13/08/2026
ਬਾਈ ਮਿੰਟੂ ਗੁਰੂਸਰੀਆ ਦੀ ਕਲਮ ਤੋਂ ਗੁਰਜੀਤ ਤੂਤ ………..
ਗੁਰਜੀਤ ਤੂਤ ਲਗਭਗ 1995-96 'ਚ ਕਬੱਡੀ ਸਟਾਰਟ ਕਰਦਾ ਹੈ। 16 ਅਪ੍ਰੈਲ 1998 ਨੂੰ ਹਰਜੀਤ, ਤਲਵਾਰ, ਕੇਵਲ ਤੇ ਸੇਖਾ ਜਿਹੇ ਕਬੱਡੀ ਦੇ ਤਾਰੇ ਇੱਕੋ ਵੇਲੇ ਹੋਣੀ ਤੋੜ ਘੱਤਦੀ ਹੈ। ਕਬੱਡੀ ਤੇ ਪੰਜਾਬ, ਦੋਵੇਂ ਸਦਮੇ 'ਚ ਚਲੇ ਜਾਂਦੇ ਹਨ। ਬਲਵਿੰਦਰ ਫਿੱਡੂ ਵਰਗੇ ਪਹਿਲੀ ਪੀੜੀ ਦੇ ਸਿਤਾਰੇ ਰਿਟਾਇਰ ਹੋ ਚੁੱਕੇ ਸਨ।
ਅਜਿਹੇ ਵਿੱਚ ਨੌਜਵਾਨਾਂ ਇੱਕ ਪੋਸ਼ ਉੱਠਿਆ, ਜਿਸ ਨੇ ਇਸ ਸਦਮੇ ਦੇ ਸੱਲ੍ਹ ਨੂੰ ਮੱਲ੍ਹਮ ਲਾਈ ਤੇ ਕਬੱਡੀ ਦੀ ਮਿਸ਼ਾਲ ਦੇ ਮਿਸ਼ਲਚੀ ਬਣਕੇ ਕਬੱਡੀ ਨੂੰ ਅੱਗੇ ਲੈ ਤੁਰੇ। ਬਹੁਤ ਨਾਂਅ ਨੇ ਵੈਸੇ ਇਹ ਪਰ ਅੱਜ ਗੱਲ ਉਨ੍ਹਾਂ ਵਿੱਚੋਂ ਹੀ ਇੱਕ ਦੀ ਯਾਨੀ ਗੁਰਜੀਤ ਤੂਤ ਦੀ।
ਗੁਰਜੀਤ ਸਵਾ ਛੇ ਫੁੱਟਾ ਸੀ। ਜੁੱਸਾ ਜਿਵੇਂ ਕੋਈ ਚੌੜਾ ਮੀਨਾਰ ਹੋਵੇ। ਇਹ ਉਨ੍ਹਾਂ ਸਮਿਆਂ ਦੇ ਜੁੱਸੇ ਸਨ, ਜਦੋਂ ਦੇਸੀ ਖੁਰਾਕ ਤੇ ਦੇਸੀ ਕਸਰਤ ਨਾਲ਼ ਹੀ ਬਲ ਪਏ ਜਾਂਦੇ ਸੀ ਤੇ ਸ਼ੋਲਡਰ ਬਣਾਏ ਜਾਂਦੇ ਸੀ। ਅਰਜਨ ਢਿੱਲੋਂ ਇਨ੍ਹਾਂ ਸ਼ੋਲਡਰਾਂ ਨੂੰ ਹੀ ਇੱਕ ਗੀਤ ਦੀ ਪੰਕਤੀ ਵਿੱਚ ਵੀ ਬੁਣਦਾ ਹੈ।
ਇਹ ਉਹੀ ਪੀੜ੍ਹੀ ਸੀ ਜੋ ਕਬੱਡੀ ਨੇ ਸੌਵਾਂ-ਹਜ਼ਾਰਾਂ ਤੋਂ ਲੱਖਾਂ ਤੇ ਡਾਲਰਾਂ ਵਿੱਚ ਲਿਜਾ ਰਹੀ ਸੀ। ਉਨ੍ਹਾਂ ਦਿਨਾਂ ਵਿੱਚ ਕਬੱਡੀ ਨਿਰੋਲ ਪਿੰਡ ਦੇ ਸੈੱਟ ਤੋਂ ਟੁੱਟ ਕੇ ਇੱਕ ਖਿਡਾਰੀ ਬਾਹਰੋਂ ਵਾਲੀ ਵੀ ਬਣੀ। ਏਸੇ ਦੌਰ 'ਚ ਫਿਰ ਗੁਰਜੀਤ ਦਾ ਸੈੱਟ ਬਣਿਆ ਸੈਦੋਕੇ ਆਲ਼ੇ ਮੱਖਣ ਹੁਰਾਂ ਨਾਲ਼। ਮੱਖਣ ਦੇ ਨਾਲ਼ ਬਲਜੀਤ ਸੈਦੋਕੇ ਵੀ ਧਾਕੜ ਜਾਫੀ ਸੀ। ਤੀਜਾ ਇਨ੍ਹਾਂ ਨਾਲ਼ ਹੁੰਦਾ ਸੀ ਨੱਟੂ , ਜੋ ਬਾਅਦ ਵਿੱਚ ਖੁਦ ਵੀ ਵਧੀਆ ਜਾਫੀ ਹੋ ਨਿੱਬੜਿਆ। ਇਸ ਸੈੱਟ ਨੇ ਫਿਰ ਜੋ ਗਰਦ 'ਠਾਈ ਉਹ ਤਾਂ ਬੱਸ ਇਤਿਹਾਸ ਵਿੱਚ ਹੀ ਦਰਜ ਹੈ।
ਤੂਤ ਪਿੰਡ ਦਾ ਇੱਕ ਹੋਰ ਵੀ ਰੇਡਰ ਬਾਅਦ 'ਚ ਤਿਆਰ ਹੋਇਆ, ਜਿਸ ਦਾ ਨਾਂਅ ਜੀਤੀ ਸੀ ਤੇ ਉਸ ਨੂੰ ਸ਼ਾਇਦ ਜੀਤ ਵੀ ਕਹਿੰਦੇ ਸਨ। ਜਦੋਂ ਪੇਂਡੂ ਕਬੱਡੀ 'ਚ ਦੋ ਬਾਹਰੋਂ ਖਿਡਾਰੀ ਖੇਡਣੇ ਸ਼ੁਰੂ ਹੋਏ ਤਾਂ ਗੁਰਜੀਤ ਤੂਤ ਪਿੰਡ ਵੱਲੋਂ ਵੀ ਆਵਦੀ ਟੀਮ ਐਂਟਰੀ ਕਰਵਾਉਂਦਾ ਰਿਹਾ।
ਡੇਢ ਦਹਾਕੇ ਤੱਕ ਗੁਰਜੀਤ ਤੂਤ ਦੀ ਤੂਤੀ ਨਹੀਂ, ਕਬੱਡੀ 'ਚ ਨਗਾਰਾ ਹੀ ਬੋਲਦਾ ਰਿਹਾ। 2007 ਦਾ ਸਾਲ ਗੁਰਜੀਤ ਕਈ ਕਬੱਡੀ ਦੇ ਅੰਬਰ 'ਤੇ ਖੁਦ ਨੂੰ ਚੰਨ ਵਾਂਗ ਸਥਾਪਤ ਕਰਨ ਵਾਲ਼ਾ ਰਿਹਾ। ਉਹ ਕੈਨੇਡਾ ਕਬੱਡੀ ਵਰਲਡ ਕੱਪ ਦਾ ਬੈਸਟ ਰਿਹਾ।
ਗੁਰਜੀਤ ਪਿੰਡ ਦੀ ਕਬੱਡੀ 'ਚੋਂ ਉੱਠਿਆ ਇੱਕ ਆਮ ਪੇਂਡੂ ਮੁੰਡਾ ਸੀ। ਵਲ-ਛਲ ਨਹੀਂ ਸੀ ਆਉਂਦੇ। ਉਦੋਂ ਤੱਕ ਵੈਸੇ ਵੀ ਯਾਰੀਆਂ-ਵਫ਼ਾਦਾਰੀਆਂ ਅਹਿਮ ਹੁੰਦੀਆਂ ਸਨ। ਇਹੋ ਜਿਹੇ ਲੋਕਾਂ ਨੂੰ ਨਾ ਮਨੀ ਮੈਨੇਜਮੈਂਟ ਦਾ ਢੰਗ ਹੁੰਦੈ ਤੇ ਨਾ ਭਵਿੱਖ ਦੀ ਚਿੰਤਾ।
ਗੁਰਜੀਤ ਅਲਮਸਤ ਬੰਦਾ ਸੀ। ਫਿਰ ਜਦੋਂ ਢਲਾਣ ਆਈ ਤਾਂ ਉਹ ਹੇਠਾਂ ਨੂੰ ਰੁੜ੍ਹਦਾ ਗਿਆ। ਜਦੋਂ ਦੌਰ ਜਾਂਦਾ ਹੈ ਤਾਂ ਸਭ ਤੋਂ ਪਹਿਲਾਂ ਜ਼ਮਾਨਾ ਹੀ ਰੰਗ ਵਟਾ ਜਾਂਦਾ ਹੈ। ਬਾਕੀ ਸਾਰਾ ਕੁਝ ਤੁਸੀਂ ਗੁਰਜੀਤ ਦੇ ਜ਼ੁਬਾਨੀ ਪੌਡਕਾਸਟਾਂ ਵਿੱਚ ਸੁਣ ਚੁੱਕੇ ਹੋ। ਇਹ ਨਸ਼ੇ ਦੇ ਰਾਹ ਐਸਾ ਤੁਰਿਆ ਕਿ ਚਾਹ ਕੇ ਵੀ ਫਿਰ ਪਿੱਛੇ ਨਾ ਮੁੜ ਸਕਿਆ।
ਹੁਣ ਕੁਝ ਲੋਕ ਉਸ ਦੀ ਆਖਰੀ ਤਸਵੀਰ , ਮਾੜੇ ਵੇਲੇ ਦੀਆਂ ਫੋਟੋਆਂ ਸ਼ੇਅਰ ਕਰਕੇ ਸਮਾਨ ਬਟੋਰ ਰਹੇ ਨੇ ਪਰ ਅਸੀਂ ਉਸ ਨੂੰ ਇੱਕ ਦੇਸੀ ਕਬੱਡੀ ਸਟਾਰ ਵੱਜੋਂ ਹੀ ਅੱਜ ਯਾਦ ਕਰਾਂਗੇ।
ਗੁਰਜੀਤ ਕਬੱਡੀ ਦੀ ਫ਼ਿਜ਼ਾ 'ਚ ਸਦਾ ਮਹਿਕਦਾ ਰਹੂ। ਉਸ ਦਾ ਨਾਂਅ ਮਿੱਟੀ ਵਾਲ਼ੀ ਕਬੱਡੀ ਵਿੱਚ ਅਮਿੱਟ ਰਹੇਗਾ। ਉਸ ਦਾ ਪੁਆਇੰਟ ਲੈ ਕੇ ਅਸਮਾਨ ਨੂੰ ਉਂਗਲ ਕਰਨੀ, ਇਹ ਉਹਦੀ ਰਜ਼ਾਂ ਦੀ ਮਹਿਮਾ ਵੀ ਸੀ ਤੇ ਨਾਲ਼ ਉਸ ਉੱਤੇ ਡੋਰਾਂ ਵੀ ਕਿ ਜਿੰਨ੍ਹਾਂ ਮਾੜੀਆਂ ਕੀਤੀਆਂ, ਅਹਿਸਾਨ ਫਰਾਮੋਸ਼ ਨਿਕਲੇ, ਉਨ੍ਹਾਂ ਨੂੰ ਵੀ ਤੂੰ ਹੀ ਜਾਣੇ।
ਕਬੱਡੀ ਦੇ ਵੱਡੇ ਖਿਡਾਰੀ/ਸਪਾਂਸਰ/ਸਰਕਾਰ ਏਨਾ ਜ਼ਰੂਰ ਕਰਨ ਕਿ ਹੁਣ ਇਸ ਮਹਾਨ ਖਿਡਾਰੀ ਦੇ ਪਰਵਾਰ ਨੂੰ ਸਾਂਭਣ। ਹੋ ਸਕੇ ਤਾਂ ਇੱਕ ਮਿਊਜ਼ੀਅਮ ਬਣਨਾ ਚਾਹੀਦਾ ਹੈ ਜੀਹਦੇ ਵਿੱਚ ਅਸੀਂ ਅੱਸੀ ਸਾਲ ਦੀ ਕਬੱਡੀ ਸਿਤਾਰਿਆਂ ਦੀਆਂ ਯਾਦਾਂ ਤੇ ਪ੍ਰਾਪਤੀਆਂ ਨੂੰ ਚਿਣ ਸਕੀਏ। ਅੰਤ 'ਚ ਗੁਰਜੀਤ ਸਿੰਹਾਂ ਤੇਰੇ ਲਈ ;
ਰਹਿਨੇ ਕੋ ਸਦਾ ਦਹਿਰ ਮੇਂ ਆਤਾ ਨਹੀਂ ਕੋਈ
ਤੁਮ ਜੈਸੇ ਗਏ ਐਸੇ ਭੀ ਜਾਤਾ ਨਹੀਂ ਕੋਈ।
ਦਹਿਰ= (ਸੰਸਾਰ)
- ਮਿੰਟੂ ਗੁਰੂਸਰੀਆ
