03/10/2025
ਤਿੰਨ ਸਾਲ ਪਹਿਲਾਂ ਦੀ ਪੋਸਟ
ਸਿੱਖ ਬਨਾਮ ਕਾਮਰੇਡ ਦਾ ਪ੍ਰਵਚਨ ਦਾ ਮਕਸਦ ।
32 ਸਾਲ ਪਹਿਲਾਂ ਦਹਿਸ਼ਤਗਰਦਾਂ ਵਲੋਂ ਕਤਲ ਕੀਤੇ ਭਰਾ ਰਾਜਿੰਦਰ ਨੂੰ ਯਾਦ ਕਰਦਿਆਂ ਮੇਰੇ ਵਲੋਂ ਦੋ ਦਿਨ ਪਹਿਲਾਂ ਲਿਖੀਆਂ ਯਾਦਾਂ ਅਤੇ ਹੁਣ ਕੁੱਝ ਤਾਕਤਾਂ ਵਲੋਂ ਮੁੜ ਕਾਲੇ ਦਿਨ ਲਿਆਉਣ ਸੰਬੰਧੀ ਚਲ ਰਹੇ ਯਤਨਾਂ ਬਾਰੇ ਪੋਸਟਾਂ ਪੜ੍ਹ ਕਿ ਹਰ ਸਨੇਹੀ ਨੇ ਮੰਡਰਾ ਰਹੇ ਖਤਰਿਆਂ ਤੇ ਫਿਕਰਮੰਦੀ ਜਾਹਰ ਕੀਤੀ ਹੈ । "ਮਾੜੇ ਦਿਨਾਂ ਮੁੜ ਨਾ ਪੈਰ ਪਸਾਰ ਲੈਣ "ਦੀ ਚਾਹਨਾ ਕੀਤੀ ਹੈ । ਸ਼ਹੀਦ ਭਗਤ ਸਿੰਘ ਦੇ ਜਨਮ ਦਿਨ ਤੇ ਜੋਗਿੰਦਰਸਿੰਘ ਉਗਰਾਹਾਂ ਵਲੋਂ ਕੀਤੀ ਕੰਠਗੰਭੀਰ ਤਕਰੀਰ ਅਤੇ ਕੁੱਝ ਜਨੂੰਨੀ ਕਿਸਮ ਦੀਆਂ ਵੰਨਗੀਆਂ ਵਲੋਂ ਕੀਤੀਆਂ ਜਾ ਰਹੀਆਂ ਸਰਗਰਮੀਆਂ , ਪ੍ਰਤੀਕਰਮਾਂ ਨੇ ਫੇਸ ਬੁੱਕ ਮੱਲਿਆ ਹੋਇਆ ਹੈ ।ਮੈ ਮਹਿਸੂਸ ਕਰਦਾ ਹਾਂ ਕਿ ਇਹ ਜੇਤੂ ਇਤਿਹਾਸਕ ਕਿਸਾਨ ਘੋਲ ਦਾ ਹੀ ਨਤੀਜਾ ਹੈ ।ਉਹ ਤਾਕਤਾਂ ਜਿਨ੍ਹਾਂ ਨੇ ਕਿਸਾਨ ਘੋਲ ਨੂੰ ਤਾਰਪੀਡੋ ਕਰਨ ,ਲੀਹੋਂ ਲਾਹੁਣ ,ਭੜਕਾਹਟ ਪੈਦਾ ਕਰਨ ,ਇਸ ਘੋਲ ਦੇ ਧਰਮ ਨਿਰਪੱਖ ਰੂਪ ਨੂੰ ਇਕ ਖੇਤਰ ,ਜਾ ਸਿੱਖ ਬਣਾਮ ਕੇਂਦਰ ਬਣਾਓਣ ਦੇ ਯਤਨ ਕੀਤੇ ਸਨ ਪਰ ਕਾਮਯਾਬ ਨਹੀਂ ਹੋਏ ,ਉਹ ਹੀ ਹੁਣ ਨਵੇਂ ਨਾਇਕ ਸਾਜ ਕੇ ਮੈਦਾਨ ਚ ਨਿੱਤਰੇ ਹਨ। ਕਿਸਾਨ ਘੋਲ ਦੌਰਾਨ ਵੀ ਉਕਤ ਤਾਕਤਾਂ ਨੇ ਸਿੱਖ ਬਨਾਮ ਕਾਮਰੇਡ ਦੇ ਵਿਵਾਦ ਉਕਸਾਉਣ ਦੀਆਂ ਚਾਲਾਂ ਚੱਲੀਆਂ ,ਪਰ ਦਰੁਸਤ ਆਗੂਆਂ ਨੇ ਬਿਨਾਂ ਭੜਕਾਹਟ ਉਹਨਾਂ ਦੀ ਇਛਾਵਾਂ ਨੂੰ ਬੂਰ ਨਹੀ ਸੀ ਪੈਣ ਦਿੱਤਾ ।ਮੋਦੀ ਸ਼ਾਹ ਹਕੂਮਤ ਨੇ ਇਹਨਾਂ ਜਨੂੰਨੀ ਤਾਕਤਾਂ ਦੀਆਂਂ ਉਕਸਾਉ ਸਰਗਰਮੀਆਂ ਨੂੰ ਵਰਤਿਆ ਅਤੇ ਉਗਾਸਾ ਵੀ ਦਿੱਤਾ ।ਫਿਰ ਹਿੰਦੂ ਫਿਰਕਾਪ੍ਰਸਤ ਅਨਸਰਾਂ ਨੂੰ ,ਕਿਸਾਨ ਘੋਲ ਤੇ ਝੱਪਟਣ ਦੀਆਂ ਖੁੱਲਾਂ ਦਿੱਤੀਆਂ।
ਮੋਦੀ ਹਕੂਮਤ ਨੇ ਇਹਨਾਂ ਦੀਆਂ '"ਸੁਰਮਗਤੀਆਂ" ਨੂੰ ਉਭਾਰ ਕੇ ਪੰਜਾਬ ਖਾਸ ਕਰਕੇ ਸਿੱਖਾਂ ਨੂੰ ਬਦਨਾਮ ਕਰਨ ਦੇ ਯਤਨ ਕੀਤੇ। ਇਹ ਹੀ ਤਾਕਤਾਂ ਸਨ ਜਿਨ੍ਹਾਂ ਨੇ ਉਗਰਾਹਾਂ ਜੀ ਨੂੰ ਘੇਰ ਕੇ ਮਨਮਰਜ਼ੀ ਫੈਸਲੇ ਕਰਾਉਣ ਦਾ ਭਰਮ ਪਾਲਿਆ ਸੀ।(ਵਿਸਥਾਰ ਨਹੀਂ) ਉਕਤ ਜਨੂੰਨੀ ਵਿਅਕਤੀਆਂ ਅਤੇ ਹਕੂਮਤ ਦੀ ਹਰ ਚਾਲ ਫੇਲ ਹੁੰਦੀ ਰਹੀ।ਅੰਤ ਘੋਲ ਜੇਤੂ ਰਿਹਾ।
ਇਸ ਸਾਰੇ ਸੰਘਰਸ਼ ਚ ਭਾਰਤੀ ਕਿਸਾਨ ਯੂਨੀਅਨ ਏਕਤਾ ਉਗਰਾਹਾਂ ਵਲੋਂ ਲਏ ਗਏ ਦਰੁਸਤ ਫੈਸਲਿਆਂ ਤੇ ਹੋਰ ਸੰਗੀ ਜਥੇਬੰਦੀ ਤੋ ਹਕੂਮਤ ਤਿਲਮਲਾਈ ਹੋਈ ਹੈ।
ਹੁਣ ਜੋਗਿੰਦਰ ਉਗਰਾਹਾਂ ਦੀ ਤਕਰੀਰ ਦੇ ਇਕ ਸ਼ਬਦ ਇਕ ਨਵ ਸਿਰਜੇ ਜਨੂੰਨੀ ਆਗੂ ਨੂੰ "ਛੋਕਰਾ"
ਕਹਿਣ ਤੇ ਉਕਤ ਹਤਾਸ਼ ਤਾਕਤਾਂ ਬੁਖਲਾਹਟ ਚ ਹਨ। ਭਗਤ ਸਿੰਘ ਨੂੰ ਅੱਤ ਵਾਦੀ ਕਹਿਣ ਵਾਲੇ ,ਕਾਤਲਾਂ ਨੂੰ ਸਿਰੋਪੇ ਭੇਂਟ ਕਰਨ ਵਾਲਿਆਂ ਨੇ,ਬੁਖਲਾਹਟ ਚ ਅਪਣੇ ਨਕਾਬ ਲਾ ਦਿੱਤੇ ਹਨ । ਅੱਖੇ "ਇਹ ਕਾਮਰੇਡ ਹਨ ਇਹਨਾਂ ਦਾ ਸਾਥ ਛੱਡੋ"
ਨਵ ਨਾਇਕ ਦੀ ਅਗਵਾਈ ਕਬੂਲ ਕਰੋ।
"ਅਮ੍ਰਿਤ ਛੱਕੋ "ਪਰ ਅਮ੍ਰਿਤ ਛਕਾਉਂਣ ਵਾਲੇ ਦਿਨ ਜੋ ਭਾਸ਼ਣ ਦਿੱਤੇ ਗਏ ਹਨ। ਜੋ ਮੱਤੇ ਪਾਸ ਕੀਤੇ ਗਏ ਹਨ ,ਪੱਤਰਕਾਰਾਂ ਦੇ ਸੁਆਲਾਂ ਦੇ ਜੋ ਜੁਆਬ ਦਿੱਤਾ ਜਾ ਰਹੇ ਉਸਨੂੰ ਸੁਣ ਕੇ ਕੋਈ ਇਹ ਨਹੀਂ ਕਹਿ ਸਕਦਾ ਕਿ ਕੋਈ ਨਿਰੋਲ ਅਮ੍ਰਿਤ ਪਾਣ ਦੀ ਲਹਿਰ ਚਲਾਈ ਜਾਣੀ ਹੈ।
ਬਰਨਾਲੇ ਚ ਇਨਕਲਾਬ ਜਿੰਦਾਬਾਦ ,ਸਾਮਰਾਜ ਵਾਦ ਮੁਰਦਾਬਾਦ ,ਦੇਸੀ ਵਿਦੇਸ਼ੀ ਲੁਟੇਰਿਆਂ ਨੂੰ, ਸ਼ਾਹੂਕਾਰਾਂ ਨੂੰ 'ਜੂਹੋ ਪਾਰ 'ਦਬਲਣ ਦੇ ,ਕਿਸਾਨ ,ਮਜਦੂਰ ਮੁਲਾਜ਼ਮ, ਵਿਦਿਆਰਥੀ ਏਕਤਾ ਦੇ ਨਾਅਰੇ ਉਕਤ ਤਾਕਤਾਂ ਨੂੰ ਜਹਿਰ ਵਾਂਗ ਲੱਗਦੇ ਹਨ। ਇਥੇ ਕਾਰਪੋਰੇਟ ਸੈਕਟਰ ਖਿਲਾਫ ਵਿਸ਼ਾਲ ਲਾਮਬੰਦੀ ਕਰਨ ਦੇ ਸੰਦੇਸ਼ ਗੂੰਜਦੇ ਹਨ। ਔਰਤਾਂ ਦੀ ਲਾਮਿਸਾਲ ਹਾਜਰੀ ਖਿੱਚ ਦਾ ਕੇਂਦਰ ਬਣੀ ਹੋਈ ਸੀ। ਜਮਾਤੀ ਸਾਂਝ ਨੂੰ ਹੋਰ ਮਜਬੂਤ ਕਰਨ ਲਈ ਪ੍ਰੇਰਿਆ ਜਾ ਰਿਹਾ ਸੀ। ਜੋ ਹਕੂਮਤੀ ਧਿਰਾਂ ਨੂੰ ਬਰਦਾਸ਼ਤ ਹੈ ਹੀ ਨਹੀਂ। ਜਨੂੰਨੀ ਤਾਕਤਾਂ ਨੂੰ ਵੀ ਰਾਸ ਨਹੀਂ ਬੈਠਦੀ। ਉਹ (ਜੀਰੇ)ਫੁਰਮਾਂਦੇ ਹਨ ਕਿ ਹਰ ਥਾਂ ਜੈਕਾਰੇ ਹੀ ਲੱਗਣੇ ਚਾਹੀਦੇ ਹਨ।ਇਨਕਲਾਬ ਜਿੰਦਾਬਾਦ ਛੱਡੋ।ਹਰ ਥਾਂ ਨਿਸ਼ਾਨ ਸਾਹਿਬ ਹੀ ਝੂਲਣਾ ਚਾਹੀਦਾ ਹੈ। ਭਈਆਂ ਨੇ ਸਾਡੇ ਰੁਜ਼ਗਾਰ ਖੋਹ ਲਏ ਹਨ। ਉਹ ਪੰਜਾਬ ਸਥਾਈ ਰੂਪ ਚ ਘਰ ਬਣਾਉਣ ਲੱਗੇ ਹਨ। ਸਾਡਾ ਸਭਿਆਚਾਰ ਖਰਾਬ ਕਰ ਰਹੇ ਹਨ।ਬਾਹਰਲੇ ਲੋਕਾਂ ਨੂੰ ਜਮੀਨਾਂ ਖਰੀਦਣ ਤੇ ਰੋਕ ਲਗਾਉਣੀ ਚਾਹੀਦੀ ਹੈ। ਭਗਤ ਸਿੰਘ ਬੱਚਾ ਸੀ ,ਉਸਨੂੰ ਸਮਝ ਨਹੀਂ ਸੀ। ਪਰ ਕਰਤਾਰਸਿੰਘ ਸਰਾਭਾ ਸੂਰਮਾ ਸੀ। ਕੀ ਇਹ ਨਿਰੋਲ ਅਮ੍ਰਿਤ ਪਾਣ ਲਹਿਰ ਉਸਾਰਨ ਦਾ ਆਗਾਜ਼ ਹੈ। ਇਹ ਪਾਟਕ ਪਾਓ ਭਾਸ਼ਣ ਅਤੇ ਮੰਗਾਂ ਕਿਸ ਦੀਆਂ ਸੇਵਾ ਕਰਨ ਗੀਆਂ। ਕੀ ਇਹ ਹੋਰ ਸੂਬਿਆਂ ਅਤੇ ਵਿਦੇਸ਼ਾਂ ਚ ਰਹਿੰਦੇ ਪੰਜਾਬੀਆਂ ਲਈ ਖਤਰੇ ਨਹੀਂ ਪੈਂਦਾ ਕਰੇਗੀ। ਹਿੰਦੂ ਫਿਰਕਾਪ੍ਰਸਤ ਤਾਕਤਾਂ ਨੂੰ ਭੜਕਾਉਣ ਦਾ ਕਾਰਨ ਨਹੀਂ ਬਣਨ ਗੀਆਂ।?
ਹਾਕਮ ਬਾਗੋ ਬਾਗ ਹੈ। ਜੇ ਕੋਈ ਇਹ ਕਹੇ ਕਿ ਇਸ ਵਰਤਾਰੇ ਬਾਰੇ ਦੜ ਵੱਟ ਲੈਣਾ ਚਾਹੀਦਾ ਹੈ। ਹਰ ਕਿਸੇ ਨੂੰ ਬੋਲਣ ਦੀ ਅਜਾਦੀ ਹੈ ,ਤਾਂ ਕਾਲੇ ਦੌਰ ਦਾ ਪੁਨਰ ਜਨਮ ਦਾ ਆਗਾਜ਼ ਹੋ ਚੁਕਿਆ ਹੈ। ਉਂਝ ਕਿਸਾਨ ਲਹਿਰ ਦੀ ਹਾਸਲ ਚੇਤਨਾ ,ਤੇ ਜਮਹੂਰੀ ਸ਼ਕਤੀਆਂ ਵਲੋਂ ਖਤਰਿਆਂ ਪ੍ਰਤੀ ਸਰੋਕਾਰ , ਭਾਈਚਾਰਕ ਸਾਂਝ ਅਤੇ ਬੁਨਿਆਦੀ ਮਸਲਿਆਂ ਤੇ ਚਲ ਰਹੇ ਸੰਘਰਸ਼ ਆਸ ਬਣਾਉਂਦੇ ਹਨ ਕਿ ਜਨੂੰਨੀ ਤਾਕਤਾਂ ਦੇ ਮਨਸੂਬੇ ਕਾਮਯਾਬ ਨਹੀਂ ਹੋਣਗੇ। ਬੁਨਿਆਦੀ ਮਸਲਿਆਂ ਤੇ ਲੜੋ ਪਰ ਜਨੂੰਨੀ ਫਿਰਕਾਪ੍ਰਸਤ ਤਾਕਤਾਂ ਬਾਰੇ ਦੜ ਨਾ ਵੱਟੋ। 9ਅਕਤੂਬਰ ਨੂੰ ਭਗਵੰਤ ਸਿੰਘ ਮਾਨ ਦੀ ਰਿਹਾਇਸ਼ ਅਗੇ ਕੁੱਝ ਫੌਰੀ ਮੰਗਾਂ
ਦੀ ਪੂਰਤੀ ਕਰਾਉਣ ਲਈ ਲਗਾਇਆ ਜਾਣ ਵਾਲਾ ਮੋਰਚਾ ਚੰਗਾ ਕਦਮ ਹੈ। ਅਜ ਦੇਸ਼ ਭਰ ਚ ਸੰਯੁਕਤ ਕਿਸਾਨ ਮੋਰਚੇ ਵਲੋਂ ਲਖੀਮਪੁਰ ਦੇ ਸ਼ਹੀਦਾਂ ਨੂੰ ਸਮਰਪਿਤ ਪ੍ਰੋਗ੍ਰਾਮ ਵੀ ਸੁਆਗਤ ਯੋਗ ਹੈ। ਫਿਰਕੂ ਜਨੂੰਨੀ ਤਾਕਤਾਂ ਨੇ ਲੋਕਾਂ ਦੇ ਅਸਲੀ ਮੁੱਦਿਆਂ ਤੋਂ ਕੀ ਲੈਣਾ ?
ਜੋਗਿੰਦਰ ਆਜਾਦ 3-10-2022 ਰਾਤ 10-50।
ਨੋਟ ਉਕਤ ਵਿਚਾਰ ਤਿੰਨ ਪਹਿਲਾਂ ਪੋਸਟ ਕੀਤੇ ਸਨ। ਹੁਣ ਤਿੰਨ ਸਾਲ ਬਾਅਦ ਹਤਾਸ਼ ,ਹਾਰੇ,ਲੋਕ ਵਿਰੋਧੀ ਅਨਸਰਾਂ ਨੇ ਮੁੜ
ਜਹਿਰ ਉਗਲਣ ਦਾ ਰਾਹ ਫੜ ਲਿਆ ਹੈ। ਪਰ ਸਫਲ ਨਹੀਂ
ਹੋਣਗੇ।3-10-25 ਦੁਪਹਿਰ
,
