28/06/2023
◆ ଆମ ମଣିପୁର ଏବଂ ଆମେ :-
●●●●●●●●●●●●●●●●●●●●●●●●●●●●●●●
ଯେଉଁମାନେ ଇତିହାସରୁ ଶିଖନ୍ତି ନାହିଁ ସେମାନଙ୍କୁ ଇତିହାସ ଶିକ୍ଷା ଦିଏ। ଆମ ଇତିହାସ ଆମକୁ ଶିକ୍ଷା ଦିଏ ଯେ, ଯେତେବେଳେ ତୁମେ ତୁମ ଜନସଂଖ୍ୟାର ଏକ ଛୋଟ ଅଂଶକୁ ଉସକେଇ ‘ଭାଗ କର ଓ ଭୋଗ କର’ ନୀତିରେ ଉତ୍ତେଜିତ କରିଥାଅ, ସେତେବେଳେ ଦେଶ ବିଭାଜିତ ହୋଇଯାଇଥାଏ। ଜର୍ମାନୀର ଇତିହାସରୁ ଶିଖିବାକୁ ମିଳେ ଯେ, ଯେତେବେଳେ ତୁମେ ତୁମର ସଂଖ୍ୟା ଗରିଷ୍ଠ ଜନତାଙ୍କୁ ଉସକାଇଥାଅ, ସେତେବେଳେ ବିଶ୍ୱଯୁଦ୍ଧର ନିଆଁ ଜଳି ଉଠେ। ସିରିଆ, ସୋମାଲିଆ, ପାକିସ୍ଥାନ ଏବଂ ଆଫଗାନିସ୍ତାନର ଇତିହାସ ଦର୍ଶାଏ ଯେ, ଯେତେବେଳେ ଆପଣ ସମଗ୍ର ଜନସଂଖ୍ୟାକୁ ଉସକାଇ ପାଗଳ ପ୍ରାୟ କରିଦିଅନ୍ତି, ସେତେବେଳେ କେବେବି ଥମିବାର ନାଁ ନେଉନଥିବା ଗୃହଯୁଦ୍ଧ ଆରମ୍ଭ ହୋଇଯାଏ। ଦେଶ ଏକ ହିଂସ୍ର ଭିଡରେ ପରିଣତ ହୋଇ ଜଣେ ଅନ୍ୟଜଣକୁ ଲୁଟିବାକୁ ପ୍ରୟାସ କରିଥାଏ। ସେଥିପାଇଁ ଏକ ଗୁରୁତ୍ୱପୂର୍ଣ୍ଣ ପ୍ରଶ୍ନ ମନରେ ଉଙ୍କିମାରେ ଯେ, ସରକାର ନାମକ ସଂସ୍ଥାର ସର୍ବନିମ୍ନ ଦାୟିତ୍ୱ କ’ଣ ? ଆମର-ଆପଣଙ୍କର ଏବଂ ପ୍ରତ୍ୟେକ ନାଗରିକଙ୍କର ଉତ୍ତର ସମାନ ହେବ ଯେ, ଅନ୍ତତଃ ପକ୍ଷେ ସରକାର ଦେଶ ଭିତରେ ଆଇନ ଶୃଙ୍ଖଳା ବଜାୟ ରଖିବ ଏବଂ ଦେଶକୁ ବାହ୍ୟ ଆକ୍ରମଣରୁ ସୁରକ୍ଷିତ ରଖିବ। ଏକ ଗଣତାନ୍ତ୍ରିକ ରାଷ୍ଟ୍ରରେ ଯେଉଁ ଦଳ ଏତିକି କାର୍ଯ୍ୟ ସଠିକ ଭାବେ ନିର୍ବାହ କରନ୍ତି ନାହିଁ, ସେ ସରକାର ଗଠନ ପାଇଁ ମଧ୍ୟ ଫିଟ୍ ନୁହନ୍ତି ଓ କ୍ଷମତାରେ ରହିବାକୁ ମଧ୍ୟ ଅଯୋଗ୍ୟ ଅଟନ୍ତି।
ସାମ୍ପ୍ରତିକ ପରିସ୍ଥିତିରେ ଯେତେବେଳେ ଆମେ ଭାରତର ଅନ୍ୟତମ ଅବିଚ୍ଛେଦ୍ୟ ଅଙ୍ଗ ମଣିପୁରକୁ ଦେଖୁଛୁ, ଲାଗୁଛି ଯେ ସରକାରମାନେ ସେମାନଙ୍କର ଅସ୍ତିତ୍ୱ ଓ ବୈଧତା ହରାଇ ସାରିଛନ୍ତି। ଧର୍ମ,ଜାତି ଓ ସମ୍ପ୍ରଦାୟ ଆଧାରରେ ମଣିପୁରର ଲୋକଙ୍କୁ ଭାଗଭାଗ କରି ଉଭୟ କେନ୍ଦ୍ର ଓ ରାଜ୍ୟ ସରକାର ଆଜି ସେଠାରେ ଯେଉଁ ନିଆଁ ଲଗାଇ ଦେଇଛନ୍ତି, ସେଥିରେ ମଣିପୁରର ଉଭୟ ଇତିହାସ ଏବଂ ବର୍ତ୍ତମାନ ସେହି ନିଆଁରେ ଜଳି ଛାରଖାର ହୋଇଯାଇଛି ତଥା ଆଉ କେତେଜଣ ଦିଲ୍ଲୀ ଏବଂ ଇମ୍ଫାଲରେ ଆନନ୍ଦରେ ବଂଶୀ ବଜାଉଛନ୍ତି। ଗତ କିଛି ମାସ ଧରି ମଣିପୁରରେ ଯେଉଁ ନିଆଁ ଲାଗିଛି, ସେଥିରେ ସେଠାକାର ଉଭୟ ମୈତେଇ ଏବଂ କୁକି ଜନଜାତି ପରସ୍ପର ପରସ୍ପରର ଘର ଓ ବସ୍ତିକୁ ଜଳାଇବା ସହ ପରସ୍ପରକୁ ହତ୍ୟା କରୁଛନ୍ତି, ରାସ୍ତାରେ ବିନାଶର ଭୟଙ୍କର ଦୃଶ୍ୟ ସୃଷ୍ଟି ହେଉଛି। ଏହା କେବଳ ଆଉ କେବଳ ସରକାରମାନଙ୍କର ପ୍ରଚ୍ଛନ୍ନ ସମର୍ଥନରେ ଆୟୋଜିତ ହେଉଥିବା ସାମ୍ପ୍ରଦାୟିକ ଦଙ୍ଗା ଓ ନରସଂହାର ଅଟେ। ଏହି ମହଦଙ୍ଗାକୁ ପ୍ରଶମିତ କରିଵା ପାଇଁ ପୋଲିସ ବା ସେନା କେହି ବି ସେଠାରେ ପ୍ରଭାବଶାଳୀ ଭୂମିକା ଗ୍ରହଣ କରୁନାହାଁନ୍ତି। ଉଭୟ କେନ୍ଦ୍ର ଓ ମଣିପୁର ସରକାରଙ୍କୁ ସାମ୍ପ୍ରଦାୟିକ ବିଷ ମଞ୍ଜି ବୁଣିବା, ନାଗରିକଙ୍କ ମଧ୍ୟରେ ଘୃଣା ଓ ହିଂସାର ପ୍ରଚାର ପ୍ରସାର ତଥା ନିର୍ବାଚନ ପାଇଁ ପ୍ରସ୍ତୁତି କରିବାରେ ଏତେ ସମୟ ଯାଉଛି ଯେ, ଏହି ସରକାରମାନଙ୍କ ପାଖରେ ମଣିପୁର ପାଇଁ ସମୟ ହିଁ ନାହିଁ । ସିଏ କିପରି ଗୃହମନ୍ତ୍ରୀ ଯିଏ ଦେଶର ଜନତାଙ୍କ ଘରକୁ ବଞ୍ଚାଇ ପାରୁନାହାନ୍ତି ?
କ'ଣ ଆମେ ଆମ ରାଷ୍ଟ୍ରର ଏପରି ବିନାଶଲୀଳା ଦେଖି ଚୁପ୍ ରହିପାରିବା ? କ’ଣ ସରକାର ଯାହା କହିବେ, ତାହା ହିଁ ଆମେ ଶୁଣିବୁ ? ସରକାର ଯାହା ଦେଖାଇବେ ତାହା ହିଁ ଆମେ ଦେଖିବୁ ଓ ସରକାର ଯାହା ପ୍ରଚାର କରିବେ, ଆମେ ତାହାକୁ ସତ୍ୟ ଭାବରେ ଗ୍ରହଣ କରିନେବୁ ? ଯଦି ଏପରି ହେବ, ତେବେ ଜନସାଧାରଣଙ୍କର ଆଉ କଣ ଆବଶ୍ୟକତା ରହିଛି, ନାଗରିକ ଭାବେ ଆମର ଭୂମିକା କ’ଣ ଏବଂ ସବୁଠୁ ଗୁରୁତ୍ୱପୂର୍ଣ୍ଣ ହେଉଛି ଗଣତନ୍ତ୍ରର ଅର୍ଥ କ’ଣ ? ଗଣତନ୍ତ୍ରର ଅର୍ଥ : ଲୋକଙ୍କ ହାତମୁଠାରେ ତନ୍ତ୍ର ! ଗଣତନ୍ତ୍ରରେ 'ଗଣ' ହିଁ ବଡ଼ ହୋଇଥାନ୍ତି 'ତନ୍ତ୍ର’ ନୁହେଁ । ହେଲେ ଏଠାରେ ତନ୍ତ୍ର ନାଗରିକର ମୁଣ୍ଡ ଉପରେ ସବାର ହୋଇ ନିଜର ସ୍ଵାର୍ଥସିଦ୍ଧି ନିମନ୍ତେ ଜନତାଙ୍କ ମୁଣ୍ଡ କାଟିବାରେ ବ୍ୟସ୍ତ । ଆମେ ଭାରତର ଯୁବଶକ୍ତି ଏବଂ ନାଗରିକମାନେ ମଣିପୁରର ଆମ ଭାଇ ଓ ଭଉଣୀମାନଙ୍କୁ କହିବାକୁ ଚାହୁଁ ଯେ, ପରସ୍ପର ପରସ୍ପରର ଜୀବନ ନେବା ତଥା ଘର, ଦୋକାନ ଓ କାର୍ଯ୍ୟାଳୟରେ ନିଆଁ ଲଗାଇବା, ମନ୍ଦିର ଓ ଚର୍ଚ୍ଚଗୁଡ଼ିକୁ ନଷ୍ଟ କରିଦେବା ଦ୍ଵାରା କିଛି ବି ହାସଲ ହୁଏ ନାହିଁ। ଆମକୁ ପରସ୍ପରକୁ ନୁହେଁ ବରଂ ଆମ ଭିତରେ ସାମ୍ପ୍ରଦାୟିକ ବିଦ୍ୱେଷର ଗୋଟି ଚଳାଇଥିବା ଶାସକମାନଙ୍କୁ ପରାସ୍ତ କରିବାକୁ ପଡିବ। ନ୍ୟାୟ ତଥା ଅଧିକାର ହାସଲ ପାଇଁ ଲଢ଼ିବାରେ ଶାନ୍ତିପୂର୍ଣ୍ଣ ଉପାୟ ରହିଛି, ଯାହା କେବଳ ନ୍ୟାୟ ଆଣିବ ନାହିଁ ବରଂ ଅନ୍ୟାୟକୁ ମଧ୍ୟ ରାସ୍ତାରୁ ହଟାଇବ। ଆମେ ମଣିପୁରର ମୈତେଇ ତଥା କୁକି ଭାଇମାନଙ୍କୁ ପଚାରିବାକୁ ଚାହୁଁଛୁ, ଯଦି ମଣିପୁର ବଞ୍ଚିବ ନାହିଁ, ତେବେ ଆମେ ବଞ୍ଚିବା କେମିତି ? ଅସଲ ପ୍ରଶ୍ନ ଏକ ପ୍ରଗତିଶୀଳ ମଣିପୁର ରାଜ୍ୟର ଅସ୍ତିତ୍ୱର।
ସରକାର ଓ ଜନସାଧାରଣଙ୍କ ହୃଦୟରେ ମାନବିକତାର ଅଗ୍ନିଶିଖାକୁ ଜାଗ୍ରତ କରିବା ଲକ୍ଷରେ ଇଶ୍ଵରଙ୍କ ନିକଟରେ ପ୍ରାର୍ଥନା କରିବା ପାଇଁ ସମଗ୍ର ଦେଶରେ ଆଗାମୀ ଜୁଲାଇ ୧ ତାରିଖ (ଶନିବାର) ଦିନ ଶାନ୍ତି ଓ ସଦଭାବନା ଦିବସର ଆୟୋଜନ କରାଯିବ ତଥା ଓଡ଼ିଶାରେ ବିଭିନ୍ନ ଜିଲ୍ଲାରେ ଓ ଭୁବନେଶ୍ୱର ସ୍ଥିତ ମାଷ୍ଟର କ୍ୟାଣ୍ଟିନ ଛକ ଠାରେ ମଧ୍ୟ; ଯେଉଁଥିରେ ସର୍ଵଧର୍ମ ପ୍ରାର୍ଥନା, ବିବେକକୁ ଉଜାଗର କରିବା ନିମନ୍ତେ ଉଭୟ ସରକାରଙ୍କୁ ମାନ୍ୟବର ରାଷ୍ଟ୍ରପତିଙ୍କ ମାଧ୍ୟମରେ ନିବେଦନ, ମଣିପୁରର ଭାଇ-ଭଉଣୀଙ୍କ ସମସ୍ୟାକୁ ଦେଶବାସୀଙ୍କୁ ଅବଗତ କରାଇବା ଭଳି କାର୍ଯ୍ୟକ୍ରମମାନ ଆୟୋଜିତ ହେବ। ଗାନ୍ଧୀ ଏବଂ ସର୍ବୋଦୟ କର୍ମକର୍ତ୍ତାଙ୍କ ନେତୃତ୍ୱରେ ଦେଶର ବିଭିନ୍ନ ଧର୍ମ, ଜାତି ଏବଂ ଅଞ୍ଚଳର ପ୍ରତିନିଧିଙ୍କ ଏକ ଦଳ ଖୁବ୍ ଶୀଘ୍ର ମଣିପୁର ଯିବେ। ଶାନ୍ତି ଓ ସଦଭାବନାର ଏହି ପଦକ୍ଷେପକୁ ସମର୍ଥନ ଓ ସହଯୋଗ କରିବାକୁ ଆମେ ଉଭୟ କେନ୍ଦ୍ର ଓ ମଣିପୁର ସରକାରଙ୍କୁ ନିବେଦନ କରୁଅଛୁ। ଯେଉଁଠାରେ ସରକାର ପହଞ୍ଚିପାରନ୍ତି ନାହିଁ, ସେନା ଯେଉଁଠାରେ ପହଞ୍ଚିବା ସମ୍ଭବ ନୁହେଁ, ସେଠାରେ ଅହିଂସକ ଶାନ୍ତି ସୈନିକ ପହଞ୍ଚିଥାଏ ଏବଂ ପ୍ରଭାବଶାଳୀ ହୋଇଥାଏ ମଧ୍ୟ। ମଣିପୁରର ଜନତା, ମଣିପୁର ସରକାର ଏବଂ କେନ୍ଦ୍ର ସରକାରଙ୍କୁ ଏହି ପଦକ୍ଷେପ ନିମନ୍ତେ ଏକ ସୁଯୋଗ ପ୍ରଦାନ କରିବାକୁ ଆମେ ଅନୁରୋଧ କରୁଅଛୁ । ଏହି ରାସ୍ତା ମହାତ୍ମା ଗାନ୍ଧୀଙ୍କ ଦ୍ଵାରା ତିଆରି ହୋଇଛି, ଯାହାକୁ ସମସ୍ତେ ସମ୍ମାନ ଦେବା ଆବଶ୍ୟକ। ଆମେ କହିବାକୁ ଚାହୁଁ, ଯେଉଁମାନେ ଇତିହାସରୁ କିଛି ଶିଖନ୍ତି ନାହିଁ, ସେମାନଙ୍କୁ ଇତିହାସ ଶିକ୍ଷା ଦିଏ। ଶାନ୍ତିର ଏହି ନାଗରିକ ପଦକ୍ଷେପକୁ ସମର୍ଥନ ଏବଂ ସହଯୋଗ କରିବାକୁ ଆମେ ସରକାରମାନଙ୍କୁ ନିବେଦନ କରୁଛୁ। ଶାନ୍ତି ଆମ ସମସ୍ତଙ୍କର ଆବଶ୍ୟକତା ଏବଂ ତାହା ହିଁ ଆମର ବଳ ଅଟେ। ଏହି ଅଭିଯାନକୁ ଆପଣଙ୍କ ଅଞ୍ଚଳରେ ଆୟୋଜନ କରି ମଣିପୁର ଜନତାଙ୍କ ସହ ଏହି କଠିନ ପରିସ୍ଥିତିରେ ଠିଆ ହେବା ପାଇଁ ଵିଶେଷ ଅନୁରୋଧ।
