03/03/2025
କାଠ ବେପାରୀଙ୍କୁ ଟଙ୍କା ମାଗୁଛନ୍ତି ଅଡିଓ ଭାଇରାଲ୍
କେନ୍ଦୁଝର ବନଖଣ୍ଡର ଚମ୍ପୁଆ ଫରେଷ୍ଟର ସୁନିତା ବାଘେଲଙ୍କୁ ଚମ୍ପୁଆରୁ ବଦଳି କରି ମୁଖ୍ୟାଳୟକୁ ଅଣାଯାଇଛି । କାଠ ବେପାରୀ ଠାରୁ ଟଙ୍କା ମାଗିବା ଅଭିଯୋଗ ଆସିବା ପରେ ତାଙ୍କ ପ୍ରତି କାର୍ଯ୍ୟାନୁଷ୍ଠାନ ସ୍ବରୂପ ବଦଳି କରାଯାଇଥିବା ଜଣାପଡିଛି । ଏକ ଭାଇରାଲ ଅଡିଓକୁ ଆଧାର କରି ଏଭଳି ପଦକ୍ଷେପ ନିଆଯାଇଛି। ଚମ୍ପୁଆ ବନାଞ୍ଚଳରେ ଇଉକାଲିପଟାସ୍ ଓ ଆକାଶିଆ ଗଛ କାଟିବା ପାଇଁ ଅନୁମତି ନେଇ କାଠ ବେପାରୀମାନେ ମୂଲ୍ୟବାନ ଗଛ କାଟୁଥିବାର ବାରମ୍ବାର ଅଭିଯୋଗ ହୋଇ ଆସୁଥିଲା। ତେବେ କାଠ ବେପାରୀଙ୍କୁ ଫରେଷ୍ଟର ସୁନିତା ୮ ହଜାର ଟଙ୍କା ମାଗିବା ଏବଂ ଜଣେ ଅସ୍ଥାୟୀ ବନ କର୍ମଚାରୀ ଡ୍ରାଇଭରଙ୍କ ଫୋନ୍ ପେ’ରେ ଟଙ୍କା ପଠାଇବାକୁ କହୁଥିବାର ଏକ ଅଡିଓ ଭାଇରାଲ ହେଉଛି ।
ଏ ସମ୍ପର୍କରେ ଡିଏଫ୍ଓ ଧନରାଜ ଏଚ୍ଡିଙ୍କୁ ଯୋଗାଯୋଗ କରିବାରୁ ଏହି ଅଡିଓ ଘଟଣାକୁ ନେଇ ଫରେଷ୍ଟରଙ୍କୁ ସେଠାରୁ ହଟାଇ ମୁଖ୍ୟାଳୟକୁ ଅଣାଯାଇଛି । ଉକ୍ତ ଘଟଣାର ତଦନ୍ତ କରାଯିବା ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି। ଅନ୍ୟପକ୍ଷରେ ଫରେଷ୍ଟରଙ୍କୁ ବାରମ୍ବାର ଯୋଗାଯୋଗ କରିଥିଲେ ମଧ୍ୟ ସେ ଫୋନ୍ ଉଠାଇ ନଥିବାରୁ ମତାମତ ନିଆଯାଇପାରିନାହିଁ।
