07/11/2025
ఘనంగా నవచేతన పుస్తక ప్రదర్శన ప్రారంభం
హనుమకొండ : పుస్తక పఠనంతోనే ప్రపంచ విజ్ఞానం సాధ్యం అని హనుమకొండ ఏసీపీ పి. నరసింహ రావు అన్నారు. శుక్రవారం హనుమకొండ అశోక కాంప్లెక్స్ లో నవచేతన బుక్ హౌస్ లో ఘనంగా పుస్తక ప్రదర్శన ప్రారంభం అయింది. గ్రంథాలయ వారోత్సవాలు, బాలల దినోత్సవం సందర్భంగా ఏర్పాటు చేసిన పుస్తక ప్రదర్శనను ఏసీపీ ప్రారంభించిన అనంతరం మాట్లాడుతూ మనిషిని పరిపూర్ణ వ్యక్తిగా తీర్చి దిద్దే శక్తి పుస్తకాలకే ఉందని అన్నారు. విద్యార్థి దశ నుండే పుస్తకాలు చదివే అలవాటును పెంపొందించుకోవాలన్నారు.ముఖ్యఅతిధిగా పాల్గొన్న సీపీఐ రాష్ట్ర సహాయ కార్యదర్శి తక్కళ్లపల్లి శ్రీనివాసరావు మాట్లాడుతూ ప్రముఖ ప్రచురణ సంస్థలకు చెందిన అనేక రకాల పుస్తకాలను తగ్గింపు ధరలతో నవచేతన బుక్ హౌస్ ద్వారా పాఠకులకు అందించడం అభినందనీయమని అన్నారు. ఉమ్మడి జిల్లా వ్యాప్తంగా ప్రతి ఒక్కరూ ఈ అవకాశాన్ని సద్వినియోగం చేసుకోవాలని కోరారు. బుక్ హౌస్ మేనేజర్ ఎర్ర నాగరాజు మాట్లాడుతూ ఈ పుస్తక ప్రదర్శన ఈ నెలాఖరు వరకు కొనసాగుతుందని, ఈ పుస్తక ప్రదర్శనలో 10 నుండి 40 శాతం వరకు ప్రత్యేక తగ్గింపు ఇస్తున్నట్లు తెలిపారు. ఈ కార్యక్రమంలో హనుమకొండ సీఐ మచ్చ శివకుమార్, సీపీఐ జిల్లా కార్యదర్శి కర్రె బిక్షపతి, రాష్ట్ర కార్యవర్గ సభ్యురాలు నేదునూరి జ్యోతి, రాష్ట్ర సమితి సభ్యులు ఆదరి శ్రీనివాస్, తోట బిక్షపతి, నాయకులు ఎన్. అశోక్ స్టాలిన్, గ్రేటర్ వరంగల్ ప్రెస్ క్లబ్ అధ్యక్షుడు వేముల నాగరాజు, మాజీ అధ్యక్షుడు గడ్డం కేశవమూర్తి, టీయూడబ్ల్యూజేే రాష్ట్ర ఉపాధ్యక్షులు గాడిపెల్లి మధు, జిల్లా కార్యదర్శి తోట సుధాకర్, రిటైర్డ్ ప్రిన్సిపాల్ ఎలుగటి తిరుపతి రెడ్డి, న్యాయవాదులు బండి మొగిలి, ఏరుకొండ జయశంకర్, ఎం. సదాశివుడు, జర్నలిస్టులు మంచాల రాజు, ఎండి. ఉస్మాన్ పాషా, తాండూరు గోపి, పి. కిషోర్ కుమార్, కుక్కల రాజు, సిబ్బంది అకినెపల్లి రమేష్, టి. సూర్య తదితరులు పాల్గొన్నారు.
