06/06/2026
മാറുന്ന കാലത്തിനനുസരിച്ച് ജീവിതനിലവാരം വർദ്ധിച്ചെങ്കിലും, അമിത ഉപഭോഗം പരിസ്ഥിതിയെയും സുസ്ഥിര വികസനത്തെയും വലിയ രീതിയിൽ ദോഷകരമായി ബാധിക്കുന്നുണ്ടെന്ന് ഓർമ്മിപ്പിക്കുകയാണ് എറണാകുളം ജില്ലാ കളക്ടർ ജി. പ്രിയങ്ക. തന്റെ ലളിതമായ ജീവിതരീതി ഉദാഹരണമായി ചൂണ്ടിക്കാട്ടിക്കൊണ്ടാണ് ബോധപൂർവ്വമുള്ള ഉപഭോഗ ശീലത്തെക്കുറിച്ച് (Conscious Consumerism) കളക്ടർ സംസാരിക്കുന്നത്.
"എനിക്ക് ആകെ എട്ട് പാന്റ്സും 15 ഷർട്ടും മൂന്ന് ജോഡി ചെരുപ്പുമേയുള്ളൂ. ഇവ വ്യത്യസ്ത കോമ്പിനേഷനുകളിൽ മാറ്റിമാറ്റി ഉപയോഗിക്കുകയാണ് പതിവ്. 15 ദിവസം കഴിഞ്ഞാൽ ഇത് തന്നെ വീണ്ടും ഉപയോഗിക്കും. ഇതാണ് യഥാർത്ഥത്തിൽ 'ബോധപൂർവ്വമുള്ള ഉപഭോഗം' അഥവാ 'കോൺഷ്യസ് കൺസ്യൂമറിസം'," കളക്ടർ വ്യക്തമാക്കി.
മുൻകാലങ്ങളിൽ വർഷത്തിൽ ഒന്നോ രണ്ടോ തവണ മാത്രം പുതിയ വസ്ത്രങ്ങൾ വാങ്ങിയിരുന്ന സ്ഥാനത്ത്, ഇന്ന് ഓരോ പരിപാടികൾക്കും പുതിയ വസ്ത്രങ്ങളും ചെരുപ്പുകളും വാങ്ങി അല്പകാലത്തിന് ശേഷം വലിച്ചെറിയുന്ന പ്രവണത വർദ്ധിച്ചിട്ടുണ്ട്. ഇത്തരം ശീലങ്ങൾ ഭൂമിയെ മാലിന്യക്കൂമ്പാരമാക്കാൻ മാത്രമേ ഉപകരിക്കൂ എന്ന് കളക്ടർ മുന്നറിയിപ്പ് നൽകുന്നു.
സാമ്പത്തിക ശേഷിയുണ്ടെന്നതുകൊണ്ട് മാത്രം ആവശ്യമില്ലാത്ത സാധനങ്ങൾ വാരിക്കൂട്ടേണ്ടതില്ലെന്നും, വസ്ത്രധാരണത്തേക്കാൾ ഉപരി വ്യക്തിയുടെ സ്വഭാവവും നിലപാടുകളുമാണ് ഒരുവനെ അടയാളപ്പെടുത്തുന്നതെന്നും അവർ ഓർമ്മിപ്പിക്കുന്നു. മറ്റുള്ളവരെ കാണിക്കാനോ പണം ചെലവഴിക്കാനോ വേണ്ടിയല്ല, മറിച്ച് അത്യാവശ്യമുണ്ടെങ്കിൽ മാത്രം ഷോപ്പിംഗ് നടത്തുക എന്നതാണ് ഈ ശീലത്തിന്റെ കാതൽ. പരിസ്ഥിതിയെയും വരുംതലമുറയെയും കരുതി, 365 ദിവസവും ഇത്തരം ബോധപൂർവ്വമുള്ള ഉപഭോഗ രീതി ജീവിതത്തിൽ പകർത്താൻ എല്ലാവരും തയ്യാറാവണമെന്ന് കളക്ടർ ജി. പ്രിയങ്ക അഭ്യർത്ഥിച്ചു.
