https://www.facebook.com/234788533053367/

The Arleng Daily, Diphu, Karbi Anglong, Diphu (2026)

12/08/2026

Dokmoka Junior Basic LP School along Lank kanglum et ajok osomar atum kesung
Dokmoka, August 12 (Thomas Terang): Dokmoka ahithi adung het kedo Dokmoka Junior Basic LP School along Lank kanglum et ajok loh kacharli a klimsomar atum kacharli ahem kedo athai kave pen Klobor Hydraulic Car Washing a kulat along si osomar atum aphan loh than pon nangkok lo.
Bangso Dokmoka Junior Basic LP School lake,kedamtang 1951 aningkan si amahang pathek ponlo,bangso a School lake,Samelangso Block angkang si kaparlo pon lapen non amat bangso School along kacharli a klimsomar bang 85 sose do lapen thanbangphi atum bang 4 do. Bangso a School along lank kanglum lake,pineng aningkan chot kali si aningkan vang ta Lank kanglum pen osomar lapen thanbang atum kasiksak thep*k chetong nang ver lo pusi Dokmoka Junior Basic LP School Headmistress Renu Teronpi ahin pen lamthe chepaklang pon si KAAC abutung jasemet KAAC CEM anparta MLA Dr.Tuliram Ronghang aphan prapjin pen School ahem kimi kim pon si Lank kanglum pen nang pajok pon nangji lapen School Boundary Wall, School a Donri nangpi pon vek nangji pusi loh thanbang atum lapen klimsomar api apo atum pen kachoningri pado pon rinti.

12/08/2026

ASDC lapen arisangho a*ong atumta I-Day talon dunji, bonta ning karong pen kali: Sonasing Terang
Diphu, August 12: Non kevangji Paipai niphai 15 arni India Independence Day pining 2026 tame Autonomous State Demand Committee (ASDC) Karbi Loh-Charli Asong (KSA), Karbi Nimso Chingthur Asong (KNCA) lapen ASDC Youth Front atum tame talon dunji bonta ning karong mate ning kangsam penle katalon dunji kali athe Karbi Anglong lapen Dima Hasao District arat akar-i Article 244(A) chunche lang lasi Karbi Anglong lapen Dima Hasao arat ke kejokvan binong kalilang apotsi ning karong penke talon dun thekthe detpo pusi Paipai niphai 11 arni ASDC asaihem along pherangke amei kangni ahut pherangke atum athengno ASDC ameiphu Sonasing Terang pen ningje pon.
Pini bangso pherangke amei along ASDC ameiphu Sonasing Terang, ASDC rap Kongchunbang Daniel Teron, KNCA ameiphi Maikon Rongpharpi, KSA pachethang chunbang Longbirsing Tisso, ASDC Youth Front Premson Bey atum chetong dun.

12/08/2026

Umswai PVN M.E School asarnung nonp**a rakthang lang!!
Ullukunchi, August 12 (Hemari Bongrung): West Karbi Anglong ahavar Amri MAC Constituency angkang local MAC mate KAAC EM D. Uphing Maslai ahem adung het kedo Umswai PVN M.E School ahem asarnung ke nonp**a rakthang si dolang.
Kachinidun atengke kedamtang Jangmipo achiklo malom tomon-herei kevang pen ajok la*o aschool asarnung ke pavakprot lo. Hala*o arni pen nonp**a kasele pu kavedet ajok loh kacharlidun atum lapen thanbang atum tame kisung pho nanglo.
Labangso aschool asarnung kerak lapen kisung kepho aphuthak nonp**a Education asaikhi atum birta ke-endam abang avelang pusi Umswai PVN M.E School Managing Committee ameiphu ahin pen than nang pachini dun.
La*on ahut kacharli atum kesung thek long si inut lohthanbangphi amethang jongjung akhi pen tirpal namsi dip ponpen osomar aphan abin along pado longlo.
Akele si kisung lo apotsi prapjin pen sorkar atum kaselam piponji aphansi kachoningri padopon.
Lapu anat labangso aschoo along headmaster tame kaprek adim kacheterek ajok penang akesung dolo. Lasi akimi headmaster prapjin pen ketoi thuji aphanta alanglitum pen choningri pon.

12/08/2026

Delhi along Team Karbi Anglong abutung
Inglong alongri apharman prekjam a*ongja atum aphan kachetong dam
Diphu, August 12: Team Karbi Anglong a*ongjapo KAAC CEM anaparata MLA Dr. Tuliram Ronghang lapen MP Amarsing Tisso atum japonsi prekjam Karbi Anglong a*ongjapo atum nonmalom Delhi arongsopi along dodamklung si Karbi Anglong apharman prekjam a*ongja atum aphan chetong dam pen chingki-chethan pon.
Karbi Anglong a*ongja atum kedamtang Paipai niphai 08 arni Union Minister Kiren Rijiju aphan chetong damsi Karbi Honghari adhorom apharman Langvoku along a*on-a*on kachingthur asai keklemji aphuthak chingki-chethan damlo.
Pini abangke Union Road Transport & Highways minister Nitin Gadkari aphan chetong damsi Karbi Anglong, West Karbi Anglong lapen Dima Hasao district angkang kacheleng atovar aphuthak pinpur aloh pajir ponsi kachingki-kachethan pado ponlo.
La*o ahut CEM lapen arisangho atum pen minister aphan kapachini ponke, inglong adistrict kethom avaikang kachingthur, beha-bepar, tourism lapen chokam amo kapachingthur dun thekji aphan kemesen kacheleng atovar kenangsot pu matha ponsi CEM Dream Project along sitame parlo ponlo. La*onsi National Highway 627 Dharamtul-Panimur (122Km) lapen Panimur-Harangajao (122Km) pangrumpet kilometre 244 ke inglong alongri aphan kenangsot atovar apotsi kaselamji aphan cherap dun nangji pusi minister aphan choningri dunlo.
Lapu anat NH 627 alam aphuthak abangke MP Amarsing Tisso tame Lok Sabha along lam paklang dunlo lapen alangli kapaklang dun alamthe aphuthak lamvoi abangke kedamtang Paipai niphai 06 arni ministry ahinpen lamvoi tame piponlo. Lamvoi lake ministry ahinpen DPR kesik-kedang asai cheng ponsi klembom lapen moning 2027 aningkan Therepo achiklo angbong ketangji aphansi ning chethelo pusi lamvoi piponlo.
Lasi DPR kapatangji, kedeng ponji lapen sai keklem kechengji aphan tender sitame kapaklang ponji aphansi CEM ahinpen minister aphan choningri tekang pusi chinidun.
La*onthakthaksi kedamtang Paipai niphai 10 arni abangke Union Home Minister Amit Shah aphan ta chetong damsi ajak dingklui pen Karbi Anglong lapen Dima Hasao alongri angkang kedo arat akar-i Indian Constitution Article 244(A) papleng ponra, Autonomous State keseng ponji aphuthak ardi piponsi chingki ponlo. Anchot kalisi Constitutioin (125th Amendment) Bill, 2019 kapachun pon serakji aphan chingki lin pon. Anchot kalisi non amat labangso a Bill koloso andeng ansi kedo loma p**a alanglitum pen HM aphan arju patini pon.
Constitutioin (125th Amendment) Bill, 2019 ke jasemet 6th Schedule alongri aphanke kenangsot thedung binong. Atheke rong-rup ajo kangthur pon avarsai revenue long dunpo. 16th Finance Commission pen ajok rong ajo kapachingthur asai keklem ponji aphan kethedung akejoivan dopo.
Ajak dingklui pen rat akar-i Indian Constitution Article 244-A ateng pen Autonomous State keseng ponji aphan kachingvai andeng paphrang pon onangji. Hemprek kehang a*ong lapen state lapen sorkar angbong chingki-chingvai ponsi jakong nangkepi ateng Autonomous State mahang pathek pon nangpo pusi Home Minister aphan CEM Dr. Tuliram Ronghang lapen arisangho atum choningri dam pusi chinidun.
Anchot kalisi Karbi Anglong ahavar kachingthur asai keklembom kapatang pon thekji aphan kuti 1000, anparata renewable energy, Hamren Town water supply, kacharli amo, jutang-jubat amo, varmon keraikomji lapen tourism ahinthu kapachingthur pon thekji aphan pura lakh 9,058.33 atangka kehang pon aphuthak sitame CEM pen HM aphan alam parno ponthu. Article 244(A) kapachun pon pen chenglok kaprek-kaprek kachingthur asai keklem pon heihui anta Karbi Anglong lapen Dima Hasao arat aphanke kenangsot binonglo. Rat akar-i ateng pensi lahai akengkem chejor ponlo pusi CEM pangdak pon.
Lapu anat Team Karbi Anglong abutung atum patumi Paipai niphai 10 arni Union Civil Aviation Minister Ram Mohan Naidu Kinjarapu aphanta chetong damsi MoS 2021 Clause 5.1 (Annex-II) ateng pen Karbi Anglong along Greenfield Airport kekim ponji aphuthak chigki-chingvai pon. Alanglitum labangso aphuthak penang an alam chingki pondet aphi mo nangklang ke survey team atum aphan nangtoipo pusi minister pen lamchak chepi ponlo. Jongsi Karbi Anglong along Greeen Airport dolo pulote lata isi rat akar-i kichun angthek si manpo.
Greenfield Airport kaselamji aphan KAAC ahinpen Borlangpher ahavar along kadokave 1,070.95 hactare an alongle pajir ponlo. Sitame kaprek-kaprek ahinthu kamatha dam pen ajok Kheroni along tame adunthu alongle abangke sikpi ponthulo. Jongsi Kheroni alongsi airport dolo pulote ladak ke Karbi Anglong, West Karbi Anglong, Dima Hasao, Hojai, Nagoan district arat aphan sitame kethedung ale lapen akejoivan dopo. Labangso airport pen ajok havar arlo tourism ahinthu sitame kapaphrang dun thekji aphan kachecharmek do.
La*onsi pini Paipai niphai 11 arni abangke labangso abutugn atum Union Tribal Affairs Minister Jual Oram aphan chetong damsi karbi Anglong arlo, inglong a*o akhei atum stiame kacharli ahinthu, seh kachelang amo anchot kalisi inglong a*o atum kapaphrang dun thekji aphuthak chingki-chingvai lin pon. Dharti Aaba Janjatiya Gram Utkarsh Abhiyan (DA-JGUA) pen ajok inglong a*o atum residential school avarsai kelong dunbomji aphansi chingki lin pon. Anchot kalisi Karbi Anglong arlo Howraghat, Phuloni, Silonijan lapen Dongkamukam along Eklavya Model Residential School avarsai kepipon apot ta minister aphan akero pipon. Lasi non puthot Karbi Anglong lapen West Karbi Anglong avaikang along hum 22 an EMRS School kepiponthuji aphanta choningri pon. Anchot kalisi Boys & Girls Hostel hum 66 an kepiponji aphanta CEM pen chonigri pon.
La*onsi Karbi Anglong arlo Dongkamukam, Diring, Langvoku, Parkup Pahar, Disama No. 2 Khorsing Terang, Rongmongve, Samelangso, Gharialdubi, Mrakondoi Guri, Arlong Chuhu, Sildharampur, Langsoliet, Rongthubong pen chenglok kaprek-kaprek adim along tame 10-Beded hospital kekim ponji aphanta choningri tekang pusi chinidun.

12/08/2026

Tove ajo jirlo apor ahut tomon arve kethep*k ajok Diphu Dilaji (Birla) malom penang an hem kaheno dun dolo. Penang an adim thengpi aro kelok, kepur dolo. Penang an ahem asarnung ke-oi ponta thek long.

11/08/2026

Zonal KYF atomon kejap cheng pon tanglo.

Borjan KCS Zone atum nonhetjong chingrum ponsi ZKYF apharman chingvai ponpen tirikam amei seng ponlo lapen arpu sitame chepek pon tanglo.

11/08/2026

Sivasagar ahavar Nepalikhuti pu adim along lang kethe pen ajok kisung kepho atum aphan Bokajan Mandal BJP Relief Team atum local MAC mate KAAC EM Madhurya Dhekial Phukan japonsi kedamtang Bhomkuru arni a*o-a*on kerap ahormu pajir dam.

11/08/2026

Bokajan along kheibarim arani katalon pon
Hanjanglangso/Bokajan, August 10: Patumi Paipai niphai 09 arni pirthe adangpi prekjam ahavar along International Day of the World indigenous People's mate somindar kheibarim atum arani katalon pon a*onthak haksi Karbi Anglong eplang pen Bokajan Jinbaba Higher Secondary School along tame alir-acham pensit alon pon.
United Tribal Coordination Front of Assam kachepatirpi pon along Indigenous Forum Assam (IFA) lapen North East Indigenous People`s Forum ( NEIPF) atum cherap cheto dun pen World Indigenous People`s Day talon pon lo. Bangso along alohi aman pen Lorin Jyoti Gogoi, Barim Engti, Litsong Rongphar atum pen danglok pinang an man kedo kethe keding atum chetong dun si mai ardi pidun. Mai along lamthe kethan pon ke Karbi Anglong arlo keong dung kedobarim akhei do p*k. La*o angbong pensita khei barim hijan angbong kachingki kachethan, kachingki kachingvai lapuson ave.Jongsi khei barim hijan angbong kachingki kachethan ave lepute Karbi Anglong arlo along prekjam akisung pen kachepajok ji aphan katikuk dokok ji. La*o apot si khei barim atum angbong ke isivet kedo pen si kisung keboi kedoanta klem dam pen pachun un ji pusi than. Karbi Anglong arlo along kedo khei barim atum ansi Longle phelang kacherai un ajakong ta chelong ji. Methang kachelong nang ji kedoan ajakong ta kachehang ji along ta khei barim atum cherap cheto pet si unji p**a ningje pon.
Assam angkang pen Karbi, Assamese, Boro, Mising pen akaprek kaprek akhai atum ta labangso amei along chetong dun pen kevangji arni khei barim hijan kopuson pensi kaike bidi sore kachipi ponthek pen kisung keboi doan along cherap cheto pen kachepajok ponthekjima aputhak sitame ardi doklong pen lamthe chepaklang pon rinti.Bokajan along kheibarim arani katalon pon
Hanjanglangso/Bokajan, August 10: Patumi Paipai niphai 09 arni pirthe adangpi prekjam ahavar along International Day of the World indigenous People's mate somindar kheibarim atum arani katalon pon a*onthak haksi Karbi Anglong eplang pen Bokajan Jinbaba Higher Secondary School along tame alir-acham pensit alon pon.
United Tribal Coordination Front of Assam kachepatirpi pon along Indigenous Forum Assam (IFA) lapen North East Indigenous People`s Forum ( NEIPF) atum cherap cheto dun pen World Indigenous People`s Day talon pon lo. Bangso along alohi aman pen Lorin Jyoti Gogoi, Barim Engti, Litsong Rongphar atum pen danglok pinang an man kedo kethe keding atum chetong dun si mai ardi pidun. Mai along lamthe kethan pon ke Karbi Anglong arlo keong dung kedobarim akhei do p*k. La*o angbong pensita khei barim hijan angbong kachingki kachethan, kachingki kachingvai lapuson ave.Jongsi khei barim hijan angbong kachingki kachethan ave lepute Karbi Anglong arlo along prekjam akisung pen kachepajok ji aphan katikuk dokok ji. La*o apot si khei barim atum angbong ke isivet kedo pen si kisung keboi kedoanta klem dam pen pachun un ji pusi than. Karbi Anglong arlo along kedo khei barim atum ansi Longle phelang kacherai un ajakong ta chelong ji. Methang kachelong nang ji kedoan ajakong ta kachehang ji along ta khei barim atum cherap cheto pet si unji p**a ningje pon.
Assam angkang pen Karbi, Assamese, Boro, Mising pen akaprek kaprek akhai atum ta labangso amei along chetong dun pen kevangji arni khei barim hijan kopuson pensi kaike bidi sore kachipi ponthek pen kisung keboi doan along cherap cheto pen kachepajok ponthekjima aputhak sitame ardi doklong pen lamthe chepaklang pon rinti.

11/08/2026

Recho alamthe aman pisi Census along “Honghari” pusi chetok dun nangpo: KHA, KHSA, KHYA
Diphu, August 10: Census 2027 along dhorom amen ke "Honghari" pusi chepi dun nangpo, anparta Rong Arak pen Karbi Recho kapangdak tang alamthe patepek pera methang a Richo aphan man kachipi akenangsot. Bangso aphuthak Karbi Honghari Amei, Karbi Honghari So-Arlo Amei lapen Karbi Honghari Youth Association atum pen pherangke amei damtang niphai 7 arni phasi lamthe peklang pon.
West Karbi Anglong Hamren Rongsopi Karbi Lammet Amei asaihem along Paipai niphai throksi arni KHA, KHSA, KHYA pen pherangke amei ingni si Karbi akhei atum methang a Nim mate Dhorom amen Census along kachipi dunji aphan anparta kevangji arni apharman Dhorom amen kepathirthip unji aphan non malom prekjam a birta achatai along pen kaprek kaprek atum pen lamthe kachepaklang pon prekjam thekpon longsi lamthe peklang pon. Sonsi ihin atum pen abang "HEMPHU NIM " Ihin atum pen abang "BARITHE" lapuson kachepaklang pon dolo. Tangte non Karbi akhei arat kopi lo ahokpet Dhorom amen kachipi dun nangji ? Kolo abang alamthe si ahok pu matha dun thip nangpo ? Non apor Dhorom amen kachipi dun nangji pu ahut kaprek kaprek amen kepaklang keong thu lake methang akhei isi angbong Dhorom amen ta kachepamanghu a*on mandet deji ma ? Sonsi Paipai niphai throksi arni KHA, KHSA, KHYA atum pen pherangke amei phasi Dhorom amen ahokpet thangnat matha the pin pen "Honghari" pusi chepi et nangpo pu lamthe peklang ponthu.
Pherangke amei pen alanglitum kepaklang ponthu alamthe, "Honghari" lake Hako phusar phisar ove koan lone akai ahut penta ilitum akhei along Cho-arkli phijo atum ke bangso amen si chethan lo lapen bang kaprek atum sitame ilitum akhei adhorom amen ke " Honghari" pusi nangchini lo. Lasi non apor ilitum sitame bangso atengsi do nangpo pusi pachini pon. Lapen ilitum akhei along aphrang phrang ahut ke Cho-arkli phijo pen akardom ansi dochot, bonta non ke prekjam akardom lapuson sitame do, apotsi kekroi sitame prekjam ta dokok lo. Bonta la*o along Arnam aphan kekroi lake madu ta chekhang un eh sitame ilitum Cho -arkli phijo aKarbi an ke ilitum methang adim Karbi Anglong pen kaprek angtan ledo atum sitame Nim mate Dhorom amen hako pen ateng chepavir nangne, apotsi ilitum ke "Honghari" pusi chetok et nangpo pusi choningri pen pachini pon. Lapen kedamtang Paipai niphai kethom arni Ronghang Rongbong Rong Arak along Rongkhang, Chinthong lapen Amri kadokave Lindok bang sirkep angbong chedonsar pen kepaklang pon alamthe ilitum patepek nangne. Athe ilitum methang a Richo aphan man kachipi akenangsot. Lasi ilitum a Richo pen Dhorom aputhak lamthe peklang pon tangdet aphit ilitum chehili dunsai abangke chokche detji apotsi Richo pen kepaklang pontang ateng pathir dun vet lonang pusi pherangke amei pen choningri pon.

11/08/2026

Private School athanbang atum aphan EM Richard Tokbi kachinvailin
Diphu, August 10: Pini niphai 10 arni Karbi Anglong Autonomous Council (KAAC) along Education EM Richard Tokbi lapen Karbi Anglong along angkang Private School kedo an athanbang atum aphan phasi Council Secretariat Meeting Hall along mei ingni linpon.
Mei kangni aphuthak EM Richard Tokbi ahinpen pherangke atum aphan kapachini pon ke, KAAC angkang kedo Private School along an sitame Rights to Education Act. 2009 lapen New Education Policy 2020 aron ateng pen Private School along sitame aron deng pon nangpo. Lapen Private School along sitame apun achak kechoklim a thanbang atum aphansi thanbang asai pek ponchot nangji. Anparata School along mesen kejun alang, barpi barso kachiti adim lapen kapathu aklam haihui osomar atum varsai long nangji. Private School charli bom osomar atum Aadhar Card pen chenglok kechoklim document kave lapen api-apo atum kenangsot document kave haihui aphuthak sitame koson pensi kepachok ponjima avarsai keklem ponji aphan sitame thanbang atum pen chingki chingvai pon lo. Lapen Goverment School lapen Private School angbong kaiketa kacherap kedoji aphan chingki chingvai pon lo pusi ningje.

The Arleng Daily

12/08/2026

12/08/2026

12/08/2026

12/08/2026

12/08/2026

11/08/2026

11/08/2026

11/08/2026

11/08/2026

11/08/2026

Address

Website

Alerts

Shortcuts

Share

Category

Listing takedown request