20/09/2025
Editorial....
The Arleng Daily, dated 20th September, 2025.
Bepar keklem-i dunrong abang kalisi
akemeji aphansi klemdun nangji
Monit inut ephong pirthe kevang ke keletlepin, kechokche chepin abang madu ta ave. Sitame kechokche keklem pen kachepachok thu lapen kachepakengthu abang henlo kenangsot nei ke. Lasi Areng kelok atum alam pen pulo “failure is the piller of sucess” pu. Oso rongro kijui abang anta chinilo, patumi-pini Karbi Anglonglong chot kalisi Assam angkangpi a social media along kopi alamsi kachethangphlup mate viral bom ma puke. Labangso kachomatha vek, kephovek atum anta monit kangthimlim atum saide pinak apotsi kachomatha ahutke chomatha detlo tema, sitame non alam klangham aphi abangke chechak nodak khangjangpo. Lasi monit hijan lapuchot kalisi, Karbi hijan pu matha ponra, labangso alam vek abangke pachardon dunthu pen social media achatai along bepar klem-i dunde detsi keme.
MLA Bidyasing Engleng, inut arleng kesar anchot kalisi Assam eplang ratchari (political) alongke inut keklangdong abang. Aphai kijumhek Karbi akhei along alangli tame ratchari apirthe alongke inut kichun lapen ale kelong abanglo. Alangli ahok-ahak aning kaheno kamatha kedo abang pu a*onte la*o angdeng anke le dunde lapen komantu lone pensi thut etpo. Sitame MLA keman ‘hattrick’ kelong abanglo. Non an alangli MLA phurun (term) 4 lake 2001, 2006, 2011 lapen 2021 ahut chepahai ponlo. Anchot kali, KAAC along tame 1979-1981, 1893-1985, 1986-1989 an Chief Executive Member (CEM) ta kemantang abangphu. Lapu an aningkan angbong ningke angnim-anghong kavepin abangphu non arta kacherlen ahut ting-ai si lapuson keklang abangke ladak komatne kangvui atum dovek lo pu puthip un.
Ahok ta ahok, arloso amethang angho pen amatsi “alangli ning kehang penle la*on kachomatha dun kali, alangliphan inut Pitor Tisso pu abangphu si ketoi lapen Pitor Tisso along Augustine Kramsa ta kacherap dun do, latum labangso viral video pen ajok lakh 30 an atangka ta MLA along pen van etlo” pu heihui alam si chekobir lo. Bonta arloso la*o alam chekobir det pen aphikeng amatsi Pitor Tisso lapen Augustine Kramsa atum tame la*o along thangta kacherap dun ave, alanglitum aphanke kapatip pontap lapen anong kejo chot pusi lamklar chepi rintilo. Tangte non abangke ahok alam kapatiniji, komatsi kechokche vek loma pu kapangthekji aphanke law & order aphansi arpu hodai detsi asai pacheklem nangpo.
Ajat punon, non athepi alam abangke kemesen alam pen mute kaheno alam si kachethang keprap pu atengsi ningkan ko-an lone ratchari achatai along angkrin-anghong kavepin abangphu, halapu arlosohei tame inut ovekimi lang sitame malomsovetsi latum aphanke amek kecharji angkrak anta avepin ansi Karbi Anglong arat kevi. Alam abangke ahok lo tahai, sitame ladak along kaprek-kaprek kapatip dun varet ra kehang rapjo abangke chokche.
Kai kimi lapen social media, IT akai pinak apotsi ongdung atum photoshop, AI akerap pen ajok latum banghini aphuthak kaheno lapen ningdok meme kalipin arjan patip dunsi meh akar along jangthu karkloktang chor dun pen me ade pathe ponlo. Arlosohei kachekobir ateng pulote alangliphanke Pitor Tisso lapen Augustine Kramsa atumsi kachojor pu. Non abangke rat thurpaksi la*o alamki pen ajok bepar klem-i lo. Social media, jasemet pen Facebook along follower kachepakamji; like, share, comment kelong kachepa-ong ra Meta company along pen tangka kachepalongji pu aphan matha ponsi meme-henono arjan patip dun pen kapachingvuikung ra social media along kerik dunphrok abangke chokche lapen lake amek alongsi ingti tei dunrong lo.
