04/08/2026
जनर्लिस्ट युनियन अफ सिक्किमको निर्वाचन सम्पन्न, प्रवीण राई खालिङ निर्विरोध अध्यक्ष निर्वाचित
जनर्लिस्ट युनियन अफ सिक्किम(जेयूएस) को सन् २०२६ को निर्वाचन प्रक्रिया मंगलबार सफलतापूर्वक सम्पन्न भएको छ। निर्वाचनमा कार्यसमितिका सातै पदमा उम्मेदवारहरू निर्विरोध निर्वाचित भएका छन्।
निर्वाचन समितिका अनुसार निर्वाचन प्रक्रिया जुलाई ३१ देखि शुरु भएको थियो। उम्मेदवारी दर्ताको अन्तिम दिन अगस्त ३ मा कार्यसमितिका सात पदका लागि कुल आठवटा उम्मेदवारी दर्ता भएका थिए। अगस्त ४ मा उम्मेदवारीको जाँच तथा उम्मेदवारी फिर्ताको प्रक्रिया सम्पन्न गरिएको थियो।
उम्मेदवारी जाँच तथा फिर्तापछि सात पदका लागि सातवटा मात्रै वैध उम्मेदवारी कायम रहेपछि निर्वाचन समितिले सबै उम्मेदवारलाई निर्विरोध निर्वाचित भएको घोषणा गरेको हो।
निर्वाचित पदाधिकारीहरूमा अध्यक्ष प्रवीण राई खालिङ , उपाध्यक्ष दिलीप कुमार कार्की, महासचिव सुरज लिम्बू, संयुक्त सचिव सन्दीप प्रसाद, कोषाध्यक्ष अम्बर गुरुङ, सह–कोषाध्यक्ष निमा ल्हामु तामाङ तथा प्रचार सचिव अनुशिला शर्मा रहेका छन्।
निर्वाचन समितिले जनर्लिस्ट युनियन अफ सिक्किमको सन् २०२६ को निर्वाचन प्रक्रिया औपचारिक रूपमा सम्पन्न भएको घोषणा गर्दै नवनिर्वाचित कार्यसमितिले निवर्तमान कार्यसमितिबाट औपचारिक रूपमा कार्यभार ग्रहण गरेपछि आफ्नो कार्यकाल सुरु गर्ने जनाएको छ।
निर्वाचन समितिले निर्वाचनलाई शान्तिपूर्ण, निष्पक्ष र सफलतापूर्वक सम्पन्न गर्न सहयोग पुर्याउने सङ्घका सम्पूर्ण सदस्यहरूप्रति हार्दिक आभार व्यक्त गरेको छ। साथै, निर्वाचन प्रक्रियाका क्रममा अमूल्य सहयोग पुर्याएकी मनिता तामाङप्रति विशेष धन्यवाद ज्ञापन गर्दै आगामी जीवन तथा कार्ययात्राको सफलताको शुभकामना व्यक्त गरेको छ।
fans
