25/08/2026
গুৱাহাটী বিশ্ববিদ্যালয়ৰ নিয়োগ মেলাত
৬৫ টা নিয়োগকাৰী প্ৰতিষ্ঠানৰ বিপৰীতে ৬০০ প্ৰাৰ্থীৰ অংশগ্ৰহণ
জালুকবাৰী ,২৫ আগষ্ট : শৈক্ষিক প্ৰতিভা আৰু উদ্যোগ খণ্ডৰ কৰ্মসংস্থাপনৰ সুযোগক একেখন মঞ্চত সংযুক্ত কৰাৰ লক্ষ্যৰে গুৱাহাটী বিশ্ববিদ্যালয়ৰ জব ফেয়াৰ কমিটিৰ উদ্যোগত আজি দিনজোৰাকৈ এখন নিয়োগ মেলা অনুষ্ঠিত হয়। নিয়োগ মেলাত ৬৫টা প্ৰতিষ্ঠানে ভাগ লয়। যত বিভিন্ন প্ৰান্তৰ পৰা অহা ছয় শতাধিক প্ৰাৰ্থীয়ে নাম পঞ্জীয়ন কৰে । নিয়োগ মেলাৰ উদ্বোধনী অনুষ্ঠানত ভাগ লৈ ভাষণ প্ৰসংগত উপাচাৰ্য অধ্যাপক ননী গোপাল মহন্তই উক্ত পদক্ষেপক প্ৰশংসা কৰি উল্লেখ কৰি কয় যে এটা সময় আছিল, যেতিয়া শিক্ষাৰ্থীসকলৰ কৰ্মসংস্থাপনৰ ক্ষেত্ৰ হিচাপে কেৱল চৰকাৰী খণ্ডকেই প্ৰধান বুলি ধৰা হৈছিল। সেই দিন এতিয়া অতীত। বৰ্তমান অসমত প্ৰায় ২২ লাখ নিবনুৱা যুৱক-যুৱতী আছে। সেয়েহে আমাৰ অধিকসংখ্যক যুৱক-যুৱতীয়ে ব্যক্তিগত খণ্ডৰ ফালে আগবাঢ়ি যোৱাটো সময়ৰ আহ্বান।
নিয়োগ মেলাত বেংকিং আৰু বিত্তীয় সেৱা, তথ্য-প্ৰযুক্তি, টেলিকমিউনিকেশ্যন, ডিজিটেল সেৱা, স্বাস্থ্যসেৱা, শিক্ষা, মাইক্ৰ’ফাইনেন্স তথা অন্যান্য সহযোগী খণ্ডৰ আগশাৰীৰ প্ৰতিষ্ঠানসমূহে অংশগ্ৰহণ কৰে। অংশগ্ৰহণকাৰী প্ৰতিষ্ঠানসমূহৰ ভিতৰত এইচ ডি এফ চি বেংক, টেক মহেন্দ্ৰ, ৰিলায়েন্স জিঅ, এক্সিজ বেংক, উজ্জীৱন স্মল ফাইনেন্স বেংক , আৰোহণ ফাইনেঞ্চিয়েল চাৰ্ভিছ, আদিত্য বিৰলা ছান লাইফ ইন্সুৰেঞ্চ আদি উল্লেখযোগ্য। নিয়োগ মেলাৰ উদ্বোধনী অনুষ্ঠানত মুখ্য অতিথি হিচাপে এইচ ডি এফ চি বেংকৰ উপ সভাপতি হেমন্ত বায়ন , সন্মানীয় অতিথি হিচাপে নেডফিৰ মহা প্ৰবন্ধক অলি বৰা , গুৱাহাটী বিশ্ববিদ্যালয়ৰ পঞ্জীয়ক অধ্যাপক উৎপল শৰ্মা, জব ফেয়াৰ সমিতিৰ অধ্যক্ষ অধ্যাপক প্ৰাঞ্জল বৰুৱা , আহ্বায়ক ডঃ সমীৰ চৰকাৰকে ধৰি উদ্যোগ খণ্ডৰ কেবাজনো প্ৰতিনিধি, বিশ্ববিদ্যালয়ৰ কেবাজনো শিক্ষক আৰু অংশগ্ৰহণকাৰী প্ৰাৰ্থীসকল উপস্থিত থাকে।
