Paridarshaka Media

03/01/2025

01/01/2025

।।ଓଁ ନମଃ ଶିବାୟ।।

18/09/2024

ବଡଦାଣ୍ଡରେ ମାଳ ମାଳ ସପିଙ୍ଗ ମଲ,
ଦୁର୍ଘଟଣାରେ ଆଘାତ ହେଉଛି ମୁଣ୍ଡ - ପ୍ରଶାସନର ଖୋଲୁନି ତୁଣ୍ଡ ।

ପୁରୀ : ବଡଦାଣ୍ଡରେ ଦିନକୁ ଦିନ ଅଧିକ ସଂକ୍ଷକ ସପିଙ୍ଗ ମଲ, ହୋଟେଲ, ଲଜିଙ୍ଗ, କ୍ଲିନିକ ଖୋଲିବା ଯୋଗୁଁ ଏତେବଡ ବଡଦାଣ୍ଡ ସଂକ୍ରିନ ହୋଇଯାଉଛି । ବଡଦାଣ୍ଡ ଉପରେ ଶହ ଶହ ବାଇକ, କାର, ଅଟୋ ରଖିବା ଯୋଗୁଁ ଦୁର୍ଘଟଣା ଘଟୁଛି । ଜିଲ୍ଲା ପ୍ରଶାସନ, ପୋଲିସ ପ୍ରଶାସନ ସବୁ ଦେଖି ତୁଣ୍ଡ ନ ଖୋଲିବା ଯୋଗୁଁ ସହରବାସୀ, ପର୍ଯ୍ୟଟକ ଓ ତୀର୍ଥଯାତ୍ରୀ କଲବଲ ହେଉଛନ୍ତି । ବେପାରୀଙ୍କ ଦଖଲକୁ ଚାଲିଗଲାଣି ବଡ଼ଦାଣ୍ଡ । କିଏ ନିଜର ବ୍ୟବସାୟିକ ପ୍ରତିଷ୍ଠାନର ପ୍ରଚାର କରିବା ପାଇଁ ହେଉ କି ଗାଡି ରଖି ବା ପାଇଁ ହେଉ ମାଡି ବସୁଛନ୍ତି ବଡ଼ଦାଣ୍ଡ ।କେବଳ ବଡ଼ଦାଣ୍ଡ ନୁହେଁ ପୁରୀ ସହରର ସବୁ ଗଳି କନ୍ଦି ରାସ୍ତା ବି ଛୋଟ ବଡ଼ ବେପାରୀଙ୍କ ଦଖଲରେ ରହିଗଲାଣି । ରାସ୍ତା ଉପରେ ବେପାର କରିବା ଦ୍ୱାରା ସହରର ଜନସାଧାରଣ ଓ ପର୍ଯ୍ୟଟକ, ଭକ୍ତ ନାହିଁ ନ ଥିବା ଯନ୍ତ୍ରଣା ଭୋଗୁଛନ୍ତି । ସହରରେ ଯେତେ ଗୁଡିଏ ବହୁତଳ ମାର୍କେଟ କମ୍ପ୍ଲେକ୍ସ ହେଇଛି ସେମାନଙ୍କର କାହାର ପାର୍କିଂ ଜାଗା ନାହିଁ । ଏହି ମାର୍କେଟ କମ୍ପ୍ଲେକ୍ସ ନିର୍ମାଣ କରିବା ସମୟରେ ପୁରୀ କୋଣାର୍କ ଉନ୍ନୟନ ଅଥୋରୀଟି ପାଖରୁ ପ୍ଲାନର ଅନୁମତି ଆଣୁଛନ୍ତି । ସମସ୍ତଙ୍କର ପାର୍କିଂ ପାଇଁ ନିର୍ଦ୍ଧିଷ୍ଟ ଅଂଚଳ ପ୍ଲାନ ରେ ଥିବା ବେଳେ ପ୍ରକୁତରେ ପାର୍କିଂ ପାଇଁ ଜାଗା ନାହିଁ । ମାତ୍ର ତାହାର ଉଲଂଘନ କରି ସେଠାରେ ସମସ୍ତେ ଦୋକାନ ଘର ନିର୍ମାଣ କରିଥିବା ଦେଖିବାକୁ ମିଳୁଛି । ପୁରୀ ପୌରପାଳିକା, ନା ଜିଲା ପ୍ରଶାସନ ନା ପୋଲିସ ପ୍ରଶାସନ କେହି ଏହି ବେନିୟମ କାମକୁ ବିରୋଧ କରି କାର୍ଯ୍ୟାନୁଷ୍ଠାନ ଗ୍ରହଣ କରୁନାହାନ୍ତି । ପ୍ରକାରନ୍ତରେ ଏହି ବେନିୟମ କାର୍ଯ୍ୟକୁ ପ୍ରସୟ ଦେଇଛନ୍ତି। ଟ୍ରାଫିକ ହେଉ କି ପି. କେ. ଡ଼ି. ଏ ସବୁ ଚୁପ ରହିବା କାରଣରୁ କିଛି ଭିତିରିଆ ସଲା ସୁତୁରା ଚାଲିଛି ବୋଲି ସହରରେ ଆଲୋଚନା ହେଉଛି । ଖାଲି ବଡ଼ଦାଣ୍ଡରେ ଥିବା ମାର୍କେଟ କମ୍ପ୍ଲେକ୍ସ ନୁହେଁ ବରଂ ସାହି ମାନଙ୍କରେ ଲଜିଙ୍କ, ହୋଟେଲ ବି ସର୍ବସାଧାରଣଙ୍କ ରାସ୍ତା ମାଡି ବସିଛନ୍ତି । ବଡ଼ଦାଣ୍ଡରେ ପ୍ରାୟ ୨୦ ଟି ଉର୍ଦ୍ଧ୍ବ ବଡ଼ ବଡ଼ ସପିଂ ମଲ ସର୍ବସାଧାରଣଙ୍କ ପାଇଁ ଉଦିଷ୍ଟ ରାସ୍ତା ଉପରେ ବେନିୟମ ଗାଡି ପାର୍କିଂ କରୁଛନ୍ତି । ବିପୋଲିସ, ଟ୍ରାଫିକ, ଜିଲା ପ୍ରଶାସନ, ପୌରପାଳିକା, ପି. କେ. ଡ଼ି. ଏ କେହି ଏହାର ସ୍ଥାୟୀ ପ୍ରତିକାର ପାଇଁ ଚିନ୍ତା କରି ନାହାନ୍ତି । ଗ୍ରାଣ୍ଡ ସେଣ୍ଟର, ସୂର୍ଯ୍ୟ କମ୍ପ୍ଲେକ୍ସ, ଶ୍ରୀହରୀ ଗ୍ରାଣ୍ଡ,ଵିଷ୍ଣୁ ଦର୍ଶନ, ଏମ ବଜ଼ାର, ନନ୍ଦିଘୋଷ ପ୍ଲାଜ଼ା, ଚନ୍ଦନ ବଜାର, ଏମ ବଜାର, ଗୁପ୍ତା ଇଲେକ୍ଟ୍ରୋନିକ୍ସ, ଭି. ମାର୍ଟ, ତ୍ରିମୂର୍ତୀ ହୋଟେଲ, ଖିମଜି ସୁନା ଦୋକାନ, ସହିତ ସହରରେ ଥିବା ମଣ୍ଡପ ଗୁଡିକ ମଧ୍ୟ ନିଜର ପାର୍କିଂ ସ୍ଥଳ ନ ରଖିବା ଫଳରେ ବିବାହ, ମାଙ୍ଗଳିକ କାର୍ଯ୍ୟ, ସଭା ସମିତି ସମୟରେ ସାଧାରଣ ଲୋକ ନାହିଁ ନ ଥିବା ଦୁର୍ଦ୍ଦଶା ଭୋଗୁଛନ୍ତି । ବାରମ୍ବାର ଅଭିଯୋଗ ହେବା ସତ୍ତ୍ୱେ ପୋଲିସ ପ୍ରଶାସନ, ଜିଲା ପ୍ରଶାସନ, ପୌରପାଳିକା ଚୁପ ରହୁଥିବା ଅଭିଯୋଗ ହେଉଛି । ବାସିନ୍ଦା, ପର୍ଯ୍ୟଟକ, ଭକ୍ତ, ବୁଦ୍ଧିଜୀବି ଏହି ପ୍ରସଙ୍ଗ ରେ ତୁଣ୍ଡ ଖୋଲୁ ନାହାନ୍ତି । ଯୋଉ ବ୍ୟବସାୟିକ ପ୍ରତିଷ୍ଠାନ, ମଣ୍ଡପ, ହୋଟେଲ, ଲଜିଙ୍ଗମାନଙ୍କର ନିଜସ୍ୱ ପାର୍କିଂ ନାହିଁ ତାଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସାଧାରଣ ଜନତା ଦାବୀ କରିଛନ୍ତି ।

28/08/2024

ଗୋଟିଏ ଗଛ କୋଟିଏ ଜୀବନ କାର୍ଯ୍ୟକ୍ରମ ।
ପୁରୀ : ପୁରୀ ଜିଲ୍ଲା ସ୍ବେଛାସେବୀ ସଂଗଠନ ସାମୁଖ୍ୟ ଦି ବେଲ୍ ଓ ଷ୍ଟେଟ ବ୍ୟାଙ୍କ୍ ମିଳିତ ଆନୁକୁଲ୍ୟରେ ଆୟୋଜିତ ହୋଇଯାଇଛି ଗୋଟିଏ ଗଛ କୋଟିଏ ଜୀବନ କାର୍ଯ୍ୟକ୍ରମ ।ପୁରୀ ବାଙ୍ଗର୍ ଠାରେ ଠାରେ ଥିବା ଇଣ୍ଟିଗ୍ରେଟେଡ ଇଂନଫା ଷ୍ଟ୍ରକଚର୍ ସେଣ୍ଟର୍ ରେ ଏହି ବୃକ୍ଷରୋପଣ କାର୍ଯ୍ୟକ୍ରମ କରାଯାଇଛି । ସେଠାରେ ଥିବା ମାନସିକ ବିକାର ଗ୍ରସ୍ତ୍ତ୍ ଲୋକ ମାନଙ୍କୁ ଏକ ସୁନ୍ଦର ପରିବେଶ ଦେବା ପାଇଁ ସେଠାରେ ଶହେରୁ ଉର୍ଦ୍ଧ୍ବ ଫଳ ଓ ଫୁଲ ଗଛ ପୋତାଯାଇଥିଲା ।କାର୍ଯ୍ୟକ୍ରମରେ ଅତିଥି ଭାବରେ ପୁରୀ ଜିଲ୍ଲା ସାମାଜିକ ସୁରକ୍ଷା ଅଧିକାରୀ ଶୁଭ୍ରାଂଶୁ ମହାରଣା ଯୋଗ ଦେଇ ବର୍ତ୍ତମାନ ସମୟରେ ପୁରୀ ଏକ ସମୁଦ୍ରକୂଳିଆ ସହର ହେବା ସତ୍ତ୍ଵେ ଦିନକୁ ଦିନ ଏହା ଉତ୍ତପ୍ତ ସହର ଭାବରେ ପରିବର୍ତ୍ତିତ ହେଉଛି ତେଣୁ କେବଳ ବ୍ରୁକ୍ଷରୋପଣ ଦ୍ଵାରା ଏହାର ନିରାକରଣ ହୋଇ ପାରିବ ବୋଲି କହିଥିଲେ । କାର୍ଯ୍ୟ କ୍ରମରେ ଅନ୍ୟ ତମ ଅତିଥି ଭାବରେ ଷ୍ଟେଟ ବ୍ୟାଙ୍କ ମୁଖ୍ୟଶାଖା ଚିଫ୍ ଜେନେରାଲ ମ୍ୟାନେଜର ବିଜୟ କୁମାର ଶତପଥୀ ଯୋଗ ଦେଇ ଷ୍ଟେଟ ବ୍ୟାଙ୍କ ସଦା ସର୍ବଦା ସାମାଜିକ ଦାୟିତ୍ଵରେ ନିଜର ଭଗିଦାରିତା ରଖିଥାଏ ବୋଲି କହିଥିଲେ । କାର୍ଯ୍ୟକ୍ରମକୁ ଦି ବେଲ୍ ଅଧକ୍ଷ ସିଦ୍ଧାର୍ଥ ରାୟ ପରିଚାଳନା କରିଥିବା ବେଳେ ଦି ବେଲ୍ ୟୁଥ୍ କ୍ଲବ୍ ସଦସ୍ୟ ଓ ଆଈ ଆଈ ସି କମ୍ପ୍ଲେକ୍ସ କର୍ମଚାରୀ ମାନେ ଏହି ବୃକ୍ଷ ରୋପଣ କାର୍ଯ୍ୟକ୍ରମ ରେ ସହଯୋଗ କରିଥିଲେ ।

25/08/2024

୧୮ ତମ ରାଜ୍ୟ ସୋତୋକାନ କରାଟେ ପ୍ରତିଯୋଗିତା ଉଦଘାଟିତ ।
ପୁରୀ : ୧୮ ତମ ରାଜ୍ୟ ସୋତୋକାନ କରାଟେ ପ୍ରତିଯୋଗିତା ରେଲବାଇ କଲ୍ୟାଣ ମଣ୍ଡପ ଠାରେ ଉଦଘାଟିତ ହୋଇଯାଇଛି । ମୁଖ୍ୟ ଅତିଥିଭାବେ ରାଜ୍ୟସଭା ସାଂସଦ ଶୁଭାଶିଷ ଖୁଣ୍ଟିଆ ଯୋଗଦେଇ କହିଲେ ଯେ ଇଛାଶକ୍ତି ଓ ଅଭ୍ୟାସ ବଳରେ ସଫଳତା ଆସିପାରିବ । ଆତ୍ମରକ୍ଷା ପାଇଁ କରାଟେର ଆବଶ୍ୟକତା ରହିଛି । ବିଶ୍ୱ ପାରମ୍ପରିକ ସୋତୋକାନ କରାଟେ ଫେଡେରେସନର ଓଡିଶା ରାଜ୍ୟ କରାଟେ ପ୍ରତିଯୋଗିତା ଓ ପ୍ରଶିକ୍ଷଣ ଅଗଷ୍ଟ୨୪ ରୁ ୨୬ ତାରିଖ ପ୍ରଯ୍ୟନ୍ତ ୩ ଦିନ ଚାଲୁ ରହିବ । ଏଥିରେ ଡବ୍ଲୁ ଟି ଏସ କେ ଏଫ ର ମୁଖ୍ୟ ପ୍ରଶିକ୍ଷକ ସିହାନ ସତ୍ରଜିତ ଚୌଧୁରୀ ଯୋଗ ଦେଇ ପ୍ରଶିକ୍ଷଣ ଦେଇଥିଲେ । ରାଜ୍ୟର ବିଭିନ୍ନ ଜିଲ୍ଲାରୁ ୨୫୦ ପ୍ରତିଯୋଗୀ ଯୋଗଦେଇଥିଲେ । ସ୍ପୋର୍ଟ୍ସ କରାଟେ ବିଷୟରେ ଶିକ୍ଷ୍ୟାଦାନ ଦିଆଯାଇଥିଲା । ରବି ନାରାୟଣ ଖୁଣ୍ଟିଆ,ଏସ. ଆର. ଶାସମଲ, ସନକ ଦେଓ, ପ୍ରସନ୍ନ ପଟ୍ଟନାୟକ, ରାଜନାରାୟଣ ଖୁଣ୍ଟିଆ ଓ ସହଯୋଗୀ କରାଟେକୋମାନେ ଏହାକୁ ପରିଚାଳନା କରିଥିଲେ ।

21/08/2024

ବର୍ଷେ ହେଲାଣି ବସି ପାରୁନି ଜିଲ୍ଲା ପରିଷଦ ବୈଠକ ।
ପୁରୀ : ପୁରୀ ଜିଲ୍ଲା ପରିଷଦ ବୈଠକ ଦୀର୍ଘ ଏକ ବର୍ଷ ହେଲାଣି ଅନୁଷ୍ଠିତ ହୋଇପାରୁନାହିଁ । ଯାହାଫଳରେ ଜିଲ୍ଲାର ଉନ୍ନୟନ କାମ ଓ ଯୋଜନା ପ୍ରସ୍ତୁତ ହୋଇପାରୁନାହିଁ । ବର୍ଷକୁ ଚାରିଥର ବୈଠକ ବସିବା ନିୟମ ଥିବାବେଳେ ଗୋଟିଏ ବୈଠକ ବସିନପାରିବା ଘଟଣା ସଭ୍ୟମାନଙ୍କ ମନକୁ ଆନ୍ଦୋଳିତ କରୁଥିବା ଆଲୋଚିତ ହେଉଛି । ନିର୍ବାଚନ ଆଚାରନବିଧି ନାମରେ ପାଞ୍ଚ ମାସ ଗଡାଇ ଦିଆଯାଇଥିଲା । ଏବେ ରାଜ୍ୟ ସରକାର ବିଜେପି ଗଠନ କରିଥିବାବେଳେ ଜିଲ୍ଲାପରିଷଦ ଅଧକ୍ଷ୍ୟା ବିଜେଡି ଦଳର । ବୈଠକ ବସିଲେ ଜଣାପଡିବ କେଉଁ ସଭ୍ୟ କିପରି ଆଲୋଚନା କରୁଛନ୍ତି । ରାଜଧାନୀ ନିକଟ ଉପକୂଳ ଜିଲ୍ଲାରେ ଯଦି ଏପରି ଅବସ୍ଥା ତେବେ କେବିକେ ଜିଲ୍ଲାରେ କଣ ହେଉଥିବ ତାକୁ ନେଇ ସଭ୍ୟମାନେ ଆଲୋଚନା କରୁଛନ୍ତି । ବିଜେଡି ଦଳ ଜଣେ ଜିଲ୍ଲା ପରିଷଦ ସଭ୍ୟଙ୍କୁ ଦଳ ରୁ ବହିଷ୍କାର କରିଛନ୍ତି । ବୈଠକ ବସିଲେ ଜଣା ପଡିବ ସେହି ସଭ୍ୟ କାହାକୁ ସମର୍ଥନ କରିବେ । ମୁଖିଆଙ୍କ ନିର୍ଦେଶକ ନିର୍ବାଚନରେ ହାରିଯାଇଥିବା ବେଳେ ଅଧକ୍ଷ୍ୟାଙ୍କୁ ଅନେକ ସଭ୍ୟ ଚାହୁଁ ନ ଥିବା ଆଲୋଚନା ହେଉଛି । ଅଧକ୍ଷ୍ୟା ବର୍ଷକୁ ଚାରିଟା ବୈଠକ କରିପାରୁ ନାହାନ୍ତି ବୋଲି ଅଭିଯୋଗ ହେଉଛି । ଏଗାର ବ୍ଲକର ଉନ୍ନୟନ କାମ ଅଟକି ରହିଛି । ତେତିଶ ଟି ଜିଲ୍ଲା ପରିଷଦ ଅଂଚଳରେ କଣ କାମ ବାକି ରହିଛି, ବକେୟା କାମ କଣ ରହିଛି, ଆଗକୁ କଣ କାମ ଏସଟିମେଟ ରହିଛି ସେ ସମ୍ପର୍କରେ ରୂପରେଖ ଠିକ ହୋଇନାହିଁ । ଏବେ ଚଳିତ ମାସ ଚଉଦ, ଉଣଇସ ତାରିଖରେ ବୈଠକ ଡାକିବାକୁ ମସୁଧା କରିଥିଲେ ମଧ୍ୟ ତାହା ସମ୍ଭବ ହୋଇପାରୁନାହିଁ । ଅନ୍ୟ ପକ୍ଷରେ ନୂଆ ବିଧାୟକ ପରିଷଦ ବୈଠକର ଅନୁଭୂତି ନେଇ ପାରୁ ନାହାନ୍ତି । ବ୍ରହ୍ମଗିରିର ବିଧାୟିକା ଉପାସନା ମହାପାତ୍ର, ପୁରୀର ସୁନୀଲ ମହାନ୍ତି, ସତ୍ୟବାଦୀ ବିଧାୟକ ଓ଼ମ ପ୍ରସାଦ ମିଶ୍ର, ପିପିଲି ବିଧାୟକ ଆଶ୍ରିତ ପଟ୍ଟନାୟକ, ନିମାପଡା ବିଧାୟକ ତଥା ଉପମୁଖ୍ୟ ମନ୍ତ୍ରୀ ପ୍ରଭାତୀ ପରିଡା ଜିଲ୍ଲା ପରିଷଦ ବୈଠକର ନୂଆ ଅନୁଭୂତି ଅନୁଭବ କରିବେ ଖୁବ ଶୀଘ୍ର ଜିଲ୍ଲା ପରିଷଦ ବୈଠକ ଡାକିବା ପାଇଁ ସଭ୍ୟ ସଭ୍ୟା ଓ ବୁଦ୍ଧିଜୀବୀ ମହଲରେ ଦାବୀ ହେଉଛି ।

20/08/2024

ପୁରୀ ଜିଲ୍ଲା କିନ୍ନର ସଂଘ ଓ ଦି ବେଲ୍ ତରଫରୁ ମାର୍ଚ୍ଚ ଫର୍ ଜଷ୍ଟିସ କାର୍ଯ୍ୟକ୍ରମ।

ପୁରୀ : କଲିକତାରେ ଡାକ୍ତରୀ ଛାତ୍ରୀ ମୌମିତା ଦେବନଥଙ୍କୁ ଗଣ ଦୁଷ୍କର୍ମ ଓ ବର୍ବର୍ ହତ୍ୟା କରାଯିବା ଘଟଣାକୁ ନେଇ ସମ୍ପୂର୍ଣ ଭାରତ ବର୍ଷରେ ପ୍ରତିବାଦର ସ୍ୱର୍ ଉଠିଚି ।ଏହି କ୍ରମରେ ପୁରୀ ଠାରେ ପୁରୀ ଜିଲ୍ଲା କିନ୍ନର ସଙ୍ଘ ଓ ପୁରୀ ଜିଲ୍ଲା ସ୍ବେଛାସେବୀ ସଂଗଠନ ସାମୁଖ୍ୟ ଦି ବେଲ ର ମିଳିତ ଆନୁକୂଲ୍ୟରେ ଏକ ଶାନ୍ତି ପ୍ରତିବାଦ ଶୋଭାଯାତ୍ରା ମାର୍ଚ୍ଚ ଫର୍ ଜଷ୍ଟିସ ଗୁଣ୍ଡିଚା ମନ୍ଦିରରୁ ବାହାରି ସହର ପରିକ୍ରମା କରିଛି । ଏଥିରେ କଲେଜ ଛାତ୍ର ଛାତ୍ରୀ ସ୍ବେଛାସେବୀ ସଙ୍ଗଠନ ପ୍ରମୁଖ ଓ ବୁଦ୍ଧି ଯିବି ମାନେ ଯୋଗ ଦେଇଥିଲେ ।
ଶୋଭାଯାତ୍ରା ବଳଗଣ୍ଡି ଠାରେ ଶେଷ ହେବା ପରେ ସମସ୍ତେ ଶ୍ରାଦ୍ଧ ସୁମନ ଅର୍ପଣ କରିବା ସହିତ ନୀରବ ପ୍ରାର୍ଥନା କରାଯାଇଥିଲା ।କାର୍ଯ୍ୟକ୍ରମ ଦି ବେଲ୍ ଅଧକ୍ଷ ସିଦ୍ଧାର୍ଥ ରାୟ ଓ ପୁରୀ ଜିଲ୍ଲା କିନ୍ନର ସଂଘ୍ ସଭାପତି ପ୍ରୀୟାଂଶି ଦାସଙ୍କ ପ୍ରତ୍ୟକ୍ଷ ତତ୍ବାବଧାନରେ କରାଯାଇଥିଲା । କାର୍ଯ୍ୟ କ୍ରମକୁ ଦି ବେଲ ର ବନିତା ଦୀକ୍ଷିତ, ରାଜ କିଶୋର ପାତ୍ର ଓ ଲକ୍ଷ୍ମୀ ଦାସ କିନ୍ନର ସଙ୍ଘର ଦେବକୀ ମା, ପିହୁ ମିଶ୍ର, ପୂଜା ମା ଓ କବିତା ମା ଓ ଦି ବେଲ୍ ର ସଦସ୍ୟ ସଦସ୍ୟା ମାନେ ପରିଚାଳନା କରିଥିଲେ ।

20/08/2024

ଶ୍ରୀକ୍ଷେତ୍ରରେ ଝୁଲଣ କୁଞ୍ଜରେ ଝୁଲୁଛନ୍ତି କୁଞ୍ଜବିହାରୀ ।
ପୁରୀ : ମଠ ମନ୍ଦିରରେ ବ୍ଯାପକ ସାଜସଜ୍ଜା, ପଶୁପକ୍ଷୀ, ଜୀବଜନ୍ତୁଙ୍କ ପ୍ରତିକୃତିରେ ସୁସଜ୍ଜିତ ଏହି ଝୁଲଣକୁଞ୍ଜ । ଜଗନ୍ନାଥ ବଲ୍ଲଭ ମଠ, ରାଧାବଲ୍ଲଭ ମଠ, ରାଧେଶ୍ୟାମ ମଠ, ମଣିରାମ ମଠ, ସାନଛତା ମଠ, ନେବଳଦାସ ମଠ, ଜୀୟରସ୍ବାମୀ ମଠ ସହ ଅନ୍ଯ ମଠ ମାନଙ୍କରେ ବଡ ବଡ ତୋରଣ କରିବା ସହ ରାଧାକୃଷ୍ଣଙ୍କ ସହ ଅନ୍ଯ ଦେବାଦେବୀଙ୍କୁ ଝୁଲଣକୁଞ୍ଜରେ ବସାଇ ପୂଜାର୍ଚ୍ଚନା କରିଛନ୍ତି । ଅନ୍ନ ବ୍ଯଞ୍ଜନ ଠାରୁ ଆରମ୍ଭ କରି ନାନାଦି ଭୋଗ ଲାଗି କରିଛନ୍ତି । ଭଜନକୀର୍ତ୍ତନ ସହ ଧାର୍ମିକ କାର୍ଯ୍ୟକ୍ରମରେ ଉଛୁଳୁଛି ମଠ ମନ୍ଦିର । ଭକ୍ତମାନେ ବି ପୂଜାର୍ଚ୍ଚନା ସହ ପ୍ରସାଦ ସେବନ ପାଇଁ ମଠ ମନ୍ଦିରରେ ଭିଡ ଲଗାଇଛନ୍ତି । ଝୁଲଣ ମଣ୍ଡପରେ ଦୋଳି ଖେଳିବାର ଦୃଶ୍ଯକୁ ଭକ୍ତ ମାନେ ମନଭରି ଦେଖିଛନ୍ତି । ବିଳମ୍ବିତ ରାତି ପର୍ଯ୍ୟନ୍ତ ନୀତିକାନ୍ତି ଚାଲିବା ସହ ଭକ୍ତଙ୍କ ଭିଡ ଜମୁଛି । ରାଧାକୃଷ୍ଣଙ୍କ ସହ ଅନ୍ଯ ଦେବାଦେବୀଙ୍କ ଆଶିର୍ବାଦ ନେଇଛନ୍ତି ।

20/08/2024

ଜଳାଶୟରେ ଦୁଇ ମହଲା କୋଠା ନିର୍ମାଣ, ପ୍ରଭାବଶାଳୀଙ୍କ ଚାପରେ ଚେପା ପ୍ରଶାସନ ।

ପୁରୀ : ଶ୍ରୀଜଗନ୍ନାଥ ମହାପ୍ରଭୁଙ୍କ ଅଚଳାଚଳ ସମ୍ପତ୍ତି ଆସ୍ତେ ଆସ୍ତେ କମିବାରେ ଲାଗିଛି । ଶ୍ରୀମନ୍ଦିର ପ୍ରଶାସନ ମହାପ୍ରଭୁଙ୍କ ସମ୍ପତ୍ତି ସୁରକ୍ଷା କରିବାରେ ନୀରବତା ଅବଲମ୍ବନ କରିବାରୁ ଜବରଦଖଲ କାରୀମାନେ ନିର୍ଦ୍ବନ୍ଦରେ ସମ୍ପତ୍ତି ମାଡି ବସୁଛନ୍ତି । ମହାପ୍ରଭୁଙ୍କ ପ୍ରମୋଦ ଉଦ୍ୟାନ ଶ୍ରୀଜଗନ୍ନାଥ ବଲ୍ଲଭରେ ଅନେକ ଜଳାଶୟ, ଔଷଧୀୟ ବୃକ୍ଷ ଓ ବିଭିନ୍ନ ଗଛ ରହିଥୁଲା । ଶ୍ରୀସେତୁ ଓ ବହୁତଳ କାର ପାକିଂ ଓ ମ୍ୟୁଜିୟମ ଯୋଗୁଁ ମହାପ୍ରଭୁଙ୍କ ପ୍ରମୋଦ ଉଦ୍ୟାନ ଏବେ କୋଳାହଳମୟ ହୋଇ ଉଠିଛି । ସବୁଠାରୁ ଗୁରୁତ୍ବପୂର୍ଣ ବିଷୟ ବଲ୍ଲଭ ଠାରୁ ଦୋଳବେଦୀ ପର୍ଯ୍ୟନ୍ତ ଶ୍ରୀଦାଣ୍ଡ ଖୋଲିବା ପରେ ବହୁ ପ୍ରଭାବଶାଳୀ ବ୍ୟକ୍ତି, ପ୍ରଶାସନିକ ଅଧିକାରୀ ମାନଙ୍କ ଦୃଷ୍ଟି ଜଳାଶୟ ଯାଗା ଉପରେ ପଡିଛି । ପୁରୀ ସହର ୟୁନୀଟ ନମ୍ବର ୨୦ ଦାଣ୍ଡିମାଳସାହି ମୌଜାର ଖାତା ନମ୍ବର ୨୫ ପଟ୍ଟାଟି ଶ୍ରୀଜଗନ୍ନାଥ ମହାପ୍ରଭୁ ବିଜେ ଶ୍ରୀକ୍ଷେତ୍ର ମାର୍ଫିତ ଶ୍ରୀମନ୍ଦିର ପରିଚାଳନା କମିଟି, ପୁରୀ ନାମରେ ରହିଛି । ଏହାର ପ୍ଲଟ ନମ୍ବର ୩୭୧ରେ ଜଳାଶୟ ଦୁଇ , ପୋଖରୀ ରହିଛି । ଏହାର ସମୁଦାୟ ଏରିଆ ୩୯.୩୦ ଡିସିମିଲି ରହିଛି । ଏହି ସ୍ଥାନରେ ଜୈନକ ପ୍ରଭାବଶାଳୀ ବ୍ୟକ୍ତି ଶ୍ରୀମନ୍ଦିର ପ୍ରଶାସନ, ଜିଲ୍ଲାପ୍ରଶାସନ ଓ କିଛି ପ୍ରଚାର ମାଧ୍ଯମ ବ୍ୟକ୍ତିମାନଙ୍କୁ ହାତ କରି ଏକ ମହଲା ନିର୍ମାଣ କରିବା ପରେ ଦୁଇ ମହଲା କୋଠା ନିର୍ମାଣ ରାତାରାତି ହାଇସ୍ପିଡିରେ କାର୍ଯ୍ୟ ଚାଲିଛି । ଦୀପତଳ ଅନ୍ଧାର ପରି ଶ୍ରୀମନ୍ଦିର ପ୍ରଶାସନ କାର୍ଯ୍ୟାଳୟର ଅତି ନିକଟରେ ଦିନ ଦ୍ଵିପ୍ରହରରେ ଆଖିରେ ଆଙ୍ଗୁଠି ଗେଜିଂ ନିର୍ମାଣ କାର୍ଯ୍ୟ ଚାଲିଥିଲେ ମଧ୍ୟ ସମ୍ପୃକ୍ତ ରାଜସ୍ୱ ନିରୀକ୍ଷକ ଆଖିବୁଜି ଶୋଇଥିବା ଅଭିଯୋଗ ହୋଇଛି । ଜଳାଶୟରେ କୌଣସି ନିର୍ମାଣ କାର୍ଯ୍ୟ ହୋଇପାରିବ ନାହିଁ ବୋଲି ଆଇନ ଥିବା ବେଳେ କିପିରି ଏହି କାର୍ଯ୍ୟ ସର୍ବ ସମ୍ମୁଖରେ ଚାଲିଛି ତାକୁ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି ।

20/08/2024

୨୩ ତାରିଖରେ ରତ୍ନଭଣ୍ଡାରରୁ ଅଲମିରା ଓ ସିନ୍ଦୁକ ସ୍ଥାନାନ୍ତରଣ, ଦିବା ୧ ଘଟିକା ରୁ ଦର୍ଶନ ବନ୍ଦ ।

ପୁରୀ : ଚଳିତମାସ ୨୩ ତାରିଖରେ ବାହାର ଏବଂ ଭିତର ରତ୍ନଭଣ୍ଡାର ଥିବା ଖାଲି ଆଲମିରା ଏବଂ ସିନ୍ଦୁକଗୁଡ଼ିକ ସ୍ଥାନାନ୍ତରଣ କରାଯିବ l ରାଜ୍ୟ ସରକାରଙ୍କ ଅନୁମୋଦିତ ମାର୍ଗଦର୍ଶିକା (ଏସ ଓ ପି ) ଅନୁସାରେ ଏହି ସ୍ଥାନାନ୍ତରଣ ପ୍ରକ୍ରିୟା ଅନୁଷ୍ଠିତ ହେବ । ଖାଲି ଆଲମିରା ଏବଂ ସିନ୍ଦୁକ ଗୁଡିକୁ ଭିତର ଓ ବାହାର ରତ୍ନଭଣ୍ଡାରରୁ ସ୍ଥାନାନ୍ତରଣ କରାଯାଇ ଶ୍ରୀମନ୍ଦିର ପରିସରରେ ଥିବା ନୀଳାଦ୍ରି ବିହାର ମ୍ୟୁଜିୟମ୍ ନିକଟସ୍ଥ ଏକ ଗୃହରେ ସୁରକ୍ଷିତ ରଖାଯିବ l ତେଣୁ ଏହି ଦିନ ଶ୍ରୀଜୀଉଙ୍କ ନୀତିକାନ୍ତି ବା ସେବାପୂଜାରେ ବ୍ୟାଘାତ ନକରି ସ୍ଥାନାନ୍ତରଣ ପ୍ରକ୍ରିୟା ପାଇଁ ଆବଶ୍ୟକ ସମୟ ଦେବା ଲାଗି ବିଶେଷ ନୀତି ନିର୍ଘଣ୍ଟ ପ୍ରସ୍ତୁତ କରାଯାଇଛି l ତଦନୁଯାୟୀ ୨୩ ତାରିଖ ଶୁକ୍ରବାର ଦିନ ପାଇଁ ହୋଇଥିବା ବିଶେଷ ନୀତି ନିର୍ଘଣ୍ଟ ଅନୁସାରେ ଦିନ ଘ.୧ଣ୍ଟା ଠାରୁ ସ୍ଥାନାନ୍ତର କାର୍ଯ୍ୟ ଶେଷ ହେବା ପର୍ଯ୍ୟନ୍ତ ସର୍ବସାଧାରଣ ଦର୍ଶନ ବନ୍ଦ ରହିବ । ମହାପ୍ରସାଦ କ୍ରୟ କରିବାକୁ ଇଚ୍ଛୁକ ଭକ୍ତ ସିଂହଦ୍ଵାର ପଟେ ବାଇଶି ପାହାଚ ଦେଇ ଆନନ୍ଦ ବଜାରରୁ ମହାପ୍ରସାଦ କ୍ରୟ କରି ଉତ୍ତର ଦ୍ୱାର ପଟେ ଉକ୍ତ ସମୟରେ ପ୍ରସ୍ଥାନ କରିପାରିବେ । ପ୍ରକାଶ ଥାଉକି, ଗତ ଜୁଲାଇ ୧୪ ଓ ୧୮ ତାରିଖ ଦିନ ଯଥାକ୍ରମେ ବାହାର ଓ ଭିତର ରତ୍ନଭଣ୍ଡାରରୁ ଶ୍ରୀମନ୍ଦିର ଭିତରେ ଥିବା ଅସ୍ଥାୟୀ ରତ୍ନଭଣ୍ଡାରକୁ ଅଳଂକାର ଏବଂ ମୂଲ୍ଯବାନ ସାମଗ୍ରୀ ସ୍ଥାନାନ୍ତରଣ ହୋଇସାରିଛି।

19/08/2024

ପୁରୀ ପୁଣି ଅଶାନ୍ତ: ଦିବ୍ୟାଙ୍କ ହରିକୁ ମରଣାତ୍ମକ ଆକ୍ରମଣ ।
ପୁରୀ : ପୁରୀ ସହର ପୁଣି ହୋଇଛି ଅଶାନ୍ତ । କେତେକ ଯୁବକ ଖଣ୍ଡି ହରିକୁ ମରଣାତ୍ମକ ଆକ୍ରମଣ କରିଥିବା ଜଣାପଡିଛି । ପୁରୀ ଟାଉନ ଥାନା ଅନ୍ତର୍ଗତ ହାଡଗୋଡ଼ିଆ ସାହି ରାଧାଗୋବିନ୍ଦ ଲେନର ଦିବ୍ୟାଙ୍ଗ ହରିହର ସାହୁଙ୍କୁ ଏଭଳି ଅମାନୁଷିକ ଆକ୍ରମଣ ହୋଇଛି । ଘଟଣାସ୍ଥଳ ରକ୍ତରେ ହୋଇଛି ଜୁଡୁବୁଡୁ । ଅପରାଧୀ ମାନଙ୍କ ଏହା ପୋଲିସ ପ୍ରତି ଖୋଲା ଚ୍ୟାଲେଞ୍ଜ ବୋଲି ସହରରେ ଆଲୋଚନା ହେଉଛି । ପୂର୍ବ ଶତ୍ରୁତାକୁ ନେଇ ଏହି ଆକ୍ରମଣ ହୋଇଥିବା ପୋଲିସ କହିଛି । ଘଟଣା ସ୍ଥଳରେ ଟାଉନ ଥାନା ପୋଲିସ ପହଞ୍ଚି ଛାନଭିନ ଆରମ୍ଭ କରିଛି । ଗୁରୁତର ଆହତ ହରିକୁ ପ୍ରଥମେ ଜିଲ୍ଲା ମୁଖ୍ୟ ଚିକିତ୍ସାଳୟରେ ଡାକ୍ତର ଚିକିତ୍ସା କରିବା ପରେ ଅବସ୍ଥା ଗୁରୁତର ହେବା ରୁ ହରିକୁ କଟକ ବଡମେଡିକାଲ ସ୍ଥାନାନ୍ତର କରାଯାଇଥିବା ଜଣାପଡିଛି । ଏ ସମ୍ପର୍କରେ ସିଟି ଡ଼ିଏସପି ପ୍ରଶାନ୍ତ ସାହୁ କହିଛନ୍ତି ଯେ ଗତ ୮ ତାରିଖରେ ଦିନେଶ ଖୁଣ୍ଟିଆ ହତ୍ୟାକାଣ୍ଡ ସହ ଲିଙ୍କ ରହିଥିବା ଅନୁମାନ କରାଯାଉଛି ।ପର୍ଯ୍ୟଟକ ଓ ତୀର୍ଥଯାତ୍ରୀ ସହର ପୁରୀରେ ଏଭଳି ଘଟଣାକୁ ବୁଦ୍ଧିଜୀବୀମାନେ ନିନ୍ଦା କରିଛନ୍ତି ।

19/08/2024

ଦି ମିରର ପକ୍ଷରୁ ଭଉଣୀ ପାଇଁ ଗଛଟିଏ କାର୍ଯ୍ୟକ୍ରମ ।
ପୁରୀ : ବାଟମାଙ୍ଗଳା ନିକଟସ୍ଥ ମଙ୍ଗରାଜପୁର ଗ୍ରାମରେ ସ୍ୱଚ୍ଛାସେବୀ ଅନୁଷ୍ଠାନ ଦି ମିରର ଓ ଭବାନୀ କ୍ଳବର ମିଳିତ ଆନୁକୂଲ୍ୟରେ ଭଉଣୀ ପାଇଁ ଗଛଟିଏ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ରକ୍ଷାବନ୍ଧନ ଉପଲକ୍ଷେ ଭଉଣୀମାନଙ୍କ ପାଇଁ ଗଛଟିଏ କାର୍ଯକ୍ରମ ନିଆରା ଢଙ୍ଗରେ ପାଳିତ ହୋଇଯାଇଛି । ଗ୍ରାମର ପୋଖରୀ, ଜାଗା ଘର, କ୍ଲବ ଘର ଓ ରାସ୍ତା କଡ଼ରେ ଗଛ ଲଗାଇବା ସହିତ ଗଛରେ ରାଖୀ ବାନ୍ଧି ଭାଈ ପରି ପାଳିବା ପାଇଁ ଶପଥ ନେଇଥିଲେ l ଆମ ଭାଇ ପରି ଗଛ ଆମକୁ ବନ୍ୟା, ବାତ୍ୟା ରୁ ସୁରକ୍ଷା ଯୋଗାଇଦେବ । ତାପରେ ଗ୍ରାମରେ ସମସ୍ତଙ୍କ ଘରେ ଘରେ ଗୋଟେ ଜାମୁ, ବଉଳ, ପୋଲାଙ୍ଗ, ଲିମ୍ବ ଓ ଅଁଳା ଗଛ ବଣ୍ଟନ କରାଯାଇଥିଲା । ଗ୍ରାମରେ ଭଉଣୀମାନେ ଭାଇମାନଙ୍କୁ ରାଖୀ ବାନ୍ଦିଥିଲେ ଆଉ ଭାଇ ମାନେ ଟଙ୍କା ବଦଳରେ ଗଛଟିଏ ଭଉଣୀକୁ ଦେଇଥିଲେ । ଏପରି ଏକ ନିଆରା ଢଙ୍ଗରେ କାଯ୍ୟକ୍ରମକୁ ଭଉଣୀ ମାନେ ଓ ଗ୍ରାମର ଲୋକମାନେ ବହୁତ ପ୍ରଶଂସା କରିଥିଲେ । ଏହି କାର୍ଯକ୍ରମକୁ ଦି ମିରର ର ସଭାପତି ସଞ୍ଜୟ କୁମାର ପ୍ରଧାନ ପରିଚାଳନା କରିଥିଲେ l ଏହି କାଯ୍ୟକ୍ରମରେ ମୁଖ୍ୟ ଅତିଥିଭାବେ ଛବିଶ ନମ୍ବର ଜୋନର ଜିଲ୍ଲାପରିଷଦ ସଭ୍ୟା ମାମିନା ଦାସ ଉଦଘାଟନ କରିଥିଲେ । ଓଡିଶା ସାମ୍ବାଦିକ ସଙ୍ଘର ଜିଲ୍ଲା ସଭାପତି ବିଜୟ ମିଶ୍ର, କାଶିହରିପୁର ପଞ୍ଚାୟତର ସମିତି ସଭ୍ୟ ପ୍ରଦୀପ୍ତଭାନୁ ଘଟୁଆରୀ ସନ୍ନମାନିତ ଅତିଥିଭାବେ ଭାବେ ଯୋଗ ଦେଇଥିଲେ l ଅନୁଷ୍ଠାନ ତରଫରୁ ପୁରୀ ସଦର ଓ ସହରରେ ୧ ଲକ୍ଷ ଗଛ ଲଗାଇବା ପାଇଁ ସ୍ଥିର କରାଯାଇଥିଲା । ଦି ମିରର ସଦସ୍ୟ ଦେବେନ୍ଦ୍ର ପ୍ରଦାନ, ଅରକ୍ଷିତ ପ୍ରଧାନ, ସୋମନାଥ ପ୍ରଧାନ, ସନ୍ତୋଷ ଘଟୁଆରୀ ଓ ମଙ୍ଗରାଜପୁର ଭବାନୀ କ୍ଲବ୍ ର ସଦସ୍ୟ ସୁବାଷ, ବିଭୁତି, ରାଜୁ, ଦୁର୍ଯୋଧନ, ମିଟୁ, ପ୍ରଶାନ୍ତ, ମାନସ୍, କାବୁ, ସୁଶାନ୍ତ, ଗେଡୁ ,ଓ ୱାର୍ଡ ମେମ୍ବର ଦିଲ୍ଲୀପ ଦାସ୍ ପ୍ରମୁଖ ଉପସ୍ଥିତ ଥିଲେ ।