20/07/2020
ভন্টি তই অনন্যা
জীৱন যাত্ৰাৰ এক
অপূৰণীয় সাধনাৰ
উজ্বল নক্ষত্ৰ তই।
দিগন্ত প্ৰসাৰি প্ৰতিজন ককাইকেই
বিচাৰে, এগৰাকী ভন্টিৰ
মৰম-ভালপোৱা।
ঠিক তোৰ দৰে সহজ মনা
তোৰ দৰে আকূলতাৰে পূৰ্ণ এখন হৃদয়
তোৰ দৰে আনক সুখি কৰিব পৰা
নিভাঁজ কন্ঠ হলেটো কথাই নাই।
পিছে,,,,তোৰ দৰে
লাজুকী হ'লেও বেচ্ জমে।।
ঐ ভন্টি,মনত বাৰু পৰেণে তোৰ
সৰুতে যে ৰজা-ৰাণী খেলা।
তোৰ বাবে ওচৰৰ ককাইটিক ৰজা সজাইছিলোঁ,
আৰু তই ৰাণী,মই তোৰ দাদা
বেচ্ জমিছিল।
সেইবোৰ দিনেই বৰ ভাল আছিল অ'
নাছিল মায়া-মোহ
নাছিল দুখ-যন্ত্ৰণা।
আজি ব্যস্ত পৃথিৱীত
ব্যস্ত জীৱন,কাৰো আহৰি নাই,
তই আনক সুখি কৰিবলৈ
নিজক প্ৰস্তুত কৰিছ
আৰু মই
তোৰ আকূলভৰা মৰম বোৰ
বুকুত মেৰিয়াই জীৱন গঢ়াৰ আখৰাত ব্যস্ত।।
তথাপি ভন্টি
তোৰলৈ কিন্তু বৰকৈ মনত পৰে
আন একো দিব নোৱাৰিলেও
দেউতাই মৰম কৰাদি
মায়েই যতন লোৱাদি
মই তোক মৰম দিব পাৰিম
মই তোৰ যতন ল'ৱ পাৰিম।
কেতিয়াবা সপোন সপোন লাগে
তোৰ নাৰীত্বৰ বাবে
আমাৰ মাজৰ পৰা আতৰি যাবি,
এইখন হেঁপাহৰ ঘৰ উদং কৰি।
এদিন আলহী হৈ আহিবি
তোৰ মৰমৰ বাবে হাইৰাণ হৈ
চিঞঁৰি চিঞঁৰি দেউতাই ক'ব
মাজনী তই সুখেৰে থাকিবি,
মায়ে উচুপি উচুপি
বিচনাত পৰি
শিতানৰ গাৰুকে তই বুলি
সাৱতি ধৰিব।
আৰু মই
তোৰ মৰমৰ বাবে
চকুলো মোহাৰি মোহাৰি
অতীতৰ স্মৃতি সোঁৱৰিব লাগিব।।
সচাঁই ভন্টি,তই অনন্যা,
তই হৃদয়ত ফুলি থকা
এপাহি সুগন্ধি ফুল,
ভন্টি তই অনন্যা।।
---জিন্টু মনি বৰা।।
