03/11/2025
নলবাৰীৰ নাট্য মন্দিৰত আদ্য শৰ্মা সদৌ অসম নাট
প্ৰতিযোগিতা।
চিত্ৰ ভাস্কৰ্য শিল্পী দিগন্ত মাধৱ গোস্বামীক ২০২৫ বৰ্ষৰ 'আদ্য শৰ্মা শিল্পী বঁটা' প্ৰদান। :
ঘগ্ৰাপাৰ : ৩ নৱেম্বৰঃ-অভিনেতা,চিত্ৰ ভাস্কৰ্য শিল্পী,কলা নিৰ্দেশক দিগন্ত মাধৱ গোস্বামীক আজি আনুষ্ঠানিকভাৱে প্ৰদান কৰা হয় ২০২৫ বৰ্ষৰ 'আদ্য শৰ্মা শিল্পী বঁটা'।আজন্ম চিত্ৰ-ভাস্কৰ্য শিল্পী,গুৰুজী আদ্য শৰ্মাৰ সজল সোঁৱৰণত অসম নাট্য সন্মিলন,নলবাৰী জিলা সমিতিৰ উদ্যোগত ১ নৱেম্বৰৰ পৰা তিনিদিনীয়া কাৰ্যসূচীৰে আৰম্ভ হৈছে আদ্য শৰ্মা সদৌ অসম নাট প্ৰতিযোগিতা।নাট্যমন্দিৰ,নলবাৰীৰ প্ৰেক্ষাগৃহত দেওবাৰে সন্ধিয়া অনুষ্ঠিত এক গাম্ভীৰ্যপূৰ্ণ অনুষ্ঠানত শিল্পীগৰাকীক উক্ত বটা প্ৰদান কৰা হয় ।উক্ত বঁটাত আছে গামোছা,স্মাৰক,মানপত্ৰ,ফুলাম জাপি আদি।উক্ত বঁটা প্ৰদান কৰে প্ৰবীণ অভিনেতা,চিত্ৰ ভাস্কৰ্য শিল্পী প্ৰমোদ কাকতিয়ে।নাট্য সন্মিলনৰ নলবাৰী জিলা সমিতিৰ সভাপতি তথা নাট প্ৰতিযোগিতা পৰিচালনা সমিতিৰ সম্পাদক দিলজিৎ বৰ্মনে আঁতধৰা অনুষ্ঠানত সভাপতিত্ব কৰে নাট প্ৰতিযোগিতা পৰিচালনা সমিতিৰ সভাপতি ডাঃ কামেশ্বৰ লহকৰে।বঁটা প্ৰদান কৰি ভাষণত প্ৰবীণ শিল্পী প্ৰমোদ কাকতিয়ে ভাষণত কয়,দিগন্ত মাধৱ গোস্বামীয়ে গুৰুজী আদ্য শৰ্মাৰ আদৰ্শ সমাজত প্ৰতিষ্ঠা কৰিব।আদ্য শৰ্মা এগৰাকী শিল্পৰ খনিকৰ আছিল বুলি মন্তব্য কৰি গুৰুজী আদ্য শৰ্মাৰ সৃষ্টিৰাজিক নৱপ্ৰজন্মই আগবঢ়াই নিব লাগিব বুলিও তেওঁ ভাষণত প্ৰকাশ কৰে।বঁটা গ্ৰহণ কৰি দিগন্ত মাধৱ গোস্বামীয়ে ভাষণত কয় যে আজি মই অভিভূত।এগৰাকী বৰেণ্য শিল্পীৰ স্মৃতিত প্ৰদান কৰা বঁটা মই গ্ৰহণ কৰিবলৈ সক্ষম হৈছো।এই ছেগতে মই নাট্য সন্মিলন নলবাৰী জিলা সমিতিক ধন্যবাদ জনাইছোঁ।তেওঁ কয় এয়া
মোৰ জীৱনৰ প্ৰথম বঁটা।এই সন্মানে মোক ভৱিষ্যত জীৱনত
শক্তি যোগান ধৰিব।গুৰুজীয়ে বিচৰা কামবোৰ অনুসৰণ কৰি নতুন চিন্তাৰে সমাজত দি থৈ যাবলৈ চেষ্টা কৰিম বুলি তেওঁ মন্তব্য কৰে।ভাষণত আবেগিক হৈ গোস্বামীয়ে কয়,প্ৰিয় শিল্পী জুবিন গাৰ্গে মোক কৈছিল জীয়াই থাকোতে মূৰ্তি বনাব লাগে।সেয়েহে মই মহান শিল্পী গৰাকীৰ এটি প্ৰতিমূৰ্তি নিৰ্মাণ কৰিবলৈ সক্ষম হৈছো।তেওঁ কয় মই
সুধাকন্ঠৰ সান্নিধ্য লাভ কৰিছিলোঁ এয়া মোৰ বাবে সৌভাগ্য।উক্ত অনুষ্ঠানত নাট্য সন্মিলন,নলবাৰী জিলাৰ কাৰ্যকৰী সভাপতি মানসজ্যোতি শৰ্মা,সাধাৰণ সম্পাদক বুবুল নায়ক,বিশিষ্ট অভিনেতা প্ৰাণজিৎ লোচন শৰ্মা,নাট প্ৰতিযোগিতা পৰিচালনা সমিতিৰ
কাৰ্যকৰী সভাপতি জয়ন্ত হাজৰিকা,সহকাৰী সম্পাদক দিগন্ত লোচন শৰ্মা,পাপৰি কলিতা,ধনেশ্বৰ ডেকাকে আদি কৰি কেবাগৰাকী বিশিষ্ট ব্যক্তি উপস্থিত থাকে।উল্লেখযোগ্য যে নৱপ্ৰজন্মৰ শিল্পী দিগন্ত মাধৱ গোস্বামী এগৰাকী সু অভিনেতা আৰু ভাস্কৰ্য শিল্পী,সংগীত শিল্পীৰ লগতে সুদক্ষ বাদ্যযন্ত্ৰী ৰূপে বহুল সমাদৃত।প্ৰতিভাৱান শিল্পীগৰাকীয়ে তেওঁৰ চিত্ৰ-ভাস্কৰ্য শিল্পকলাৰ অনুষ্ঠান 'পূৰ্ণ শিল্পম'ৰ জৰিয়তে শব্দ-সুৰ আৰু শিল্প-কলাৰ ক্ষেত্ৰখনত অনবদ্য অৱদান যোগাই আহিছে।উল্লেখ্য যে এইগৰাকী শিল্পীয়েই অসমপ্ৰাণ শিল্পী জুবিন গাৰ্গৰ মহাপ্ৰয়াণৰ পিছত তেওঁ কৰকমল আৰু পদযুগলৰ চিহ্ন সংৰক্ষণ কৰিছিল। উল্লেখযোগ্য যে শিল্পী দিগন্ত মাধৱ গোস্বামী সংবাদ জগতৰ সৈতেও জড়িত।ইপিনে সন্ধিয়া সুধাকন্ঠ ড° ভূপেন হাজৰিকাৰ জন্ম শতবাৰ্ষিকী কাৰ্যসূচী উদ্বোধন কৰে অসম বাণিজ্য উন্নয়ন সংস্থাৰ উপাধ্যক্ষ মধুৰাম ডেকাই।অনুষ্ঠানত উপস্থিত থাকে জলসিঞ্চন বিভাগ,নলবাৰী চক্ৰৰ অধীক্ষক অভিযন্তা মনোৰঞ্জন চৌধুৰী,শোনিতপুৰ জিলাৰ আবকাৰী পৰিদৰ্ষক মাধূৰ্য তালুকদাৰকে ধৰি কেবাগৰাকী বিশিষ্ট ব্যক্তি।ভূপেন হাজৰিকাৰ প্ৰতি শ্ৰদ্ধা জনাই গীত পৰিবেশন কৰে কন্ঠশিল্পী ভাৱনা কলিতা,প্ৰশান্ত নাৰায়ণ চৌধুৰী,ৰঞ্জিত শৰ্মা,মনোৰঞ্জন চৌধুৰী আদিয়ে।নিশা ৮ টা নাট্যদলে নাট প্ৰদৰ্শন কৰে।
