23/11/2024
ৰাস উৎসৱৰ লগত সংগতি ৰাখি ৰাইডঙীয়া পহুকটা গাঁৱত কৃষ্ণ বন্দনাৰে মুখৰিত আকাশ বতাহ। বিধায়ক ৰূপক শৰ্মাৰ অংশ গ্ৰহণ।
ডিজিটেল সংবাদ, বটদ্ৰৱাঃ
ভগৱান শ্ৰীকৃষ্ণৰ ৰাস উৎসৱক কেন্দ্ৰ কৰি ৰাজ্যৰ প্ৰান্তে প্রান্তে এতিয়াও উৎসাহ-উদ্দীপনা বিৰাজ কৰি আছে। ৰাস উৎসৱৰ লগত সংগতি ৰাখি বটদ্ৰৱাৰ সমীপবৰ্তী ৰাইডঙীয়া পহুকটা গাঁৱত শুক্ৰবাৰে কৃষ্ণ বন্দনাৰে আকাশ বতাহ মুখৰিত হৈ পৰে। পহুকটা গাঁৱৰ 'জুৰন বৰা ক্ষেত্ৰ'ত ৰাস উৎসৱ উপলক্ষে গঞা ৰাইজৰ উদ্যোগত নিশা কেলিগোপাল নাটক মঞ্চস্থ কৰা হয়। উল্লেখ্য যে, ৰাস উৎসৱৰ লগত সংগতি ৰাখি দুদিনীয়াকৈ অনুষ্ঠিত পহুকটা গাঁৱৰ কাৰ্যসূচীত গাঁওখনৰ শিশুৰ পৰা বৃদ্ধলৈ সকলো পুৰুষ মহিলাৰ অংশ গ্ৰহণেৰে কালি প্ৰথম দিনা কেলিগোপাল নাটক মঞ্চস্থ কৰা হয় আৰু আজি (শনিবাৰে) নিশা "ভক্ত হনুমান ভাওনা পৰিবেশন কৰিব। ইফালে ঐতিহ্যমণ্ডিত গাঁও খনৰ ৰাস উৎসৱত অংশ গ্ৰহণ কৰে বিধায়ক ৰূপক শৰ্মাই। বিধায়ক ৰূপক শৰ্মাই কেলিগোপাল নাটখন উপভোগ কৰি "শৰৎ কালৰ নিশা কৃষ্ণ ভক্তিত বিলীন হবলৈ আমাক গুৰুজনাই কেলিগোপাল নাটখন দি থৈ গৈছে। আৰু এই ভগৱৎ প্ৰেমত মত্ত হৈ আমি সম্প্ৰতি, সমন্বয়ৰে এখন সুন্দৰ সমাজ গঢ়িব লাগে" বুলি মন্তব্য প্ৰদান কৰে। শৈলেন বৰাৰ পৰিচালনাৰে পুৱতি নিশালৈ মঞ্চস্থ কৰা কেলিগোপাল নাটখন সহস্ৰাধিক লোকে উপভোগ কৰে।
বটদ্ৰৱা পৰা মেহদি জামান প্রতিবেদন।
