25/01/2026
မင်နီယာပိုလစ်မြို့ ဆူပူအုံကြွမှုအတွင်း လုံခြုံရေးအရာရှိတစ်ဦး၏ လက်ချောင်း ကိုက်ဖြတ်ခံရ
မင်နီယာပိုလစ်မြို့တွင် စနေနေ့က ဖြစ်ပွားခဲ့သော ဆူပူအုံကြွမှုအတွင်း ဆန္ဒပြသူတစ်ဦးက ပြည်တွင်းလုံခြုံရေးစုံစမ်းစစ်ဆေးရေး (HSI) အရာရှိတစ်ဦး၏ လက်ချောင်းကို ကိုက်ဖြတ်လိုက်ကြောင်း ပြည်တွင်းလုံခြုံရေးဌာန လက်ထောက်အတွင်းရေးမှူး Tricia McLaughlin က ပြောကြားခဲ့သည်။
"မင်နီယာပိုလစ်မှာ ဒီဆူပူသူတွေက ကျွန်မတို့ရဲ့ တရားဥပဒေစိုးမိုးရေးအရာရှိကို တိုက်ခိုက်ခဲ့ကြပြီး သူတို့ထဲက တစ်ယောက်က ကျွန်မတို့ HSI အရာရှိရဲ့ လက်ချောင်းကို ကိုက်ဖြတ်လိုက်ပါတယ်။ သူ သူ့လက်ချောင်း ဆုံးရှုံးရတော့မှာပါ" ဟု သူမက X (ယခင် Twitter) လူမှုကွန်ရက်တွင် ရေးသားခဲ့သည်။
ဖက်ဒရယ်အေးဂျင့်များက လက်နက်ကိုင်ဆောင်ထားသည့် ဆန္ဒပြသူတစ်ဦးကို ပစ်ခတ်ခဲ့ပြီးနောက် ဖြစ်ပွားလာသော မငြိမ်မသက်မှုများအတွင်း McLaughlin က ယခုကဲ့သို့ ရေးသားခဲ့ခြင်းဖြစ်သည်။
မိသားစုဝင်များ၏ ပြောကြားချက်အရ အသက် ၃၇ နှစ်အရွယ်ရှိ Jeffrey Pretti သည် စစ်ပြန်များဆိုင်ရာဌာန (Veterans Administration) တွင် အထူးကြပ်မတ်ကုသဆောင် သူနာပြုတစ်ဦးဖြစ်ပြီး လူသားချင်းစာနာစိတ် ရှိသူဖြစ်ကြောင်း၊ သူ၏မြို့တွင် သမ္မတ ဒေါ်နယ်ထရန့်၏ လူဝင်မှုကြီးကြပ်ရေး အရှိန်အဟုန်မြှင့် နှိမ်နင်းမှုများအပေါ် စိတ်မကောင်းဖြစ်နေခဲ့ကြောင်း သိရသည်။
၎င်းသည် ယခုလအစောပိုင်းက အမေရိကန် လူဝင်မှုကြီးကြပ်ရေးနှင့် အကောက်ခွန်ဥပဒေစိုးမိုးရေးအရာရှိတစ်ဦး၏ လက်ချက်ဖြင့် Renee Good သေဆုံးခဲ့ပြီးနောက် ဖြစ်ပွားခဲ့သော ဆန္ဒပြပွဲများတွင်လည်း ပါဝင်ခဲ့သူဖြစ်သည်။
"လွန်ခဲ့တဲ့ နှစ်ပတ်လောက်က သူ့ကို ကျွန်တော်တို့ ပြောခဲ့ပါသေးတယ်။ ဆန္ဒပြတာကိုတော့ သွားပါ၊ ဒါပေမဲ့ ထိပ်တိုက်ရင်ဆိုင်တာမျိုး မလုပ်ဖို့နဲ့ အဓိကကတော့ မိုက်မဲတဲ့အလုပ်တွေ မလုပ်ဖို့ပါပဲ။ သူလည်း အဲဒါကို သိပါတယ်လို့ ပြန်ပြောခဲ့တယ်" ဟု Jeffrey Pretti ၏ ဖခင်ဖြစ်သူ Michael Pretti က Associated Press သတင်းဌာနသို့ ပြောကြားခဲ့သည်။
ပြည်တွင်းလုံခြုံရေးဌာန၏ ထုတ်ပြန်ချက်အရ အဆိုပါအမျိုးသားသည် ၉ မီလီမီတာ ဆီမီးအော်တိုမက်တစ် လက်နက်ကို ကိုင်ဆောင်ကာ အမေရိကန် နယ်ခြားစောင့်ရဲများထံ ချဉ်းကပ်လာသောကြောင့် ပစ်ခတ်ခံခဲ့ရခြင်း ဖြစ်သည်။ Pretti သည် သေနတ်ကို ထုတ်ပြပြီး ခြိမ်းခြောက်ခဲ့ခြင်း ရှိ၊ မရှိကို တာဝန်ရှိသူများက အသေးစိတ် ပြောကြားခြင်းမရှိသလို၊ Associated Press က ရရှိထားသည့် အနီးနားရှိသူများ ရိုက်ကူးထားသော ဗီဒီယိုမှတ်တမ်းတွင်လည်း သေနတ်ကို မတွေ့ရပေ။
Pretti တွင် လက်နက်ကိုင်ဆောင်ခွင့်လိုင်စင်ရှိပြီး သေနတ်တစ်လက် ပိုင်ဆိုင်ကြောင်း မိသားစုဝင်များက အတည်ပြုခဲ့သော်လည်း၊ ၎င်းသည် ထိုသေနတ်ကို အပြင်သို့ ယူဆောင်သွားလေ့ရှိသည်ကို တစ်ခါမျှ မသိရှိခဲ့ဖူးကြောင်း ပြောကြားခဲ့သည်။
