30/07/2025
•~• বন্ধুৰ বাবে বন্ধুৰ সহমৰ্মিতা •~•
°^° আন্তৰিক সমন্বয় =^°
+::+ গোলাঘাট এমেচাৰ থিয়েটাৰ চচাইটি +::+
-আৰু-
+ সীমান্ত কুমাৰ শইকীয়া (টিকি) স্মৃতি ৰক্ষা সমিতি +
*"* বন্ধুত্ব আমন্ত্ৰণ *"*
* সূৰুয ড্ৰামা প্ৰডাকচন ওৱৰ্কচ, যোৰহাট *
•^• বুজা নুবুজাৰ ছন্দেৰে •^•
]] পাৰ হয় এটি মধুৰ সন্ধিয়া [[
:: আত্মপ্ৰকাশ অন্তৰ্দৃষ্টি নাট্য বাৰ্তা ::
: চুমী, এগৰাকী নতুন দিনৰ বোৱাৰী। আধুনিক চিন্তা আৰু লাহ-বিলাহত জীৱন অতিবাহিত কৰিবলৈ বিচাৰে। সিদ্ধাৰ্থ, আজিৰ প্ৰজন্মৰ স্বামী যদিও জীৱিকা-কৰ্তব্য নিষ্ঠাৰে পালন কৰি পত্নী, পৰিয়াল, আত্মীয়-স্বজনৰ সৈতে জীৱন-সংসাৰ আগুৱাই নিয়াত যত্নপৰ। এনে এজন মৰমীয়াল, দায়িত্ব সম্পন্ন, সহজ-সৰল জীৱন সংগী পায়ো চুমীয়ে সংসাৰ নিয়াৰিকৈ আগবঢ়াই নিয়াত আধুনিক মনৰ ভাৱধাৰাৰ বাবেই উজুতি খায়। সিদ্ধাৰ্থই যি কৰ্মৰ দ্বাৰা তেওঁলোকৰ জীৱন-সংসাৰ আজিৰ ছ'ছাইটিত মিলাই ৰাখিছে সেই কৰ্মস্থলীৰ পৰা আহোঁতে কিছু সময় পলম হোৱাত চুমীৰ মাক-দেউতাকৰ বিবাহ বাৰ্ষিকী উদযাপনত ভাগ ল'বলৈ চুমীয়ে বিচৰা সময়ত যাব নোৱাৱাৰ বাবেই তাই তৰ্কত লিপ্ত হৈ বিবাহ বিচ্ছেদ প্ৰসংগ উত্থাপন কৰিবলৈও কুণ্ঠাবোধ নকৰিলে। আন এদিনাই দুপৰীয়া ভাত সাজ মাহীয়েকহঁতৰ সৈতে একেলগে খাবলৈ যাবলৈ দেউতাকে মাতিলে। যিহেতু, মাহীয়েকহঁতো সেইদিনা বিবাহ বাৰ্ষিকীলৈ আহিব নোৱাৰিলে। এই নিমন্ত্ৰণো সিদ্ধাৰ্থই ৰাখিব নোৱাৰে। কাৰণ, একে সময়তে তেওঁৰ মাকৰ অপাৰেশ্যন ! চুমীয়ে সিদ্ধাৰ্থৰ মাকৰ অপাৰেশ্যনৰ গুৰুত্বতকৈ মাক-দেউতাকৰ ঘৰত তাইৰ আত্মীয়-স্বজনৰ লগত হাঁহি-ফুৰ্তিৰে সময় অতিবাহিত কৰিবলৈ নোপোৱাতোতহে পুনৰ জীৱন জুই জ্বলালে। পৰিণতিত সংসাৰ ভাগো-ভাগো পৰ্যায় পায়গৈ। কিন্তু, চুমীৰ দেউতাকে কন্যা পক্ষ নলৈ জীৱন আৰু সংসাৰ ধৰি ৰাখিবলৈ এগৰাকী বোৱাৰী কেনে হোৱা উচিত সেয়া চুমীক ভালদৰে বুজাই দিয়ে। একে সময়তে একে এপাৰ্টমেণ্টৰ প্ৰবীণ বাসিন্দা সীতানাথ হাজৰিকাৰ সৈতে পৰিচয় হয়। হাজৰিকাইও আধুনিক জীৱনধাৰাই সমাজ আৰু মানুহক কি পৰ্যায়লৈ ৰূপান্তৰিত কৰিছে আৰু ফলত জীৱন-সংসাৰৰ গতি ক'লৈ গৈ আছে সেয়া নিজৰ উপমাৰে বিতংকৈ বুজাই দিয়ে। হাজৰিকাৰ উচ্চ শিক্ষিতা পত্নী শিক্ষা বিভাগৰ উচ্চ পদবীত অধিষ্ঠিত। মাক নিজৰ মতত অটল। সেয়ে এটা পৰিয়াল হৈ বাস কৰিব নোৱাৰে। মাক আৰু দেউতাক সুকীয়া বৃদ্ধাশ্ৰমত থাকে। পত্নী থাকে কৰ্তব্যস্থলীত। পুত্ৰও বাহিৰত থাকে। কাৰো পক্ষ ল'ব নোৱাৰি হাজৰিকাও অকলশৰীয়া। লগ থাকিও অকলে থাকিব লগীয়া হোৱাতো কিমান বেদনাদায়ক সেয়া হাজৰিকাই দাঙি ধৰে। দেউতাক আৰু হাজৰিকাৰ কথাত চুমীয়ে বুজি উঠিলে যে, থকাসকলক হেৰোৱাব নালাগে। সংসাৰ ভঙাতকৈ গঢ়াতহে গুৰুত্ব দিব লাগে। এনে ইতিবাচক কাহিনীৰ মাধ্যমেৰে আজিৰ সমাজে চিন্তা আৰু শুধৰণি কৰিব পৰা প্ৰসংগৰে মানবেন্দ্ৰ শৰ্মাই 'বুজা নুবুজাৰ ছন্দেৰে' নাটক ৰচনা আৰু পৰিচালনা কৰে। নাটকখন গোলাঘাট এমেচাৰ থিয়েটাৰ চচাইটি প্ৰেক্ষাগৃহত ২৮ জুলাইৰ সন্ধিয়া যোৰহাটৰ সূৰুয ড্ৰামা প্ৰডাকচন ওৱৰ্কচে মঞ্চস্থ কৰে। ১৯৯৭ চনত মাত্ৰ ৩২ বছৰ বয়সতে ইহসংসাৰৰ পৰা মেলানি মাগিব লগীয়া হোৱা আশী-নব্বৈ দশকতে অতি সুবিধা নথকা সময়তে দৃষ্টি আৰু কৃষ্ণচূড়া অসমীয়া বোলছবি প্ৰযোজনা কৰা সাংস্কৃতিক ক্ষেত্ৰখনত বিশেষ অৱদান আগবঢ়োৱা গোলাঘাটৰ এক উজ্বল সত্তা সীমান্ত কুমাৰ শইকীয়া (টিকি)ৰ স্মৃতিত গোলাঘাট এমেচাৰ থিয়েটাৰ চচাইটি আৰু সীমান্ত কুমাৰ শইকীয়া (টিকি) স্মৃতি ৰক্ষা সমিতিয়ে এই নাট্য সন্ধিয়া আয়োজন কৰে। য'ত প্ৰকাশ হয় বন্ধুৰ প্ৰতি বন্ধুৰ দায়িত্ব। সীমান্ত (টিকি)ৰ বন্ধুবৰ্গৰ দ্বাৰা হৈ আছে গোলাঘাটত স্মৃতিচাৰণ। বন্ধু মানবেন্দ্ৰ শৰ্মাইও ধৰি ৰাখিছে যোৰহাটত সূৰুয ড্ৰামা প্ৰডাকচন। বন্ধুৰ স্মৃতিত বন্ধুক অধিষ্ঠিত কৰাই গোলাঘাটৰ উক্ত সমিতি দুখনে যি সমন্বয় গঢ়াৰ ভূমিকা ল'লে সেয়া আজিৰ সময়ৰ প্ৰশংসনীয় চিন্তা। শাৰীৰিক আৰু মানসিক নাট্য ৰসেৰে সমৃদ্ধ মানবেন্দ্ৰ শৰ্মাইও সূৰুয ড্ৰামা প্ৰডাকচন ওৱৰ্কচৰ দায়িত্বশীল সংগীসকলৰ পূৰ্ণ সহযোগত মান সম্পন্ন নাট্য সন্ধিয়া উপহাৰেৰে গোলাঘাটৰ বন্ধুবৰ্গ আৰু নাট্যানুৰাগীক সন্তুষ্ট কৰিবলৈ সক্ষম হয়। নাট্যকাৰ হিচাপে যিদৰে সংলাপৰ বলিষ্ঠতা তথা স্পষ্টতা বিচাৰে সেইদৰে সকলো অভিনেতা-অভিনেত্ৰীয়ে দৰ্শকৰ হৃদয়ত সাঁচ বহুৱাব পাৰিছে। পৰিচালক হিচাপে কেউ কেইগৰাকী অভিনেতা-অভিনেত্ৰীৰ পৰাই সাৱলীল অভিনয় উলিয়াই লোৱাত সাৰ্থক হৈছে। চৰিত্ৰৰ সৈতে অভিনেতা-অভিনেত্ৰীৰ বয়স আৰু শাৰীৰিক অৱয়ব হুবহু মিলি গৈছে। নাট্যকাৰ-পৰিচালক মানবেন্দ্ৰ শৰ্মাই সিদ্ধাৰ্থৰ দেউতাক গাঁৱলীয়া বৃদ্ধ চৰিত্ৰ জীৱন্ত ৰূপত উপস্থাপন কৰিলে। চুমীৰ পিতৃৰ চৰিত্ৰত অৰ্পণ শৰ্মা পাঠকৰ অভিনয় বাস্তৱসন্মত। দুয়োৰে অভিনয় নহয় যেন বাস্তৱ পৰিয়ালৰ পিতৃহে। সিদ্ধাৰ্থৰ চৰিত্ৰত চন্দন ঠাকুৰ সমানে সফল। মূহুৰ্তে মূহুৰ্তে অভিব্যক্তি সলনি কৰিব পৰাটো তেওঁৰ যোগাত্মক দিশ। সীতানাথ হাজৰিকা চৰিত্ৰত বিজু দুৱৰাইও নাটকখনৰ গতি শীৰ্ষলৈ নিয়াত সম্পূৰ্ণ অৱদান যোগাই অন্য এক তৰাস্বৰূপে জিলিকি ৰয়। নৱাগতা বিপাশা শইকীয়া আজিৰ প্ৰজন্মৰ সম্ভাৱনাময়ী অভিনেত্ৰীৰূপে ধৰা দিছে। অভিব্যক্তি আৰু অভিনয় আছিল অৰ্থবহ। দৃশসজ্জাত দিম্পুৰাজ বৰাই সহায় কৰে। পৰিচালক মানবেন্দ্ৰ শৰ্মাৰ পৰশত ৰূপসজ্জা প্ৰায় শিল্পীৰ নিজা। আলোক নিয়ন্ত্ৰণত অচিন্ত শইকীয়াই নয়ন সাৰ্থক কৰিলে। সঞ্জীৱ চিকু আৰু প্ৰাণজিৎ শৰ্মাৰ সংগীত সংযোজনে নাটক আগুৱাই নিয়ে। গোলাঘাট এমেচাৰ থিয়েটাৰ চচাইটি প্ৰেক্ষাগৃহৰ নিজা শব্দ ব্যৱস্থাপনা যোগাত্মক অৱদান আছিল। সূৰুয ড্ৰামা প্ৰডাকচন ওৱৰ্কচৰ দায়িত্বশীল সভাপতি বিনোদ গগৈয়ে গোলাঘাটত 'বুজা নুবুজাৰ ছন্দেৰে' সফল কৰি তুলিবলৈ অহোপুৰুষাৰ্থ কৰে। বিশেষ সহযোগী আছিল চফিকুল ইছলাম। দৃশ্য সংৰক্ষণ বিদ্যুৎ শইকীয়াৰ। নাটকৰ আগে-আগে সীমান্ত কুমাৰ শইকীয়া (টিকি)ৰ স্মৃতিচাৰণ আৰু গোলাঘাট এমেচাৰ থিয়েটাৰ চচাইটিৰ গীত পৰিৱেশনে নাট্য সন্ধিয়াৰ মান বঢ়ায়। নাটকৰ সমাপ্তিত প্ৰেক্ষাগৃহপূৰ্ণ দৰ্শকৰ সন্মুখত অক্লান্ত নাট্যযোদ্ধা মানবেন্দ্ৰ শৰ্মাক গোলাঘাটৰ দুয়োখন সমিতিয়ে সম্বৰ্ধনা জনায়। এনে সাংস্কৃতিক আনুষ্ঠানিকতাৰ সমন্বয় স্থায়ী হোৱাৰ বাঞ্ছা কৰিলোঁ।
