13/12/2022
**आमाक् मो़हो़त बाडाय जो़ङ में**
नो़ंडे पा़किस्तानी तिरला़ मलाला युसुफजई बारे ते ला़ला़यीञ उसरा़क् काना । जाहाँय दो़ हुडिञ उमा़र रेगे ओ़लो़क्-पाड़हाक् रेयाक् मो़हो़ते बुझा़व ञाम लेत् ते मो़ठे 13 बो़छो़र उमा़र रे तहरीक-ए-तालिबानाक् को़चलो़न बिरूद बीबीसी ला़गित् मित् Blog रेय ओ़ल केदा । ओ़लो़क् पाहावो़क् ला़गित् आ़यदा़री बाबो़त सो़ङघो़से एहो़प् एना। खासकायते तिरला़को ला़गित् । ओ़ना खा़तिर गुजुक् मुहाँ मुहीं सेटेर हुय लेन ताया। 14 बो़छो़र उमा़र रे बा़ॅंदुक तेको ठु लेदे उनीयाक् ओ़न्तो़र दाड़े ताय ताराल- बासाल रेयाक् को कुरूमुटु लेत्आ। मो़नसुबा़ मा उनी गो़जे रेयाक्। मेनखान भागेयाक् दो़ तिसहो़ं निसड़ा़व दाड़ेवाकाना? चेठा रूवाड़ेनाय । आरहो़ं मो़ने मुरूक् काते। आर ञेल मेसे गो़टा धा़रती जाकात् रेको बाडाय केदेया । थुमादेयाको । खान धा़रती जाकात् रेयाक् माराङ सिड़पा़ नोबेल तेय दा़हड़ी ओचोयेना।
आँजो़म आर पाड़हाव तेगे आड़ेच्- गाड़ेच् आटकारोक् काना । मेनखान सो़ङघो़स रेयाक् नो़ङकान का़हनी दो़ बेगो़र चाँदो बो़ंगावाक् थुम ते ओ़हो़ गे निङगरा़वको़क्आ। आर चाँदो बो़ंगावाक् थुम दो़ नुना़क् आलगा तेहो़ं बाङ आरजाव गो़दो़क्आ। आ़डी आयमा खा़टा़वनी आर भाँवार हेवा तायो़म गे चाँदो बोंगा दो़य कुसी गो़दो़क् ते रा़सका़ सालाक् ए थुमा । एकेन चेतान मो़ने से खा़टा़उनी ते दो़ ओ़हो़ गे चाँदो बोंगावाक् थुम दो़ आरजाव दाड़े को़कआ । मोने मुरूक् काते लाहा लेन तायो़म गे ञामो़क्आ ओ़ना दो़। आर तोबेयानेच् गे ओ़न्तो़र कुचीत रे पा़तिया़व रेयाक् पो़हा जानामो़क् ते माराङ माराङ आको़ट लागा फोड़ रेयाक् दाड़े सारसाक्आ। उन रे आमाक् आयदा़री रेदो़ आमाक् गे हो़क ताहेंना। बाम एड़े ओचोआ दिकुको ठेन। गाँवता ताला आमाक् हो़ं ञुम हालाङ ताहेंना । जा़ती-धो़रो़म रेयाक् पा़चरी चेतान ते आमाक् ञुतुम रेयाक् गे दुराङ ऑंजो़मो़क्आ। उन ओ़क्तो़म ओ़हमा ञामा जो़तो़ आको़ट रेन आसो़ल दुसी दो़ आम गेम ताहेंकाना । जियोन रेयाक् ताड़ाम डाहार रे जानुम झाँटी दो़ आम गे चोम ताहेंकान। एटाक् हो़ड़ाक् उदुक् डाहार मेत् जा़पित् काते पाँजाय दो़ लेलहा आर कुड़िया़ लाठे कोवाक् का़मी काना । ओ़को़य बाडाय केया आमाक् चुलहा़ रेयाक् लो़लो़ तावा रेगे उनको बारो़ रूपान हो़ड़ रूटी को सेकाव जो़ङ काना। ओनकोवाक् मिछा़ मेत् दाक् रे दो़ आलोम आन्दहा ताहेंना। मेंत् दाक् रेयाक् हो़ं आ़डी आयमा रो़ङ मेनाक्आ। ञेल ओरोम कोम ओ़नकान बारो़ रूपान हो़ड़ जाहाँयाक् मिछा़ मेंत् दाक् रे आमाक् ओ़न धो़नको जो़तो़ बो़हाव सेनो़क् कान। आमाक् लाच् रेयाक् रेंगेच् तेताङ दो़ आमगेम जो़खा दाड़ेकेया । चेत् रेंगेच् मेया आर तिनाक् रेंगेच् मेया ओ़ना रेन तुला़-जो़खायिच् दो़ आम गे। एटाक् हो़ड़ आमाक् आसो़ल तेताङ ओ़हो़ गेको मारको़त दाड़े केया । तेताङ मारको़त रेन आसो़ल ओ़जे दो़ आम गे बेनाक् मे।
✍️ शनिचर मुर्मू (SC MURMU)
आपेरेन-GODET HADAM
