02/08/2026
സംസ്ഥാനത്ത് കനത്ത മഴയും വിവിധ മേഖലകളിലെ പ്രളയവും കണക്കിലെടുത്ത് വിവിധ ജില്ലകളിൽ തിങ്കളാഴ്ച വിദ്യാലയങ്ങൾക്ക് അതത് ജില്ലാ കളക്ടർമാർ അവധി പ്രഖ്യാപിച്ചു. പാലക്കാട്. പത്തനംതിട്ട, കണ്ണൂർ, കോഴിക്കോട്, കാസർകോട്, കോട്ടയം, മലപ്പുറം, തൃശ്ശൂർ, ഇടുക്കി, വയനാട്, ജില്ലകളിലെ പ്രൊഫഷണൽ കോളേജുകൾ ഉൾപ്പെടെയുള്ള വിദ്യാഭ്യാസ സ്ഥാപനങ്ങൾക്കാണ് 03- 08-2026 തിങ്കളാഴ്ച അവധിയായിരിക്കുമെന്ന് ജില്ലാ കളക്ടർമാർ അറിയിച്ചത്. കൂടാതെ എറണാകുളം ആലപ്പുഴ ജില്ലകളിൽ ചില താലൂക്കുകളിലും അവധി പ്രഖ്യാപിച്ചിട്ടുണ്ട്.
ആലപ്പുഴയിൽ കുട്ടനാട്, ചെങ്ങന്നൂർ താലൂക്കുകളിലേയും എറണാകുളത്ത് കോതമംഗലം, മൂവാറ്റുപുഴ താലൂക്കുകളിലേയും വിദ്യാഭ്യാസ സ്ഥാപനങ്ങൾക്കും നാളെ അവധിയാണ്. കോതമംഗലം, മൂവാറ്റുപുഴ താലൂക്കുകളിൽ പ്രൊഫഷണൽ കോളേജുകൾക്ക് അവധിയില്ല. ഇരു ജില്ലകളിലും ദുരിതാശ്വാസ ക്യാമ്പുകൾ പ്രവർത്തിക്കുന്ന വിദ്യാഭ്യാസ സ്ഥാപനങ്ങൾക്കും നാളത്തെ അവധി ബാധകമാണ്. അതേസമയം മുൻകൂട്ടി നിശ്ചയിച്ച പൊതുപരീക്ഷകൾക്കും യൂണിവേഴ്സിറ്റി പരീക്ഷകൾക്കും അവധി ബാധകമല്ല.
സംസ്ഥാനത്ത് രണ്ടുദിവസം ശക്തമായി പെയ്ത മഴയിൽ ഇതുവരെ എട്ട് ജീവനുകളാണ് പൊലിഞ്ഞത്. എട്ടുപേരെ കാണാനില്ല. ഇവർക്കായുള്ള തിരച്ചിൽ തുടരുന്നു. ഇടുക്കി ജില്ലയിലെ മലയോര മേഖലയില് ശക്തമായ മഴ തുടരുന്ന സാഹചര്യത്തില് ദേശീയ പാത 85ല് നേര്യമംഗലം മുതല് അടിമാലി വരെ ഗതാഗതം പൂര്ണമായും നിരോധിച്ചതായി ദുരന്ത നിവാരണ വിഭാഗം അറിയിച്ചു. ഈ ഭാഗത്ത് മണ്ണിടിച്ചിലുണ്ടാകാനുള്ള സാധ്യത കണക്കിലെടുത്താണിത്. ഇതു സംബന്ധിച്ച് പൊലീസിന് അടിയന്തര നിര്ദേശം നല്കിയിട്ടുണ്ട്. പൊതുജനങ്ങള് ഈ ഭാഗത്തു കൂടിയുള്ള യാത്ര ഒഴിവാക്കണമെന്നും ദുരന്ത നിവാരണ വിഭാഗം അറിയിച്ചു
കണ്ണുർ ജില്ലയിൽകനത്ത മഴയെത്തുടര്ന്നുണ്ടായ നാശനഷ്ടങ്ങള് കാരണം പാല്ച്ചുരം റോഡ് പൂര്ണ്ണമായും അടച്ചതിനാല് വയനാട്ടിലേക്ക് ബദല് യാത്രാ ക്രമീകരണം ഏര്പ്പെടുത്തി. ഉരുള്പൊട്ടലിനെത്തുടര്ന്ന് അടിഞ്ഞുകൂടിയ മണ്ണും അവശിഷ്ടങ്ങളും നീക്കം ചെയ്ത് നെടുംപൊയില് ചുരം റോഡ് നിലവില് ഗതാഗതയോഗ്യമാക്കിയിട്ടുണ്ട്.
നെടുംപൊയില് വഴിയുള്ള വാഹനസഞ്ചാരം തുടരുന്നുണ്ടെങ്കിലും, ഏതെങ്കിലും തരത്തിലുള്ള തടസ്സങ്ങള് ഉണ്ടായാല് രണ്ട് ബദല് പാതകള് ഉപയോഗിക്കാം. കണ്ണൂര് ഭാഗത്തുനിന്നും വരുന്നവര്ക്ക്, കണ്ണവം- ചെറുവാഞ്ചേരി- നാദാപുരം-കുറ്റ്യാടി ചുരം റോഡ് വഴി മാനന്തവാടിയിലേക്ക് പോകാം.
തലശ്ശേരി ഭാഗത്തുനിന്നും വരുന്നവര്ക്ക്, പള്ളൂര്-നാദാപുരം- കുറ്റ്യാടി-മാനന്തവാടി റോഡും ഉപയോഗിക്കാം.പ്രതികൂല കാലാവസ്ഥയില് വയനാട്ടിലേക്കുള്ള യാത്ര ജനങ്ങള് പരമാവധി ഒഴിവാക്കണമെന്ന് ജില്ലാ ദുരന്തനിവാരണ അതോറിറ്റി ചെയര്മാനായ ജില്ലാ കലക്ടര് പി വിഷ്ണു രാജ് അഭ്യര്ത്ഥിച്ചു.
