07/09/2026
ഓണാവധിക്ക് ശേഷമുള്ള ആദ്യ പ്രവൃത്തിദിനമായ കഴിഞ്ഞ തിങ്കളാഴ്ച ചരിത്രനേട്ടം കുറിച്ച് കെഎസ്ആർടിസി എറണാകുളം ഡിപ്പോ. ഒറ്റദിവസം കൊണ്ട് ഡിപ്പോ സ്വന്തമാക്കിയത് 29.88 ലക്ഷം രൂപയുടെ (29,88,679 രൂപ) റെക്കോർഡ് വരുമാനമാണ്. ദിവസേന ലക്ഷ്യമിട്ട 25,10,000 രൂപ മറികടന്ന് 116.07 ശതമാനത്തിന്റെ കൂറ്റൻ വർധനവാണ് പ്രതിദിന വരുമാനത്തിൽ എറണാകുളം ഡിപ്പോ രേഖപ്പെടുത്തിയത്. അവധി കഴിഞ്ഞ് മടങ്ങുന്ന വിദ്യാർഥികളുടെയും ജീവനക്കാരുടെയും വൻ തിരക്ക് മുൻകൂട്ടി കണ്ട് കൃത്യമായ ആസൂത്രണത്തോടെ സർവീസുകൾ ക്രമീകരിച്ചതാണ് ഈ നേട്ടത്തിന് വഴിയൊരുക്കിയത്. സാധാരണയായി 83 സർവീസുകൾ നടത്തുന്ന ഡിപ്പോയിൽ നിന്ന് അന്നേദിവസം 95 സർവീസുകളാണ് ഓപ്പറേഷൻ നടത്തിയത്. ഓണനാളുകളിലെ മറ്റ് ദിവസങ്ങളിലും മികച്ച വരുമാനം നേടാൻ ഡിപ്പോയ്ക്ക് സാധിച്ചിരുന്നതായി എടിഒ അജിത് വ്യക്തമാക്കി.
അവധി കഴിഞ്ഞ് മടങ്ങുന്നവർക്കായി ഞായറാഴ്ച ഉച്ചയ്ക്ക് ശേഷവും തിങ്കളാഴ്ചയുമായി ബംഗളൂരുവിലേക്ക് 10 അധിക സർവീസുകളും ചെന്നൈയിലേക്ക് ഒരു സർവീസും എറണാകുളത്ത് നിന്ന് നടത്തിയിരുന്നു. ഇതിന് പുറമെ തിരുവനന്തപുരം, കോഴിക്കോട് ഭാഗങ്ങളിലേക്ക് നാല് എസി ലോ ഫ്ലോർ ബസുകളും ഓർഡിനറി, ഫാസ്റ്റ് പാസഞ്ചർ, സൂപ്പർഫാസ്റ്റ് ശ്രേണിയിലുള്ള മറ്റ് അധിക സർവീസുകളും ഓടിക്കാൻ കഴിഞ്ഞത് യാത്രാക്ലേശം പൂർണ്ണമായി പരിഹരിക്കാൻ സഹായിച്ചു. ഡിപ്പോയിലെ ആകെയുള്ള സർവീസുകളിൽ 21 എണ്ണം സ്ത്രീകൾക്ക് സൗജന്യ യാത്ര അനുവദിച്ച പ്രിയദർശിനി ബസുകളാണ്. ഗുരുവായൂർ, പിഴല, ജില്ലയിലെ കിഴക്കൻ മേഖലകൾ എന്നിവിടങ്ങളിലേക്കാണ് ഇവ സർവീസ് നടത്തുന്നത്.
ബജറ്റ് ടൂറിസം പദ്ധതികളിലൂടെയും പുതിയ ഫീഡർ സർവീസുകളിലൂടെയും വരുമാനം ഇനിയും ഉയർത്താനാണ് അധികൃതർ ലക്ഷ്യമിടുന്നത്. ഇതിന്റെ ഭാഗമായി ഫോർട്ട് കൊച്ചിയിൽ നിന്ന് നെടുമ്പാശ്ശേരി എയർപോർട്ടിലേക്കുള്ള പുതിയ എസി ലോ ഫ്ലോർ സർവീസിന് കഴിഞ്ഞ വ്യാഴാഴ്ച തുടക്കമായി. ഈ ബസ് വിമാനത്താവളത്തിൽ നിന്ന് പാലക്കാട്ടേക്കും തിരിച്ചുമാണ് തുടർസർവീസ് നടത്തുന്നത്. കൂടാതെ, ഡബിൾ ഡെക്കർ ബസ് ഉൾപ്പെടെയുള്ള ഡിപ്പോയുടെ ജനപ്രിയ ബജറ്റ് ടൂറിസം സർവീസുകളും മികച്ച വരുമാനം നേടുന്നുണ്ട്. ഇവിടേക്ക് ഓൺലൈൻ ബുക്കിങ് സൗകര്യവും ലഭ്യമാണ്.
