08/06/2026
📌 গৌৰৱে কথাই নাপাতে-ব্ৰেকফাষ্ট কৰোতেই ১০ বাজে
গৌৰৱ গগৈ পুৱা দেৰীকৈ শোৱাৰ পৰা উঠে৷ তেওঁ ব্ৰেকফাষ্ট কৰাৰ আগতে কাকো লগ নধৰে৷ ভিজিটৰ ৰৈ থাকিলেও গৌৰৱ গগৈয়ে কথা নাপাতে৷ ব্ৰেড-বাটাৰ আৰু ট’ষ্টেৰে ব্ৰেকফাষ্ট কৰি গৌৰৱ ড্ৰয়িং ৰূমত কিছুসময় বহে৷ তেতিয়ালৈ গৌৰৱ গগৈৰ ভিজিটৰৰ সৈতে কথা পাতিবলৈ বেছি সময় নাথাকে৷ মেল-মিটিঙৰ বাবে তেওঁ ওলাই যাবলৈ সময় হয়৷ মাজে মাজে নমস্কাৰ, হেণ্ডছেক কৰি সমৰ্থকৰ সৈতে মিটিঙত গৌৰৱে কথা পাতে৷ কিন্তু জনসম্পৰ্ক ৰক্ষা কৰি বেছিসময় কথা পাতিবলৈ গৌৰৱে অশান্তি পায়৷
পকেটত থকা ফোনটো মাজে মাজে গৌৰৱ গগৈয়ে উলিয়াই চায়৷ কিন্তু মিছড কল থাকিলেও তেওঁ কলবেক কৰাৰ উদাহৰণ নাই৷ মেছেজৰ ৰিপ্লাই দিয়াৰ প্ৰয়োজনবোধ গৌৰৱে নকৰে৷ মুঠতে গৌৰৱে কাকো পাত্তাই নিদিয়ে৷ তেওঁৰ অসমীয়া পেপাৰ পঢ়াৰো সময় নাই৷ কেতিয়াও বাতৰি নাচায়৷ গৌৰৱৰ মনটো দিল্লীত থাকে৷ কিবা ক’বলগীয়া থাকিলে একেবাৰে ঘনিষ্ঠ দুজন নেতাই তেওঁক কয়৷ মন গ’লে গৌৰৱ গগৈয়ে তেওঁলোকৰ কথা শুনে৷ প্ৰায়ে নুশুনে৷ গুৱাহাটীৰ লখৰাত নিজে পাতি লোৱা দলীয় কাৰ্যালয়ত গৌৰৱ বেছি সময় থাকে৷ তেওঁ প্ৰায়ে ABCৰ ৰাজীৱ ভৱনলৈ যোৱাৰ ইচ্ছা নকৰে৷
গৌৰৱ গগৈৰ এই অমনোযোগিতাৰ সুবিধা লয় তেওঁৰ বিশ্বাসী পালিনেতাই৷ যোৰহাট বিধানসভা সমষ্টিৰ নিজা বুথতে গৌৰৱ পৰাজিত হোৱাৰ এইটোৱেই মূল কাৰণ৷ আচলতে গৌৰৱৰ সৈতে সমষ্টিৰ ভোটাৰৰ ডাইৰেক্ট কানেকশ্যন নাই৷ তাৰে সুযোগ লৈ তেওঁক পালিনেতাই বিভ্ৰান্ত কৰে৷ ৯৩ নম্বৰ ৱাৰ্ডৰ ১০ নং বুথতো গৌৰৱৰ কেবাজনো ঘনিষ্ঠ পালিনেতা আছিল৷ তেওঁলোকে গৌৰৱেই ৱাৰ্ডটোৰ সকলো ভোট পাব বুলি গেৰাণ্টী দি থৈছিল৷ সেইসকলৰ কথা বিশ্বাস কৰি গৌৰৱ গগৈয়ে নিজে প্ৰচাৰ চলোৱাৰ প্ৰয়োজনেই অনুভৱ নকৰিলে৷ তাৰ ফলতে গৌৰৱ গগৈ পিতৃভিঠাতে বৰ বেয়াকৈ পৰাজিত হ’বলগীয়া হ’ল৷
গৌৰৱ গগৈ ৰাজনৈতিক কেৰিয়াৰত এবাৰো হাৰিয়েই পোৱা নাছিল৷ প্ৰতিটো নিৰ্বাচনতে জয়ী হোৱা গৌৰৱক এইবাৰো জিকিবই বুলি সেই পালিনেতাসকলেই আশ্বস্ত কৰি আছিল৷ আচলতে চাতুকাৰৰ আবেষ্টনীত অসহায় হৈ পৰিছিল গৌৰৱ গগৈ৷ তেওঁলোকৰ মাজত থাকি গৌৰৱে প্ৰকৃত পৰিস্থিতিৰ উমান নাপালে৷ ফলাফলত যেতিয়া তেওঁ ভবাতকৈ কথাবোৰ ওলোটা হ’ল তেতিয়াহে গৌৰৱে বুজি পালে প্ৰকৃত পৰিস্থিতি৷ কিন্তু তেতিয়ালৈ বহু দেৰী হৈ গৈছিল৷ গৌৰৱ গগৈয়ে এতিয়াও অসমৰ ৰাজনীতিৰ ভিতৰুৱা কঠিনতা বুজি পোৱা নাই৷ সেয়ে তেওঁ ২০৩১ত আকৌ এবা চেষ্টা কৰিব পাৰিম বুলি বিশ্বাসী হৈ আছে৷
কিন্তু এইটো গতিৰে ৰাজনীতি কৰিলে গৌৰৱ গগৈয়ে অহা ২০ বছৰৰ পিছতো একো কৰিব নোৱাৰিব৷ আনকি সঁচাকৈ ক’বলৈ গ’লে জনসম্পৰ্ক ইমান বেয়া হ’লে যোৰহাট লোকসভাত গৌৰৱ হৈ পৰিব বিধ্বস্ত৷ সমষ্টিটোত বৰ্তমান পৱিত্ৰ মাৰ্ঘেৰিটাই আগ্ৰাসী প্ৰচাৰ চলাই আছে৷ তোলনী বিয়াৰ পৰা আদ্যশ্ৰাদ্ধলৈ সৰ্বত্ৰ উপস্থিত হৈছে মাৰ্ঘেৰিটা৷ ক’ৰবালৈ যাব নোৱাৰিলেও ফোন কৰি তেওঁ জনাই দিছে৷ কিন্তু গৌৰল গগৈ যেন উদাসীন ভকতৰ নিচিনা৷ তেওঁ কাকো ভালদৰে মাতবোল নকৰে৷ ৰাজনীতি নহয় যেন চাকৰিহে কৰিছে তেনেকৈ থাকে গৌৰৱ৷ সেয়ে তেওঁক অহংকাৰী বুলি ভাবি এৰাই চলিবলৈ ধৰিছে ভোটাৰে৷
