Denis Arackal, Kochi (2026)

19/06/2026

നിങ്ങളുടെ യാത്രകൾക്ക് ശേഷം നിങ്ങൾ എവിടെ നിന്നും തുടങ്ങിയോ അവിടെത്തന്നെ നിങ്ങൾ തിരിച്ചെത്തുകയും, എന്നാൽ ആ പഴയ സ്ഥലത്തെ നിങ്ങൾ നിങ്ങളുടെ പുതിയ കണ്ണുകൾ കൊണ്ട് കാണുകയും ചെയ്യും.

യാത്രകൾ നിങ്ങളുടെ കണ്ണുകളെയാണ് മാറ്റുന്നത്.

18/06/2026

Hugs 🫂 നിങ്ങളുടെ കാമുകിയെ നിങ്ങൾ സ്നേഹിക്കുന്ന പോലെ നിങ്ങൾ നിങ്ങളെ സ്നേഹിക്കുവിൻ ♥️

16/06/2026

ഒരു ബന്ധത്തിൽ അല്ലാതെയിരിക്കുന്നത് കൊണ്ടാണോ ആളുകൾ ഏകാന്തതയിലായിരിക്കുന്നത്?

അതോ ബന്ധങ്ങളിലാണോ ഏകാന്തത കൂടുതൽ?

Denis Arackal ©
ᵗʰᵉ ᵏᵉᵉᵖᵉʳ ᵒᶠ ˢᵐᵃˡˡ ᵗʰⁱⁿᵍˢ

14/06/2026

അമ്മായിഅമ്മ മരുമകളെ സ്വന്തം മകളായി കാണണമെന്ന് പറയുന്നത് യഥാർത്ഥത്തിൽ നടക്കുന്ന കാര്യമാണോ? അത് അനാവശ്യമായ ഒരു ഡിമാൻഡ് ഒരു സ്ത്രീയുടെ മുകളിൽ കയറ്റി വയ്ക്കുന്നതിനു തുല്യമല്ല?

സത്യത്തിൽ ഏതെങ്കിലും സ്ത്രീയ്ക്ക് മറ്റൊരു പെൺകുട്ടിയെ സ്വന്തം മകളായി കാണാൻ സാധിക്കുമോ? മകളെപ്പോലെ കാണാൻ അല്ലേ സാധിക്കൂ? സ്വന്തം മകൾക്ക് എപ്പോഴും ഒരു പ്രത്യേക സ്ഥാനം തന്നെ ഉണ്ടാകില്ലേ?

ഇവൾ എന്റെ മകൾ തന്നെയാണെന്ന് മരുമകളെ കുറിച്ച് പറയുന്ന അമ്മായിയമ്മമാർ കള്ളമാണോ പറയുന്നത്? അതോ അങ്ങനെ സാധിക്കുന്ന സ്ത്രീകൾ ഉണ്ടോ?

നിങ്ങൾക്ക് എന്തു തോന്നുന്നു?

Denis Arackal ©

14/06/2026

ഞായറാഴ്ച ആണല്ലോ. എന്തൊക്കെയുണ്ട്? ഇന്ന് ഞാൻ കുറച്ച് പരിപാടി പ്ലാൻ ചെയ്തിട്ടുണ്ടെങ്കിലും എല്ലാം കൂടി നടക്കും എന്ന് തോന്നുന്നില്ല.

രാവിലെ ബാത്റൂം ഒന്ന് കഴുകി വൃത്തിയാക്കണം എന്ന് വിചാരിച്ചെങ്കിലും പല കാര്യങ്ങൾ കൊണ്ട് നടന്നില്ല. പക്ഷേ മുറിയൊക്കെ ഒന്നു വൃത്തിയാക്കി, ചെറിയ അടുക്കി പെറുക്കൽ ഒക്കെ നടത്തി.

ഒരു രണ്ടു മണിയാവുമ്പോഴേക്കും എന്റെ ഒരു കൂട്ടുകാരൻ വരും. ഞങ്ങൾ രണ്ടുപേരും ഒന്ന് പുറത്തു പോയി ചായ കുടിച്ചു തിരിച്ചു വരും. പിന്നീട് എന്തെങ്കിലും സിനിമ കാണണം എന്ന് വിചാരിക്കുന്നു.

നിങ്ങൾ എവിടം വരെയായി? ♥️🫂

13/06/2026

പല മാതാപിതാക്കളുടെയും ഒരു തെറ്റിദ്ധാരണ അവരുടെ കുട്ടികൾ അവരുടെ ജീവിതത്തിൽ നടക്കുന്ന "എല്ലാ" പ്രധാനപ്പെട്ട കാര്യങ്ങളെക്കുറിച്ചും അവരോട് പറയുന്നുണ്ട് എന്നാണ്. സത്യം പറഞ്ഞാൽ ഇതുപോലൊരു മണ്ടത്തരം വേറെയില്ല.

മാതാപിതാക്കൾ ഇതിനു പറയുന്ന ഒരു ലോജിക്ക്, ഞാൻ എന്റെ കുട്ടിയോട് വളരെ ഫ്രണ്ട്ലിയാണ്, എന്റെ കുട്ടിയും എന്നോട് വളരെ ഫ്രണ്ട്ലിയാണ്, ഞങ്ങൾ കൂട്ടുകാരെ പോലെയാണ്, ഞങ്ങൾ എല്ലാ കാര്യം ഡിസ്കസ് ചെയ്യാറുണ്ട് എന്നതാണ്.

ഇതു വായിക്കുന്ന പല മാതാപിതാക്കളും ഓൾറെഡി അങ്ങനെ ചിന്തിച്ചു കഴിഞ്ഞു എന്നും എനിക്കറിയാം. "ഡെന്നിസിന് ഞാനും എന്റെ കുട്ടിയും തമ്മിലുള്ള ബന്ധം അറിയാഞ്ഞിട്ടാണ്", എന്ന മട്ടിൽ! ❤️

കുട്ടികളുമായി ഒരുമിച്ച് Snapchat ഫോട്ടോയെടുത്തത് കൊണ്ടോ, ദിവസം മൂന്നുനേരം അവരുമായി ഫോണിൽ സംസാരിച്ചത് കൊണ്ടോ, അവർ ഓപ്പോസിറ്റ് ജൻഡറിനെ കുറിച്ച് നിങ്ങളോട് സംസാരിക്കുന്നത് കൊണ്ടോ, നിങ്ങളുടെ ഭാര്യയുമായി അല്ലെങ്കിൽ ഭർത്താവുമായുള്ള നിങ്ങളുടെ പിണക്കങ്ങൾ നിങ്ങളുടെ മക്കളുമായി സംസാരിക്കുന്നത് കൊണ്ടോ, അവർ നിങ്ങളോട് അവരുടെ ജീവിതത്തിൽ നടക്കുന്ന എല്ലാം തന്നെ പറയണമെന്നില്ല.

അല്ല, പറയില്ല!

നിങ്ങൾക്ക് പക്ഷേ അങ്ങനെ തോന്നുന്നുണ്ടെങ്കിൽ കുട്ടികൾ സമർത്ഥരായതുകൊണ്ടാണ്. സമർത്ഥരാണ് എന്ന് ഞാൻ പറയുമ്പോൾ ഒരു നെഗറ്റീവ് സെൻസിൽ അല്ല ഞാൻ പറയുന്നത് എന്ന് കൂടി അറിയണം.

അവർ നമ്മളോട് എല്ലാം പറയുന്നുണ്ട് എന്ന് നമുക്ക് തോന്നാൻ വേണ്ടി അവർ കുറച്ചു ടോപ്പിക്കുകൾ നമ്മൾക്ക് ഇട്ടുതരും. ആ ടോപ്പിക്കുകളിൽ നമ്മുടെ ഉപദേശം അവർ തേടും. നമ്മൾ ഒരിക്കൽ കുട്ടികളായിരുന്നപ്പോൾ നമ്മുടെ മാതാപിതാക്കളോട് സംസാരിക്കാത്ത "ടോപ്പിക്കുകൾ" ആകും അത്. അപ്പോൾ നമ്മൾ വിചാരിക്കും കൊള്ളാമല്ലോ എന്റെ കുട്ടി എന്നോട് എന്തുമാത്രം ട്രാൻസ്പരന്റ് ആണെന്ന്!

സത്യത്തിൽ ഇതിൽ വലിയ അത്ഭുതപ്പെടേണ്ട കാര്യമൊന്നുമില്ല. നമ്മൾ അവരുടെ പ്രായത്തിൽ ആയിരുന്നപ്പോൾ നമ്മൾ എന്തൊക്കെ കാര്യങ്ങൾ മാതാപിതാക്കളോട് പറയാതിരുന്നിട്ടുണ്ട്?

നമ്മുടെ മാതാപിതാക്കൾ അന്ന് നമ്മളെക്കുറിച്ച് കരുതിയത് നമ്മൾ ഇപ്പോൾ നമ്മുടെ മക്കളെ കുറിച്ച് കരുതുന്നു. അത്രയുമേയുള്ളൂ!

പക്ഷേ ഇതിൽ മണ്ടത്തരം ഒളിഞ്ഞിരിക്കുന്നത് നമ്മളോട് നമ്മുടെ മാതാപിതാക്കൾ ഫ്രണ്ട്ലി ആയിരുന്നതിനേക്കാൾ കൂടുതൽ നമ്മൾ നമ്മുടെ കുട്ടികളോട് ഫ്രണ്ട്ലി ആയതുകൊണ്ട്, നമ്മൾ അന്ന് നമ്മുടെ മാതാപിതാക്കളോട് പറഞ്ഞതിനേക്കാൾ കൂടുതൽ നമ്മുടെ മക്കൾ ഇന്ന് നമ്മളോട് പറയും എന്ന് ചിന്തിക്കുന്നതാണ്!

അതാണ് മണ്ടത്തരം.

ഞാൻ തുറന്നു പറയാം. നമ്മുടെ മക്കൾക്ക് നമ്മളറിയാത്ത ലോകങ്ങളുണ്ട്. നാളെ അവരുടെ മക്കൾക്ക് അവരറിയാത്ത ലോകങ്ങളും ഉണ്ടാകും!ഇത് തിരിച്ചറിയുമ്പോൾ ആണ് നമ്മൾ വിവേകികളായ മാതാപിതാക്കളായി മാറുന്നത്.

നിങ്ങളുടെ രണ്ടു കണ്ണുകളും വേണ്ടയിടത്തു നിങ്ങളുടെ രണ്ട് കണ്ണുകളും വേണം. കുട്ടികളോട് ഫ്രണ്ട്‌ലി ആക്കുക എന്നുള്ളത് കാലഘട്ടത്തിന്റെ ഒരു രീതി മാത്രമാണ്. അതു വളരെ നല്ലതാണ്. പല കാര്യങ്ങളെക്കുറിച്ച് നിങ്ങളോട് തുറന്നു സംസാരിക്കാൻ കുട്ടിക്ക് അത് ധൈര്യം നൽകും.

പക്ഷേ നിങ്ങളോട് അവരുടെ ജീവിതത്തിൽ നടക്കുന്ന എല്ലാം ഷെയർ ചെയ്യും എന്നുള്ള ഒരു ഗ്യാരണ്ടി അല്ല അത്.

പ്രൈവസി അവർക്കും വേണ്ടതാണ്. അത് നിങ്ങൾക്ക് പറ്റാവുന്ന പോലെ, അവർക്ക് വേണ്ടതുപോലെ അനുവദിച്ചും കൊടുക്കുക.

അവർ നിങ്ങളോട് കഥകൾ പറയുമ്പോൾ ചിരിച്ചുകൊണ്ട് കേൾക്കുക. എന്നാൽ അവർ പറയാത്ത കഥകൾ ഉണ്ടെന്നും നിങ്ങൾ അറിഞ്ഞിരിക്കുക.

ഉപ്പും, ഉപ്പിലിട്ടതും രണ്ടാണ്! ❤️❤️

Denis Arackal ©
ᵗʰᵉ ᵏᵉᵉᵖᵉʳ ᵒᶠ ˢᵐᵃˡˡ ᵗʰⁱⁿᵍˢ

10/06/2026

നിങ്ങൾ ഇവിടം വരെ എത്തിയത് വെറുതെയല്ല!

റോഡിൽ ആരും നിങ്ങളെ തിരിച്ചറിയാനിലെങ്കിലും, നിങ്ങളുടെ ജന്മ ദിവസം രാത്രി പന്ത്രണ്ടു മണിക്ക് നിങ്ങളെ ഉറക്കത്തിൽ നിന്നുമുണർത്തി "ഹാപ്പി ബെർത്ഡേയ്" ആരും പറയുന്നില്ലെങ്കിലും, നിങ്ങൾ പാർക്ക് ബഞ്ചിൽ സന്ധ്യമയങ്ങുമ്പോൾ കുറച്ചു നേരം കൂടുതൽ ഇരുന്നാലും കുറച്ചിരുന്നാലും അതാരും ശ്രദ്ധിക്കുന്നില്ലയെങ്കിലും, നിങ്ങൾ ലീവിലായിരുന്നപ്പോൾ നിങ്ങളുടെ ജോലിസ്ഥലത്തും നിന്നും അത്യാവിശ്യമായി ഒരു ഫോൺകാൾ പോലും നിങ്ങളെ തേടി വരാതിരുന്നാലും, രാഷ്ട്രീയക്കാർ പോലും, ലൈഫ് ഇൻഷുറൻസുകാർ പോലും, നിങ്ങളെ നോക്കി ചിരിക്കാതിരുന്നാലും, നിങ്ങൾ ദേ, ഇവിടെ സത്യമായും ജീവിച്ചിരിക്കുന്നു!

നമ്മളൊക്കെ ഉണ്ട്!

ഗോൾഡ്‌ലോണെടുത്തും, ഇടയ്ക്കിടെ മറ്റൊരു തേയില ബ്രാൻഡ് മാറ്റി ഒന്ന് ഉപയോഗിച്ച് നോക്കിയും, ചില പെട്രോൾ ബങ്കിൽ നിന്നും പെട്രോൾ അടിക്കുമ്പോൾ കുറച്ചു പെട്രോൾ മാത്രമേ കിട്ടുന്നുള്ളോ എന്ന് ശങ്കിച്ച് കൊണ്ടും, വാഷിംഗ് മെഷീനിലെ തുണിയെടുത്തുവിരിക്കുന്നതു പിന്നീടാകാമെന്നു കുറ്റബോധത്തോടെ ഓർത്തുകൊണ്ടും, നമ്മളൊക്കെ ഇവിടെത്തന്നെയൊക്കെയുണ്ട്..

നമ്മളൊക്കെ ഇവിടം വരെയെത്തിയത് വെറുതെയല്ല! നമ്മളും ഈ ലോകത്തുണ്ട്!

അതെ, നമ്മളൊക്കെ ഉണ്ട്, ദേ, അവിടെയും ഇവിടെയുമൊക്കെ നിറച്ചുമുണ്ട്!

നിങ്ങളും ഞാനും!

Denis Arackal ©
ᵗʰᵉ ᵏᵉᵉᵖᵉʳ ᵒᶠ ˢᵐᵃˡˡ ᵗʰⁱⁿᵍˢ

09/06/2026

ചില നമ്പറുകൾ വിളിക്കാനുള്ളതല്ല.

നിങ്ങളുടെയോ അവരുടെയോ കുഴപ്പം കൊണ്ടല്ല - പക്ഷെ മറ്റു പല കാരണങ്ങൾ കൊണ്ട് നിങ്ങളുടെ ഓർമ്മകളിൽ മാത്രം ജീവിക്കാനുള്ളവർ, കോൺടാക്ട് ലിസ്റ്റിൽ മാത്രം നിലനിൽക്കേണ്ടവർ.

നിങ്ങളുടെ മനസ്സിനറിയാമത്, ഹൃദയത്തെ വിശ്വസിപ്പിക്കാനാണ് പ്രയാസം.

Denis Arackal ©
ᵗʰᵉ ᵏᵉᵉᵖᵉʳ ᵒᶠ ˢᵐᵃˡˡ ᵗʰⁱⁿᵍˢ

08/06/2026

ഒന്നാം നിര താരങ്ങൾ മരിച്ചുപോകുമ്പോൾ അല്ല നമുക്ക് സിനിമയിൽ വലിയ കുറവ് വന്നെന്നു തോന്നുക.

അത് തോന്നുക നമ്മുടെ കൂടെ ഏതോ ഒരു ചെറിയ ചായക്കടയിൽ ഇരുന്ന് ചായ കുടിച്ചു കൊണ്ടിരുന്ന, നമ്മളെപ്പോലെയൊക്കെ ഇരിക്കുന്ന സാധാരണക്കാരിൽ സാധാരണക്കാരനായിരുന്ന ഒരു താരം, നമ്മെ വിട്ടു പോകുമ്പോഴാണ്.

എനിക്ക് ആദ്യമായി അങ്ങനെ തോന്നിയത് ശങ്കരാടി മരിച്ചു പോയപ്പോഴാണ്. അതുപോലെ ഒടുവിലുണ്ണികൃഷ്ണനും, കൊച്ചിൻ ഹനീഫയും, മാമുക്കോയയും, പറവൂർ ഭരതനും, ബോബി കൊട്ടാരക്കരയും, കൃഷ്ണൻകുട്ടി നായരും ഒക്കെ പോയിക്കഴിഞ്ഞപ്പോൾ നാട്ടുംപുറത്തെ ചായക്കട നിശബ്ദമായി..

ഉച്ചത്തിലുള്ള പത്രം വായന ഇനിയില്ല. പണപ്പെട്ടിക്ക് മുകളിലായിരുന്നു പിറുപിറുക്കുന്ന റേഡിയോ ഇനി ശബ്ദിക്കില്ല. പുകയുന്ന അടുക്കളയും, വെട്ട് കേക്കും, ബോളിയും, ഉണ്ണിയപ്പവും നിറഞ്ഞ ഗ്ലാസ് അലമാരയും ഇതാ കാലിയായിരിക്കുന്നു.

ഓരോരുത്തരായി അവരെല്ലാം പോയിക്കഴിഞ്ഞു. ഒഴിഞ്ഞുകിടക്കുന്ന ബെഞ്ചുകളിൽ നമ്മൾ മാത്രം തനിച്ചായതുപോലെ...

ഇപ്പോൾ ഇതാ പ്രിയപ്പെട്ട സലിംകുമാറും യാത്രയായിരിക്കുന്നു.

കുട്ടിക്കാലത്തും യൗവന കാലത്തും നമ്മെ ചിരിപ്പിച്ചവർ നമ്മെ വിട്ടു പോകുമ്പോൾ, നമ്മൾ പെട്ടെന്ന് ഈ ലോകത്ത് ഒറ്റപ്പെട്ടതുപോലെ. നമ്മളെല്ലാം നമ്മളറിയാതെ വളർന്നു വലിയവരായിരിക്കുന്നു...

വ്യക്തിപരമായി അവരൊന്നും നമ്മുടെ ആരുമായിരുന്നില്ല. പക്ഷേ അവർ അവതരിപ്പിച്ച ആ കഥാപാത്രങ്ങൾ ഒക്കെ നമ്മളിൽ ഒരാളായിരുന്നു. അതുകൊണ്ടാണ് അവർ മരിച്ചുപോകുമ്പോൾ നമ്മളിൽ ഒരാൾ മരിച്ചു പോയതായി നമുക്ക് തോന്നുന്നത്...

അതേ! നമ്മളിൽ ഒരാൾ തന്നെയാണ് മരിച്ചു പോയിരിക്കുന്നത്.

പ്രിയപ്പെട്ട നടൻ സലിം കുമാറിന് വിട.

Denis Arackal ©
ᵗʰᵉ ᵏᵉᵉᵖᵉʳ ᵒᶠ ˢᵐᵃˡˡ ᵗʰⁱⁿᵍˢ

07/06/2026

ഞങ്ങടെ വീടിന് അടുത്ത് ഒരു ജോൺസൺ സാർ ഉണ്ടായിരുന്നു. നല്ല ഒരു മലയാളം അധ്യാപകനായിരുന്നു അദ്ദേഹം. എന്റെ അച്ഛനുമായി നല്ല ബന്ധത്തിലുമായിരുന്നു. സത്യം പറഞ്ഞാൽ നാട്ടിലെല്ലാവരും ആയി അദ്ദേഹത്തിനു നല്ല ബന്ധമായിരുന്നു. ഇതുപോലെ സൗമ്യനായ, ദൈവവിശ്വാസിയായ ഒരു മനുഷ്യനെ, ഞാൻ ഇതുവരെ കണ്ടിട്ടില്ല.

സ്വന്തമായി ഒരു കാവ്യസമാഹാരം പ്രസിദ്ധീകരിച്ച അദ്ദേഹം, ഒരിക്കൽ എന്റെ വീട്ടിൽ വന്നിരുന്നു ആ പുസ്തകത്തിലെ ചില കവിതകൾ അച്ഛനെ ചൊല്ലി കേൾപ്പിക്കുന്നത്, അന്ന് ഞാൻ അത്ഭുതത്തോടെ കേട്ടിരുന്നത് ഇപ്പോൾ ഇവിടെ ഓർക്കുന്നു.

( ഡെനിസ് അറക്കൽ എഴുതുന്നു...)

പക്ഷേ ഇത്രയും നല്ല ഒരു മനുഷ്യനായ അദ്ദേഹത്തിന്, അത്രയും മോശമായ മക്കളായിരുന്നു. ആൺമക്കൾ ഒക്കെ നാട്ടിൽ അടിപിടിയും പ്രശ്നങ്ങളും. അവരെപ്പറ്റി അദ്ദേഹം ഒരുപാട് വേദനിച്ചിരുന്നു. വേണ്ടപോലെ ശാസിച്ചും ലാളിച്ചും സ്നേഹിച്ചും ഒക്കെ തന്നെയാണ് അദ്ദേഹം മക്കളെ വളർത്തിയത്. പക്ഷേ അദ്ദേഹത്തിന് എവിടെ പിഴച്ചു പോയെന്ന്, തെറ്റിപ്പോയെന്ന്, അദ്ദേഹം എന്റെ അച്ഛനോട് പരിതപിക്കുന്നത് ഞാൻ കേട്ടിട്ടുണ്ട്...

പല മാതാപിതാക്കളും വേദനയോടു കൂടി ഉള്ളിൽ ചോദിക്കുന്ന ഒരു ചോദ്യം, "ഞങ്ങളുടെ വളർത്തുദോഷം കൊണ്ടാണോ ഞങ്ങളുടെ കുട്ടികൾ ഇങ്ങനെയായിപ്പോയത്? സ്നേഹിച്ചും ശാസിച്ചും ശിക്ഷിച്ചും ഒക്കെ തന്നെയല്ലേ ഞങ്ങൾ കുട്ടികളെ വളർത്തിയത്? മാതൃകയായി കാണിക്കേണ്ടത് എല്ലാം തന്നെ ഞങ്ങളുടെ ജീവിതം കൊണ്ട് കാണിച്ചിട്ടില്ലേ? പിന്നെ എന്താണ് ഞങ്ങളുടെ മക്കൾ ഇങ്ങനെ ചീത്തയായി പോയത്?" ഈയൊരു ചോദ്യം പല മാതാപിതാക്കളുടെ മനസ്സിൽ തുടരെ തുടരെ വരുന്നതാണ്...

എന്നാൽ ഇന്ന് ഞാൻ മനസ്സിലാക്കുന്ന ഒരു സത്യമുണ്ട്...

മാതാപിതാക്കൾ തിരിച്ചറിയേണ്ട ഒരു കാര്യം എന്തെന്ന് വെച്ചാൽ വേണ്ടവിധത്തിൽ സ്നേഹിച്ചും, ശാസിച്ചും, ശിക്ഷിച്ചും, മാതൃകയായി നിന്ന്
നിന്നും കുട്ടികളെ വളർത്തിയാൽ അവരെ നല്ല പൗരന്മാരാക്കാനുള്ള അല്ലെങ്കിൽ മനുഷ്യരാക്കാനുള്ള "സാധ്യത" കൂടുമെന്നേയുള്ളൂ. അവർ നല്ല മനുഷ്യരായി വളരണമെന്ന് യാതൊരു നിർബന്ധവുമില്ല.

നിങ്ങൾക്ക് പറ്റാവുന്ന വിധത്തിൽ നന്മകൾ പറഞ്ഞുകൊടുത്തും, മാതൃകയായി നിന്നും നിങ്ങൾ നിങ്ങളുടെ കുട്ടികളെ വളർത്തിയിട്ടുണ്ടെങ്കിൽ, നിങ്ങടെ മക്കൾ, നല്ല മനുഷ്യരായി തീരാത്തതിനുള്ള ഉത്തരവാദിത്വം നിങ്ങളുടെ അല്ല. നിങ്ങളല്ല അതിന്റെ കുറ്റം ചുമക്കേണ്ടത്. എന്തുകൊണ്ട് ഇങ്ങനെ സംഭവിച്ചു എന്ന് ചിന്തിച്ച് നിങ്ങൾ വലയേണ്ടതില്ല...❤️

നിങ്ങൾ നിങ്ങളുടെ വീട് എത്ര വൃത്തിയായി സൂക്ഷിച്ചു അവരെ കാണിച്ചു കൊടുത്താലും, അവർ വൃത്തി പഠിക്കണം എന്നില്ല. നിങ്ങൾ കള്ളുകുടിച്ച് വീട്ടിൽ വന്ന് ഭാര്യയെ തല്ലിയിട്ടില്ല എന്നുണ്ടെങ്കിൽ, നിങ്ങളുടെ മക്കൾ കള്ളുകുടിച്ചു വന്നു ഭാര്യയെ തല്ലില്ല എന്നതിന് ഒരു ഉറപ്പുമില്ല...

ഇതൊരു സത്യമാണ്...

ഒരു പുതിയ ഫ്രിഡ്ജ്, കാറോ, ടി വി യോ വാങ്ങുമ്പോൾ അതിന്റെ കൂടെ അതിന്റെ ഇൻസ്ട്രക്ഷൻ മാനുവൽ കിട്ടും. അങ്ങനെ " കുട്ടികളെ എങ്ങനെ വളർത്താം" എന്ന ഒരു ഇൻസ്ട്രക്ഷൻ മാനുവൽ മാതാപിതാക്കൾ ആവുമ്പോൾ നമുക്ക് ആർക്കും കിട്ടുന്നില്ല. നമ്മുടെ അറിവിനും പക്വതയ്ക്കും യോജിച്ച രീതിയിൽ, നമുക്കറിയാവുന്ന പോലെ, നമ്മൾ കുട്ടികളെ വളർത്തുന്നു. നമ്മുടെ മാതാപിതാക്കളിൽ നിന്ന് നമ്മൾ കണ്ട കുറവുകൾ മക്കൾക്ക് നമ്മൾ വരുത്താതെ നോക്കുന്നു.

അതുമതി...

പ്രായപൂർത്തിയായ മക്കളുടെ ജീവിതം ഒരു വ്യക്തിയെന്ന രീതിയിൽ അവരുടെ ഉത്തരവാദിത്തമാണ്. അതിനു നിങ്ങൾ നിങ്ങളെ കുറ്റപ്പെടുത്തുകയോ, അവർ നിങ്ങളെ കുറ്റപ്പെടുത്തിയോ ചെയ്യുന്നത് തികച്ചും മണ്ടത്തരമാണ്...

നിങ്ങൾ എത്ര നന്നായി വളർത്തിയാലും നിങ്ങടെ മക്കൾ നല്ലതാകും എന്നതിന് ഒരു ഗ്യാരണ്ടിയും ഇല്ല. അങ്ങനെ വളർത്തിയാൽ അതിനുള്ള ചാൻസ് നിങ്ങൾക്ക് കൂട്ടാൻ സാധിക്കും. അതുകൊണ്ട് ചെയ്യാൻ പറ്റുന്ന രീതിയിൽ ചെയ്യുക...

അത്രയുമേ ഉള്ളൂ....❤️❤️

ഭഗവാൻ കൃഷ്ണനെപ്പോലെ യുദ്ധം എങ്ങനെ വേണമെന്ന് ഉപദേശിക്കാനേ നിങ്ങൾക്ക് പറ്റുകയുള്ളൂ. യുദ്ധം ചെയ്യേണ്ടത് അർജുനനാണ്...

യഥാർത്ഥത്തിൽ അത് അർജുനന്റെ മാത്രം യുദ്ധമാണ്. അതിന്റെ ഭവിഷത്തുകൾ അനുഭവിക്കേണ്ടത് അർജുനനാണ്...

നിങ്ങൾ തേര് തെളിയിച്ചാൽ മതി...

നിങ്ങൾക്ക് എന്തു തോന്നുന്നു? മക്കൾ വഴിപിഴച്ചു പോകുന്നതിൽ മാതാപിതാക്കൾക്ക് ഒട്ടും പങ്കില്ലെന്ന് പറയാൻ ആകുമോ? അതോ പലതും അവരുടെ കയ്യിൽ അല്ലേ?

പറയാമോ? ❤️

"ജീവിതത്തിലെ ചെറിയ വലിയ കാര്യങ്ങളെക്കുറിച്ചുള്ള കൂടുതൽ കുറിപ്പുകൾ വായിക്കാൻ ഈ പേജ് ഫോളോ ചെയ്യാൻ മറക്കണ്ട."

Denis Arackal ©
ᵗʰᵉ ᵏᵉᵉᵖᵉʳ ᵒᶠ ˢᵐᵃˡˡ ᵗʰⁱⁿᵍˢ

Denis Arackal

19/06/2026

18/06/2026

16/06/2026

14/06/2026

14/06/2026

13/06/2026

10/06/2026

09/06/2026

08/06/2026

07/06/2026

Address

Website

Alerts

Contact The Business

Shortcuts

Share

Category

Listing takedown request