09/09/2022
◾মুখ্যমন্ত্ৰীলৈ মুকলি চিঠি
মাননীয় অসমৰ মুখ্যমন্ত্ৰী ড০ হিমন্ত বিশ্ব শৰ্মা ডাঙৰীয়া, জয় জয়তে আপোনালৈ আন্তৰিক অভিনন্দন জ্ঞাপন কৰিলো, আশা কৰোঁ আপুনি ভালেই আছে। ঈশ্বৰ-আল্লাহে কৰক আপুনি সকলোসময়তে ভালে-কুশলে থাকক, আপোনাৰ পদমৰ্যদা বৃদ্ধি পাওঁক।
মহাশয়, আপুনি দেশ তথা ৰাজ্যৰ ভবিষ্যৎ। আপোনাক লৈ আমি গৌৰৱ কৰোঁ, দেখোঁ অলেখ সপোন। আমি প্ৰতিজন অসমবাসীয়ে মনেপ্ৰাণে বিচাৰোঁ যে, অসমৰ সুযোগ্য সন্তান ড০ হিমন্ত বিশ্ব শৰ্মা এদিন দেশৰ প্ৰধানমন্ত্ৰী আৰু ৰাষ্ট্ৰপতিৰ দৰে সৰ্ব্বোচ্চ আসন অলংকৃত কৰক।
মহাশয়, মিছা কথা কলে কি ডাল হ'ব? এটা সময়ত আপুনি মোৰ আদৰ্শ আছিল। আপোনাৰ কথাবতৰা, কথা কোৱাৰ স্টাইল, সুন্দৰ ভইচ আদি নকল কৰিছিলোঁ। আপোনাৰ যুক্তি আৰু উপস্থিত বুদ্ধিক লৈ আমি গৌৰৱ অনুভৱ কৰিছিলোঁ, আজিওঁ কৰোঁ।
মহাশয়, আজি কিছুদিন ধৰি টিভি-মিডিয়া যোগে সম্প্ৰচাৰিত আপোনাৰ কিছু আপত্তিজনক আৰু সাম্প্ৰদায়িক মন্তব্যই এটা বিশেষ জনগোষ্ঠীৰ লোকৰ লগতে মোকো ব্যথিত কৰি তুলিছে। এটা বিশেষ সম্প্ৰদায় বা তেওঁলোকৰ ধৰ্মীয় প্ৰতিষ্ঠান অৰ্থাৎ মাদ্ৰাছাক টাৰ্গেট কৰি আপুনি যি ধৰণে মন্তব্য আগবঢ়াই গৈছে সেইটো আপোনাৰ দৰে এগৰাকী শক্তিশালী মুখ্যমন্ত্ৰীৰ মুখত শোভা নাপায়, কাৰণ আপুনি এতিয়া কোনো দল-সংগঠনৰ কৰ্মকৰ্তা হৈ থকা নাই, আপুনি এতিয়া ৰাজ্যৰ মুখ্যমন্ত্ৰী। অসম তথা অসমত বসবাস কৰা বিভিন্ন জাতি ধৰ্মালম্বী লোকৰ অভিভাৱক আৰু অভিভাৱক এজন সদায়ে উদাৰ, নিৰপেক্ষ তথা সহিষ্ণুতা পৰায়ণ হয়। চৰকাৰ-প্ৰশাসনৰ মুৰব্বী এজনৰ ধৰ্মই হৈছে দেশ তথা দহৰ সেৱা কৰা লগতে সংখ্যালঘু সম্প্ৰদায়ৰ লোকসকলৰ জীৱন আৰু সম্পত্তিৰ নিৰাপত্তা সুনিশ্চিত কৰা, যাতে সংখ্যাগুৰুৰ দেশত বসবাস কৰা অল্পসংখ্যক লোকে কেতিয়াওঁ নিৰাপত্তাহীনতা বা মনোকষ্ট নাপায়।
মহাশয়, বেয়া নাপাব, মই হলে আপোনাক নীতি শিক্ষা দিব বিচৰা নাই আৰু সেই যোগ্যতাও মোৰ নাই। মই কিয়? আপোনাৰ দৰে এগৰাকী নিপুণ, সাহসী, বাকপটু আৰু প্ৰচুৰ বুদ্ধিমত্তা সম্পন্ন ব্যক্তিক নীতি শিক্ষা দিয়াৰ দুঃসাহক কৰাৰ ধৃষ্টতা কোনেওঁ কৰিব নোৱাৰে? আপোনাক ভাল পাওঁ বুলিহে মনৰ কথাখিনি প্ৰকাশ কৰিবলৈ প্ৰয়াসহে কৰিলোঁহক।
মহাশয়, মই কোনো জেহাদী, অপৰাধী, বিদেশী বা বহিঃশক্তীৰ পক্ষত নাই, সি লাগিলে মুছলমান কিংবা ধৰ্মগুৰু আলিম-উলামাই নহওঁক কিয়? কিন্তু জেহাদী, বিদেশীৰ আলম লৈ কোনো এখন মাদ্ৰাছা ভাঙি চূৰমাৰ কৰি দিয়া বা ভাৰতীয় মিঞা মুছলমান সকলক তুচ্ছ-তাচ্ছিল্য কৰি কথা কৈ তেওঁলোকৰ অনুভূতিত আঘাত দিয়াটোও সমীচিন নহয়।
মহাশয়, সমগ্ৰ দেশ তথা ৰাজ্যৰ দৃষ্টি সদায়ে আপোনাৰ পিনে নিবদ্ধ হৈ থাকে, আমিওঁ আন ৰাজ্যৰ মুখ্যমন্ত্ৰীতকৈ আপোনাক অধিক গুৰুত্ব দিওঁ। আমি বিশ্বাস কৰোঁ যে, আন আন ৰাজ্যৰ মুখ্যমন্ত্ৰীৰ তুলনাত আপুনি এজন দক্ষ, প্ৰভাৱশালী মুখ্যমন্ত্ৰী, সেয়ে আকৌ কৈছোঁ আপুনি এজন সম্ভাৱনাময় ব্যক্তি। আপোনাৰ দৰে সুযোগ্য, বিজ্ঞ আৰু মেধাসম্পন্ন ব্যক্তিৰ সদায় আমাৰ দেশ আৰু জাতিৰ প্ৰয়োজন আছে আৰু আগলৈও থাকিব।
মহাশয়, আমি পাহৰি যোৱা নাই যে, আপুনি কৰোনা মহামাৰীৰ সময়চোৱাত নিজৰ জীৱনকো বাজিত ৰাখি কিদৰে সৰ্বসাধাৰণৰ সেৱাত সচেষ্ট আছিল। প্ৰয়াত প্ৰাক্তন মুখ্যমন্ত্ৰী তৰুণ গগৈৰ নেতৃত্বধীন কংগ্ৰেছ চৰকাৰত থাকি আপুনি শিক্ষা, স্বাস্থ্য খণ্ডৰ আমোল পৰিৱৰ্তন কৰাৰ সমান্তৰালকৈ বৰ্তমান বিজেপি নেতৃত্বাধীন চৰকাৰৰ মুৰব্বীৰ দ্বায়িত্ব চম্ভালি অপৰাধ-অপকৰ্ম, দুৰ্নীতি-ভ্ৰষ্টাচাৰ তথা অসামাজিক কাৰ্য্যকলাপৰ লগতে ড্ৰাগছৰ বিৰুদ্ধে যুদ্ধ ঘোষণা কৰি কেৱল সাহসিকতাৰ পৰিচয় ধিয়াই নহয় বৰঞ্চ আপুনি যে অসমৰ এগৰাকী দ্বায়িত্ববোধ থকা দ্বায়বদ্ধশীল মুখ্যমন্ত্ৰী সেয়াও প্ৰমাণ কৰি দেখুৱালে। আপোনাৰ কৰ্মদক্ষতা আৰু শূন্য সহনশীল মনোভাৱ সচাকৈয়ে শলাগনীয়। অৱশ্যে এতিয়াওঁ ড্ৰাগছৰ বেহা-বেপাৰ চলিয়েই আছে।
মহাশয়, বিভিন্ন জাতি, ধৰ্মাৱলম্বী লোকেৰে পৰিপূৰ্ণ বাৰেৰহণীয়া ফুলনি বাগিচা সদৃশ্য সামজখনত সাধাৰণ বিদ্যালয়ৰ লগতে ধৰ্মীয় অনুষ্ঠান-প্ৰতিষ্ঠানৰো প্ৰয়োজন আছে। ধৰ্মীয় শিক্ষাৰ প্ৰচলন (লাগিলে সনাতনী শিক্ষাই হওঁক বা ইছলামীক শিক্ষাই হওঁক) নাথাকিলে মানুহ গোমৰা অৰ্থাৎ পথভ্রষ্ট হৈ পৰিব। সেয়ে সাধাৰণ শিক্ষাৰ লগতে ধৰ্মীয় শিক্ষাৰ প্ৰাসংগিকতা নুই কৰিব নোৱাৰি। হয়, মাদ্ৰাছাক কেৱল ধৰ্মীয় শিক্ষাতে সীমাবদ্ধ নাৰাখি স্কুলীয়া শিক্ষাৰ লগতে কাৰিকৰী শিক্ষাৰো ব্যৱস্থা ৰাখিব লাগে। এই ক্ষেত্ৰত আলিম-উলামাৰ লগত আলোচনা মৰ্মে আপোনাৰ চৰকাৰে বিশেষ নিয়ম-নীতি বান্ধি দিব পাৰে। এতিয়ালৈকে ৰাজ্যত যিমানবোৰ মাদ্ৰাছা প্ৰতিষ্ঠা হৈছে সেইসমূহ মাদ্ৰাছাক চৰকাৰী নথিভুক্ত কৰাৰ লগতে পৰৱৰ্ত্তী সময়ত যাতে চৰকাৰৰ অনুমতিবিহীন যতে-ততে আৰু মাদ্ৰাছা প্ৰতিষ্ঠা কৰিব নোৱাৰে সেইটোও চৰকাৰে নজৰত ৰাখিব লাগে। বহিঃৰাষ্টৰ পৰা চান্দা-বৰঙণি সংগ্ৰহৰ ক্ষেত্ৰত প্ৰতিবন্ধকতা আৰোপ কৰাৰ উপৰিও শিক্ষক নিযুক্তিৰ ক্ষেত্ৰতো চৰকাৰে কিছু নীতি-নিৰ্দেশনা জাৰি কৰিব পাৰে। তাৰোপৰি যিসকল শিক্ষকৰ সাধাৰণ শিক্ষা, আধ্যাত্মিক জ্ঞান, সমাজ সংস্কাৰমুখী চিন্তা-চেতনা, দেশ তথা দেশৰ পৱিত্ৰ সংবিধানৰ প্ৰতি সমৰ্পণৰ ভাৱ নাথাকিব তেনে শিক্ষকক মাদ্ৰাছা কৰ্তৃপক্ষই নিযুক্তি দিব নালাগিব। তদুপৰি যিসকল আলিম-উলামা, হাফিজ, ক্বাৰী মাদ্ৰাছা কিংবা মছজিদত থাকি কোনো গৰ্হিত, অনৈতিক তথা ৰাষ্ট্ৰ বিৰোধী কাম কৰিব তেনে শিক্ষকৰ বিৰুদ্ধে আইনগতভাৱে বিহিত ব্যৱস্থা অৱশ্যেই লওঁক। মুঠতে ধৰ্ম, সমাজ তথা ৰাষ্ট্ৰৰ স্বাৰ্থত চৰকাৰীভাৱে যি কৰিবলগীয়া আছে সকলো ফৰমেলিটি কৰি হলেওঁ মাদ্ৰাছাসমূহক অক্ষত ৰাখি দেশৰ দ্বিতীয় বৃহত্তৰ জনগোষ্ঠীটোৰ আস্থা, বিশ্বাস, আবেগ, অনুভূতিক সন্মান জনোৱা উচিত।
মহাশয়, এইখিনিতে আপোনালৈ মোৰ আন্তৰিক পৰাৰ্মশ যে, আপুনি কাৰোবাৰ অভিশাপ নলৈ শ্ৰষ্টাৰ সৃষ্টি জীৱশ্ৰেষ্ঠ মানুহৰ আৰ্শীবাদ বিচৰা উচিত, কিয়নো সদা-সৰ্ব্বদা আপোনাৰ কুশল-মঙ্গলেই একমাত্ৰ আমাৰ কাম্য।
শেষত আপোনৰ সুস্বাস্থ্য আৰু দীৰ্ঘায়ু কামনা কৰি পৰম কাৰুণাময়, পৰম দয়ালু মহান আল্লাহৰ ওচৰত প্ৰণিপাত জনালোঁ—
জুলহাছ আলী আহমেদ
জাগীৰোড, মৰিগাঁও (অসম)
ম'বাইলঃ ৯৭০৬৬-৬৬১৯২
