26/07/2025
स्वतन्त्र सभासद पाल्देन तामाङको थ्योरी : चुपचाप ‘सफा’ काम
++
चुनाउ जितेपछि सबका सब स्वतन्त्र उम्मेदवारहरू भागोप्रमोमा हाम्फाले र भोट दिने जनतालाई दिनसम्मको धोका दिए, तर जनमतको सम्मान र आफ्नो वचन पूरा गर्ने कालेबुङका एकैजना मात्र स्वतन्त्र उम्मेदवारर हुन्- पाल्देन तामाङ। पाल्देन तामाङ 36 नम्बर समष्टीका स्वतन्त्र सभासद हुन्।
उनलाई पनि अरूलाईजस्तो अनेकौं प्रलोभन देखाइयो, लोभलालच देखाइयो, तर तिनी टसमस भएनन्। तिनी आफ्नो वचनमा अडिरहे।
‘भोट माग्नु जाँदा दिएको बचन भोट पाइसकेर बदल्नु भनेको छल्नु हो,’ खबरम्यागजिनसित पाल्देन तामाङ भन्छन्, ‘यसरी छल्ने सिद्धान्त मेरो छैन। म स्वतन्त्र उठेको हुँ, स्वतन्त्रै छु।‘
अहिले कालेबुङका 13 वटा समष्टीमा पाल्देन तामाङको समष्टी, अर्थात 36 नम्बर समष्टी नै त्यो समष्टी हो, जहाँ धेरै भन्दा धेरै विकासको काम भइरहेको छ।
जो जो स्वतन्त्र उम्मेदवार जित्ने वित्तिकै भागोप्रमोमा हाम्फाले, उनीहरूको समष्टीमा भन्दा पनि धेरै विकासको काम किन पाल्देन तामाङको 36 नम्बर समष्टीमा भइरहेको छ? किन भने पाल्देन तामाङ कुनै पनि प्रलोभनमा फँसेनन्। यसैले पाल्देन तामाङलाई देखाउन कै निम्ति जिटिएले राज्य र केन्द्रको सबै योजना 36 नम्बर समष्टीमा नै खन्यायो।
‘म यही त चहान्थे, मैले नै विकास गर्नुपर्छ भन्ने छैन, मेरो कारणले मेरो समष्टीको विकास भयो भने भयो,’ पाल्देन तामाङ भन्छन्, ‘घ्यु, औंली बाङ्गो गर्दा मात्र आउँदैन, सिधा औंलीमा पनि आउँछ, तर त्यसको लागि चाहिने एउटै औजार हो- इमान। म मेरो विकासको लागि चुनाउमा उठेको होइन, जनताको विकासको लागि चुनाउमा उठेको हुँ, ऐले हेर्नुस्, मेरो विकास भएन तर जनताको विकास भयो। मैले मेरो समष्टीका जनतालाई विकासको वचन दिएको थिएँ, त्यो पूरा हुँदैछ। म बिकेको भए, यति विकास हुँदैनथ्यो।‘
ती नै पाल्देन तामाङलाई आफ्ना समर्थकहरूसहित कालेबुङको सहिद पार्कमा देखियो। त्यो पनि चुपचापसित, सहिद पार्क सफाई गर्न।
धेरैको आँखा सहिद पार्कमा परेको छ, कतिले सहिद पार्क को खाली जमिनमा आँखा गाडेको छ, कतिको ध्येय छ, सहिद पार्क भत्काएर ठेकेदारी गर्नु, तर पाल्देन तामाङको आँखा गाडियो- सहिद पार्क सफा गर्नु।
सबैले सहिद पार्कमा 27 जुलाईको दिन नौटङ्की गर्छन्, तर सहिद पार्क सफा, स्वच्छ राख्ने सोच कसैमा पलाएन। पाल्देन तामाङ अनि उनका समर्थकहरूले चुपचापसित सहिद पार्क सफा गरे। यतो त पाल्देन तामाङ चुपचापचुपचाप आफ्नै धुनमा काम गरिरहन्छन्। तिनी कसैबाट प्रायोजनामा पाएको कुरा बाँड्न जनतामा जाँदैनन्, तिर्पाल नै बाँड्नुपर्छ भने पनि आफ्नै पैसाले किनेर बाँड्छन्। सरकारले दिएको तिर्पाल बाँडेर नेता भइ पल्टिँदैनन्। अहिले पनि तिनी आफ्नै पैसाले लाखौंको औषधीहरू किनेर कालेबुङका विभिन्न समष्टीमा हेल्थक्याम्प गरिरहेका छन्। समष्टीलाई एम्बुलेन्स दिएका छन्, सक्नेले तेल हालेर चलाउँदा हुन्छ, नसक्नेलाई तेल आफै हालिदिन्छन्।
पाल्देन तामाङ भन्छन्, ‘मैले यो काम गरें, त्यो काम गरें भन्नु मलाई लाज लाग्छ, तपाईँहरूले देखेर बताइदिनु भयो भने त्यो अर्कै कुरा हो।‘
सहिद पार्कको सरसफाइपछि तिनले भने, ‘अब सहिद पार्क सफा भयो। सफा ठाउँमा सफा मनले सहिद दिवस मनाऔं। सहिद दिवस मनाउँदै गर्दा आफूलाई सहिदहरूको रगतमा उभेको छु भन्ने गिल्टी नहोस्, सहिद दिवसको दिन सहिदको सपना पूरा गर्ने प्रण गरौं। सफा ठाउँमा, सफा मनले देखेको सपना पूरा हुन्छ। सहिद पार्क मात्र होइन, हरेक नेताको नियत पनि सफा हुनुपर्छ।’
