https://www.youtube.com/channel/UC_hd6_d57ieXL8CpaQ-xo3w

Metro news pulse, kalamassery, Eranakulam (2026)

26/08/2026

‘ക്ലീനല്ല’ കാര്യങ്ങൾ! ഓണക്കാല റെയ്ഡിൽ കൊച്ചിയിലെ 33 ഭക്ഷണ സ്ഥാപനങ്ങൾ കുടുങ്ങി
കൊച്ചി: ഓണസദ്യ കഴിക്കാൻ ഒരുങ്ങുന്നവരേ, ഒന്ന് സൂക്ഷിക്കുക! ഓണത്തിന് മുന്നോടിയായി നഗരസഭ നടത്തിയ വ്യാപക ഭക്ഷ്യ പരിശോധനയിൽ ഞെട്ടിക്കുന്ന കണ്ടെത്തലുകൾ. ഓണസദ്യ തയ്യാറാക്കി വിതരണം ചെയ്യുന്ന ഏഴ് സ്ഥാപനങ്ങൾ ഉൾപ്പെടെ 77 കേന്ദ്രങ്ങളിൽ നടത്തിയ റെയ്ഡിൽ 33 കടകൾ വൃത്തിഹീനതയുടെ പേരിൽ കുടുക്കിലായത്.
ആരോഗ്യവകുപ്പ്, ഫുഡ് സേഫ്റ്റി, പൊലീസ് എന്നിവരുടെ സംയുക്ത സ്ക്വാഡാണ് വൈറ്റില, കടവന്ത്ര, കതൃക്കടവ്, പാലാരിവട്ടം, കലൂർ, ബ്രോഡ്‌വേ, തമ്മനം, മേനക, ഏളംകുളം, ബോട്ട് ജെട്ടി, എറണാകുളം ടൗൺ അടക്കമുള്ള സ്ഥലങ്ങളിൽ ഇറങ്ങിയത്. തട്ടുകടകൾ മുതൽ ഹോട്ടലുകളും ബേക്കറികളും ഷവർമ, കുഴിമന്തി കടകളും വരെ പരിശോധനാ വലയത്തിൽ പെട്ടു.

എന്തൊക്കെയാണ് കണ്ടെത്തിയത്?
പഴകിയ സാധനങ്ങൾ, നിരോധിത കളറുകൾ, ലേബൽ പോലുമില്ലാത്ത ഭക്ഷണസാധനങ്ങൾ, ഹെൽത്ത് കാർഡ് ഇല്ലാത്ത ജീവനക്കാർ, ലൈസൻസ് ഇല്ലാത്ത കടകൾ, ശാസ്ത്രീയമല്ലാത്ത മാലിന്യ സംസ്കരണം - ഇതൊക്കെയായിരുന്നു പരിശോധനയിൽ പുറത്തുവന്നത്. 33 കടകൾക്ക് ആകെ 73,500 രൂപ പിഴ ചുമത്തി, ഗുരുതര വീഴ്ച കണ്ടെത്തിയ ചിലത് ഉടൻ അടപ്പിക്കുകയും ചെയ്തു.

കുടിവെള്ളത്തിലും അപകടം
കുടിവെള്ളവും സുരക്ഷിതമല്ലെന്നാണ് കണ്ടെത്തൽ. ശേഖരിച്ച 53 സാമ്പിളുകളിൽ 29 എണ്ണത്തിലും കോളിഫോം ബാക്ടീരിയയുടെ സാന്നിധ്യം സ്ഥിരീകരിച്ചു - അതായത്, പല കടകളിലെയും കുടിവെള്ളം കുടിക്കാൻ പോലും സുരക്ഷിതമല്ലായിരുന്നു എന്നർത്ഥം.

തുടർ നടപടി
ഭക്ഷണം കൈകാര്യം ചെയ്യുന്നതിൽ ശ്രദ്ധിക്കേണ്ട കാര്യങ്ങൾ വിവരിക്കുന്ന ബോധവത്കരണ പോസ്റ്ററുകൾ എല്ലാ കടകളിലും പതിപ്പിച്ചു. ഷവർമ, കുഴിമന്തി, പാൽ ഉൽപ്പന്നങ്ങൾ കൈകാര്യം ചെയ്യുന്നവർക്ക് പ്രത്യേക നിർദേശങ്ങളും നൽകി. ഓണം സ്പെഷ്യൽ ഡ്രൈവിന്റെ ഭാഗമായി ജില്ലയിലുടനീളം സമാന പരിശോധനകൾ തുടരുമെന്ന് അധികൃതർ മുന്നറിയിപ്പ് നൽകിയിട്ടുണ്ട്. ഓണത്തിന് പുറത്തുനിന്ന് ഭക്ഷണം കഴിക്കുന്നവർ ഇനി ഒന്നുകൂടി ചിന്തിക്കേണ്ട സമയമായി എന്ന് ചുരുക്കം.

26/08/2026

പകൽ വൈദ്യുതി നിരക്ക് കുറയും, രാത്രി കൂടും: കരട് മാർഗനിർദേശം പുറത്ത്
തിരുവനന്തപുരം: സംസ്ഥാനത്ത് വൈദ്യുതി നിരക്ക് ഘടനയിൽ സമൂലമായ മാറ്റത്തിന് വഴിയൊരുക്കുന്ന കരട് മാർഗനിർദേശം റഗുലേറ്ററി കമീഷൻ പുറത്തിറക്കി. അടുത്ത അഞ്ച് വർഷത്തേക്കുള്ള നിരക്ക് പരിഷ്കരണ പദ്ധതിയുടെ ഭാഗമായാണ് ഇത്. പകൽ സമയത്തെ വൈദ്യുതി ഉപയോഗത്തിന് കുറഞ്ഞ നിരക്കും, രാത്രി പീക്ക് സമയത്തെ ഉപയോഗത്തിന് ഉയർന്ന നിരക്കും ഈടാക്കാനാണ് പ്രധാന നിർദേശം. ടൈം ഓഫ് ഡേ (ടി.ഒ.ഡി) മീറ്റർ ഘടിപ്പിച്ചവർക്കായിരിക്കും ഈ രീതി ആദ്യം ബാധകമാവുക. കെ.എസ്.ഇ.ബി സ്മാർട്ട് മീറ്റർ വ്യാപകമാക്കാൻ തീരുമാനിച്ച സാഹചര്യത്തിൽ, ഭാവിയിൽ കൂടുതൽ ഉപഭോക്താക്കൾക്ക് ഇത് ബാധകമാകും.

ഫിക്സഡ് ചാർജിലും മാറ്റം
കണക്ട് ചെയ്ത ലോഡിന്റെയോ ഉയർന്ന വൈദ്യുതി ആവശ്യത്തിന്റെയോ അടിസ്ഥാനത്തിൽ ഫിക്സഡ് ചാർജ് നിശ്ചയിക്കാമെന്ന നിർദേശവും കരടിലുണ്ട്. കിലോവാട്ടിന് നിശ്ചിത നിരക്ക് എന്ന നിലയിലേക്ക് ഫിക്സഡ് ചാർജ് മാറുന്നത് ഉപഭോക്താക്കൾക്ക് അധിക ഭാരമുണ്ടാക്കുമെന്നാണ് വിലയിരുത്തൽ.

യൂനിറ്റിന് ഒരു രൂപ വരെ വർധനക്ക് സാധ്യത
നിലവിൽ നിരക്ക് വർധന വഴി ഈടാക്കാൻ കഴിയാത്ത അംഗീകൃത നഷ്ടം വരുംവർഷങ്ങളിൽ പിരിച്ചെടുക്കണമെന്ന നിർദേശവും കമീഷൻ മുന്നോട്ടുവെച്ചിട്ടുണ്ട്. ഇത് യൂനിറ്റിന് ഒരു രൂപ വരെ വർധനക്ക് വഴിയൊരുക്കും.

ജല-താപ നിലയങ്ങൾക്കും പുതിയ മാനദണ്ഡം
ജല-താപ വൈദ്യുതി നിലയങ്ങളിൽനിന്ന് ഉത്പാദിപ്പിക്കുന്ന വൈദ്യുതിയുടെ ഫിക്സഡ് ചാർജ് നിർണയിക്കാനുള്ള മാനദണ്ഡവും പുതുക്കുന്നുണ്ട്. ബാറ്ററി സ്റ്റോറേജ് സംവിധാനം, സൗരോർജം എന്നിവയിലും ഫിക്സഡ് ചാർജ് മാനദണ്ഡം വരും - ഇത് സ്വാഭാവികമായും ഉപഭോക്താക്കളുടെ ബില്ലിൽ പ്രതിഫലിക്കും. ഹൈ ടെൻഷൻ, എക്സ്ട്രാ ഹൈ ടെൻഷൻ വ്യവസായങ്ങൾക്ക് പവർ ഫാക്ടറിന്റെ അടിസ്ഥാനത്തിൽ നൽകുന്ന വ്യത്യസ്ത ബില്ലിങ് ഏകീകരിക്കും.

ഇന്ധന സർചാർജും ഇളവുകളും
ഇന്ധന സർചാർജ് മാസംതോറും ഈടാക്കുന്നത് തുടരും; ഒരു മാസത്തെ അധിക ബാധ്യത അടുത്ത മാസംതന്നെ ഈടാക്കും. എന്നാൽ മാസം 40 യൂനിറ്റ് വരെ ഉപയോഗിക്കുന്നവരെ ഇതിൽനിന്ന് ഒഴിവാക്കും. സ്വന്തം ബാറ്ററി സ്റ്റോറേജ് സംവിധാനം സ്ഥാപിച്ച സൗര ഉപഭോക്താക്കൾക്ക് രാത്രി (പീക്ക്) സമയത്തെ നിരക്കിൽ ഇളവ് പരിഗണിക്കും. സൗരോർജം രാത്രിയിലും ഉപയോഗിക്കാൻ കഴിയുന്ന ബാറ്ററി എനർജി സ്റ്റോറേജ് (ബെസ്) സംവിധാനവും ജലം വീണ്ടും സംഭരണികളിലെത്തിച്ച് ഉൽപാദനം നടത്തുന്ന പമ്പ്ഡ് സ്റ്റോറേജ് സംവിധാനവും കാര്യക്ഷമമാക്കാനും നിർദേശമുണ്ട്.

സെപ്റ്റംബർ 18 വരെ അഭിപ്രായം അറിയിക്കാം
വിശദമായ തെളിവെടുപ്പിന് ശേഷമായിരിക്കും റഗുലേറ്ററി കമീഷൻ വ്യവസ്ഥകൾ അന്തിമമാക്കുക. കരടിനെക്കുറിച്ചുള്ള അഭിപ്രായങ്ങളും നിർദേശങ്ങളും സെപ്റ്റംബർ 18നകം കമീഷനെ അറിയിക്കണം.

25/08/2026

മലയാളി എൽ എൽ ബി വിദ്യാർഥിനി മിസ് യൂണിവേഴ്‌സ് ഇന്ത്യ ആലപ്പുഴ: ആലപ്പുഴക്കാരി കസിയ മിസ് യൂണിവേഴ്‌സ് ഇന്ത്യ മത്‌സരവിജയിയായി.നവംബറിൽ നടക്കുന്ന മിസ് യൂണിവേഴ്സ് മത്സരത്തിൽ ഇന്ത്യയെ പ്രതിനിധീകരിക്കുക കസിയ യായിരിക്കും. അഞ്ചാം വയസിൽ ഫാഷൻv വേദിയിലെത്തിയതാണ് 19 കാരിയായ കസിയ ലിസ് മെജോ. ജയ്പൂരിൽ നടന്ന മിസ് യൂണിവേഴ്‌സ് ഇന്ത്യ 2026 ഗ്രാൻഡ് ഫിനാലെയിൽ 52 മത്സരാർത്ഥികളെ പിന്നിലാക്കിയാണ് ദേശീയ കിരീടം ചൂടിയത്. നിയമപഠനത്തിനൊപ്പം മോഡലിംഗും ഫാഷൻ മത്സരങ്ങളും മുന്നോട്ടുകൊണ്ടുപോകുന്ന കസിയ ശുഭപ്രതീക്ഷയിലാണ്. പ്യൂർട്ടോ റിക്കോയിലാണ്
75-ാമത് മിസ് യൂണിവേഴ്സ് മത്സരം.

25/08/2026

തൃക്കാക്കര ക്ഷേത്രത്തിൽ തിരുവോണ ദിനത്തിൽ 25,000 പേർക്ക് ഓണസദ്യ
തൃക്കാക്കര: തൃക്കാക്കര ക്ഷേത്രത്തിൽ തിരുവോണദിനത്തിൽ രാവിലെ 10 മുതൽ വൈകിട്ട് നാലുവരെ ഭക്തർക്കും സന്ദർശകർക്കുമായി ഓണസദ്യ വിളമ്പും.
തിരുവോണദിനത്തിലെ സദ്യയിൽ 25,000 പേർക്ക് ഭക്ഷണം ഒരുക്കും. പ്രശസ്ത പാചകവിദഗ്ധൻ പഴയിടം മോഹനൻ നമ്പൂതിരിയുടെ നേതൃത്വത്തിൽ തയ്യാറാക്കുന്ന സദ്യയിൽ 15 വിഭവങ്ങൾ ഉൾപ്പെടും.
ഓണാഘോഷങ്ങളുടെ ഭാഗമായി തൃക്കാക്കര ക്ഷേത്രത്തിൽ വിവിധ പരിപാടികളും ഒരുക്കിയിട്ടുണ്ട്. ഓണസദ്യയ്ക്കായി വിപുലമായ ക്രമീകരണങ്ങളാണ് ക്ഷേത്ര ഭാരവാഹികൾ ഒരുക്കുന്നത്.അത്തം മുതൽ പത്തുദിവസവും സദ്യയുണ്ട്. കേരളത്തിന്റെ ഓണപ്പാരമ്പര്യവും തൃക്കാക്കര വാമനമൂർത്തി ക്ഷേത്രത്തിന്റെ സാംസ്കാരിക പ്രാധാന്യവും വിളിച്ചോതുന്ന രീതിയിലായിരിക്കും ആഘോഷങ്ങൾ.

24/08/2026

കളമശേരി മെഡിക്കൽ കോളജിൽ ജൂനിയർ ഡോക്ടർമാർക്ക് അവസരം

കളമശേരി:എറണാകുളം സർക്കാർ മെഡിക്കൽ കോളേജിലെ ജനറൽ മെഡിസിൻ, നെഫ്രോളജി വിഭാഗങ്ങളിലേക്കായി മൂന്ന് ജൂനിയർ റെസിഡൻ്റുമാരെ കരാറടിസ്ഥാനത്തിൽ നിയമിക്കുന്നതിന് വാക്ക്-ഇൻ-ഇന്റർവ്യൂ നടത്തും. വേതനം:45000 രൂപ. യോഗ്യരായ ഉദ്യോഗാർത്ഥികൾ ജോലിപരിചയം, ടി സി എം സി രജിസ്ടേഷൻ എന്നിവ തെളിയിക്കുന്ന രേഖകൾ സഹിതം സെപ്റ്റംബർ മൂന്ന് (വ്യാഴം) രാവിലെ 11 മുതൽ ഉച്ചയ്ക്ക് ഒരു മണി വരെ അഡ്മിനിസ്ട്രേറ്റീവ് ബ്ലോക്കിൽ ഹാജരാകണം.

24/08/2026

എറണാകുളത്ത് അടിപൊളി ഓണാഘോഷം ‘ലാവണ്യം 2026’; 15 വേദികളിൽ വൈവിധ്യമാർന്ന പരിപാടികൾ
കൊച്ചി: സംസ്ഥാന വിനോദസഞ്ചാര വകുപ്പും എറണാകുളം ജില്ലാ ഭരണകൂടവും ജില്ലാ ടൂറിസം പ്രമോഷൻ കൗൺസിലും (ഡി.ടി.പി.സി.) സംയുക്തമായി സംഘടിപ്പിക്കുന്ന ‘ലാവണ്യം 2026’ ഓണാഘോഷത്തിന് എറണാകുളം ജില്ലയിൽ വിപുലമായ ഒരുക്കങ്ങൾ. ജില്ലയിലെ വിവിധ കേന്ദ്രങ്ങളിലായി 15 വേദികളിലാണ് ഇത്തവണ ഓണാഘോഷ പരിപാടികൾ സംഘടിപ്പിക്കുന്നത്. ഉദ്ഘാടനം ഇന്ന് വൈകിട്ട് അഞ്ചിന്
ദർബാർ ഹാൾ ഓപ്പൺ എയർ തിയറ്ററിൽ നടക്കും മന്ത്രി വി.ഇ അബ്ദുൽ ഗഫൂർ ഉദ്ഘാടനം നിർവഹിക്കും. ഓണത്തിന്റെ തനത് പാരമ്പര്യവും കേരളത്തിന്റെ സാംസ്കാരിക വൈവിധ്യവും വിനോദസഞ്ചാര സാധ്യതകളും കോർത്തിണക്കിയാണ് പരിപാടികൾ ആസൂത്രണം ചെയ്തിരിക്കുന്നത്.
വൈവിധ്യമാർന്ന കലാപരിപാടികൾ, ദൃശ്യ-ശ്രാവ്യ കലാവിരുന്നുകൾ, സംഗീത-നൃത്ത പരിപാടികൾ എന്നിവയാണ് ആഘോഷങ്ങളുടെ പ്രധാന ആകർഷണങ്ങൾ. കേരളീയ കലാരൂപങ്ങൾക്കും പാരമ്പര്യ കലകൾക്കും പ്രത്യേക പരിഗണന നൽകുന്നതിനൊപ്പം ആധുനിക കലാ അവതരണങ്ങൾക്കും വേദിയൊരുക്കും.
ഓണത്തിന്റെ പ്രധാന ആകർഷണങ്ങളായ പൂക്കളം, ഓണാഘോഷ അലങ്കാരങ്ങൾ, കേരളീയ കലാ-സാംസ്കാരിക അവതരണങ്ങൾ എന്നിവയും വിവിധ വേദികളിൽ ഒരുക്കും. കുടുംബങ്ങൾക്കും കുട്ടികൾക്കും യുവാക്കൾക്കും ഒരുപോലെ പങ്കെടുക്കാനും ആസ്വദിക്കാനും കഴിയുന്ന തരത്തിലാണ് ആഘോഷ പരിപാടികൾ ക്രമീകരിക്കുന്നത്.
ജില്ലയിലെ വിവിധ വിനോദസഞ്ചാര കേന്ദ്രങ്ങളെയും ആഘോഷത്തിന്റെ ഭാഗമാക്കുന്നതിലൂടെ ഓണക്കാലത്ത് കൂടുതൽ സഞ്ചാരികളെ എറണാകുളത്തേക്ക് ആകർഷിക്കുകയാണ് ലക്ഷ്യം. കായലും വള്ളങ്ങളും കേരളീയ ഗ്രാമീണ ജീവിതത്തിന്റെ ദൃശ്യങ്ങളും ഉൾക്കൊള്ളുന്ന രീതിയിൽ എറണാകുളത്തിന്റെ തനത് ടൂറിസം മുഖവും ആഘോഷങ്ങളിലൂടെ അവതരിപ്പിക്കും.
ജനപങ്കാളിത്തം ഉറപ്പാക്കുന്നതിനായി വിവിധ സർക്കാർ വകുപ്പുകൾ, തദ്ദേശ സ്ഥാപനങ്ങൾ, സാംസ്കാരിക സംഘടനകൾ, കലാകാരൻമാർ എന്നിവരുടെ സഹകരണത്തോടെയാണ് പരിപാടികൾ ഏകോപിപ്പിക്കുന്നത്. വിവിധ മേഖലകളിലെ ജനപ്രതിനിധികളും ഉദ്യോഗസ്ഥരും സംഘാടനത്തിന് നേതൃത്വം നൽകും.

23/08/2026

മൂവാറ്റുപുഴ ജില്ല രൂപീകരണം ഗൗരവമായി പരിശോധിക്കും; ഡീലിമിറ്റേഷൻ കമ്മിഷൻ പരിഗണിക്കും: മുഖ്യമന്ത്രി
മൂവാറ്റുപുഴ: മൂവാറ്റുപുഴ ആസ്ഥാനമായി പുതിയ ജില്ല രൂപീകരിക്കണമെന്ന ആവശ്യം ഗൗരവമായി പരിശോധിക്കുമെന്ന് മുഖ്യമന്ത്രി വി.ഡി. സതീശൻ. ഇതിനായി സർക്കാർ ഡീലിമിറ്റേഷൻ കമ്മിഷനെ കൊണ്ടുവരുമെന്നും, കമ്മിഷന്റെ പരിഗണനയിൽ മൂവാറ്റുപുഴ ജില്ല രൂപീകരണ ആവശ്യവും ഉൾപ്പെടുത്തുമെന്നും മുഖ്യമന്ത്രി പറഞ്ഞു. മൂവാറ്റുപുഴ നഗരസഭയുടെ ത്രിവേണി ഓണാഘോഷം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
മൂവാറ്റുപുഴയെ സ്വന്തം ജില്ലയായ എറണാകുളത്തുനിന്ന് വേർപെടുത്തുന്നതിൽ വ്യക്തിപരമായി വിഷമമുണ്ടെങ്കിലും പ്രദേശത്തിന്റെ ദീർഘകാല ആവശ്യത്തെ ഗൗരവത്തോടെ കാണുമെന്ന് മുഖ്യമന്ത്രി പറഞ്ഞു. മൂവാറ്റുപുഴക്കാരുടെ പരാതികൾക്കും വികസന പിന്നാക്കാവസ്ഥയ്ക്കും പരിഹാരം കാണുമെന്നും അദ്ദേഹം ഉറപ്പുനൽകി.
വർഷങ്ങളായുള്ള ആവശ്യം
മൂവാറ്റുപുഴ ജില്ല രൂപീകരണമെന്ന ആവശ്യം വർഷങ്ങളായി ഉയരുന്നതാണ്. എറണാകുളം ജില്ലയിലെ കിഴക്കൻ മേഖലകൾക്കും ഇടുക്കി ജില്ലയിലെ വടക്കൻ പ്രദേശങ്ങൾക്കും കൂടുതൽ പ്രാധാന്യം നൽകുന്ന തരത്തിൽ പുതിയ ജില്ല രൂപീകരിക്കണമെന്ന നിർദേശമാണ് പ്രധാനമായും ഉയർന്നിട്ടുള്ളത്. മൂവാറ്റുപുഴ, കോതമംഗലം, പിറവം, തൊടുപുഴ തുടങ്ങിയ മേഖലകളെ ഉൾപ്പെടുത്തി ജില്ല രൂപീകരിക്കണമെന്ന ആവശ്യങ്ങളും വിവിധ ഘട്ടങ്ങളിൽ സർക്കാരിന് മുന്നിലെത്തിയിട്ടുണ്ട്.
1984-ൽ കാസർകോട് ജില്ല രൂപീകരിച്ചതിന് ശേഷം കേരളത്തിൽ പുതിയ ജില്ല നിലവിൽ വന്നിട്ടില്ല. സംസ്ഥാനത്തെ ജനസംഖ്യാ വർധനയും ഭരണപരമായ സൗകര്യങ്ങളും പരിഗണിച്ച് പുതിയ ജില്ലകളും താലൂക്കുകളും രൂപീകരിക്കുന്നതിന്റെ സാധ്യത പഠിക്കാൻ കമ്മിഷനെ നിയോഗിക്കുമെന്ന് 2026ലെ ബജറ്റിൽ സർക്കാർ പ്രഖ്യാപിച്ചിരുന്നു. മൂവാറ്റുപുഴയ്ക്കു പുറമെ തിരൂർ, ഷൊർണൂർ, നെയ്യാറ്റിൻകര തുടങ്ങിയ പ്രദേശങ്ങളിൽനിന്നും പുതിയ ജില്ലകൾക്കായുള്ള ആവശ്യങ്ങൾ ഉയർന്നിട്ടുണ്ട്.
‘നഷ്ടപ്പെട്ട വികസനം പലിശ സഹിതം തിരികെ നൽകും’
മൂവാറ്റുപുഴയുടെ വികസനത്തിൽ ഉണ്ടായ പിന്നാക്കാവസ്ഥ പരിഹരിക്കുമെന്ന് മുഖ്യമന്ത്രി പറഞ്ഞു. പ്രദേശത്തിന് ഉണ്ടായ നഷ്ടങ്ങൾ പരിഹരിക്കാൻ സർക്കാർ തയ്യാറാണെന്നും വികസന പ്രവർത്തനങ്ങൾക്ക് ആവശ്യമായ പിന്തുണ നൽകുമെന്നും അദ്ദേഹം വ്യക്തമാക്കി.
ചടങ്ങിൽ മാത്യു കുഴൽനാടൻ എംഎൽഎ അധ്യക്ഷത വഹിച്ചു. ഡീൻ കുര്യാക്കോസ് എംപി മുഖ്യപ്രഭാഷണം നടത്തി. മൂവാറ്റുപുഴ നഗരസഭാ ചെയർപേഴ്സൺ ജോയ്സ് മേരി ആന്റണി, വൈസ് ചെയർമാൻ പി.എം. അബ്ദുൽ സലാം, മുൻ എംഎൽഎമാരായ ജോസഫ് വാഴക്കൻ, ജോണി നെല്ലൂർ, പ്രോഗ്രാം ജനറൽ കൺവീനർ പി.പി. എൽദോസ്, സാബു ജോൺ, സുഭാഷ് കടക്കോട്, കെ.എ. അബ്ദുൽ സലാം, അബ്ദുൽ മജീദ് തുടങ്ങിയവർ പങ്കെടുത്തു.
ഓണവിപണിയിൽ സർക്കാർ ഇടപെടൽ ശക്തം
പ്രതിസന്ധികൾക്കിടയിലും ഓണാഘോഷത്തിന് സർക്കാർ യാതൊരു കുറവും വരുത്തിയിട്ടില്ലെന്ന് മുഖ്യമന്ത്രി പറഞ്ഞു. കുടിശ്ശികകൾ വിതരണം ചെയ്യുന്നതിനുള്ള നടപടികൾ പുരോഗമിക്കുകയാണ്. മാസങ്ങളായി പണം ലഭിക്കാതെ കാത്തിരിക്കുന്നവർക്കും കുടിശ്ശികയുള്ളവർക്കും ആവശ്യമായ തുക നൽകുന്നുണ്ട്.
സംസ്ഥാനത്തെ സപ്ലൈകോ ഓണം ഫെയറുകളിൽ സബ്സിഡിയുള്ള 13 നിത്യോപയോഗ സാധനങ്ങൾ ഉറപ്പാക്കിയിട്ടുണ്ടെന്നും അദ്ദേഹം പറഞ്ഞു. രണ്ടു മാസം മുൻപേ ആസൂത്രണം ചെയ്ത് സാധനങ്ങൾ സംഭരിച്ചതിനാൽ വിലക്കയറ്റം നിയന്ത്രിക്കാൻ കഴിഞ്ഞു. കുറഞ്ഞ വിലയിൽ സാധനങ്ങൾ ലഭ്യമാക്കുന്നതിലൂടെ സപ്ലൈകോയ്ക്ക് റെക്കോർഡ് വിൽപ്പനയാണ് നടക്കുന്നതെന്നും മുഖ്യമന്ത്രി പറഞ്ഞു.
കാർഷിക സമൂഹത്തിന്റെ കൊയ്ത്തുത്സവമായാണ് ഓണത്തെ കാണേണ്ടതെന്നും ജാതി, മത, വർഗ, വർണ ചിന്തകൾക്കതീതമായി കേരളം ഒരുമിച്ച് ഓണം ആഘോഷിക്കുന്നുവെന്നും മുഖ്യമന്ത്രി കൂട്ടിച്ചേർത്തു.

22/08/2026

ആശാഭവനിൽ കരുതലിന്റെ കൈത്താങ്ങായി ഡിറ്റർജന്റ് യൂണിറ്റ്; മന്ത്രി അബ്‌ദുൽ ഗഫൂർ ഉദ്ഘാടനം ചെയ്തു
കൊച്ചി: കൈകളിൽ പുതിയൊരു തൊഴിൽ, മനസ്സിൽ ആത്മവിശ്വാസം—ആശാഭവനിലെ താമസക്കാർക്ക് ഡിറ്റർജന്റ് യൂണിറ്റ് പുതിയ പ്രതീക്ഷയാകുന്നു. മാനസികാരോഗ്യ ചികിത്സയ്ക്ക് വിധേയരായും ബന്ധുക്കളുടെ സംരക്ഷണം ലഭിക്കാതെയും കഴിയുന്നവരുടെ പുനരധിവാസത്തിന് തൊഴിൽപരിശീലനം കൂടി കൂട്ടിച്ചേർത്താണ് ‘നവസ്പർശം’ പദ്ധതിയുടെ ഭാഗമായി യൂണിറ്റ് ആരംഭിച്ചത്.
സാമൂഹ്യനീതി വകുപ്പിന് കീഴിൽ എറണാകുളം ജില്ലയിൽ പ്രവർത്തിക്കുന്ന ആശാഭവൻ (മെൻ) ഇനി പരിചരണത്തിന്റെയും സംരക്ഷണത്തിന്റെയും ഇടം മാത്രമല്ല; കഴിവുകൾ തിരിച്ചറിയാനും അവ പ്രയോജനപ്പെടുത്താനും കഴിയുന്ന ഇടം കൂടിയാകുകയാണ്. ഡിറ്റർജന്റ് നിർമാണത്തിൽ പരിശീലനം നേടിയ താമസക്കാർക്ക് ഉൽപന്നം നിർമിക്കുന്നതിലൂടെ തൊഴിൽപരമായ അനുഭവവും ആത്മവിശ്വാസവും നേടാനാകും.
ഫിഷറീസ്, സാമൂഹ്യനീതി വകുപ്പ് മന്ത്രി വി. ഇ. അബ്ദുൽ ഗഫൂർ ഡിറ്റർജന്റ് യൂണിറ്റിന്റെ ഉദ്ഘാടനം നിർവഹിക്കുകയും ആദ്യ വിൽപ്പന നടത്തുകയും ചെയ്തു. താമസക്കാർക്ക് ആവശ്യമായ മാനസിക-സാമൂഹിക പിന്തുണയ്ക്കൊപ്പം തൊഴിൽപരമായ ഇടപെടലുകൾക്കും അവസരം ഒരുക്കുമെന്ന് മന്ത്രി പറഞ്ഞു.
ഭിന്നശേഷി, പുനരധിവാസ മേഖലകളിൽ വൈദഗ്ധ്യമുള്ള രാജഗിരി കോളേജ് ഓഫ് സോഷ്യൽ സയൻസിന്റെ നേതൃത്വത്തിലാണ് പദ്ധതിക്കാവശ്യമായ പരിശീലനവും പിന്തുണയും ലഭ്യമാക്കിയത്. ഒരു ഉൽപന്നം നിർമ്മിക്കുന്നതിനപ്പുറം, ഓരോരുത്തരിലും ശേഷിക്കുന്ന കഴിവുകൾ കണ്ടെത്തി ജീവിതത്തിലേക്ക് തിരിച്ചുകൊണ്ടുവരാനുള്ള ശ്രമം കൂടിയാണ് പദ്ധതിയിലൂടെ ലക്ഷ്യമിടുന്നത്.
ആശാഭവനിലെ ദിനചര്യകൾക്കിടയിൽ ഡിറ്റർജന്റ് യൂണിറ്റിലെ പുതിയ തിരക്കുകൾ താമസക്കാർക്ക് വ്യത്യസ്തമായൊരു അനുഭവമാണ്. സ്വന്തം കൈകളാൽ നിർമിക്കുന്ന ഉൽപന്നത്തിന് വിപണിയിൽ ഇടം നേടുമ്പോൾ അതിനൊപ്പം ലഭിക്കുന്നത് അംഗീകാരവും ആത്മവിശ്വാസവും കൂടിയാണ്.
തൃക്കാക്കര എം.എൽ.എ ഉമ തോമസ് ഓണക്കോടി വിതരണം ചെയ്തു. ജില്ലാ കളക്ടർ ജി. പ്രിയങ്ക, ജില്ലാ പഞ്ചായത്ത് പ്രസിഡന്റ് കെ. ജി. രാധാകൃഷ്ണൻ, തൃക്കാക്കര നഗരസഭാ ചെയർപേഴ്സൺ റാഷിദ് ഉള്ളംപള്ളി തുടങ്ങിയവർ ചടങ്ങിൽ പങ്കെടുത്തു. ആശാഭവന്റെ പ്രാരംഭഘട്ടത്തിൽ പ്രഥമ സൂപ്രണ്ടായി സേവനമനുഷ്ഠിച്ച ഇ. വി. ലതയെ ചടങ്ങിൽ ആദരിച്ചു.

22/08/2026

ഫീസടക്കാെത പരസ്യം പതിച്ച വണ്ടിയുമായി റോഡിലിറങ്ങി;
‘മാവേലിയും സംഘ’വും പിടിയിൽ
കാക്കനാട്: സ്വകാര്യ ബാങ്കിന്റെ പരസ്യം പതിച്ച വാഹനം പതിവ് പരിശോധനയിൽ മോട്ടോർ വാഹന വകുപ്പ് ഉദ്യോഗസ്ഥർ തടഞ്ഞപ്പോൾ അകത്ത് ‘മാവേലിയും പുലിയും’. പരിശോധനയിൽ പരസ്യം പതിച്ചതിന് നിയമപ്രകാരമുള്ള ഫീസ് അടച്ചിട്ടില്ലെന്ന് കണ്ടെത്തിയതോടെ വാഹനം കസ്റ്റഡിയിലെടുക്കാതെ നിവൃത്തിയില്ലെന്നായി. ഓണക്കാലത്ത് മാവേലിയെ റോഡിൽ ഇറക്കി വിടുന്നത് ശരിയല്ലല്ലോ എന്ന ചിന്തയിൽ കസ്റ്റഡി വാഹനത്തോടൊപ്പം മാവേലിയെയും പുലിയെയും ഉദ്യോഗസ്ഥർ ആർ.ടി ഓഫിസിലെത്തിച്ചു. അപ്രതീക്ഷിതമായി ഓഫീസിലേക്ക് കടന്നുവന്ന മാവേലിയെ ജീവനക്കാർ ആഹ്ലാദത്തോടെയാണ് സ്വീകരിച്ചത്. സൽക്കാരവും നൽകി, സെൽഫിയുമെടുത്തപ്പേഴേക്കും ആർ.ടി.ഒ ബിജു ഐസക് ഇടപെട്ട് 10 മിനിറ്റുകൊണ്ട് പിഴയടപ്പിക്കലടക്കം നടപടികൾ പൂർത്തിയാക്കി വാഹനത്തിനൊപ്പം മാവേലിയെയും പുലിയെയും വിട്ടയച്ചു. അനുമതിയില്ലാതെ പരസ്യം പതിച്ചതിന് 7700 രൂപയാണ് പിഴ അടപ്പിച്ചത്. പരസ്യം പ്രദർശിപ്പിക്കാൻ കരാറെടുത്ത ഏജൻസിയുടെ വീഴ്ചയാണ് മാവേലിക്കും സംഘത്തിനും വിനയായത്.

21/08/2026

ഓണം: തൃക്കാക്കര ക്ഷേത്രത്തിലേക്ക് മെട്രോ ഫീഡർ സർവീസ് ഞായറാഴ്ച്ച മുതൽ

കൊച്ചി:ഓണത്തോടനുബന്ധിച്ച്
ഓഗസ്റ്റ് 23 ഞായർ മുതൽ തിരുവോണ ദിനമായ 26 വരെ കുസാറ്റ് മെട്രോ സ്റ്റേഷനിൽ നിന്നും തൃക്കാക്കര ക്ഷേത്രത്തിലേക്ക് കൊച്ചി മെട്രോ ഇലക്‌ട്രിക് ഫീഡർ ബസ് സർവീസ് ഉണ്ടായിരിക്കും.
രാവിലെ 6.30 മുതൽ രാത്രി 8 വരെ 30 മിനുട്ട് ഇടവേളയിലായിരിക്കും സർവീസ് നടത്തുക.

ശനിയാഴ്ച്ച മുതൽ കൊച്ചി മെട്രോ അധിക സർവിസ്

ഓണത്തോടനുബന്ധിച്ച് കൊച്ചി മെട്രോ റെയിൽ അധിക ട്രെയിൻ സർവീസുകൾ ശനിയാഴ്ച്ച(ഓഗസ്റ്റ് 22) മുതൽ ആരംഭിക്കും.

2026 ഓഗസ്റ്റ് 22, 24, 25 തീയതികളിൽ ഉച്ചകഴിഞ്ഞ് 3 മുതൽ തിരക്കുള്ള സമയങ്ങളിൽ 6.45 മിനിട്ട് ഇടവേളയിൽ 4 അധിക സർവീസുകൾ നടത്തും.

ഓഗസ്റ്റ് 23 ഞായറാഴ്ച്ച 2 ട്രെയിനുകൾ കൂടുലായി സർവീസ് നടത്തും. ഉച്ചകഴിഞ്ഞ് 2.30 മുതൽ 7. 13 മിനിട്ട് ഇടവേളയിൽ 8 അധിക ട്രിപ്പുകളാകും ഞായറാഴ്ച്ച ഉണ്ടാകുക.

Metro news pulse

26/08/2026

26/08/2026

25/08/2026

25/08/2026

24/08/2026

24/08/2026

23/08/2026

22/08/2026

22/08/2026

21/08/2026

Address

Website

Alerts

Shortcuts

Share

Category

Listing takedown request