29/08/2025
विशिष्ट शिक्षाविद श्रीमती शान्ति राई "गोलाघाट गोर्खा गौरव सम्मान २०२५ ले सम्मानित
भारतीय गोर्खा परिसंघ देशकै एक मात्र सक्रिय राष्ट्रिय संस्था हो, असमको कठिन समयमा साथ दिएको छ : शान्ति राई
#सरुपथार, #गोलाघाट Dainandini News दैनन्दिनी समाचार #29अगस्त2025 : “एनआरसी अद्यावधिक प्रक्रियामा भारतीय गोर्खा परिसंघ (BGP)को भूमिका असमका गोर्खाहरूका लागि नम्र साथै प्रभावकारी उदाहरण हो, जसले मौन तर बौद्धिक हस्तक्षेपद्वारा सुनिश्चित गर्यो कि कुनै पनि रैथाने गोर्खाहरू एनआरसीबाट बाहिर नहोस,” श्रीमती शान्ति राई, गोलाघाट गोर्खा गौरव सम्मान २०२५ प्राप्त गरे पश्चात यस संवादाता संग फोन मार्फत यसरी भन्नुभो।
परिसंघको योगदान सम्झिँदै उनले अझ थपनुभो: “माननीय भारतको सर्वोच्च अदालतमा पक्षकार बन्नेदेखि, राज्य राजधानीबाट नियमित पत्रकार सम्मेलन गर्दै एनआरसी प्रक्रियाका असमानताहरूलाई सार्वजनिक गर्नु, राष्ट्रियदेखि राज्यस्तरका उच्च पदस्थ प्रशासनिक अधिकृतहरूसँग पटक-पटक भेटी समाधानका सुझाव दिनु यी सबै परिसंघको बलियो बौद्धिक संलग्नताको प्रमाण हुन। यिनै प्रयासकै कारण गोर्खाहरू डि-भोटर ट्यागबाट मुक्त भए र एनआरसीका धेरै समस्याहरू समाधान भए। एउटा महत्वपूर्ण घटना भनेको त्यतिबेलाका असम नेपाली साहित्य सभाका अध्यक्ष श्री दुर्गा खतिवडाको मुद्दा हो, जुन परिसंघले सार्वजनिक गरेपछि संसदमा विपक्षी उपनेता सांसद गौरव गोगोईले समेत उठाएका थिए।” श्रीमती राईले भन्नुभो कि ती सबै गतिविधिहरूको जानकारी उनले ती दिनमा राष्ट्रिय पत्रपत्रिका, डिजिटल मीडियाको विभिन्न संस्करण र समाचार च्यानलमार्फत पाएकी थिइन।
“म भारतीय गोर्खा परिसंघप्रति आभारी छु, जसले सही प्लेटफर्ममार्फत जातिका महत्वपूर्ण मुद्दाहरू समाधान गर्न प्रतिबद्धता दोहोराएको छ,” उनले थप्नुभो।
उनले परिसंघको सम्मानको परम्परा पनि उल्लेख गर्दै भन्नुहुन्छ “राष्ट्रिय गोर्खा गौरव सम्मानदेखि जिल्ला गोर्खा गौरव सम्मानसम्मका प्रयासहरू परिसंघको दर्शन हो, व्यक्तिको महत्वपूर्ण योगदानलाई जिल्ला स्तरदेखि राष्ट्रिय स्तरसम्म उच्च प्रशंसा गरी अभिनन्दन जनाएर मान्यता दिने। २०२५ को संस्करणका लागि मलाई गरिमामय 'गोलाघाट गोर्खा गौरव सम्मान २०२५' को निम्ति छनोट गरेकोमा म परिसंघ परिवारप्रति गहिरो आभार व्यक्त गर्छु।” श्रीमती राईले एउटा व्यक्तिगत अनुभव पनि यस संवादाता संग साझा गर्नुभो, "सन् २०२० मा, कोभिडअघि, परिसंघले मेरो छोरा सागर राईसँग सम्पर्क गरेर मेरो दिवंगत श्रीमान शिवाजी राईलाई स्मारिका ‘पूर्वाञ्चल’को स्मृति स्तम्भमा राख्ने प्रस्ताव गरेको थियो, जहाँ हरि प्रसाद ‘गोर्खा’ राई, मनीकुमार सुब्बा, पिताम्बर गुरुङजस्ता दिग्गजहरूलाई समावेश गरिएको थियो। हामीले त्यतिबेला अस्वीकार गर्यौं, किनभने उहाँको योगदान ती ध्रुव तारा जस्ता महानुभावहरूसँग मेल खान सक्दैन भन्ने लाग्यो। मेरो श्रीमान लाइ पनि परिसंघले उच्च सम्मान दिएको हो यो कुरा म सार्वजनिक गर्नु चाहन्छु। २०२४ मा असम नेपाली साहित्य सभाको स्वर्णजयन्ती हाम्रो घरअगाडि आयोजना हुँदा हामीले त्यस्तो सम्मान स्वीकार्नुपर्यो, परिसंघलेनै प्रस्ताव गरेको उच्च सम्मानको सम्झनामा ।”
उनी सम्मान स्वीकारेको विषय मा भन्नुहुन्छ “यो सम्मान मैले मेरो दिवंगत पति श्रीमान शिवाजी राई, जो बोलोसिङ मेमोरियल स्कूल (BMS) का संस्थापक प्रधानाध्यापक र गोलाघाटमा अखिल भारतीय गोर्खा लिगका संस्थापक सदस्य साथै यसक्षेत्रका शिक्षाविद र समाज सेवक उहाँकै योगदानलाई समर्पित गर्दै ग्रहण गरें।” आभार व्यक्त गर्दै उनले भन्नुभो, “यो सम्मान प्रदान गर्नुहुने सम्मान छनोट समिति, गोलाघाट जिल्ला परिसंघका अध्यक्ष ज्ञनिन्द्र छेत्री, कार्यकारी अध्यक्ष गणेशकुमार गिरी, मूलसचिव रुप नारायण राई, जिल्ला पर्यवेक्षक धनप्रसाद लिम्बू र राज्य महासचिव नन्द किराती देवान जो मेरा विद्यार्थी हो सबैलाई धन्यवाद ज्ञापन गर्दछु।” स्वास्थ्यगत कारण र डिब्रुगढस्थित असम मेडिकल कलेजमा उपचाररत भएकाले श्रीमती राईले कार्यक्रममा व्यक्तिगत उपस्थिति जनाउन सक्नुभएन। “म मेरो अनुपस्थितिका लागि क्षमा चाहन्छु। मेरो जेठी बुहारी मायाले मेरो तर्फबाट सम्मान ग्रहण गरिन र फोनमार्फत बलिदान दिवस र सम्मान समारोहबारे मलाई जानकारी गराइन।”
*गोलाघाटका गोर्खाली भारतीय गोर्खा परिसंघको उद्योगमा ८१औँ बलिदान दिवस शहीद बीरबल लिम्बू स्मृति गोर्खा भवन सरुपथारमा पालन गरे*
८१औँ बलिदान दिवस, जसले स्वतन्त्रता सेनानी र आजाद हिन्द फौजका वीर मेजर दुर्गा मल्लको सहादतलाई स्मरण गर्दछ, सोमबार सरूपथारस्थित शहीद बीरबल लिम्बू स्मृति गोर्खा भवनमा भारतीय गोर्खा परिसंघ (BGP) को तत्वावधानमा एक दिवसीय कार्यक्रमसहित गोलाघाट का गोर्खा हरुले एकसाथ मनाये। कार्यक्रमको सुरुवात भा गो प गोलाघाट जिल्ला अध्यक्ष ज्ञनिन्द्र क्षेत्री द्वारा झण्डोतोलनबाट भयो, त्यसपछि गोर्खा जागरण गीत र वातावरणमैत्री संस्था भएको हैसियतले जिल्लाका सल्लाहकार भक्त लिम्बूले वृक्षारोपण गरे। त्यसपछि आजाद हिन्द फौजका मेजर दुर्गा मल्लको तस्वीरमा माल्यार्पण गर्दै शहिदप्रति श्रद्धाञ्जली अर्पण गरियो, जसको नेतृत्व भारतीय गोर्खा परिसंघका प्रदेश मूलसचिव नन्द किराती देवानले गरे। उनलाई असम गोर्खा सम्मेलनका केन्द्रीय कार्यकारी सदस्य अजीत सारू, असम नेपाली साहित्य सभाका जिल्ला कार्यकारी अध्यक्ष धन बहादुर लिम्बू र अन्य आमन्त्रित सम्माननीय अतिथि लगायत उपस्थित हरूले साथ दिए।
यस अवसरको मुख्य आकर्षण थियो गोर्खा समाजप्रतिको जीवनभरको योगदानको कदर गर्दै श्रीमती शान्ति राईलाई "गोलाघाट गोर्खा गौरव सम्मान २०२५" प्रदान गरिनु। स्वास्थ्य समस्याका कारण र असम मेडिकल कलेज, डिब्रुगढमा उपचाररत भएकाले श्रीमतीराई स्वयं उपस्थित हुन सक्नुभएन र पुरस्कार उनको तर्फबाट जेठी बुहारी माया राईले ग्रहण गरिन।
अखिल असम गोर्खा छात्र संघ (AAGSU) गोलाघाट जिल्ला समितिका संस्थापक अध्यक्ष र हाल भा गो प गोलाघाट जिल्लाका सल्लाहकार युवराज गुरुङले भारतीय गोर्खा परिसंघको स्थापनाकाल राष्ट्रिय स्तरदेखि असम हुँदै गोलाघाटसम्मको यात्राबारे प्रेरणादायी सम्बोधन गरे। उनले विगत दशकमा जिल्ला नेतृत्वद्वारा दिइएका योगदानको प्रशंसा गर्दै भीमसेन राई, धनप्रसाद लिम्बू, सूर्य छेत्री, पञ्जक उपाध्यायदेखि ज्ञनिन्द्र क्षेत्रीसम्मको नाम लिए।
विशेष सम्मान गोलाघाट जिल्ला लोक सेवा पुरस्कार २०२५ का प्राप्तकर्ता दिल बहादुर क्षेत्रीलाई भा गो प गोलाघाट जिल्ला समिति र आग्सु सरूपथार क्षेत्रीय समितिद्वारा प्रदान गरियो। भावुक सम्बोधनमा क्षेत्रीले संस्थाहरूप्रति कृतज्ञता व्यक्त गर्दै औपचारिक रूपमा परिसंघ परिवारमा आफ्नो आवद्धता घोषणा गरी प्राथमिक सदस्य ग्रहण गरे। भा गो प जिल्ला पर्यवेक्षक धनप्रसाद लिम्बूले परिसंघको परिणाममुखी कार्यशैली र आधुनिक, प्रविधिमुखी नेतृत्व प्रशिक्षण मोड्युलबारे बोले। उनले भने, “परिसंघले व्यक्तिको क्षमता समुदाय सेवाका लागि उपयोग गर्छ; म यसको जीवित उदाहरण हुँ।”
भारतीय गोर्खा परिसंघ असम प्रदेश समितिको मूलसचिव नन्द किराती देवानले गोर्खाको वर्तमान अवस्थाबारे जानकारी दिँदै आज हुदैगरेको जिल्ला परिषद् बैठकमा गोर्खाहरूलाइ अन्य परम्परागत वनवासी (OTFD) श्रेणीमा समावेश गर्न प्रस्ताव गर्न आग्रह गरे। उनले यो विषय राज्य परिषद् सभा र सरकारी निकायसँग, वन र राजस्व विभागलगायत, उठाउने प्रतिवद्धता जनाए। उनले जिल्ला पदाधिकारीहरूलाई रजत जयन्ती सदस्यता अभियान अन्तर्गत कम्तीमा २५ सदस्य व्यक्तिगत रूपमा भर्ना गर्न तथा परिसंगको प्रकाशन र स्मारिका आदी प्रचार गर्न सुझाव दिए।
आग्सु गोलाघाट जिल्ला समितिका हालै बिदाइ मूलसचिव बिशिष्ट अतिथिको रुपमा आफ्नु अभिव्यक्ति राख्दै कर्ण सिंह लिम्बूले गोलाघाटमा विगत दुई दशकदेखि भा गो प द्वारा गरिएका मौन तर प्रभावकारी कामको प्रशंसा गरे, विशेषगरी आग्सुका पृष्ठभूमिबाट आएका नेतृत्वलाई। उनले श्रीमतीशान्ति राई र दिल बहादुर क्षेत्रीलाई उपलब्धिका लागि बधाई दिए। मगर साहित्य सभाका राज्य अध्यक्ष रिकुटे पुलामीले भा गो पको राष्ट्रिय योगदान विशेषगरी नयाँ दिल्लीमा मेजर दुर्गा मल्लको जीवन आकारको प्रतिमा स्थापनाको प्रशंसा गरे। उनले बलिदान दिवस अवसरमा गोर्खा स्वतन्त्रता सेनानी र सहिदहरूको जिल्ला-स्तरीय अभिलेख प्रकाशन गर्न सुझाव दिए र गोलाघाटको सूची संकलन गर्न स्वयं दायित्व लिनु सक्ने अभिव्यक्ति राखे।
कार्यक्रममा अखिल असम गोर्खा छात्र संघ (AAGSU), असम गोर्खा सम्मेलन (AGS), गोर्खा स्वायत्त परिषद् माग समिति (GACDC) र असम नेपाली साहित्य सभा (ANSS) का प्रमुख नेताहरूको उपस्थिति थियो। सहभागीहरूमा आग्सु गोलाघाट जिल्लाका उपसभापति दुर्योधन लिम्बू, उनका सहकर्मीहरू साङ्गठनिक सचिव राजु राई, प्रचार सचिव अमर लिम्बू, वरिष्ट समाजसेवी बिक्रम लिम्बू र नारी नेतृ कविता उपाध्याय, आग्सु सरूपथार र उरियमघाट क्षेत्रीय समितिका अध्यक्षहरू गौतम क्षेत्री र प्रकाश राई थिए। सम्माननीय अतिथिमा सरूपथार सरकारी गाउँ प्रधान कृष्ण प्रसाद सुवेदी, सरूपथारका पूर्व भारतीय सैनिक वीर बहादुर राई, भा गो प गोलाघाटका पूर्व कार्यकारि अध्यक्ष सुर्य क्षेत्री, आग्सु उरियामघाट भारप्राप्त मुल सचिव राकेस लिम्बू, युवा व्यवसायी राजु पिठाकटे र पुरस्कारप्राप्त व्यक्तिको नजिकका आफन्त र परिरत हरू पनि उपस्थित थिए।
कार्यक्रम, जसको संयोजन भा गो प गोलाघाट जिल्ला समितिका मूलसचिव रुप नारायण राईले गरेका थिए, गोर्खा जागरण गीतबाट सुरु भई, ज्ञात-अज्ञात सहिदहरूको सम्झनामा एक मिनेट मौन धारण राखियो। अन्त्यमा अध्यक्षीय सम्बोधनपछि असम राज्य गीत ‘ओ मुर अपुनार देश’ गाएर सम्पन्न गरियो।
Nanda K Dewan
