28/07/2025
#সদৌ অসম সন্মিলিত ব্ৰাহ্মণ পৰিষদৰ গোলাঘাট জিলা সমিতি গঠন ৷
#বহুধা বিভক্ত ব্ৰাহ্মণ সমাজক একত্ৰিকৰণৰ পদক্ষেপ ৷
#সদৌ অসম সন্মিলিত ব্ৰাহ্মণ পৰিষদৰ গোলাঘাট জিলাৰ জিলা সমিতি গঠনৰ বাবে ২৭ জুলাইত গোলাঘাট নগৰৰ সনাতন ধৰ্ম মন্দিৰ প্ৰঙ্গনত পুলিন শৰ্মাৰ সভাপতিত্বত গোলাঘাট জিলাৰ যথেষ্ট সংখ্যক ব্ৰাহ্মণৰ উপস্থিতিত এখনি ৰাজহুৱা সভা অনুষ্ঠিত হয় । সভাৰ আৰম্ভণিতে ব্ৰাহ্মণ সমাজৰ উত্থানৰ বাবে সেৱা আগবঢ়াই ইহলীলা সম্বৰণ কৰা জ্ঞাত-অজ্ঞাত সকলোৰে আত্মাৰ সদগতিৰ অৰ্থে এক মিনিট সময় মৌন প্ৰাৰ্থনা জনোৱা হয়। সভাত উপস্থিত কেন্দ্ৰীয় সমিতিৰ কাৰ্যকৰী সভাপতি প্ৰমোদ চন্দ্ৰ গোস্বামী, সাধাৰণ সম্পাদক গোপাল পাণ্ডে আৰু শৈৱ মহাসংঘৰ কেন্দ্ৰীয় সমিতিৰ সভাপতি সৌমিত্ৰ গোস্বামীক সম্বৰ্দ্ধনা জনোৱা হয়। চিনাকি পৰ্ব আৰু সম্বৰ্দ্ধনা কাৰ্যসূচীৰ আতধৰে আহ্বায়ক মণ্ডলীৰ ধ্ৰুৱজ্যোতি শৰ্মাই। সভাৰ উদ্দ্যেশ্য ব্যাখ্যা আগবঢ়ায় আহ্বায়ক মণ্ডলীৰ প্ৰশান্ত গোস্বামীয়ে কয় যে অসমত যুগ যুগ ধৰি বসবাস কৰা সকলো ভাষা ভাষী ব্ৰাহ্মণক একগোট কৰাৰ যি প্ৰচেষ্টা সদৌ অসম সন্মিলিত ব্ৰাহ্মণ পৰিষদে গ্ৰহণ কৰিছে তাৰ প্ৰতি আকৃষ্ট হৈ সদৌ অসম সন্মিলিত ব্ৰাক্ষ্মণ পৰিষদৰ গোলাঘাট জিলাৰ জিলা সমিতি গঠনৰ বাবে আজিৰ সভাখন আহ্বান কৰা হৈছে। কেন্দ্ৰীয় সমিতিৰ কাৰ্যকৰী সভাপতি প্ৰমোদ চন্দ্ৰ গোস্বামী দেৱে কয় যে অসমৰ বহু চিন্তাশীল ব্যক্তিৰ অপ্ৰাণ প্ৰচেষ্টাত সদৌ অসম সন্মিলিত ব্ৰাহ্মণ পৰিষদ ২০২২ চনৰ ৩০ অক্টোবৰত শিৱসাগৰত গঠন হৈছিল আৰু ইয়াৰ মূল উদ্দেশ্য হৈছে ভিন্ন মতানৈক্যৰ বাবে বহুধা বিভক্ত হৈ থকা অসমৰ সকলকো ভাষা-ভাষীৰ ব্রাহ্মণ সমাজক সাঙুৰি বৃহত্তৰ ব্রাহ্মণ জাতিক শৈক্ষিক, সাংস্কৃতিক, অর্থনৈতিক, সংস্কাৰীক, বৌদ্ধিক আৰু আধ্যাত্মিক দিশত আগবঢ়াই নিয়া। ব্ৰাহ্মণ জাতিৰ সৰ্বাংগীণ উত্থানৰ বাবে ব্রাহ্মণ জাতিৰ স্বকীয় বৈশিষ্ট্য আৰু পৰম্পৰা অক্ষুণ্ণ ৰাখি ভাৰতীয় দৰ্শন “বসুদৈৱ কুটুম্বকম” মূল মন্ত্ৰক সাৰোগত কৰি অসমৰ বিভিন্ন জাতি জনগোষ্ঠীৰ লগত সমন্বয় স্থাপনৰ জৰিয়তে সদ্ভাৱ সম্প্ৰীতি অটুট ৰাখি সনাতন বৈদিক ধৰ্ম সংস্কৃতিৰ প্ৰচাৰ আৰু প্ৰসাৰ কৰাৰ লগতে ব্ৰাহ্মণ সমাজখনক শক্তিশালী নেতৃত্বৰে আগুৱাই নিয়াৰ ক্ষেত্রত বলিষ্ঠ নেতৃত্ব প্ৰদান কৰাৰ তথা ব্রাহ্মণ জাতিৰ শোষিত, নিষ্পেষিত দৰিদ্ৰ লোকসকলৰ উত্থানৰ বাবে যথোচিত ব্যৱস্থা গ্রহণ কৰা তথা ৰাজনৈতিক, অৰ্থনৈতিক আৰু সামাজিক ন্যায় সাব্যস্ত কৰা । সভাত বিশিষ্ট অতিথি হিচাপে উপস্থিত থাকি শৈৱ মহাসংঘৰ কেন্দ্ৰীয় সমিতিৰ সভাপতি সৌমিত্ৰ গোস্বামীয়ে কয় যে ব্ৰাহ্মণৰ অস্তিত্ব ৰক্ষাৰ অৰ্থে অসমতেই নহয় বৰঞ্চ ভাৰতবৰ্ষৰ সকলো ব্ৰাহ্মণেই সকলো ভেদাভেদ পৰিহাৰ কৰি একগোট হোৱাৰ সময় আহি পৰিছে। তেখেতে সদৌ অসম সন্মিলিত ব্ৰাহ্মণ পৰিষদৰ এই প্ৰচেষ্টাক সলাগ লয়। কেন্দ্ৰীয় সমিতিৰ সাধাৰণ সম্পাদক গোপাল পাণ্ডেয়ে কয় যে অসমৰ ব্ৰাহ্মণ সমাজৰ জনসংখ্যা মোটামুটি ৮ লাখৰ পৰা ১২ লাখৰ ভিতৰত বুলি অনুমান কৰা হয় । এই সংখ্যা অসমৰ মোট জনসংখ্যাৰ (প্ৰায় 3.5 কোটি) আনুমানিক ২.৫% – ৩.৫% হিচাপে ধৰা হয়। থিক একেদৰে সমগ্ৰ ভাৰতত ব্ৰাহ্মণ সকলৰ জনসংখ্যা ৬ কোটিৰ পৰা ৭.৫ কোটিৰ ভিতৰত বুলি অনুমান কৰা হয় । যি জনসংখ্যা ভাৰতৰ মুঠ জনসংখ্যাৰ (প্ৰায় ১৪০ কোটি) ৪% – ৬% ৰ ভিতৰত হ’ব পাৰে বুলি অনুমান কৰা হয় যদিও ই কোনো শুদ্ধ তথ্য ভিত্তিক নহয় । শুদ্ধ ৰূপত জৰীপ হ'লে এই সংখ্যা তিনি-চাৰি গুণলৈ বৃদ্ধি পোৱাৰ সম্ভাৱনা আছে। সেই বাবে সদৌ অসম সন্মিলিত ব্ৰাহ্মণ পৰিষদৰ জিলা সমিতি সমূহ সমগ্ৰ অসমতে গঠন হোৱাৰ লগে লগেই জৰীপৰ জৰিয়তে ব্ৰাহ্মণৰ প্ৰকৃত জনসংখ্যা আৰু আৰ্থসামাজিক সমীক্ষা চলাবলৈ এক পৰিকল্পনা যুগুত কৰা কথা উল্লেখ কৰে যাৰ ভিত্তিত অন্যান্য জাতি জনগোষ্ঠীৰ দৰেই অসমৰ ব্ৰাহ্মণ সকলৰ সৰ্বাংগীন উত্থানৰ বাবে ব্ৰাহ্মণ উন্নয়ন পৰিষদ গঠন কৰিবলৈ চৰকাৰক হেঁচা প্ৰয়োগ কৰাৰ লগতে ব্ৰাহ্মণ সকলৰ সৰ্বাংগীন বিকাশৰ বাবে চৰকাৰৰ দৃষ্টি আকৰ্ষণ কৰাত সহায়ক হ'ব। পৰিষদৰ গোলাঘাট জিলা সমিতি গঠনৰ আলোচনাত অংশ গ্ৰহণ কৰি সভাত উপস্থিত ধ্ৰুৱজ্যোতি শৰ্মা, প্ৰশান্ত গোস্বামী , কুলদীপ বৰদলৈ, বিতোপন গোম্বামী, পুলিন শৰ্মা, অচ্যুত শৰ্মা, ভাস্কৰ জ্যোতি শৰ্মা, ড০ সুমিত কুমাৰ শৰ্মা, চন্দন গোস্বামী, অনিল শৰ্মা বৰদলৈ, অমৰজিত বৰদলৈ আদিয়ে বক্তব্য আগবঢ়াই সন্মিলিত ব্ৰাহ্মণ পৰিষদৰ গোলাঘাট জিলা সমিতি খন গঠন কৰাৰ পোষকতা কৰে। পুলিন শৰ্মা দেৱক সভাপতি, অনিল শৰ্মা বৰদলৈ দেৱক কাৰ্যকৰী সভাপতি আৰু বিতোপন গোস্বামীক সম্পাদক, ধ্ৰুৱজ্যোতি শৰ্মা দেৱক মুখ্য উপদেষ্টা আৰু প্ৰশান্ত গোস্বামীক উপদেষ্টা হিচাপে লৈ এখন শক্তিশালী সমিতি গঠন কৰা হয়। ৰাজহুৱা সভাই পৰৱৰ্তী সময়ত সন্মিলিত ব্ৰাহ্মণ পৰিষদৰ প্ৰতি আনুগত্য থকা জিলা খনৰ অন্যান্য উপযুক্ত ব্ৰাহ্মণৰ সংযোজনৰ জৰিয়তে গোলাঘাট জিলা সমিতি খন অধিক শক্তিশালী কৰাৰ মতামত পোষণ কৰে। কেন্দ্ৰীয় সমিতিৰ সহকাৰী সম্পাদক নৱ জ্যোতি শৰ্মাই শলাগৰ শৰাই আগবঢ়াই ৰয় সভাখনত অনুষ্ঠিত কৰাৰ সহায় কৰাৰ বাবে সকলো লৈ কৃতজ্ঞতা জ্ঞাপন কৰে। সভাপতি দেৱে অনাগত দিনবোৰত পৰিষদৰ লক্ষ্য উদ্দেশ্য সফল কৰি তোলাৰ ক্ষেত্ৰত সকলোৰে সহযোগিতা কামনা কৰি সভাপতিৰ মন্তব্য আগবঢ়ায় ৷
( #গোলাঘাটৰপৰা প্ৰকাশ শৰ্মাৰ ৰিপৰ্ট Today )
