25/04/2025
Hmar Inpui (Hmar Supreme House) 14th Assembly le Election tluong taka nei
Sakawrdai, Sinlung Hills, April 24, 2025, Virthli(ONP): Hmar Inpui (Hmar Supreme House) 10th Executive Council le 14th Assembly -cum- Election chu Community Hall, Sakawrdai, Sinlung Hills, Mizoram ah April 23-24, 2025 khan tluong taka nei zo a lo ni tah.
April 24, 2025 a 14th Assembly -cum- Election hi 10 AM-5:40 PM sung khan nei a nih. Palai 164 an ṭhang a. Palai hai lai hin Hmar Inpui Constitution dungzuiin people's representative Lalmuanpuia Punte, MLA le Adviser to CM, Mizoram; Sinlung Hills Council (SHC), Mizoram a inthawk Benjamin Lalrawnliana-Deputy Chairman, Melody Lalchhuangzeli-Executive Member, Zokhumthang-Executive Member, Lalrawngbawl Pulamte-Member le Vanlalsiamsanga-Member hai khawm ro relna ah ṭhangin an voting rights nei hmangin vote khawm an thlak ve a nih. Anni hai bak a hin mi challang tak tak Manipur tienga Ex-MLA/Minister Dr. Chaltonlien Amo, President, HNU le Ex-EM, ADCC Lalhrillien Zote, Adviser, HI-GHQ hai khawm an ṭhang bawk.
Rev. Rohminglien Pakhuongte, Speaker, Hmar Inpui, Moderator a ṭhangin a keiṭhuoi a, Rev. Langminthang, PS, Evangelical Free Church of India (EFCI), Sakawrdai Presbytery'n hnam ṭhuoitu hai hi devotion hmangpuiin Pathien mi pek Hmar hnam iengti'n am ei enkawl, khaw tieng am ei panpui, vawisun a ei enkawl dan hi a mi hrietpui am? Chanchinṭha leh inmil sien ti hai hrilin infuina ṭha tak a nei a nih.
Manipur buoina leia Zo hnathlak hringna chânhai sûnna (Condolence) minute 1 sung toṭawka nei a ni a, Rev. Vanlalhlun Traite, Fin. Secy., HCLF le Local Pastor, AGEI in hringna chan hai le tulai hnaia hnam le hnam kara buoina suok leia harsatna tuok, khuo raw peka um hai ta ding khawmin ṭawngṭai pekna a nei bawk.
Upa R. Rawna Khawbung, Assembly Secretary-in inhmelhriettirna le hminglamna a nei a, Presidential Address Rev. Ros Infimate, President, HI-GHQ in a nei zoin Finance and Audit Statement report Upa Joel Songate, Treasurer, HI-GHQ le Rev. Tlanghmingthang, Finance Secretary, Emergency Relief Finance Committee (ERFC) a inthawk ngaithlak a nih.
President HI-GHQ in Presidential Address a neina ah Manipur a hnam buoina a hringna chan hai a tuorpui thu puongin, inzana a pek a, ram buoina leia ka sawl ka kham ti loa venghimna sin thawtu hai an huoisenna leiin an chungah hnam hmingin lawmthu a hril a, an hringna khawm thlakhla loa ral hmatawnga an inpekna lawmthu a hril.
Nuhmei hai (HWA), HYA, HSA le a dang dang hai hmalakna suong um a ti thu le Region dang dang hai hmalakna lawmum a ti thu hai uor takin a hril a. Hmar Inpui 14th Assembly nei thei dinga um lawmthu hrilin palai fekhawm hai a changtieng ban pharin chibai a buk a. Hmar hnam chu hnam dang hai inhnar a nina hai hrilin vawng hring zing dingin fielna a siem.
Manipur buoina hi hnam bing buoina a ni naw a, ṭhangruol thiem a ngai zie hai hrilin narrative inlar tak Meitei vs Kuki ti a ni a, British le sawrkar mi hrietna Kuki ni sienkhawm Hmar chu Hmar, hnam pakhat sawrkar mi hriet hai ei ni ve dan hai a hril a. Indian Constitution Article 371 C chungchang le SoO group hai thil ngen chungchang, Kuki-Zo chungchang thu bakah ITLF, COTU, ITAC, HTC-CORSAM, JIC, ZU, KZC umzie le hung pieng dan hai a hrilfie bawk. KZC ah Gen. Secy. khawm Hmar a ni thu, Manipur chau a dinga indin le hmun danga Hmar hai ta dinga pawi thei ding ieng khawm a um naw thu le a ni dan tak a hril fie.
Home Ministry ah Hmar hminga inlang a vawi khatna dingin HI hmingin Home Ministry ah intatlut a ni tah dan, sawrkar thlungpui le inbiek theina dinga KZC hi lo hmang vak a ni dan, Hmar political hmathlir hrilna a nei bawk. Hmar hai inthla pung uor dinga rawtna siemin, birth control dodal, nau hau hai lawmman siem, lengṭul hai khawm nei vat dingin a fiel a. Mizoram a Sinlung Hills hlimthla hai khawm hrilin le social media tieng fimkhur a, hmang thiem dingin a ngen a, HPC-D Manipur Region sung buoina khawm chingfel a ni tah thu le MHA in KZC fethlengin Delhi ah inbiekna nei a ni dan hrilna a nei. Collective movement fepui mek laiin island movement nei lo dingin hnam mipui hai a ngen a. Hmar nina anga inpumkhatna lungril putin hmatieng pan pei dingin hnam mipui hai a fiel a nih.
Assembly Speaker-in Hmar nau UPSC AIR 999 Jerry Lalhratthang lawmpuinain a piengna pa Upa Buonglienkung Buongpui, Hmar Inpui Meghalaya Region ṭhuoitu le palai khawm inngirtirin Assembly palai fekhawm haiin an lawmpui a. Manipur buoina le inzawma media tienga thawhlawk em em el Mangtinchung kuomah a thil thaw ṭhaṭ hrietpuina le chawimawinain Hmar Women Association (HWA)-GHQ in Hmar Pasalṭhapuon inbattirna an nei.
Business session nei a ni hun ah 9th Executive Council le 13th Assembly (2024) resolutions thlirlêtna le hmalakna, Assembly karlaka Executive Committee hmalakna report le hriltlangna General Secretary, HI-GHQ le Joint Secretary inrawinaa nei le anni a inthawk ngaithlak a ni a, 10th Executive Council thurêl hriltlangna le pawmpuina nei a ni a, Agenda pawimaw tak el Manipur buoina le inzawm hriltlangna nei niin, Hmar Inpui General Headquarters 2025-2028 Office Bearers' Election chu Hmar Christian Leaders' Forum (HCLF) hai Election Commission dinga ruot anni angin Rev. Lalneikhup Hmar, Vice-Chairman, HCLF le Rev. Lungawiruol Khawbung, Secretary, HCLF hai inrawinain thienghlim le felfai taka election hi nei a nih. Election hi secret ballot paper hmanga nei a ni a, results chu: President: Rev. Ros Infimate S/o (L) Rev. HL Ngura of Saikawt, Manipur (Elected); Vice-President: J. Lalvarlien Puruolte S/o Darsavung of Zuangtui, Aizawl, Mizoram (Elected); General Secretary: Immanuel Pulamte S/o Dr. Lalkhawlien of MSVT, Aizawl, Mizoram (Elected); Joint Secretary (Head Office): VK Pakhuongte S/o (L) Liensangluoi of Sielmat, Manipur (Uncontested); Finance Secretary: Rev. Tlanghmingthang S/o Upa N. Tuolien of Rengkai, Manipur (Uncontested) le Treasurer: Lalhmingmak Joute S/o (L) Sailienlung Joute of Rengkai, Manipur (Uncontested).
Office Bearers dinga thlang thar hai hin an inthlawppui ding Executive Committee member, departmental secretaries, Sub-Committee, nominated post chi tum tum hai Hmar Inpui Constitution dungzuiin an la hung ruot ding a nih. Palai hai hmaah Hmar Inpui General Headquarters ṭhuoitu dinga thlang thar hai hi Hmar Inpui Constitution dungzuia Oath Taking Rev. Lalneikhup Hmar-in innei tirin ṭawngṭai pekna a nei.
PRESIDENT post hi (1). Lalrothang Infimate S/o (L) Ruia of Shanveng, Rengkai, Manipur; (2). Joseph Rohmingthang Hmar R. Hmar S/o (L) Lalthangmawi Hmar of Imphal, Manipur le (3). Rev. Ros Infimate
S/o (L) Rev. HL Ngura of Saikawt, Manipur haiin nomination an file a, scrutiny ah an fethleng seng a, Rev. Ros Infimate thlangtlingin a um a nih. Ama hin k*m inzawnin President, HI-GHQ a hung chel ding a nih.
VICE-PRESIDENT post ah (1). J. Lalvarlien Puruolte S/o Darsavung of Zuangtui, Aizawl, Mizoram; (2). T. Romeo Hmar S/o Kapniang of Muolvaiphei, Manipur le (3). Rev. Dr. V. Lalnghakthang S/o Rev. Lalthlunglien, Rengkai, Manipur haiin nomination an file a, scrutiny ah an fethleng seng a, sien khawm Rev. Dr. V. Lalnghakthang hin Nomination peluttuhai inhnukdawk thei hun sung April 15, 2025, zantieng dar 6 chen a ni lai khan a lo inhnukdawk leiin election hun a hin ama ni lo pahni hai laia J. Lalvarlien Puruolte thlangtling a nih.
GENERAL SECRETARY post ah (1). Immanuel Pulamte S/o Dr. Lalkhawlien of MSVT, Aizawl, Mizoram le (2). Rev. V. Lalṭhalien Zote S/o (L) Pastor S. Hlunthang of Sielmat, Manipur haiin nomination an file a, scrutiny ah a fethleng ve ve a, Immanuel Pulamte thlangtling a nih.
Nomination file hun sung, mi dang nomination file ve an um naw leiin hieng post hai hi chu khingtu um loa tlinga puong an nih: JOINT SECRETARY (HEAD OFFICE): VK Pakhuongte S/o (L) Liensangluoi of Sielmat, Manipur. FINANCE SECRETARY: Rev. Tlanghmingthang S/o Upa N. Tuolien of Rengkai, Manipur. TREASURER: Lalhmingmak Joute S/o (L) Sailienlung Joute of Rengkai, Manipur.
Ro rela um hai le thutlukna siema um hai palai fekhawmhaiin ban pharin an namdet a. Dan ang ngeiin ni 15 sungin ṭhuoitu dinga thlang thar haiin Charge inhlanna um a tih.
HI-GHQ a Vice-President, T. Romeo Hmar in lawmthu hrilna a nei a. Hmar Inpui 10th Executive Council le 14th Assembly hnesaw taka mikhuoltu Hmar Inpui, Mizoram Region (Zantieng ruoi vawikhat buoisaitu) le Sakawrdai khawtlang ṭhuoitu le a pawimaw po po thawtu HSA Sakawrdai Unit kuomah Palai haiin lawmthu an hril.
Closing prayer Rev. Lalṭhakung, Regional Superintendent, WMCEI/Treasurer, HCLF in a nei zoin hun suktawp le HI-GHQ in a buotsai zantieng bu/ruoi tuihnai tak kiltlang a nih.
Zan hun ah HSA Sakawrdai Unit in an Unit building bawlna ding ṭhangpuinain GSA Playground ah Social Function -cum- Concert buotsaiin hun hlimum tak an huoihawt a. Hnam ṭhuoitu haiin ṭawiawmin Lalkhumsang, President, HI-Mizoram Region le George F. Tuollai, President, HSA-GHQ ha'n thuhrilna hun khawm hmang anih.
