Fresh News Dapoli 24

22/08/2026

दापोलीत ८०८ अन्न विक्रेत्यांना FoSTaC प्रशिक्षण

दापोली, २२ ऑगस्ट २०२६ : दापोली शहरातील स्ट्रीट फूड विक्रेते तसेच छोट्या हॉटेल व्यावसायिकांसाठी FoSTaC (Food Safety Training and Certification) प्रशिक्षण कार्यक्रमाचे आज यशस्वी उद्घाटन करण्यात आले. अन्न सुरक्षा, स्वच्छता आणि सुरक्षित अन्न हाताळणीबाबत विक्रेत्यांमध्ये जनजागृती निर्माण करणे हा या प्रशिक्षणाचा प्रमुख उद्देश होता.

या कार्यक्रमास महाराष्ट्र राज्याचे FDA मंत्री मा. ना. श्री. योगेश कदम प्रमुख पाहुणे म्हणून उपस्थित होते. यावेळी त्यांनी अन्न विक्रेत्यांना मार्गदर्शन करताना अन्न व्यवसायामध्ये स्वच्छता, अन्न सुरक्षा मानके आणि सुरक्षित अन्न हाताळणीचे महत्त्व अधोरेखित केले. तसेच प्रशिक्षणातून मिळणाऱ्या ज्ञानाचा आपल्या व्यवसायात प्रभावीपणे वापर करण्याचे आवाहन त्यांनी विक्रेत्यांना केले.

कार्यक्रमास डॉ. सचिन जाधव, सहआयुक्त, FDA महाराष्ट्र; श्री. शशिकांत यादव, सहाय्यक आयुक्त, FDA; श्री. उन्मेष राजे, पंचायत समिती, दापोली; श्री. संजय भंडारी, Nestlé India; श्री. गुरुनाथ सावंत, NASVI Food Safety Trainer; श्री. संकेत कोनेरी तसेच श्रीमती भाग्यश्री परदेशी, Food Safety Officer यांची उपस्थिती होती.

प्रशिक्षण सत्रामध्ये FoSTaC प्रशिक्षक श्री. गुरुनाथ सावंत यांनी अन्न विक्रेत्यांना अन्न स्वच्छता, सुरक्षित अन्न हाताळणी, वैयक्तिक स्वच्छता, व्यवसायाच्या परिसराची स्वच्छता तसेच अन्न सुरक्षा मानकांबाबत सविस्तर मार्गदर्शन केले.

या प्रशिक्षणामध्ये दापोली शहरातील एकूण ८०८ अन्न विक्रेते व खाद्य व्यवसायिक सहभागी झाले. सहभागी व्यावसायिकांना सुरक्षित आणि स्वच्छ पद्धतीने अन्न व्यवसाय करण्यासाठी आवश्यक माहिती व मार्गदर्शन मिळाले.

नोंदणीसाठी नियोजन समितीचे विशेष सहकार्य

या प्रशिक्षणाच्या नियोजनासाठी सचिन तोडणकर, मंगेश मोरे, दिनेश नाईक आणि बाळासाहेब नकाते यांनी विशेष मेहनत घेतली. दापोली शहरातील जास्तीत जास्त अन्न व्यवसायिकांना या प्रशिक्षणाचा लाभ मिळावा, यासाठी त्यांनी व्यावसायिकांची नोंदणी करून घेण्यापासून ते प्रशिक्षणासाठी आवश्यक नियोजनापर्यंत महत्त्वपूर्ण सहकार्य केले.

व्यवसायिकांना प्रशिक्षणाचा लाभ मिळावा यासाठी आधीच नोंदणी प्रक्रिया पूर्ण करून घेण्यात आली, त्यामुळे मोठ्या संख्येने व्यावसायिकांना या उपक्रमात सहभागी होता आले.

Nestlé India कडून मोफत किचन किट

या प्रशिक्षणामध्ये सहभागी अन्न व्यवसायिकांना Nestlé India कंपनीच्या वतीने मोफत किचन किट देण्यात आले. या किटमध्ये अन्न व्यवसायात स्वच्छता आणि सुरक्षितता राखण्यासाठी उपयुक्त साहित्य, त्यामध्ये किचन कॅप आदी वस्तूंचा समावेश होता.

दापोली शहरातील स्ट्रीट फूड विक्रेते आणि छोट्या खाद्य व्यवसायांमध्ये सुरक्षित, स्वच्छ आणि दर्जेदार अन्न पद्धतींना प्रोत्साहन देण्यासाठी हे प्रशिक्षण महत्त्वपूर्ण पाऊल ठरले आहे. या उपक्रमामुळे अन्न व्यवसायिकांमध्ये अन्न सुरक्षेबाबत अधिक जागरूकता निर्माण होऊन नागरिकांना सुरक्षित व आरोग्यदायी अन्न उपलब्ध होण्यास मदत होणार आहे.

#दापोली #अन्नसुरक्षा #अन्नविक्रेते #अन्नव्यवसायिक #दापोलीबातम्या #रत्नागिरी #कोकण #स्वच्छताअभियान #सुरक्षितअन्न #लोकलन्यूज

21/08/2026

https://youtube.com/shorts/58FJk2NO58M?si=Tw7smKBxoqhLds-i

Enjoy the videos and music that you love, upload original content and share it all with friends, family and the world on YouTube.

20/08/2026

*फ्रेश न्युज दापोली 24*

*दापोली ब्रेकिंग*

*ई-बस चालकाचा दापोली आगारातच आत्महत्येचा प्रयत्न*
*ड्युटी न मिळाल्याने नैराश्यातून टोकाचे पाऊल; दोन युनियन व स्थानिक राजकारणाचीही चर्चा*

दिनांक २०/०८/२६
*दापोली* - गणेशोत्सव काही दिवसांवर येऊन ठेपलेला असतानाच दापोली आगारात धक्कादायक घटना घडली आहे. ई-बस कंपनीच्या एका चालकाने आगाराच्या आवारातच फिनेल प्राशन करून आत्महत्येचा प्रयत्न केल्याची घटना समोर आली आहे. या घटनेमुळे आगार परिसरात खळबळ उडाली आहे.

मिळालेल्या प्राथमिक माहितीनुसार, संबंधित ई-बस चालकाला मागील काही दिवसांपासून नियमितपणे ड्युटी मिळत नसल्याचे सांगितले जात आहे. गणेशोत्सवाच्या पार्श्वभूमीवर मोठ्या प्रमाणात प्रवासी वाहतूक होणार असताना ड्युटी मिळत नसल्याने संबंधित चालक नैराश्यात होता. याच नैराश्यातून त्याने आगारात फिनेल प्राशन करून आत्महत्येचा प्रयत्न केल्याची माहिती आहे.

घटनेनंतर चालकाची प्रकृती बिघडल्याने त्याला तातडीने उपजिल्हा रुग्णालय, दापोली येथे दाखल करण्यात आले असून त्याच्यावर उपचार सुरू आहेत.

दरम्यान, मागील काही दिवसांपासून दापोली आगारातील ई-बस चालक आणि व्यवस्थापन यांच्यातील विविध कारणांवरून चर्चा व वाद सुरू असल्याचे बोलले जात आहे. तसेच दोन वेगवेगळ्या युनियन्समधील अंतर्गत मतभेद आणि स्थानिक राजकारणाच्या हस्तक्षेपामुळे चालकांना ड्युटी देण्याच्या मुद्द्यावर तणाव निर्माण झाल्याचीही चर्चा आगार परिसरात सुरू आहे.

मात्र, आत्महत्येच्या प्रयत्नामागील नेमके कारण अद्याप अधिकृतपणे स्पष्ट झालेले नाही. संबंधित चालकाची ड्युटी, व्यवस्थापनाशी झालेला वाद, युनियनमधील मतभेद तसेच इतर बाबींची चौकशी झाल्यानंतरच या घटनेमागील वस्तुस्थिती स्पष्ट होणार आहे.

या घटनेची माहिती मिळताच पोलिसांनीही दखल घेतली असून, आत्महत्येच्या प्रयत्नामागील नेमके कारण आणि घटनेची पार्श्वभूमी याबाबत अधिक तपास सुरू आहे. दरम्यान, गणेशोत्सवाच्या तोंडावर घडलेल्या या घटनेमुळे दापोली आगारातील ई-बस चालकांच्या ड्युटी आणि व्यवस्थापनाच्या कार्यपद्धतीबाबत पुन्हा प्रश्न उपस्थित झाले आहेत.
Join Group
https://chat.whatsapp.com/JdseCfeLB03Dnzx0PfjCL9?s=cl&p=a&ilr=4

#दापोली #ईबस #बसचालक #एसटी #दापोलीआगार #आत्महत्येचाप्रयत्न #दापोलीबिगब्रेकिंग #गणेशोत्सव #युनियन #स्थानिकराजकारण #कोकण #रत्नागिरी #आवाजजनतेचा

19/08/2026

*फ्रेश न्युज दापोली 24*

*दहावी बोर्ड परीक्षेचा बिगुल! अर्ज भरण्याच्या तारखा जाहीर; विद्यार्थ्यांनी नोंद करून ठेवा*

दिनांक १९/०८/२६
*मुंबई* - महाराष्ट्र राज्य माध्यमिक व उच्च माध्यमिक शिक्षण मंडळातर्फे फेब्रुवारी-मार्च २०२७ मध्ये घेण्यात येणाऱ्या माध्यमिक शालांत प्रमाणपत्र (इयत्ता दहावी) परीक्षेसाठी ऑनलाइन अर्ज भरण्याचे वेळापत्रक जाहीर करण्यात आले आहे. नियमित विद्यार्थ्यांसह पुनर्परीक्षार्थी, खासगी विद्यार्थी, श्रेणीसुधार योजनेतील विद्यार्थी तसेच आयटीआयचे विद्यार्थी या प्रक्रियेत सहभागी होऊ शकणार आहेत.

*अर्ज भरण्याचे वेळापत्रक*

विद्यार्थ्यांना नियमित शुल्कासह १९ ऑगस्ट ते ३१ ऑक्टोबर २०२६ या कालावधीत ऑनलाइन अर्ज भरता येणार आहे.

यानंतर विलंब शुल्कासह १ नोव्हेंबर ते १५ नोव्हेंबर २०२६ या कालावधीत अर्ज स्वीकारले जातील. त्यानंतरही अर्ज भरायचा असल्यास अतिरिक्त विलंब शुल्कासह १६ नोव्हेंबर ते ३० नोव्हेंबर २०२६ या कालावधीत अर्ज भरण्याची संधी उपलब्ध राहणार आहे.

*विद्यार्थ्यांच्या माहितीची अचूकता महत्त्वाची*

शाळांनी विद्यार्थ्यांची आवश्यक माहिती UDISE आणि PEN-ID प्रणालीमध्ये अचूकरीत्या नोंदवणे आवश्यक आहे. ऑनलाइन अर्ज भरताना विद्यार्थ्याचे नाव, जन्मतारीख, आई-वडिलांचे नाव, विषयांची माहिती तसेच इतर आवश्यक तपशील काळजीपूर्वक तपासण्याच्या सूचना मंडळाने दिल्या आहेत.

अर्जातील माहितीमध्ये चूक राहिल्यास पुढील प्रक्रियेत अडचणी निर्माण होऊ शकतात. त्यामुळे विद्यार्थ्यांनी अर्ज अंतिम करण्यापूर्वी शाळेतील संबंधित शिक्षक किंवा अधिकाऱ्यांकडून सर्व माहितीची पडताळणी करून घेणे आवश्यक आहे.

*फोटोबाबतही विशेष सूचना*

ऑनलाइन अर्जासोबत अपलोड करण्यात येणारा विद्यार्थ्याचा फोटो अलीकडील, स्पष्ट आणि JPG स्वरूपातील असणे आवश्यक आहे. फोटोचा आकार २५ KB ते ४० KB दरम्यान असावा. मंडळाकडे अर्ज पाठविल्यानंतर फोटोमध्ये कोणताही बदल करता येणार नसल्याचे मंडळाने स्पष्ट केले आहे.

*अंतिम मुदतीपूर्वी अर्ज भरण्याचे आवाहन*

अर्ज भरण्यासाठी विविध टप्प्यांमध्ये मुदत देण्यात आली असली तरी विद्यार्थ्यांनी शेवटच्या दिवसाची वाट न पाहता नियमित शुल्काच्या कालावधीतच अर्ज प्रक्रिया पूर्ण करावी. अंतिम दिवसांमध्ये तांत्रिक अडचणी किंवा सर्व्हरवरील वाढीव ताणामुळे अर्ज भरताना अडथळे येण्याची शक्यता लक्षात घेऊन वेळेत अर्ज भरणे विद्यार्थ्यांच्या हिताचे ठरणार आहे.

इयत्ता दहावीची परीक्षा देणाऱ्या सर्व विद्यार्थ्यांनी आणि पालकांनी अर्ज भरण्याच्या तारखांची नोंद घेऊन संबंधित शाळेशी संपर्क साधावा आणि आवश्यक कागदपत्रे व माहिती वेळेत उपलब्ध करून द्यावी, असे आवाहन महाराष्ट्र राज्य माध्यमिक व उच्च माध्यमिक शिक्षण मंडळाकडून करण्यात आले आहे.
Join Group

19/08/2026

*फ्रेश न्युज दापोली 24*

*इस्रोच्या गौरवशाली अंतराळ प्रवासाचा माहितीपटातून वेध*

दिनांक १९/०८/२६
*दापोली* -दापोली अर्बन बँक कॉलेजच्या भौतिकशास्त्र विभागातर्फे भारतीय अंतराळ संशोधन संस्थेच्या (ISRO) गौरवशाली वाटचालीवर आधारित माहितीपटाचे १५ ऑगस्ट २०२६ रोजी स्वातंत्र्यदिनाच्या निमित्ताने प्रभावी सादरीकरण करण्यात आले.

भौतिकशास्त्र विभागातील एफ.वाय., एस.वाय. आणि टी.वाय.च्या विद्यार्थ्यांनी एकत्रितपणे इस्रोच्या कार्याचा अभ्यास करून या माहितीपटाची निर्मिती केली. भारताच्या अंतराळ संशोधनातील प्रगती, वैज्ञानिकांचे योगदान आणि विविध महत्त्वपूर्ण अंतराळ मोहिमांची माहिती या माहितीपटाच्या माध्यमातून विद्यार्थ्यांनी अत्यंत सुंदर व प्रभावी पद्धतीने मांडली.

या माहितीपटामध्ये आर्यभट उपग्रह, INSAT मालिका, चांद्रयान-१, चांद्रयान-२, चांद्रयान-३, मंगळयान (Mars Orbiter Mission) तसेच आदित्य-L1 यांसारख्या भारताच्या महत्त्वपूर्ण अंतराळ मोहिमांचा प्रामुख्याने उल्लेख करण्यात आला. इस्रोच्या सुरुवातीपासून ते चंद्र व सूर्याच्या अभ्यासापर्यंतच्या भारताच्या अंतराळ प्रवासाचा माहितीपूर्ण आढावा विद्यार्थ्यांनी सादर केला.

या उपक्रमासाठी भौतिकशास्त्र विभागाचे विभागप्रमुख प्रा. डी. डी. कुलकर्णी सर, तसेच सहाय्यक प्राध्यापक प्रा. व्ही. आर. जोशी, प्रा. ए. एस. महाजन सर यांचे मार्गदर्शन विद्यार्थ्यांना लाभले. त्यांच्या मार्गदर्शनामुळे विद्यार्थ्यांना माहितीपटाच्या निर्मितीपासून ते अंतिम सादरीकरणापर्यंत विविध टप्प्यांमध्ये मोलाची मदत मिळाली.

विद्यार्थ्यांनी माहितीपटासाठी संशोधन, निवेदन, दृश्यसाहित्य, सादरीकरण तसेच तांत्रिक बाबींमध्ये सक्रिय सहभाग घेतला. या उपक्रमामुळे विद्यार्थ्यांच्या वैज्ञानिक दृष्टिकोन, संशोधनवृत्ती, संघभावना आणि सादरीकरण कौशल्याला चालना मिळाली.

विद्यार्थ्यांमध्ये अंतराळ संशोधन, विज्ञान आणि तंत्रज्ञानाविषयी जागरूकता व जिज्ञासा निर्माण करण्याच्या उद्देशाने हा माहितीपट इतर महाविद्यालयांमध्येही सादर करण्याचा विभागाचा मानस आहे. इस्रोच्या या माहितीपटाचे आपल्या महाविद्यालयात विद्यार्थ्यांसाठी सादरीकरण आयोजित करण्याची इच्छा असलेल्या महाविद्यालयांनी दापोली अर्बन बँक कॉलेजच्या भौतिकशास्त्र विभागाशी संपर्क साधावा, असे आवाहन करण्यात आले

या माहितीपटाचे महाविद्यालयाचे प्राचार्य डॉ. जी. बी. साठे आणि संस्थेचे संचालक श्री. रविंद्र कालेकर तसेच सर्व प्राध्यापकांनी कौतुक करून सहभागी विद्यार्थ्यांचे हार्दिक अभिनंदन केले.
Join Group
https://chat.whatsapp.com/JdseCfeLB03Dnzx0PfjCL9?s=cl&p=a&ilr=4

19/08/2026

*फ्रेश न्युज दापोली 24*

*दापोलीत २२ ऑगस्टला खाद्यपदार्थ विक्रेत्यांसाठी राज्यस्तरीय अन्न सुरक्षा प्रशिक्षण (FoSTaC) कार्यक्रमाचे आयोजन*

दिनांक १९/०८/२६
*दापोली* दापोली तालुक्यातील खाद्यपदार्थ विक्रेते, हॉटेल व्यावसायिक, बेकरी, स्वीट मार्ट तसेच खाद्य व्यवसायाशी संबंधित व्यावसायिकांसाठी राज्यस्तरीय अन्न सुरक्षा प्रशिक्षण (FoSTaC) कार्यक्रमाचे आयोजन करण्यात आले आहे.

अन्न व औषध प्रशासन विभाग (महाराष्ट्र), Nestlé India आणि NASVI (National Association of Street Vendors of India) यांच्या संयुक्त विद्यमाने हे प्रशिक्षण आयोजित करण्यात आले आहे. शनिवार, २२ ऑगस्ट २०२६ रोजी दुपारी १ वाजता सेवाव्रती शिंदे गुरुजी सभागृह, दापोली येथे हा कार्यक्रम होणार आहे.

या कार्यक्रमाचे उद्घाटन महाराष्ट्र राज्याचे गृह (शहरे), महसूल, ग्रामविकास व पंचायत राज, अन्न व नागरी पुरवठा व ग्राहक संरक्षण तसेच अन्न व औषध प्रशासन राज्यमंत्री मा. ना. श्री. योगेश ज्योती रामदास कदम यांच्या हस्ते होणार आहे.

कार्यक्रमाला जि. प. रत्नागिरीच्या अध्यक्षा सौ. अस्मिताताई केंद्रे, पं. स. दापोलीचे सभापती श्री. उन्मेश राजे दापोली नगरपंचायतीच्या नगराध्यक्षा सौ. कृपाताई घाग, Nestlé कंपनीचे हेड कॉर्पोरेट श्री. संजय भंडारी तसेच NASVIचे वरिष्ठ व्यवस्थापक श्री. गुरुनाथ सावंत यांची प्रमुख उपस्थिती राहणार आहे.

मोफत प्रशिक्षणासह प्रमाणपत्र व Hygiene Kit

या प्रशिक्षणामध्ये अन्न सुरक्षा मानके व नियमांनुसार खाद्यपदार्थांची सुरक्षित हाताळणी, स्वच्छता आणि ग्राहकांना सुरक्षित अन्न पुरवठा याबाबत मार्गदर्शन करण्यात येणार आहे. प्रशिक्षण पूर्ण करणाऱ्या सहभागीांना FoSTaCचे शासकीय प्रमाणपत्र मोफत देण्यात येणार असून, प्रशिक्षणार्थींना Hygiene Kit देखील मोफत वितरित करण्यात येणार आहे. या किटमध्ये एप्रन, कॅप, ग्लोव्हज, नैपकिन आदी आवश्यक साहित्याचा समावेश आहे.

खाद्य व्यवसायाच्या अधिकृत परवानगीसाठी तसेच सुरक्षित अन्न पुरवठा सुनिश्चित करण्यासाठी हे प्रशिक्षण अत्यंत महत्त्वाचे असल्याचे आयोजकांनी सांगितले आहे. त्यामुळे दापोलीतील सर्व खाद्यपदार्थ विक्रेत्यांनी या प्रशिक्षणासाठी उपस्थित राहून आपली नोंदणी पूर्ण करावी, असे आवाहन करण्यात आले आहे.

सुरक्षित अन्न • स्वच्छ व्यवसाय • सुरक्षित ग्राहक हा संदेश या प्रशिक्षणाच्या माध्यमातून देण्यात येणार आहे.
Join Group
https://chat.whatsapp.com/JdseCfeLB03Dnzx0PfjCL9?s=cl&p=a&ilr=4

19/08/2026

आरोग्य विषयक माहिती

*⏹️ किडनी निरोगी ठेवण्याचे उपाय*

किडनी शरीरातील सगळ्यात महत्वाच्या अवयवांपैकी एक आहे. किडनी यूरीन बनवण्यास मदत करतात. शरीरातील फ्लूइड आणि मिनरल्स बॅलन्स करतात. तसेच शरीरातील विषारी पदार्थ बाहेर काढण्याचं काम करतात. किडनी खराब होऊ नये म्हणून काळजी घेणं गरजेचं ठरतं. किडनी निरोगी ठेवण्यासाठी काही सोपे उपाय बघूया.

*पौष्टिक आहार* : कडधान्य, हिरव्या पालेभाज्या आणि फळांचं रोजच्या आहारात समावेश केल्याने किडनीचं आरोग्य चांगलं राहतं. कारण या गोष्टी नॅचरल फॉर्म मध्ये असल्याने, ते किडनीसाठी फायदेशीर असतात. तसेच जास्तीत जास्त पाणी पिणं गरजेचं आहे.

*पुरेशी झोप* : पुरेशी झोप घेत न झाल्याने हायपरटेंशन आणि डायबिटीसचा धोका वाढतो, ज्यामुळे किडनीवर दबाव पडतो. झोपे दरम्यान किडनी जास्त ब्लड फिल्टर करू शकतात आणि जास्त यूरीन तयार करतात, ज्यामुळे एक्स्ट्रा फ्लूइड आणि वेस्ट शरीरातून बाहेर निघतात. त्यामुळे किडनी निरोगी ठेवण्यासाठी पुरेशी झोप घेणं महत्वाचं आहे.

*पेनकिलर टाळा* : वेगवेगळ्या वेदना दूर करण्यासाठी बरेच जण पेनकिलरचं सेवन करतात. पण पेनकिलरच्या सेवनाने किडनीचा ब्लड फ्लो प्रभावित होतो. जर आधी किडनी संबंधी किंवा डिहायड्रेशन सारखी समस्या असेल, तर पेनकिलरचं सेवन टाळावं.

*मीठ कमी खा* : शरीरात मिठाचं बॅलन्स कायम ठेवण्यात किडनीची महत्वाची भूमिका असते. जेव्हा शरीरात एक्स्ट्रा सोडिअम जमा होतं, तेव्हा किडनींना ते बाहेर काढण्यासाठी जास्त मेहनत घ्यावी लागते, त्यामुळे जास्त मिठाचं सेवन करू नये. जास्त मीठ हे हृदयासाठीही घातक असतं.

*स्मोकिंग, मद्यसेवन* : स्मोकिंग केल्याने किडनीचं काम प्रभावित होतं आणि किडनीला कॅन्सरचा धोका वाढतो. सिगारेट मधील निकोटीन मुळे रक्तवाहिन्यांचंही नुकसान होतं. ज्यामुळे किडनीच्या रक्तवाहिन्या नष्ट होतात. तसेच जास्त मद्यसेवन केल्याने डिहायड्रेशन आणि हायपरटेंशनची समस्याही होते, ज्यामुळे किडनी प्रभावित होतात. अशात निरोगी निरोगी ठेवण्यासाठी स्मोकिंग नि मद्यसेवन टाळलं पाहिजे.
Join Group

18/08/2026

18/08/2026

*फ्रेश न्युज दापोली 24*

*गिम्हवणे-सुतारवाडीत सोन्याचे दागिने व बचत गटाच्या रकमेचा कथित अपहार; दोघांविरुद्ध गुन्हा*

दिनांक १८/०८/२६
*दापोली*- विश्वासाने परिधान करण्यासाठी घेतलेले सोन्याचे दागिने बँकेत गहाण ठेवण्यासह महिला बचत गटातील सदस्यांकडून कर्जाच्या हप्त्यांसाठी जमा केलेली रक्कम बँकेत न भरता स्वतःच्या फायद्यासाठी वापरल्याचा गंभीर प्रकार दापोली तालुक्यातील गिम्हवणे-सुतारवाडी येथे समोर आला आहे. या प्रकरणी दोघांविरुद्ध दापोली पोलीस ठाण्यात गुन्हा दाखल करण्यात आला असून, एकूण ९ लाख ६० हजार रुपयांच्या अपहाराचा आरोप करण्यात आला आहे.

याप्रकरणी पूर्वा गणेश देवघरकर (३८) यांनी दापोली पोलिसांत तक्रार दाखल केली. त्यांच्या तक्रारीवरून प्रतिज्ञा विश्वास देवघरकर (३१) आणि विश्वास रमेश देवघरकर (३८), दोघेही रा. गिम्हवणे-सुतारवाडी, यांच्याविरुद्ध गुन्हा दाखल करण्यात आला आहे.

पोलिसांनी दिलेल्या माहितीनुसार, तक्रारदारांकडून विश्वासाने परिधान करण्यासाठी घेतलेले सुमारे सहा तोळे वजनाचे सोन्याचे मंगळसूत्र प्रतिज्ञा देवघरकर व विश्वास देवघरकर यांनी परस्पर बँकेत गहाण ठेवले. त्यातून मिळालेली रक्कम स्वतःच्या फायद्यासाठी वापरल्याचा आरोप आहे.

तसेच तक्रारदारांच्या भावकीतील अनुष्का उमेश देवघरकर यांच्या मालकीची सुमारे पाच ग्रॅम वजनाची सोन्याची कर्णफुलेही प्रतिज्ञा देवघरकर हिने परिधान करण्यासाठी विश्वासाने घेतली होती. ही कर्णफुलेदेखील परस्पर बँकेत गहाण ठेवून त्यातून मिळालेली रक्कम स्वतःच्या फायद्यासाठी वापरल्याचे तक्रारीत नमूद आहे.

बचत गटाच्या रकमेबाबतही गंभीर आरोप

प्रतिज्ञा देवघरकर हिची विश्वकर्मा समूह महिला मंडळ बचत गटाच्या सचिवपदी नियुक्ती करण्यात आली होती. बचत गटातील महिलांच्या कर्जाचे हप्ते वेळोवेळी भरण्याची जबाबदारी तिच्यावर सोपवण्यात आली होती.

या विश्वासाचा गैरफायदा घेत तिने तक्रारदारासह बचत गटातील १२ महिलांकडून कर्जाच्या हप्त्यांसाठी सुमारे ४ लाख ६० हजार रुपये जमा केले. मात्र, ही रक्कम बँकेत जमा न करता स्वतःच्या फायद्यासाठी वापरल्याचा आरोप करण्यात आला आहे.

याशिवाय एचडीएफसी बँकेमार्फत महिला बचत गटाने घेतलेल्या सुमारे १० लाख रुपयांच्या कर्जाच्या परतफेडीसाठी तक्रारदारासह इतर महिलांनी प्रतिज्ञा देवघरकर हिच्याकडे विश्वासाने जमा केलेली सुमारे ५ लाख रुपयांची रक्कम संबंधित कर्जाचे हप्ते भरण्यासाठी वापरण्यात आली नसल्याचे तक्रारीत म्हटले आहे.

सोन्याचे दागिने बँकेत गहाण ठेवणे आणि बचत गटाच्या सदस्यांकडून कर्जाच्या हप्त्यांसाठी जमा झालेली रक्कम बँकेत न भरता तिचा कथित अपहार केल्यामुळे एकूण ९ लाख ६० हजार रुपयांचे आर्थिक नुकसान झाल्याचा आरोप आहे.

या प्रकरणी १७ ऑगस्ट २०२६ रोजी रात्री ९.१६ वाजता दापोली पोलीस ठाण्यात गुन्हा दाखल करण्यात आला असून, भारतीय दंड संहितेच्या कलम ३१६(२) आणि ३(५) अन्वये कारवाई करण्यात आली आहे. प्रकरणाचा पुढील तपास दापोली पोलीस करीत आहेत.
Join Group
https://chat.whatsapp.com/FW00cjUsvVd0rouxs7oI8T?s=cl&p=a&mlu=3

#दापोली #दापोलीबातम्या #गिम्हवणे #सुतारवाडी #रत्नागिरी #रत्नागिरीबातम्या #बचतगट #महिलाबचतगट #सोन्याचेदागिने #अपहार #गुन्हादाखल #दापोलीपोलीस #कोकण #कोकणबातम्या #महाराष्ट्रबातम्या #ब्रेकिंगन्यूज #ताज्याबातम्या

18/08/2026

दापोलीत आजाराला कंटाळून ४० वर्षीय व्यक्तीची गळफास घेऊन आत्महत्या

दापोली : दापोली तालुक्यातील बौद्धवाडी येथे आजारपणाला कंटाळून ४० वर्षीय व्यक्तीने राहत्या घरातील बेडरूममध्ये गळफास घेऊन आत्महत्या केल्याची घटना मंगळवारी (१८ ऑगस्ट) दुपारी घडली.

पोलिसांनी दिलेल्या माहितीनुसार, विश्वजित विश्वनाथ कासारे (वय ४०, रा. बौद्धवाडी, ता. दापोली, जि. रत्नागिरी) हे वारंवार आजारी असल्याने मानसिकदृष्ट्या त्रस्त होते. आजारपणाला कंटाळून त्यांनी दुपारी सुमारे १.३० वाजण्याच्या सुमारास घरातील बेडरूममधील छताच्या लोखंडी बारला कापडाची ओढणी बांधून गळफास घेतल्याचे प्राथमिक तपासात समोर आले.

या घटनेची माहिती प्रवीण जनार्दन तांबे यांनी दापोली पोलिसांना दिली. त्यानंतर पोलिसांनी अकस्मात मृत्यूची नोंद करून तपास सुरू केला आहे. या प्रकरणाचा पुढील तपास दापोली पोलीस करत आहेत.