12/03/2026
મુખ્યમંત્રી શ્રી ભૂપેન્દ્રભાઈ પટેલે વિવિધ જિલ્લાઓની ITI માટે 40 ઇલેક્ટ્રીક કારનું ગાંધીનગરમાં શ્રમ અને કૌશલ્ય વિકાસ મંત્રી શ્રી કુંવરજીભાઈ બાવળીયાની ઉપસ્થિતિમાં ફ્લૅગ-ઓફ કરાવી વિતરણ કર્યું હતું.
ઇલેક્ટ્રીક વાહનોના વધતા જતા વ્યાપ અને તે ક્ષેત્રમાં રોજગારીની વિપુલ તકો વધી છે ત્યારે મુખ્યમંત્રીશ્રી દ્વારા રાજ્યની ઔદ્યોગિક તાલીમ સંસ્થાઓને વિતરણ કરવામાં આવેલ ઇલેક્ટ્રીક કાર થકી ITIમાં મોટર મિકેનિક ટ્રેડના 8000થી વધુ યુવા તાલીમાર્થીઓ હવે ઇલેક્ટ્રીક વ્હીકલ સંબંધિત નવીનતમ ટેકનોલોજીની પ્રેક્ટિકલ તાલીમ મેળવી શકશે.
મુખ્યમંત્રીશ્રીએ આ ઉપરાંત 50 ધનવંતરી આરોગ્ય રથ અને 6 મોબાઈલ મેડિકલ વાનના લોકાર્પણ પણ કર્યા હતા.
મુખ્યમંત્રીશ્રી દ્વારા આજે લોકર્પિત થયેલ ધનવંતરી આરોગ્ય રથ અને મોબાઇલ મેડિકલ વાન સાથે રાજ્યભરના 34 જિલ્લાઓમાં કુલ 206 ધનવંતરી આરોગ્ય રથ અને 31 મોબાઇલ મેડિકલ વાન બાંધકામ શ્રમિકો અને સંસ્થાઓના શ્રમયોગીઓ તથા તેમના પરિવારજનોને તેમના ઘર આંગણે પ્રાથમિક તબીબી સારવાર મળી રહે, ગંભીર રોગ થતા અટકે અને તેમનું આરોગ્ય જળવાઈ રહે તે હેતુસર કાર્યરત કરવામાં આવ્યા છે.
