Hamro Samachar

15/04/2025

बर्सेमा सञ्जवनी साहित्य मञ्चको ६४औं मासिक प्रकरण
पश्चिम सिक्किमको पर्यटकीय स्थल बर्सेमा पहिलोपटक साहित्यिक कार्यक्रम सम्पन्न भएको छ। गत 12 अप्रेल 2025-को दिन सञ्जवनी साहित्य मञ्चले आफ्नो मासिक साहित्यिक कार्यक्रमको ६४औं प्रकरण बर्सेमा आयोजन गरेको थियो। उक्त दिनको साहित्यिक कार्यक्रमलाई श्री पी.एम चामलिङ्गले अध्यक्षता गरेका थिए भने मञ्चका अध्यक्ष, मूल सचिव, वरिष्ठ सल्लाहकार, साहित्य सचिव, प्रचार-प्रसार सचिव साथै अन्य सदस्यहरूको पनि उपस्थित रहेको थियो।
यस अवसरमा सधै झैँ कविता, मुक्तक, गजल, लघुकथा वाचन गरिएका थिए भने बर्से घुम्न आउने धेरै पर्यटकहरूले पनि उनीहरूको उद्देश्यभन्दा छुट्टै साहित्यिक मनोरञ्जन लिएका थिए। आयोजक समितिका साहित्य सचिव बिकास कुलुङअनुसार सम्भवतः बर्सेमा साहित्यिक कार्यक्रम यो नै पहिलो हो। सञ्जीवनी साहित्य मञ्चले यसरी बर्सेमा साहित्यिक कार्यक्रम आयोजन गरेर आफ्नो छुट्टै इतिहास नै रचेको पनि आयोजक समितिको भनाइ रहेको छ।

07/04/2025

01/04/2025

बियाड युवा साहित्यिक संस्थानद्वारा चार साहित्यिक व्यक्तित्व सम्मानित
साहित्यले राजनीतिक चेतनाको पनि विकास गर्नुपर्छः भीम राउत
अर्जुन राई
गान्तोक, 31 मार्चः बियाड युवा साहित्यिक संस्थान, बिरिङ पाकिम सिक्किमको चौथो स्थापना दिवसको अवसरमा राज्यका चार साहित्यिक व्यक्तित्वलाई सम्मान जनाइएको छ। वरिष्ठ पत्रकार एवं प्रेस क्लब अफ् सिक्किमका अध्यक्ष भीम राउत मुख्य अतिथि रहेको समारोहलाई वरिष्ठ साहित्य अध्येता कमल काप्लेले अध्यक्षता गरेका थिए भने हिन्दी साहित्य सेवा समिति, सिक्किमका अध्यक्ष एवं साहित्यकार भीम ठटाल, प्रेस क्लब अफ् सिक्किमका महासचिव डिल्लीराम दुलाल, रामगौरी सङ्ग्रहालयका संस्थापक गणेश प्रधान, अतिरिक्त जिल्लापाल (विकास), पाकिम रविन सेवा विशिष्ट अतिथिका रूपमा उपस्थित थिए।
कार्यक्रममा वरिष्ठ साहित्यका एवं गजलगो डिल्लीप्रसाद अधिकारीलाई उनको साहित्यिक योगदानको कदर गर्दै ‘बियाड साहित्य सेवा सम्मान-2025’-ले अलङ्कृत गरियो भने वरिष्ठ साहित्यकार एवं आकाशवाणी गान्तोककी समाचार वाचिका उषा शर्मालाई उनको साहित्यिक योगदानको कदरस्वरूप ‘बियाड शारदा सम्मान-2025’-ले अङ्कृत गरिएको छ। यसरी नै विभिन्न क्षेत्रमा आफ्नो अब्बल प्रतिभा दर्शाउँदै आइरहेकी तल्लो बिरिङकी बाल प्रतिभा तेजस्वी भट्टराईलाई ‘बियाड बाल प्रतिभा सम्मान-2025’ र साहित्य तथा पत्रिकारिता जगतमा लामो समयदेखि योगदान दिँदै आइरहेका अर्जुन चामलिङ ‘यावा’-लाई ‘बियाड प्रतिविम्ब सम्मान-2025’-द्वारा अलङ्कृत गरिएको छ। यसरी नै समाजको विकासमा उल्लेखनीय योगदान पुर्‍याउँदै आइरहेका दुईवटा गैरसरकारी संस्था ‘सिटिजन फाउण्डेशन’ र ‘कञ्चन क्लब लोअर बिरिङ’-लाई पनि अभिनन्दन जनाइयो। समारोहमा मुख्य अतिथि भीम राउतलाई पनि अभिनन्दन जनाइयो। कार्यक्रममा भर्खरै मात्र साहित्य अकादमीद्वारा पुरस्कृत साहित्यकार युवा बराललाई वुमन सोशल वर्कर, बिरिङद्वारा बधाई दिँदै अभिनन्दन जनाइयो।
कार्यक्रमलाई सम्बोधन गर्दै सभाध्यक्ष कमल काफ्लेले बियाड युवा साहित्य संस्थानले धेरै काम गरिसकेको र भारतीय स्तरमै पुगिसकेको बताए। सिक्किममा 1940 देखि मात्रै लिपिबद्ध लेख/साहित्य पाइएको उनले बताए। त्यसपछि मात्र ‘अपतन’ स्थापना भएर साहित्यको विकास हुँदै आएको सभाध्यक्ष काफ्लेले बताए। साहित्यमा नारी हस्ताक्षरको सन्दर्भमा बोल्दै उनले अहिलेसम्म नेपाली साहित्यमा तीनजनाले मात्र साहित्य अकादमी पुरस्कार पाउन सकेको बताए। अहिलेसम्म 48 जनाले साहित्य पुरस्कार पाइसक्दा केवल तीनजना नारी हस्ताक्षर गीता शर्मा, विन्द्या सुब्बा र वीणा हाङ्खिम पुरस्कृत हुनसकेको बताउँदै नारी कलम अघि आउनुपर्ने मन्तव्य राखे।
यसरी नै मुख्य अतिथि भीम राउतले आफ्नो सम्बोधनमा साहित्यको स्वरूप र साहित्य सिर्जनाबारे आफ्नो धारणा राख्दै साहित्यले राजनीतिक चेतनाको विकास गराउन सक्नुपर्ने बताए। आज सिक्किमे साहित्यले समात्नुपर्ने धार छोड़िएको महसुस भएको बताउँदै अबका साहित्यकारहरूले त्यसलाई समाउनुपर्ने विचार राखे। उनले भने, “आज संविधानको धाराको कुरा उठिरहेको हुन्छ। तर त्यसबारे लेखिएको छैन। साहित्यले जनताका समस्याका कुराहरूलाई सम्बोधन गर्नुपर्छ। यसो गरे मात्र साहित्यको समग्र विकास हुनसक्छ।” उनले साहित्यले राजनीतिलाई डोर्‍याउनुपर्ने बताउँदै साहित्यमा व्यङ्ग्य पनि एउटा सशक्त माध्यम भएको हुनाले आफूले व्यङ्ग्यमा कलम चलाइरहेको बताए।
कार्यक्रमको अर्को आकर्षण ‘रामायणदेखि कृत्तिम बुद्धिमत्तासम्म’ वार्ता रहेको थियो। यो वार्ता कवि तथा साहित्यकार प्रवीण खालिङले प्रस्तुत गरेका थिए। एआईभन्दा अघि वाई-जेनेरशनको साहित्यमा सब-कल्चर आइरहेको उनले बताए। नेपाली साहित्यमा लेखकहरूलाई अग्रिम भुक्तान शुरु हुनुलाई उपलब्धि मान्न सकिने भए पनि अहिले आएर एआईको प्रयोग शुरु भइसकेपछि यो पनि एउटा चुनौती बनिरहेको उनले बताए। यद्यपि, लोकसंस्कृतिलगायतका कुराहरूमा एआईले मान्छेलाई रिप्लेस गर्न नसक्ने उनले बताए। वर्तमान साहित्यमा कोरा भावुकता मात्र लेखेर नहुने बताउँदै एआईसँग दाँजिएर लेख्नसक्नुपर्ने चुनौतीमाझ साहित्य सिर्जना गर्नसक्नुपर्ने बताए। खालिङले सिक्किम सब-कल्चर लेखनमा पनि पछि परिरहेको अवस्था उजागर गर्दै सबै जिम्मेवार भएर लेख्नुपर्ने कुरामा जोड़ दिए।
कार्यक्रमलाई सम्मानित व्यक्तित्वहरू डिल्लीप्रसाद अधिकारी, उषा शर्मा र अर्जुन चामलिङ ‘यावा’-ले पनि सम्बोधन गरे भने तेजश्‍वी भट्टराईले कविता वाचन गरिन्।
कार्यक्रम दीप प्रज्ज्वलन तथा आयोजक समितिका संयोजक युवा बराल ‘अनन्त’-को स्वागत सम्बोधनबाट शुरु भएको थियो। आफ्नो सम्बोधनमा बरालले बियाड युवा साहित्यिक संस्थानले गर्दै आइरहेका कार्यहरूरबारे प्रकाश पारे भने कार्यकारिणी सदस्य पवन बाहुनले वार्षिक प्रतिवेदन प्रस्तुत गर्दै संस्थानका उद्देश्य र लक्ष्यबारे प्रकाश पारे।
कार्यक्रममा तल्लो बिरिङका मदन मित्रको टोलीद्वारा प्रस्तुत दोलखे नृत्य, कला एवं संस्कृति परिषद्, ताकछाङद्वारा बालन नृत्य र कञ्चन क्लब लोअर बिरिङद्वारा मारुनि नृत्य प्रस्तुत गरिएको थियो भने स्पोर्टिङ क्लब, केराबारीको टोलीले सँगिनी नृत्य प्रस्तुत गर्‍यो। कार्यक्रमको अर्को विशेष प्रस्तुति काव्य प्रस्तुति रहेको थियो, जो दुई चरणमा राखिएको थियो। पहिलो चरण ‘बियाड काव्य सङ्गम’-मा बियाडका सदस्य कविताहरू केएन कश्यप, एलडी अधिकारी, टेकनाथ घिमिरे, अलख नारायण दङ्गाल र टीकाराम दाहालले कविता वाचन गरे। दोस्रो चरणमा आमन्त्रिक कविहरू भीम ठटाल, मुक्ति घिमिरे, सुमन मिश्र, ईश्‍वर तिम्सिना, सुशान्त प्रधान, अमर बानिया ‘लोहोरो’, जीविका ‘अश्रु’, एनबी घिमिरे, जीवन छेत्री, कुबेर भट्टराई ‘आभास’, प्रेम न्यौपाने ‘प्रहर’, मोहन गौतम, सुमीरण सापकोटा, कपिलमणि अधिकारी, सरिता छेत्री, सन्तु राईले कविता वाचन गरे भने ललित लोहार गीत पाठ गरे।

30/03/2025

श्रष्टा संवर्धन समिति गान्तोकद्वारा आयोजित किरण रसौली अभिनन्दन ग्रन्थ एवं वीनाश्री खरेल स्मृति ग्रन्थ लोकार्पण समारोह।

21/03/2025

07/03/2025

बियाड सम्मान 2025 को घोषणा
राङ्का, 7 मार्चः
बियाड युवा साहित्यिक संस्थान बिरिङ्गको चौथो स्थापना दिवस विषय गत 16 फरवरीको दिन संस्थानका प्रमुख संयोजक युवा बराल ‘अनन्त’को अध्यक्षतामा बसेको सभाले कला एवं साहित्य क्षेत्रका चार व्यक्तित्वलाई सम्मान जनाउने निर्णय लिएको छ। संस्थानका सदस्यवर्ग तुलसी घिमिरे ‘कश्यप’, बिष्णु के सी, प्रितम दुलाल र ममता बरालको उपस्थितिमा बसेको सभामा लिइएको निर्णय अनुसार संस्थानको चौथो स्थापना दिवस विविध साहित्यिक एवम् सांस्कृतिक प्रस्तुतिसँगै सम्मान एवम् अभिनन्दन कार्यक्रम भव्यतापूर्वक आयोजन गरिने भएको छ।
यस अवसरमा संस्थानले प्रत्येक वर्ष झैँ पूर्व निर्धारित संस्थानको कार्यतालिका अनुरुप एकजना वरिष्ठ साहित्यकार, एकजना वरिष्ठ नारी स्रष्टा, एकजना बाल/किशोर साहित्यानुयायी र एकजना वरिष्ठ साहित्यिक पत्रकारलाई सम्मान जनाउने छ। संस्थानले साहित्यिक व्यक्तित्व एवम् उभर्दो प्रतिभालाई उनीहरूको साहित्यिक योगदान र अभिरूचीको कदर तथा प्रोत्साहनार्थ ‘बियाड सम्मान’द्वारा अभ्यर्थना जनाउने गरेको छ।
आगामी 22 मार्च 2025 शनिवारको दिन पाकिम जिल्ला अन्तर्गत बिरिङमा आयोजना हुने कार्यक्रममा साहित्यमा उत्कृष्ट, अनवरत र प्रेरणादायी सेवा पुऱ्याएवापद् वरिष्ठ साहित्यकार तथा समालोचक डिल्लीप्रसाद अधिकारीलाई ‘बियाड साहित्य सेवा सम्मान’ ; वरिष्ठ नारी साहित्यकार श्रीमती उषा शर्मालाई ‘बियाड शारदा सम्मान’ ; बालक-बालिकालाई साहित्य लेखनतर्फ प्रेरणा प्रदान गर्न बालिका तेजस्विनी शर्मालाई ‘बियाड बाल प्रतिभा सम्मान’ र वरिष्ठ साहित्यकार तथा पत्रकार अर्जुन यावालाई ‘बियाड प्रतिबिम्ब सम्मान’-द्वारा सम्मान जनाइने भएको छ।
यसरी नै बिरिङ गाउँलाई मध्यनजरमा राखेर उत्कृष्ट समाज सेवा गरिरहेको र केही महत्वपूर्ण पूर्वाधार निर्माणमा सक्रीय भूमिका निर्वाह गरिरहेको गैर-सरकारी सङ्गठन ‘सिटिजन फाउण्डेसन’-लाई समाज सेवा र गाउँको पूर्वाधार निर्माणमा दिएको योगदानको निम्ति बिरिङ गाउँको तर्फबाट अभिनन्दन पनि गरिने भएको छ।
कार्यक्रममा वरिष्ठ पत्रकार तथा प्रेस क्लब अफ सिक्किमका अध्यक्ष भीम रावत मुख्य अतिथि र वरिष्ठ समाज सेवक तथा साहित्य अध्येता श्री कमल काफ्ले सभाध्यक्षका रूपमा उपस्थि रहने बियाड युवा साहित्यिक संस्थानले प्रेम विज्ञप्तिमार्फत जानकारी गराएको छ।

07/03/2025

8 मार्चमा साहित्य अकादमी पुरस्कार 2024 अर्पण कार्यक्रम
नेपाली साहित्यमा युवा बराल ‘अनन्त’-को कथासङ्ग्रह ‘छिचिमिरा’-लाई
भारत सरकारको संस्कृति मन्त्रालय अन्तर्गत रहेको सर्वोच्च साहित्यिक संस्था साहित्य अकादमीले यही मार्च ७ तारीखदेखि १२ तारीखसम्म ‘साहित्योत्सव’ (Festival of Letters) पाँच दिने महत्त्वपूर्ण कार्यक्रम आयोजना गरिरहेको दिल्लीबाट जे.के.बराईली जानकारी गराउनु भएको छ।
कार्यक्रम साँझ पाँच बजेदेखि कोपरनिकस मार्ग स्थित कमानी सभागारमा हुनेछ। सन् 2024 को लागि छनौट भएका विभिन्न साहित्यिक कृतिहरूका लागि स्रष्टाहरूलाई साहित्य अकादमी पुरस्कारले सम्मानित गर्नु कार्यक्रममा प्रमुख विषय रहनेछ।
22 भाषाका साहित्यकारहरूलाई मञ्चमा पुरस्कारले सम्मानित गरिँदा यसपटक नेपाली साहित्यको तर्फबाट सिक्किमका कथाकार तथा कवि युवा बराल ‘अनन्त’-ले आफ्नो कथा संग्रह ‘छिचिमिरा’ को लागि प्रदान गरिने साहित्य अकादमी जस्तो राष्ट्रिय पुरस्कार ग्रहण गर्नु हुनेछ। पुरस्कार अर्पण कार्यक्रमको अध्यक्षता सा. अ. का अध्यक्ष माधव कौशिकले गर्नु हुनेछ। मुख्य अतिथिको आसनमा प्रख्यात अङ्ग्रेजी नाटककार तथा रंगव्यक्तित्व महेश दत्तानी रहनु हुनेछ। वन्दना गायनबाट सुरू हुने कार्यक्रममा सा. अ. का सचिव के. श्रीनिवासरावको स्वागत भाषण र सा.अ. का अध्यक्ष माधव कौशिकको अध्यक्षीय वक्तव्यपछि स्रष्टाहरूलाई पुरस्कार र प्रशस्ति पत्र प्रदान गरिने छ। अन्तमा मुख्य अतिथिको वक्तव्य र सा.अ. का उपाध्यक्ष कुमुद शर्माको समापन वक्तव्य पछि पुरस्कार अर्पण कार्यक्रमको क्रम सकिनेछ तर लगत्तै एक सांस्कृतिक कार्यक्रम सुरू हुनेछ, जस अन्तर्गत प्रख्यात बाँसुरी वादक राकेश चौरसियाले आफ्नो वादन प्रस्तुत गर्नुहुनेछ। त्यसपछि उक्त दिनको सम्पूर्ण कार्यक्रमको समापन हुनेछ।
पुरस्कार अर्पण कार्यक्रम 8 मार्चको दिन गरिने भए तापनि साहित्य अकादमीले निश्चित गरेको पाँच दिने कार्यक्रम 7 मार्चदेखि नै रविद्र भवन परिसरभित्रकै विभिन्न सभागारमा सुरू हुनेछ। यी पाँच दिनभित्र प्रतिदिन नै कैयौं विषयहरूमा विभिन्न विषय अन्तर्गत बहुभाषी कविता पाठ हुनेछन्, जसमा अन्य भाषी कविहरू लगायत नेपाली भाषी कविहरूले पनि आफ्नो कविता वाचन गर्नेछन्। विशेष गरि यी पाँच दिनभित्रका कार्यक्रमका एकातिर विगत वर्ष 24 भित्र अकादमीले गरेको गतिविधिहरूमाथि प्रकाश पारिनेछ भने प्रतिदिन बिहान दस बजेदेखि साँझ सात बजेसम्म चल्ने कार्यक्रमहरूमा विभिन्न विषय अन्तर्गतका भिन्न भिन्न सत्रहरूमा विविध भाषाका साहित्यकारहरूले सहभागीता जनाउँनेछन्। यी सात दिनसम्मको विभिन्न सत्रमा चल्ने कार्यक्रमको बेलिविस्तार नगरेर यहाँ कुन कुन सत्रमा हाम्रा नेपाली स्रष्टाहरूका सहभागीता रहनेछ, त्यसबारे मात्र अहिलेलाई यहाँ प्रकाश पारिनेछ।
(१) सात मार्चको दिन साँझ ४.३० देखि ६ बजेसम्म चल्ने बहुभाषी कहानी पाठ अन्तर्गत चार भाषाका कथाकारहरूले आफ्नो रचना प्रस्तुत गर्नेछन्। नेपाली साहित्यको प्रतिनिधित्व गर्दै प्रसिद्ध कथाकार श्री प्रेम प्रधानले यस सत्रमा आफ्नो कथा प्रस्तुत गर्नु हुनेछ।
(२) सोही दिन साँछ ४.३० देखि हुने ‘भारत के उत्तर-पूर्वी और पश्चिम क्षेत्रों की लोक संस्कृति’ शिर्षक रहेको सत्रमा वरिष्ठ साहित्यकार एवं नेपाली परामर्श बोर्डका संयोजक शंकरदेव ढकालले आफ्नो वक्तव्य प्रस्तुत गर्नु हुनेछ।
(३) मार्च १० को दिन १२ बजेदेखि १.३० सम्म चल्ने बहुभाषी कविता पाठमा नेपाली साहित्यको प्रतिनिधित्व गर्दै आशा मुखियाले कविता वाचन गर्नु हुनेछ।
(४) सोही दिन मध्याह्न १२ बजेदेखि अपराह्न १.३० बजेसम्म कावेरी सभागारमा चल्ने बहुभाषी कविता-पाठ कार्यक्रममा नेपाली साहित्यको प्रतिनिधित्व गर्दै युवा कवि तथा समालोचक सुकराज दियालीले आफ्नो कविता प्रस्तुत गर्नु हुनेछ।
(५) मार्च ११ को दिन १० बजेदेखि ११.३० सम्म चल्ने ‘उत्तर-पूर्वी और पूर्वी भारत के मिथक और दिव्य चरित्र’ शिर्षकको कार्यक्रममा नेपाली साहित्यको प्रतिनिधित्व गर्दै कवि तथा समालोचक डा. जीवन नामदुङले सहभागिता जनाउनु हुनेछ।
(६) सोही दिन १० बजेदेखि ११.३० सम्म कावेरी सभागारमा चल्ने कविता पाठ कार्यक्रममा नेपाली साहित्यको प्रतिनिधित्व गर्दै साहित्यकार थिरू प्रसाद नेपालले सहभागीता जनाउनु हुनेछ।
(७) १२ मार्चको दिन ब्रह्मपुत्र सभागारमा पूर्वाह्न १० बजेदेखि १.३० सम्म ‘अनूदित कृतियों का पढ़ने का महत्त्व’ शिर्षकमा चल्ने सत्रमा नेपाली साहित्यको प्रतिनिधित्व गर्दै जीवन राणाले सहभागीता जनाउनु हुनेछ।
साहित्य अकादमीले सन् 1975 देखि एक भारतीय भाषाको रूपमा नेपाली भाषालाई पनि आफ्नो कार्यक्षेत्रमा ल्याएर अरू भारतीय भाषा सरह यो भाषा र साहित्यको प्रबर्द्धनको लागि पनि काम गर्दै आएको हो अनि नेपाली साहित्यकारहरूलाई पनि उत्कृष्ट कृतिको आधारमा सन् 1977 देखि साहित्य अकादमी पुरस्कार प्रदान गर्न थालेको हो। यस क्रममा अहिलेसम्ममा ४५ जना नेपाली साहित्यकारहरूले उत्कृष्ट कृतिको आधारमा यो सर्वोच्च पुरस्कार प्राप्त गरिसकेका छन्।

06/03/2025

अन्त्येष्टि
राङ्का राईगाउँ निवासी श्री प्रेमकुमार याखा राई (सीताबाउ)-को गत ५ मार्च २०२५-को दिन निधन भएको छ। ७० वर्षीय स्व. राईको दाहसंस्कार ६ मार्चको दिन सम्पन्न भयो।
आगामी ९ मार्च २०२५-को दिन राङ्का राईगाउँस्थित छोरा वीरेको निवासमा उनको अन्त्येष्टि कार्य गरिने भएको छ।
यस दुःखद घढ़ीमा हामीलाई साथ दिनुहुने सम्पूर्ण इष्टमित्र, गाउँ-छिमेकी तथा शुभचिन्तकप्रति आभार प्रकट गर्दै ९ मार्च २०२५-को दिन हुने अन्त्येष्टि क्रियामा उपस्थित भई मृतकको आत्माशान्तिको कामना गरिदिहुन विनम्र निवेदन गर्दछौं।

विनीत -
छोरा-बुहारीहरू :
-राजकुमार राई
-दिलबहादुर राई (ठूलो भाइ)/मुन्ना छेत्री (7001212923)
-बुद्धसिंह राई (वीरे)/प्रीतिका लिम्बू (7076520889)
-सुकमन राई (भुण्टे) र
-साजन राई/सकुन राई (8116693974) अनि
-सीता राई (छोरी) र नाति/नातिनीहरू एवं सम्पूर्ण शोकाकुल परिवार।

12/02/2025

Heartfelt condolences

Late Ganga Maya Rai (Mother of Shri Shyam Rai), a resident of Barpipal of Sichey under Upper Burtuk constituency, passed away today on Wednesday, 12th feb'2025.

The earthly body of the late Ganga Maya will be buried tomorrow, on 13th feb'2025 Thursday above Ranka (Fox Land).

Anteshti Kriya for peace of her soul on 17th feb'2025, Monday, all the bereaved family informed through this news.

Contact no.
8145076198

31/01/2025

तार्कु ग्राम प्रशासन केन्द्रमा हाम्रो चिन्हारी सिक्किमको सभा सम्पन्न

गत २८ जनवरी २०२५ मंगलबारका दिन दक्षिण सिक्किमको तार्कु ग्राम प्रशासन केन्द्रमा दोस्रोपटक हाम्रो चिन्हारी सिक्किमको सभा सम्पन्न भयो। हाम्रो चिन्हारी तिमीतार्कू शाखाद्वारा आयोजना गरिएको यस सभामा तिमी ग्राम पञ्चायत एकाइकी सभापति विनीता विष्ट सभाध्यक्ष रहेकी थिइन्।
सभामा हाम्रो चिन्हारी सिक्किमका अध्यक्ष चक्रपाणी भट्टराई, साङ्गठनिक सचिव लिलाधर अधिकारी, सङ्गठनका पाकिम जिल्ला अध्यक्ष कृष्ण खनाल तथा तार्कुका वरिष्ठ कार्यकर्ता दुर्गा प्रसाद सिरुपाली, धरणी शर्मा तथा गुरुभक्त नेपालको पनि उपस्तिति रहेको थियो।
दुर्गा प्रसाद सिरुपालीले स्वागत भाषण गरेपश्चात कृष्ण खनालले एउटा कविता वाचन गरे। त्यसपछि श्री लिलाधर अधिकारीले हामी र हाम्रो समाजमा भएका कमी - कमजोरीहरूका बारेमा वक्तव्य राखे। त्यसरी नै अध्यक्ष श्री चक्रपाणी भट्टराईले सिक्किमको पुरानो इतिहाससँग जोड़िएको नेपाली भाषाको अवस्थाका बारेमा प्रकाश पारेका थिए।
कार्यक्रममा पञ्चायत श्री एल बी पौड्याल, श्रीमती रुद्र कुमारी छेत्री र श्रीमती डोमा शर्मा लगायत अन्य धेरै वरिष्ठ व्यक्तिहरूको बाक्लो उपस्थिति रहेको थियो।
सभाको अन्तमा श्री गुरुभक्त नेपालले धन्यवाद ज्ञापन गरेपश्चात आगामी नेपाली नयाँ वर्ष (पहिलो वैशाख) उत्सव वृहद प्रकारले राज्यस्तरीय रूपमा मनाउने निर्णय लिँदै सभा बर्खास्त गरिएको थियो।