The Maraland Times

26/10/2025

Rovina Khaimeichho Music Album release aw

Phiata noh 26, 2025: Mara Idol Season 6 (2021) tawhta hmia eima pahnopa Laihsa Rovina Khaimeichho cha a music album hmiatua chai awpa ‘A THÂNGIANA’ tahpa cha 26 Oct. 2025 4:00pm (Malaysia local time) ta release pa a châ aw.

Rovina he MVM Sport Day & Music Concert liata hlasa awpa ta hruapa châ ta, Malaysia lia a châh haino a châ. Album he MRC Office, Malaysia liata Khichhailaipa K. Sotha ta a palâhâh aw.

Rovina heta Malaysia nata khizaw su nanopa liata ypa Marasaw zydua album palâhâna liata a hlao chyu awpa ta a hrua ei.

-The Maraland Times

25/10/2025

CHÂHDUA NATA TLÂUAH
Episode 58

TLÂUAH NAWH TLÂH ATLYHNA

CHÂHDUA:
Unawh Tlâuah, atliata liata nama tlâh ryureihtuhpa atlyhna ziza kha dia a nano kaw? Pupa Chhituhchâkhoh ta atlyhna liata a tloh khao leipa vâta a paphôh-palyuhna biezy kha dia keimo tlâh lâ taih ta a vaw pathâh? Biepawpa khiah ma tah na ta dia, ano vaw tlô ta, ano pakah tawh cheingei ta ei thei?

TLÂUAH:
Pahno bao va na, Unawh; cha hawh chhituh ama châ khoh kaw sai muarua bao cha la. Dyh kih nata dyh sari khihsata châ pi ta, a pahnopasia khai pi ta, ano cha mah chati-kôsy eima tlâh ryureihtuhpa a châ tyh bao. Atlia tawhta deikua cha, zawpi ta ama chhituhpa châta ama ngiabâh khao leipa a lyu. Zawpi ta ama ngiabâh khao vei tawhta cha, ano chhao ta a pyhzie a thai bâ awpa na a châ taraw bao.

CHÂHDUA:
“Eima tlâh mo ta la kei na eina khoh chai ei. Eima tlâh liata cha, kei he a tlâh ei châ chai. Ei hneina chhao ta a daih ta, riethei sipasapazy a deichhy thei chai awpa cha kei he na ei châ. Pinô Sovâhzietaih ta a laihsa nota na khoh ta, kei ta ei hnei khoh leipa kha tanoh taihta ei chô liata a palôh y thlâh ha ta, chavâta ei thâtih â doleipa ta a khiekhei ta, a chhie thei chaipa hawhta a rei laihpa na ama zo khai haw. Atlyhna daihti hra cha a hnia tu ha ta, chavâta a reipasia nawpa daihti ei hnei hmâ khao vei,” tahpa ta eima tlâh lâ a vaw tlô nota a rei kha zaw.?

TLÂUAH:
Cha muarua cha la, Unawh. A haipa sai na, tah mawh no sala, biedopa a hlao ha heih tlôh. Pinô Sovâhzietaih ta la ama satlia laihsa khoh daihti liata bie pha â chho ngâ kaw tyh tlai. Châhrasala tahmâ ta ama nô Rianaihrongia he tlao a khoh via haw. Pupa Chhituhchâkhoh he a pathao nota la chhituh phapa tlai na a châ. A khihsa vaw pha laih ta, â bei parei tawhta na â palai haw. Chavâta khihsawzy ta ama ai kaw bâpa ta na kei la ei hmô.

CHÂHDUA:
A châ tlai na, Unawh. Chyhsapa he la eimâ vaw palai kaw sai tlai na. Keimo tlâh liata Pupa Areisipakheithai chhao he â reisi thaina taih na miah â palai thlu tyh.

TLÂUAH:
Na rei dâh pi cha la, Unawh. Cha naih ta, Pupa Chhituhchâkhoh he la â palai tu pâ tu haw. A nga khaoh liata cha-ia khaoh a y hôlôpa taih na â palaikhei.

CHÂHDUA:
Cha hawhpa khiah, Pupa Chhituhchâkhoh cha khâpa a lyu lymâ. A palôh pasapa a dia via laih ma?

TLÂUAH:
Dia tiarâh vei, Unawh. Ziza a hnei pazao ngâ thlâh ha. Eima tlâh odyh eima chyh thlâ bao na ta, miah pachhaih ta, dyh thôh a chhi ta, tlâh hro a kiakhei ha ei. Dyh thôh chô liata ryureihtuhpa ta a y.

CHÂHDUA:
A moh nata â hmie kaw chu. Dyh kih nata dyh sari chô liata ryureihtuhpa a tloh khao leipa chhao ta, dyh thôh chô lia chhâ ta ryu a rei thei tawhta cha, kao kha lâ tawhta pachâpa ta la, Unawh, a moh a phaoh thei kaw, tahna na a châ.

TLÂUAH:
A châ kaw na, Unawh. Biehneina iah ta a vaw zai ha he tly ma. Ano dei vei; mohropazy chhao â daih tahna daihti rai pahno thai veih ei.

CHÂHDUA:
Na rei pasu dâh chi, Unawh. Chavâta âmo lôhthai ta a pahâna châh pahno leipa ei ta, mohropazy tleina châh ama pahno vei tawhta cha, zawpi ta, “Â daih bâ,” eima tah awpa â ngiah ha tyh he maw. Biehneina he la a iahzai a vaw nao kaw tlai na.

TLÂUAH:
Bie a vaw zao ta, Unawh, eima tlâhzy liata atlyhna hluhzie rimâ hih: Tlâh ryureihtuhpa atlyhna, chanô py chhituhpa atlyhna, thyutlia py chhituhpa atlyhna, paw py chhituhpa atlyhna, hawti py chhituhpa atlyhna, achuhaipa py chhituhpa atlyhna, pâti py chhituhpa atlyhna, barô thih a taopa py chhituhpa atlyhna, tlâh hrozy nata pahlyhpa vyuhtuapa atlyhna, thlahpa py awnanopa lia taih ta na atlyhna a y. Keimo tlâh hawhpa odyh chyhpata tlâh châta la, chhituhpa a châ leipa y tlâ ma pi.

CHÂHDUA:
A pha kaw cha my, Unawh, chituh leipa y leina tlâh tlâ nama châ aw cha my. Bie a vaw zao ta, nama khih awnanopa chhituhpazy atlyhna daihti zaw, khati ta? Cha chhao cha dia a ziza a y pathao kaw heih?

TLÂUAH:
Awnanopa chhituhpazy chhao thla heihpa liata eimâ tlyh aw. Na reipa hawhta a ziza â sâh kaw. Chhituhpa ama châ khoh kaw sai. Thokha la Awnanopa châta hmiasai ama hnei muaruapa vâta chhituh châ awpa ama kho kawpa a châpa ta chhao a lâ vei. Keima hawhpa rakhapa na tlâ ama châ hra. Biehneituhpa châ awpa nata moh a lâ awpa ama tlaichhaipa vâta a châ chaipa hawhta na kei la ei pachâ. Awnanopa ta sadô, leipalie, arâ, viahchao nata naw talailih zy hnei pi ta, chazy chô liata biehnei awpa ama khopa vâta na chhituhpa châ awpa ama khoh kaw sai. Thokha la odyh to kiah ei ta, ei no ei thôh ama padô hmâ haw. A tlyh daihti liatapa hawhna heta zaizyh daihtizy liata chhao odyh to miah kiah ei sala, thlah miah chhâpa laih ei sala a pha kaw awpa tlai.

CHÂHDUA:
A châ chaimâh na, Unawh. Khazohpa châbu pathaihpa liata eima hmôpa, awnanopa hmiatuapazy taozie hawhna khata, awnanopa chhituhpa cheingei he la, vaw pathlapa ta a tlyh leip’aw sih la, thlahchhâ sih la, a nuby ta tlâ a dao sih la, a pathaih chai awpa tlai. Cha hawhta eima tao khiahta la, Khazohpa raopa cheingei ama tloh na ta ei pangiasa kaw. Kampei byuh leipa aw ta, tiama ta thlahchhâ awpa tlâ a châ.

TLÂUAH:
Cha hawhta tao awpa ta ei kha reih pi ta na, thokha ta, “Châthai leipa, tlâh hro reih kawh kha chhao a cheih thai leipa moh a daopa châ thlâh mawh sala, kheihta ma chhituhpa a châ thai rai aw,” tah ei ta, nuby a dao awpa cha hmo pha chaipa a châpa ta ama pahno vei. Awnanopa pi hih, eimâ vaw nano kaw. A châh ta Khazohpa ngâ pi, a châh ta ngâ khao heih pi va, eima tah tyh. Khazohpa ngâna chôta nuby eimâ dao khiahta cha, Khazohpa ta a tlâh a châpa ta a pahnopa nata ano ta chhituhpa châta â tlyhpa moh mah a daopa a châ thlâh taraw bao aw. Nâ pyhzie a châ ma?

CHÂHDUA:
A châ kaw ny, Unawh. Nama tlâh ryureihtuhpa atlyhna châta amâ kampei chhiechhupa cha mawh la, kao nanopa ta soh sih la, a pachâzie chhao thai a chhuah sih la, Khazohpa hrohpa awnanopa chhituhpa atlyhna lia tlai ta kampei chaimâh ei ta, “Kei na a pha chai na,” ama tah ngâ kawpa deikua cha la, pha ngâsâ vei; hmo siezie awpa chhao châ vei. Sâtâ nata a sahlaozy ta hmahta cha pahneisao ngâ kaw ei sala ei pangiasa.

TLÂUAH:
Sâtâ cha tlao â ly kaw hri bao aw na, Unawh. Thlah miah chhâkhei muh vy, Khazohpa khopa, chyhsa ngâchhihpa, chyhsa dopa, kyhpachâna a hneipa, a hria pasapa nata awnanopa châta hmiasai a hnei phapazy eima tlyhpatloh thei nawpa ta. Cha khiah nâmo tlâh zaw, khitlâh ryureihtuhpa nata awnanopa chhituhpa atlyhna hnei hra aw veih ei chi ma?

CHÂHDUA:
Unawh, keimo tlâh khitlâh ryureihtuhpa nata awnanopa chhituhpa atlyhna la hâhkô-kavei lâ na a châ aw. A ziza y mâh vei. Cha naih ta, awnanopa chhituhpa namâ tly tita la, Machâ Sôhkyhliatangâchhih kha vaw patloh a chhuah muh vy. Sôh kyh liata ngâchhih ei sala, amâ do khiahta la, kao hropazy liata la ama hmasie laih thlâh ha aw.

TLÂUAH:
Nâ chhao cha eina vaw kampei pâ chi dua, Unawh. Cha khiah la atlâhpa ta sy. Nama tlâh liata Pupa Chaoleihuachai kha nâ naohpa mah y.

CHÂHDUA:
Atlâhpa ta sy, Unawh. Nâ chhao nama tlâh liata Pinô Chyhsakyhreihbeihlei kha samaw na hlâpa hra mah y.

24/10/2025

Mara Rapper eimâ chhaih

24/10/2025: Mara Rapper lâluahpa Gilbert Syhly cha tazâ 7:30 rachhôh khata â pahâ haw.

Gilbert he Mara rap khizaw liata mo chyhta hry ta pakha a châ hra.

Thlalohpa ta a pahâ mawh sy 💐

23/10/2025

KYHPACHÂNA TLÂHRAI REPORT

23rd Phiata, 2025

Atamy patinie hlâta, MTP Branch ,Tisi General ta, kyhpachâna tlâhrai hria pazao heihpa châta, manôh sy pangawh (50) tlaita tláhrai eima hria.

Atamy ta, tlâhrai eima hriapa he, N. Makhai ( Singiarili Paw ) nawh Sâh, ama Lyu liata kei paly pa châta, Member zy tiamana zawhzi ta, paly khai hapa a châ.

Bao angiahpazy baona cháh pahno pata, MTP manôh, tlâhrai ahriatuhpa zydua, nama chô liata, MTP mohta alynabie eima chareih chyu ei.

MTP Branch, Tisi, tlâh parei mawh sy

Sd/- i/c Secretary
Information & Publicity
MTP Branch : Tisi

22/10/2025

MTP GENERAL CONFERENCE EI 33-NA A HLAO THEI AWPA AVAW REPORT HAIPAZY:

1. MTP Branch, Zyhno - 50
2. MTP Branch, Zyhno B - 50
3. MTP Branch, Lotai - 15
4. MTP Branch, Pala - 40
5. MTP Branch, Ahmypi - 15
6. MTP Branch, Bymari - 20
7. MTP Branch, Chakhei - 70
8. MTP Branch, New Laty - 40
9. MTP Branch, Kaochao East - 18
10. MTP Branch, College Vaih - 80
11. MTP Branch, Siasi - 10
12. MTP Sub HQ: Chhaolo - 24
13. MTP Branch, Phura North - 50
14. MTP Branch, Miepu - 25
15. MTP Branch, Old Tisopi - 35
16. MTP Branch, Theiva - 20
17. MTP Branch, Tipa Bazar - 20
18. MTP Branch, Khopai - 20
19. MTP Branch, Phura South - 20
20. MTP Branch, Chhaolo-II - 15
21. MTP Branch, No-ao tlâh - 25
22. MTP Sub HQ: Saikao - 24

Khichhai Maluh avaw Report hapa zydua - 686

Branch a Report mâh leipa zie - 52
Sub HQ a Report mâh leipa zie - 5

A Report mâh leipazy namâ vaw Report khai bâ awpa ta, MTP General Conference Managing Board Chapi ta eima châ haw hmeihseih.

Sd/-C.VABEIKHOLAI
Secretary
MTP General Conference Managing Board, Chapi
_For further information contact_-7085843730

22/10/2025

Padona:
Mawhrei Peace Talk liata Mawhrei nopaw pakha ta CNA pheisaih mo 5 rachhôh amâ hlaopa hawhta a reipa kha, CNA & CDF-Mara pahlaopalina vâta châ ta, CNA pheisaih châ leipa ei ta, CDF-Mara pheisaih ama châ tahpa Mawhrei nôpaw tawhta bie eima dao.

Pahno chheina vâta thâtih do leipa eima vaw palâsana liata thâtih reihtuhpa zydua pachâthaina sâhchaipa eima châ haw.

Mawhrei Peace Talk MTC/MDF tlô veih ei

Phiata noh 18, 2025: East Maraland Peace Committee (EMPC) hmalapa ta MTC/MDF nata CDF-Mara a pôhkhana kyh rei nawpa noh nata daihti raopa liata MTC/MDF vyuhtuapazy tlô veih ei tahpa thâtih daopa a châ.

CDF-Mara vyuhtuapazy tlô khai ei ta, Sawhmo bia lâta vyuhtuapa hruapazy chhao ama tlôpha kaw no ta, MEC, MTP General Headquarters, Sabyh, MChP General Headquarters, Lialaipi nata a hropa vyuhtuapa hruapa zydua tlô tlâ veih ei tahpa bie daopa a châ.

He Peace Talk lia heta CNA pheisaih mo 5 rachhôh ama vaw tlô hrapa hawhta Peace Talk liata a hlao hrapa Mawhrei nôpaw pakha ta The Maraland Times a chho nota, IMC Chairman ta CNA pheisaih a hlao veih ei tahpa The Maraland Times a chho hra.

MTC vyuhtuapazy ama tlô leipa vâta a pôhkhana rei thaipa châ vei hrasala; a tlô theipa zydua a tyna hneipa châ ta, CDF-Mara tawhta ama palôh phao nata ama khonazy Peace Committee hnohta ama chho.

The Maraland Times ta MTC vyuhtuapazy ama tlô leina chhâpa MTC chhihthatuhpa pakha hnohta eima hriana cha, Zo Reunification Organization (ZoRO) hmalapa a pôhkhana reina a sie haipa a y hleikhô ta, meeting peimawhpa vâta khitly awpa châ pi ta, eimâ mâ lei awpa zie Peace Committee hnohta pakah (verbal) ta liahsa chho khai haw pi ta, eimâ mâ leizie ama pahno thlâh hâpa ta ama pahrua raruahpa vâta eima tlô thei leipa a châ. Tahmâ chhao MTC chhituhpazy khitlyna liata eima yno a châ tahpa maniah a chho.

Mawhrei Peace Talk he Mawhrei VC, MTP nata MChP zy a pakaopa ta thopi ravo, niedo nata a hropa a byuh ngiahpa zydua ama patôhpatia khai.

Pahnosana: IMC Chairman tawhta a pohkhana kyh nata a zaopa ta thâtih papua mâh lei awpa ta maniah chho taraw ta, thâtih a roh tyhpa Lai chyhsa thokha tawhta thatih a pua hapa vâta he thatih he papuapa a châ.

21/10/2025

Laihsa N. Rosaline MTP General Headquarters a tlyna a vaw y awpa liata Treasurer candidate awpa vâta Branch lia a chakaona tawhta bâna châ a pangia.

20/10/2025

ALYNABIE REINA

Atanoh târi 20th October, 2025 pata MTP Gerenal Conference HIPHEI BYUREIH sana tlâhrai hria pazao heihpa châ ta, MTP Branch, Mawhrei manôh-60 hlei tlai ta tlâhrai miah za bao heih ei ta, a chô chhao dia khai hapa a châ.

Chatawhta, eima MTP Sub-Hqrs:Chakhei nôpawpa nahzy chhao atanoh lâ liata eima raihrianazy miah ama vaw mokheipa dei châ leipa ta, phusâ hluhpi Rs.10,000 tlai miah vaw bao heih ei ta, eimâ ly ngaita.

Atanoh noh y khata tlâhrai miah a za baopa Mawhrei MTP manôh zydua nata sôh hluhpi baona miah a pietuhpa MTP Sub-Hqrs: Châkhei hnohta Managing Board ta palôhru tlôkhu ta alynabie eima cha reih hmeihseih.

Sd/-
Secretary
MTP General Conference Managing Board, Chapi

19/10/2025

IMC Statement
Burmese and Mara Version

19/10/2025

EMPC tawhta Mawhrei Meeting Report

19/10/2025

Opinion Poll result
Mara zawpi ta MTC/MDF nata CDF-Mara chô lia eima palôh chhâ ha ta, a pôhkha awpa ta hnabeiseina hnei khao thlyu ma pi.

18/10/2025

MARAPA NATA EIMA KHIH NATA RÂH

Laiu Fachhai

Mara sawzy châta cha, Mongyuh reih ta “emotional attachment” ama tahpa he eima khih liata lah a y. Eima khih chyu cha eima ngia a ryh chaina, palôh eima so chaina, thapasana eima chaipa nata eima ngiabâh chaipa a châ. Eima pho nata hrâ hlâta chhao ta, eima khih thapasana eima hnei lai via. Khi kha nata khi kha a siehnaopa châ mawh sala, Fachhaipa nata Fachhaipa lah a siehnao ngâ kaw aw pi.

Eima palôh eima khih lâ sai â heih tyhpa vâta, siku eima kia nota, khih liata Krisma hmâh hmâ awpa ta azo lâ taih ta a para kawpa eima sie pâ ngâ kaw tyhpa zy kha, kaw rohpady heih châh ta, palôhlie â chhih kaw tyh. Tiria haosâ awhsi tlana khih phapa nata râh phapa liata y hr’aw sih la, pâdawhpa liata a y thlâhpa eima o nata eima khih zy he eima vaw vâ thlyu thlyu tyh. My thei ma pi.

Atlia liata USA lâ ei vaw nona kha, Mara saawzy ta eima khih eima tlaichhaina kyh bie lôhawhpa reih pi ta, Kentucky liata pawhrâhpa pakha ta â dozie hetana heta saisobie ta a pa-i: “Mara sawzy pi ta eima khih nata eima khih mo eima tlaichhaizie cha, vârâh lâ khy sih la, eima khih mo za y tlâ vei ei sala, meitipo lâ za moh sih la, eima khih mo y hôlô mawh ei sala, eima khih mo yna meitipo lâ na eima zu khoh via aw.” Saisobie châ ta, a hmeiseihpa ta a y awpa hmo a châ lei tarawpa ta, he saisobie heta Mara saw ta eima khih nata eima khihsawzy eima tlaichhaizie a palâsa kaw.

Myanmar râh atymâna vâta Nochhi Mara khihzy rairuna thata amâ tyh haina liana chhao he ta, Mara saw ta eima khih eima pachâzie â lâ heih tyh. Mara Diasporazy (râh hro lâta a ypa Mara sawzy) ta sanawh nawh lei tahpa pathlua lei ta, ama khih chyu riethei rairuna zy vaw pathlâkhei lymâ ei ta, mathlai thisaih lopa ta riethei ngaitana chôpa hriapa ta ama hmôpa sôh chhao i leipa ei ta, pasai ngaitapa ta ama khih liata bao ngiahpazy vaw bao ei ta, hmasiena rai hria awpazy ama vaw hria lymâ. He hawhta a châ awpa tlai na a châ.

Eima khih khai tawhta, Mara sawzy ta eima ngia a ryh chaina, eima palôh eima so chaina, thapasana eima hnei chaipa nata eima ngiabâh chaipa cha eima Mara râh nata keimolâsaw (Mara heihpa) a châ heih. Tiria haosâ awhsi tlana khih phapa nata râh phapazy tawhta thotlâh râh, Mara râh nata Mara sawzy he eima vaw vâ kaw tyh. Râh hrozy liata keimolâsaw (Marapa) eimâ tyh thlâhpa cha, eimâ ly ngaita tyh. Sie nano heih awpa chhao pasaih khao tyh ma pi.

He vâna tlai heta a châ. Mara Zawthâ ta a palôh liata a Zawthâ heihpa Hiakhapa hlâta a Mara heihpa pho hropa â hnia via. Mara Choza nata Hlychho, Mara Fachhai, Mara Azyu, Mara Tôpa, etc zy chhao, cha hawhta eima châ khai. Thlâtlâh, Lautu, Azyuh (Zotung), etc zy liata eima phoheihpa unawhzy hlâta Mara râh liata eima Mara heihpa pho hropazy thapasana hnei via pi ta, eima za puana râh hlâta eima za pangaipa Mara râh he thapasana eima hnei via. Cha hawhta a châ awa tlai na a châ, Mara râh ziza chahâ pi ta, Mara râh ti doh pi ta, Mara râh ta a papuapa niedoh nie pi ta, Mara râh liata eima pahrâpa vâta.

Mara sawzy ta eima khih nata râh tlaichhaina eima hnei lai kawpa he, Khazoh kho leipa hmo a châ muarua a ngia vei. Chavâta chhy lymâ suh u. Cha nota, eima khih nata râh tlaichhaina nata thapasana eima hnei lai kawna chôta, chihropazy deikua a hao awpa châ vei. Âmo châta opa phapa châ lymâ eimâ chhuah awpa a châ.