28/09/2025
বঙাইগাঁৱত পূজাৰ সময়ছোৱাত গধুৰ যান-বাহন চলাচলত বিশেষ নিৰ্দেশনা
বঙাইগাঁও, ২৮ছেপ্টেম্বৰ: ২৮ছেপ্টেম্বৰৰ পৰা ২অক্টোবৰলৈ ৰাজ্যৰ অন্যান্য অঞ্চলৰ লগতে বঙাইগাঁও জিলাৰ অন্তৰ্গত বিভিন্ন অঞ্চলতো উদযাপিত হ'ব দূৰ্গাপূজা।বৃহত্তৰ বঙাইগাঁও চহৰতো বিভিন্ন পুজাথলীত ভক্তিপ্ৰাণ ৰাইজ তথা পূজা উপভোগ কৰিবলৈ লোকসকলে ওলাই আহিব নিজ নিজ ঘৰৰ পৰা।এনেকুৱা পৰিৱেশত চহৰখনত জনসাধাৰণে ভিৰ কৰিবহি।এনে পৰিস্থিতিত গধুৰ যান-বাহন বঙাইগাঁও চহৰৰ মাজত প্ৰৱেশ কৰিলে সৰ্বসাধাৰণ ৰাইজৰ অসুবিধা হ'ব পাৰে বা অবাঞ্চিত দুৰ্ঘটনা আদি হ'ব পাৰে।
বঙাইগাঁও চহৰৰ সীমান্তৱৰ্তী চাপাগুৰিৰ পৰা উত্তৰ শালমাৰা ৰাজ্যিক ঘাইপথ আৰু চিলাৰায় উৰণসেতুৰ পৰা নিউ বঙাইগাঁও হৈ ডাংতল পথ হৈছে দূৰ্গাপূজা চাবলৈ যোৱা লোকৰ বাবে প্ৰধান পথ যি দুটা পথেৰে লোকসকলে বিভিন্ন দূৰ্গাপূজা মণ্ডপলৈ ঢাপলি মেলিব। বিশেষকৈ দূৰ্গাপূজাৰ কেইদিন বিয়লি ৩-০০বজাৰ পৰা নিশা ১০-০০ বজালৈ নিজৰ ল'ৰা-ছোৱালীৰ সৈতে লোকসকলে পূজা মণ্ডপত ভিৰ কৰিব।
আনহাতে এই কথাটোও গুৰুত্বপূৰ্ণ যে বৃহত্তৰ বঙাইগাঁও অঞ্চলেৰে অত্যাৱশ্যকীয় সামগ্ৰীসমূহ বিভিন্ন এলেকালৈ কঢ়িয়াই নিবও লাগিব।
সেয়েহে জনসাধাৰণৰ সুবিধাৰ প্ৰতি লক্ষ্য ৰাখি ২৮ছেপ্টেম্বৰৰ পৰা ২অক্টোবৰ,২০২৫ তাৰিখলৈ বঙাইগাঁও চহৰ আৰু ডাংতল এলেকাৰ মাজেৰে ছয়চকীয়া বা তাতকৈ অধিক চকাযুক্ত ট্ৰাক,ডাম্পাৰ,মাটি কঢ়িওৱা ট্ৰেক্টৰ আদি গধুৰ বাহন চলাচলত বঙাইগাঁও জিলাৰ জিলা দণ্ডাধীশ নৱদ্বীপ পাঠকৰ এক নিৰ্দেশনাযোগে নিষেধ কৰা হৈছে।কেৱল অত্যাৱশ্যকীয় সামগ্ৰীসমূহ কঢ়িওৱা গধুৰ বাহন নিশা ১২-০০বজাৰ পৰা ৰাতিপুৱা ৬-০০ভিতৰত নিউ বঙাইগাঁও ৰেল ষ্টেচন হৈ -দোলাইগাঁও-কুকুৰমাৰী আৰু নতুন ২৭নং ৰাষ্ট্ৰীয় ঘাইপথ হৈ চলাচল কৰিবলৈ অনুমতি প্ৰদান কৰা হৈছে।
দূৰ্গাপূজাৰ সময়ছোৱাত যোগীঘোপা,উত্তৰ শালমাৰা আদি অভিমুখে যাবলগা অন্যান্য গধুৰ যান-বাহনসমূহ জিলা প্ৰশাসন আৰু আৰক্ষী প্ৰশাসনৰ অনুমতি সাপেক্ষে হাপাচাৰা-টুলুঙীয়া-যোগীঘোপা পথেৰে চলাচল কৰিব পাৰিব।
এই নিৰ্দেশনা ২অক্টোবৰ, ২০২৫তাৰিখে মাজ নিশালৈ বাহাল থাকিব।
