07/08/2026
Kalaymyo-ah sipai ṭang tura man hluar zel
Tahan Post
6th August, 2026
Sagaing Region, Kalaymyo-ah thuneihna la sipaite chuan sipaia ṭang turin ṭhalaite man an la chhunzawm zel a, a hma aiin mi man an hluar sawt thu hriat a ni.
July 31 khan, Myanmar sipai sorkar President Min Aung Hlaing-a'n Union Parliament-a thu a sawinaah sipai ṭan luih dan kalpui zel a ni ang tih a sawi hnuah, Kalaymyo veng ṭhenkhatah an man nasat thu hriat a ni.
Kalaymyo-a Bike ke 3 nei khalh pakhat chuan, "Tun hma aiin an man nasa hle. Bike ke 3 nei khalhtu pawh an hlah lo, kan tlan chhuah lo chuan sum hmuhna a harsa sia, kan chhuah lahin min man kan hlau sia," tiin a sawi.
Kalaymyo-ah Myanmar sipaiten khaw chhunga ṭhalai leh puitlingte sipaia ṭang turin kawngpuiah leh veng chhungah an man chhunzawm zel thu hriat a ni.
A bik takin Bogyoke kawngpui dung, Mingyi Hotel kawt, Pinlon traffic point, Sanpya kawngpeng, rel station pengthuam, Pinlon Lanmadaw bus terminal, Taung Tha veng, Myo Hla kawngpui, Taung Tha kawng pengte, Sanmyo Monastery kawt, Shwe Kyaungdaw Monastery bul leh Tahan kawtthler thenkhatan an duty-a an man thut thin thu, Kalaymyo Strike Steering Committee hnen aṭanga hriat a ni.
Kalaymyo-a nu pakhat chuan, "Veng chhung kawng thenkhatah pawh, ni khatah tum 2,3 te an an man thin a. Chhungkaw list-te an check a, in khatah sipai tang tur rual thalai an awm chuan an chhinchhiah a, eng tik nge an rawn man ang tiin kan lungngai thei hle a ni," tiin a sawi.
Myanmar sipaiten khaw chhunga ṭhalai leh pavalaite sipaia ṭang turin kawngpuiahleh veng chhungah luh chhuahin an man thin bakah, an vak kuala sipai tang tur bituk thlengin an man thin thu, hriat a ni.
Chuvangin, tualchhung nu leh pa bakah ṭhalaite pawn chhuah huna fimkhur lehzual turin leh ṭul bik loah chuan pawn chhuak lo turin, Kalaymyo Strike Steering Committee chuan a hriattir a ni.
