08/08/2026
വെള്ളത്തൂവലിലെ ‘വെള്ളം’ മലവെള്ളം കൊണ്ടുപോകുമോ?: കുലുങ്ങി വിറച്ച് ബെവ്കോ ഔട്ട്ലെറ്റ്; അടിയിലൂടെ കുതിച്ചുപാഞ്ഞ് മലവെള്ളപ്പാച്ചിൽ
കാണുന്നവനും കുടിക്കുന്നവനും ഒരുപോലെ നെഞ്ചുപിടയ്ക്കുന്ന കാഴ്ചയ്ക്കാണ് ഇടുക്കി വെള്ളത്തൂവൽ സാക്ഷ്യം വഹിക്കുന്നത്. ശക്തമായ മഴ തുടരുന്ന സാഹചര്യത്തിൽ വെള്ളത്തൂവലിലെ കേരള ബെവറേജസ് കോർപ്പറേഷന്റെ (ബവ്കോ) ഔട്ട്ലെറ്റിന് താഴെക്കൂടി ആർത്തലച്ചൊഴുകുന്ന മലവെള്ളപ്പാച്ചിൽ വലിയ ഭീതിയും ആശങ്കയുമാണ് പ്രദേശത്ത് സൃഷ്ടിക്കുന്നത്. കെട്ടിടത്തിന്റെ അടിഭാഗത്തുള്ള കനാലിലൂടെ ചെളി കലങ്ങിയ മലവെള്ളം വലിയ പൈപ്പ് പോലെ ശക്തിയായി പുറത്തേക്ക് തെറിച്ചൊഴുകുന്ന ദൃശ്യങ്ങളാണ് പുറത്തുവന്നിട്ടുള്ളത്. വെള്ളത്തിന്റെ ഭയനാകമായ ഒഴുക്കും സമ്മർദ്ദവും കാരണം ഔട്ട്ലെറ്റിലെ മദ്യക്കുപ്പികളും തട്ടുകളും കുലുങ്ങി വിറയ്ക്കുന്നതായാണ് റിപ്പോർട്ടുകൾ. രാവിലെ ആരംഭിച്ച മഴ രാത്രിയിലും തുടരുന്നത് കെട്ടിടത്തിന്റെ അടിത്തറയ്ക്ക് ഭീഷണിയാകുമോ എന്ന ആശങ്ക വർദ്ധിപ്പിക്കുന്നു. ദൃശ്യങ്ങളിൽ കാണുന്ന വെള്ളത്തിന്റെ വേഗതയും രൗദ്രരൂപവും ഏതൊരു കെട്ടിടത്തിന്റെ ബാലൻസിനെയും ചോദ്യം ചെയ്യുന്നതാണ്. ബെവ്കോയുടെ തറഭാഗം തുരന്ന് വെള്ളം വരുന്നത് പോലെയാണ് കാഴ്ചയിൽ അനുഭവപ്പെടുന്നത്. "നാടിന് വെള്ളം കൊടുക്കുന്ന സ്ഥാപനത്തിന് താഴെക്കൂടി തന്നെ പ്രകൃതി വെള്ളമൊഴുക്കുന്നു" എന്ന തരത്തിൽ സോഷ്യൽ മീഡിയയിൽ ഇത് കൗതുകത്തോടെയും തമാശയോടെയും കാണുന്നവരുണ്ടെങ്കിലും, സംഗതി വളരെ ഗൗരവമുള്ളതാണ്. വെള്ളത്തിന്റെ കുത്തൊഴുക്ക് തുടരുകയാണെങ്കിൽ കെട്ടിടത്തിന്റെ അടിത്തറയിളകാനും അടിഭാഗത്തെ മണ്ണ് ഒലിച്ചുപോകാനും വലിയ സാധ്യതയുണ്ട്. കെട്ടിടത്തിനുള്ളിൽ ആയിരക്കണക്കിന് രൂപയുടെ മദ്യശേഖരവും ജീവനക്കാരും ഉള്ളതിനാൽ വരും മണിക്കൂറുകളിൽ മഴ ശക്തമായാൽ അടിയന്തരമായി മുൻകരുതൽ നടപടികൾ സ്വീകരിക്കേണ്ടി വരും. സ്ഥലത്ത് സുരക്ഷാ പരിശോധന നടത്തണമെന്നും ആവശ്യമെങ്കിൽ മദ്യശേഖരം സുരക്ഷിത സ്ഥാനത്തേക്ക് മാറ്റണമെന്നുമുള്ള ആവശ്യവും ഉയരുന്നുണ്ട്. വെള്ളത്തൂവലിലെ ‘വെള്ളം’ കാണാൻ ആളുകൾ തടിച്ചുകൂടുന്നത് ഒഴിവാക്കാനും അധികൃതർ ശ്രദ്ധിക്കുന്നുണ്ട്.
-----------------------------
വാർത്തകൾ അറിയാനും വാട്സ് അപ്പ് ഗ്രൂപ്പിൽ ജോയിൻ ചെയ്യുന്നതിനായി താഴെ കാണുന്ന ലിങ്കിൽ ക്ലിക്ക് ചെയ്യുക.
https://chat.whatsapp.com/KJUqZABNkvM6Xxqc33kQ02?s=cl&p=a&mlu=0&ilr=0
