04/06/2026
शोणितपुर जिला आग्सुका ५ आञ्चलिक समितिको स्वतन्त्र हुने चर्चाबीच ढेकियाजुली आञ्चलिकद्वारा औपचारिक रूपमै स्वतन्त्र भएको घोषणा; जिल्ला प्रतिनिधिहरूलाई पदमुक्त हुन आग्रह
ढेकियाजुली, ४ जुन:
अखिल असम गोर्खा छात्र संघ (आग्सु) को शोणितपुर जिल्ला समितिमा उत्पन्न आन्तरिक विवादले नयाँ मोड लिएको छ। जिल्लाका ५ वटा आञ्चलिक समितिहरू (मिसामारी, गरमारा, ढेकियाजुली, सिंग्री र बरसोला) ले असन्तुष्टि जनाउँदै स्वतन्त्र रूपमा काम गर्ने चर्चा चलिरहेकै बीच, ढेकियाजुली आञ्चलिक समितिले भने एक कदम अघि बढ्दै औपचारिक रूपमै आफूलाई जिल्ला समितिबाट स्वतन्त्र घोषणा गरेको छ।
बिहीबार केन्द्रीय समितिका सभापति तथा मूल-सचिवलाई सम्बोधन गर्दै जारी गरिएको कडा विज्ञप्तिमार्फत ढेकियाजुली आञ्चलिकले नवगठित शोणितपुर जिल्ला समितिको कार्यप्रणालीप्रति गम्भीर असहमति प्रकट गर्दै अब उप्रान्त स्वतन्त्र रूपमा सांगठनिक कार्य गर्ने स्पष्ट पारेको हो।
यसै औपचारिक घोषणासँगै ढेकियाजुली आञ्चलिक समितिले शोणितपुर जिल्ला समितिमा प्रतिनिधित्व गरिरहेका आफ्ना प्रतिनिधिहरूलाई तत्काल पदमुक्त हुन पनि आग्रह गरेको छ।
विज्ञप्तिमा स्पष्ट रूपमा भनिएको छ कि नवगठित जिल्ला समितिसँग अब कुनै पनि प्रकारको सम्पर्क र सहकार्य रहने छैन। यसै सन्दर्भलाई जोड्दै समितिले जिल्ला स्तरीय पदमा रहेका आफ्ना प्रतिनिधिहरू क्रमशः रजत भारद्वाज, करण छेत्री र ललित छेत्रीलाई जिल्लाको जिम्मेवारीबाट तत्काल मुक्त भई आञ्चलिक तहमै सांगठनिक कार्यमा सक्रिय हुन हार्दिक आग्रह गरेको छ।
जिल्लाका जम्मा १३ वटा आञ्चलिक समितिमध्ये ५ वटालाई पूर्ण रूपमा बहिस्कार गर्दै प्रतिनिधि सभा सञ्चालन गरिएकोमा ढेकियाजुली आञ्चलिकले केन्द्रीय पर्यवेक्षकहरूको भूमिकामाथि समेत गहिरो आश्चर्य र खेद प्रकट गरेको छ।
संस्थालाई निहित स्वार्थ र विशुद्ध राजनीतिकरणको शिकार बनाइएको भन्दै, अब उप्रान्त ढेकियाजुली आञ्चलिक समितिले स्थानीय पूर्व आग्सु कर्मी, अभिभावक र सल्लाहकारहरूसँग समन्वय गर्दै आञ्चलिक तहमै स्वतन्त्र रूपले आग्सुको सांगठनिक कार्य गर्ने दृढ निश्चय गरेको छ ।
#आग्सु #शोणितपुर #ढेकियाजुली #अखिल_असम_गोर्खा_छात्र_संघ
