22/05/2025
'സ്റ്റില്ലം 2025': സെൽഫി പോയിൻ്റ് ഉദ്ഘാടനം ചെയ്തു
കൊല്ലം: ജില്ല രൂപീകൃതമായതിന്റെ 75ാം വാര്‍ഷികത്തോടനുബന്ധിച്ച് കൊല്ലം പ്രസ് ക്ലബ്ബും ചവറ ഐആർഇ ഇന്ത്യ ലിമിറ്റഡും സംയുക്തമായി സംഘടിപ്പിക്കുന്ന ഫോട്ടോ പ്രദർശനത്തിന് - സ്റ്റില്ലം - 2025ന് മുന്നോടിയായി സെൽഫി പോയിന്റിന്റെ ഉദ്ഘാടനം മേയർ ഹണി നിർവഹിച്ചു. കൻ്റോൺമെൻ്റ് മൈതാനത്തിന് സമീപം വി പാർക്കിൽ സ്ഥാപിച്ചിട്ടുള്ള സെൽഫി പോയിന്റിൽ മികച്ച ചിത്രം എടുക്കുന്നവർക്ക് സമ്മാനം നൽകും.
കൊല്ലത്തെ പ്രസ് ഫോട്ടോഗ്രാഫര്‍മാര്‍ പകര്‍ത്തിയ ദൃശ്യങ്ങള്‍ ഉള്‍പ്പെടുത്തിയുള്ള ഫോട്ടോപ്രദര്‍ശനം 'സ്റ്റില്ലം 2025' പബ്ലിക് ലൈബ്രറിയിലെ ക്വയിലോണ്‍ ആര്‍ട്ട് ഗാലറിയില്‍ 23 മുതല്‍ 25വരെയാണ്. ഫോട്ടോ പ്രദര്‍ശനത്തിന്റെ ഉദ്ഘാടനം 23ന് വൈകിട്ട് മൂന്നിന് ചലച്ചിത്രസംവിധായകന്‍ അടൂര്‍ ഗോപാലകൃഷ്ണന്‍ നിര്‍വഹിക്കും. മൂന്നുദിവസം നീണ്ടുനില്‍ക്കുന്ന പ്രദര്‍ശനത്തോടനുബന്ധിച്ച് കുട്ടികളുടെ ചിത്രരചനാമത്സരം, ഫോട്ടോഗ്രഫിയെക്കുറിച്ചുള്ള വിദഗ്ദ്ധരുടെ ക്ലാസുകള്‍, മൊബൈല്‍ഫോണ്‍ ഫോട്ടോഗ്രാഫി മത്സരം, ക്വിസ് മത്സരം, സെല്‍ഫി പോയിന്റ് തുടങ്ങിയവയും സംഘടിപ്പിച്ചിട്ടുണ്ട്.
23ന് രാവിലെ 11ന് ബി ജയചന്ദ്രന്‍ 'ഫോട്ടോഗ്രാഫിയിലെ പുതിയ പ്രവണതകള്‍' എന്ന വിഷയത്തില്‍ ക്ലാസ് നയിക്കും. പ്ലസ് ക്ലബ്ബ് പ്രസിഡന്റ് ബി ജയകൃഷ്ണന്‍ അധ്യക്ഷത വഹിക്കും. സെക്രട്ടറി സനല്‍ ഡി പ്രേം സ്വാഗതം പറയും. ഐആര്‍ഇഎല്‍ ഹെഡ് എന്‍ എസ് അജിത്ത്, പ്രതാപ് ആര്‍ നായര്‍ എന്നിവര്‍ പങ്കെടുക്കും. കണ്ണന്‍ നായര്‍ നന്ദി പറയും.
24ന് രാവിലെ 10.30ന് വന്യജീവി ഫോട്ടോഗ്രാഫര്‍ സാലി പാലോടിന്റെ പ്രഭാഷണം. തുടര്‍ന്ന് കുട്ടികളുടെ ചിത്രരചനാമത്സരം. എം മഹേഷ് കുമാര്‍ അധ്യക്ഷത വഹിക്കും. രാജ് കിരണ്‍ സ്വാഗതവും സന്ദീപ് നന്ദിയും പറയും. പകല്‍ രണ്ടിന് സിനിമാ സംവിധായകരായ ഷാഹി കബീര്‍, ദിലീഷ് പോത്തന്‍ എന്നിവരുമായ മുഖാമുഖം. റിങ്കുരാജ് സ്വാഗതവും പി എന്‍ സതീശന്‍ നന്ദിയും പറയും. 25ന് രാവിലെ 10ന് ചലച്ചിത്രനടനും ഫോട്ടോഗ്രാഫറുമായ അരുണ്‍ പുനലൂരിന്റെ പ്രഭാഷണം. പകല്‍ 12ന് മലയാളം വിക്കിപീഡിയ അഡ്മിന്‍ കണ്ണന്‍ ഷണ്‍മുഖത്തിന്റെ 'വിക്കിപീഡിയ സ്വതന്ത്രവിജ്ഞാനത്തിന്റെ പുതിയ ആകാശങ്ങള്‍' എന്ന വിഷയത്തില്‍ ക്ലാസ്.
25ന് വൈകിട്ട് മൂന്നിന് നടക്കുന്ന സമാപനസമ്മേളനം നോവലിസ്റ്റും തിരക്കഥാകൃത്തുമായ ജി ആര്‍ ഇന്ദുഗോപന്‍ ഉദ്ഘാടനം ചെയ്യും. സനല്‍ ഡി പ്രേം അധ്യക്ഷത വഹിക്കും. ജയന്‍ മഠത്തില്‍ സ്വാഗതം പറയും. പ്രകാശ് ആര്‍ നായര്‍, ഡി ജയകൃഷ്ണന്‍ എന്നിവര്‍ സംസാരിക്കും. സി ആര്‍ ഗിരീഷ് കുമാര്‍ നന്ദി പറയും.
