Evergreen media, Kochi (2026)

16/03/2026

മഞ്ചേശ്വരത്ത് താമര വിരിയുമോ...!

28/02/2026

നിലവിൽ എന്നെ ഏറ്റവും അത്ഭുതപ്പെടുത്തി കൊണ്ടിരിക്കുന്ന വ്യക്തിയാണ് എം വി ഗോവിന്ദൻ മാഷ്. ഇദ്ദേഹം ഈ കാലഘട്ടത്തിൽ തന്നെയാണോ ജീവിക്കുന്നത് എന്ന് തോന്നി പോകും. ഏറ്റവും കുറഞ്ഞത് ഈ കാലഘട്ടത്തിൽ ജീവിച്ചു പോരുന്ന ആത്മാർത്ഥ സുഹൃത്തുകൾ എങ്കിലും ഇദ്ദേഹത്തിന് ഉണ്ടായിരുന്നെങ്കിൽ എന്ന് ആഗ്രഹിച്ചു പോകുകയാണ്.

പൊതുവിൽ സി പി എമ്മിന് അനുകൂലമായി നിൽക്കുന്ന ഒരു കാര്യത്തിൽ ഇദ്ദേഹം പത്ര സമ്മേളനം നടത്തിയാൽ അതും കയ്യിൽ നിന്ന് പോകുന്ന അവസ്ഥയാണ്. വീണ ജോർജിന്റെ കേസ് തന്നെ എടുക്കാം. ഒരിക്കലും ഒരു വിദ്യാർത്ഥി സംഘടനയുടെ ഭാഗത്ത് നിന്ന് ഉണ്ടാകാൻ പാടില്ലാത്ത ഒരു പ്രതിഷേധം ആയിരുന്നു കെ എസ് യൂവിന്റെ ഭാഗത്ത് നിന്നുണ്ടായത്. സ്വാഭാവികമായും സി പി എമ്മിന് അനുകൂലമാകേണ്ട ഒരു വിഷയം ആയിരുന്നു ഇത്. കെ എസ് യൂക്കാർ അപ്രതീക്ഷിതമായി പാഞ്ഞടുത്തു വന്നപ്പോൾ പോലീസിന്റെ പ്രതിരോധവും മറ്റുമായുള്ള തിക്കും തിരക്കിലും പെട്ട് മന്ത്രിക്ക് പരിക്ക് പറ്റി എന്ന് പാർട്ടി സെക്രട്ടറി ഒരു പ്രസ്താവന നടത്തിയിരുന്നെങ്കിൽ പന്ത് ഇപ്പോഴും സിപിഎമ്മിന്റെ കോർട്ടിൽ കിടക്കുമായിരുന്നു. എന്നാൽ സംഭവിച്ചതോ, മലയാളികൾ മുഴുവൻ ലൈവ് ആയി കണ്ട് കൊണ്ടിരുന്ന കാര്യത്തെ കുറിച്ച് കേട്ടാൽ മൂക്കത്ത് വിരൽ വെച്ചു പോകുന്ന പ്രസ്താവനയാണ് ഇദ്ദേഹം നടത്തിയത്. മന്ത്രിയുടെ കയ്യും കഴുത്തും പിടിച്ച് തിരിച്ചെന്നൊക്കെ ഗോവിന്ദൻ മാഷ് സ്വത്വ സിദ്ധമായ ശൈലിയിൽ പറയുമ്പോൾ കേട്ടിരുന്നവരുടെ തൊലി ഉരിഞ്ഞു പോയിട്ടുണ്ടാകും. ശരിക്കും മന്ത്രി വീണാ ജോർജിന് ഒരു കോമാളി ഇമേജ് നൽകാൻ പ്രധാന കാരണമായി മാറിയത് ഇദ്ദേഹത്തിന്റെ പ്രസ്താവനകളായിരുന്നു. സ്വന്തം കോർട്ടിലുള്ള പന്ത് ഒരാവശ്യവുമില്ലാതെ എതിർ കോർട്ടിലേക്ക് പാസ്സ് ചെയ്യുന്ന പണിയാണ് ഇദ്ദേഹം എടുത്തത്. പുതിയ കാലഘട്ടത്തിൽ അനുകൂലമായ ഒരു സാഹചര്യത്തിൽ എങ്ങനെയാണ് ഓവറാക്കാതെ രംഗം കയ്യടക്കേണ്ടത് എന്ന് പാർട്ടി സെക്രട്ടറിക്ക് ആരെങ്കിലും ക്ലാസ് എടുത്ത് കൊടുക്കണം. അല്ലെങ്കിൽ ഇനിയും ഇതുപോലെ വെളുക്കാൻ തേച്ചതൊക്കെ പാണ്ടായി മാറും...

27/02/2026

നടന്‍ ടിനി ടോമിന്‍റെ മകൻ കഞ്ചാവുമായി പിടിയിൽ: പിടികൂടിയത് ക്ഷേത്ര പരിസരത്തു നിന്ന്

നടന്‍ ടിനി ടോമിന്‍റെ മകൻ ആദം ഷീം കഞ്ചാവുമായി പിടിയിൽ. കൊച്ചി തൃപ്പൂണിത്തുറയില്‍നിന്നാണ് ടിനി ടോമിന്റെ മകനെ പിടികൂടിയത്.

ഇയാൾക്ക് ഒപ്പം കാര്‍ത്തിക്, അമിത് ജോര്‍ജ് എന്നിവരെയും പോലീസ് പിടികൂടി. ഇവരിൽ നിന്നും നാല് ഗ്രാം കഞ്ചാവ് പൊലീസ് പിടിച്ചെടുത്തു.

ഈ മാസം 22നാണ് മൂവരെയും തൃപ്പൂണിത്തുറ ഹില്‍പാലസ് പൊലീസ് അറസ്റ്റ് ചെയ്തത്. തിരുവാങ്കുളത്തെ ഒരു ക്ഷേത്ര പരിസരത്തു നിന്നാണ് മൂവരും പിടിയിലായത്. ഇവരെ സ്റ്റേഷന്‍ ജാമ്യത്തില്‍ വിട്ടയച്ചു.

20/02/2026

"സ്റ്റെപ്പ് ഇറങ്ങാൻ ലാൽ സഹായിക്കുകയാണ് ചെയ്തത്, കൈ വച്ചത് തള്ളുന്നതാക്കി: പതിറ്റാണ്ടുകളായുള്ള തങ്ങളുടെ ബന്ധത്തിൽ ഒരു മൺതരിയുടെ അത്ര പോലും അഭിപ്രായവ്യത്യാസം ഉണ്ടായിട്ടില്ല": വിവാദങ്ങളിൽ പ്രതികരിച്ചു എസ്.എൻ. സ്വാമി

ബി. ഉണ്ണികൃഷ്ണൻ സംവിധാനം ചെയ്യുന്ന 'പ്രതിച്ഛായ' എന്ന ചിത്രത്തിന്റെ ട്രെയിലർ ലോഞ്ചിനിടെ നടൻ മോഹൻലാൽ തന്നോട് മോശമായി പെരുമാറി എന്ന തരത്തിൽ സോഷ്യൽ മീഡിയയിൽ പ്രചരിക്കുന്ന വാർത്തകളിൽ പ്രതികരിച്ചു തിരക്കഥാകൃത്ത് എസ്.എൻ. സ്വാമി.

സോഷ്യൽ മീഡിയയിൽ പ്രചരിക്കുന്ന വാർത്തകൾ അടിസ്ഥാനരഹിതമാണെന്നും കേവലം റീച്ചിന് വേണ്ടി ഇത്തരം വാർത്തകൾ പ്രചരിപ്പിക്കരുതെന്നും എസ് എൻ സ്വാമി പറഞ്ഞു.

ചടങ്ങിൽ നിന്ന് മടങ്ങുന്നതിനിടെയുണ്ടായ തിരക്കിലെ ദൃശ്യങ്ങൾ മനഃപൂർവം എഡിറ്റ് ചെയ്തും ഫ്രെയിമുകൾ മാറ്റിയും ദുർവ്യാഖ്യാനം ചെയ്താണ് പ്രചരിപ്പിക്കുന്നത്.

സ്റ്റെപ്പുകൾ ഇറങ്ങാൻ മോഹൻലാൽ തന്നെ സഹായിക്കുകയാണ് ചെയ്തതെന്നും സ്വാമി പറഞ്ഞു

‘സ്വാമി ഞാനൊന്ന് പൊക്കോട്ടെ’ എന്ന് മോഹൻലാൽ തന്നോട് സ്നേഹത്തോടെ ചോദിച്ച കാര്യമാണ്. ഇതാണ് വിവാദമാക്കിയത് എന്നും അദ്ദേഹം കൂട്ടിച്ചേർത്തു.

ക്യാമറയുമായി തിക്കിത്തിരക്കി വന്നവരോടാണ് മോഹൻലാൽ ബാക്കി കാര്യങ്ങൾ പറഞ്ഞതെന്നും അദ്ദേഹം പറയുന്നു.

പതിറ്റാണ്ടുകളായുള്ള തങ്ങളുടെ ബന്ധത്തിൽ ഒരു മൺതരിയുടെ അത്ര പോലും അഭിപ്രായവ്യത്യാസം ഉണ്ടായിട്ടില്ല എന്നും അദ്ദേഹം വ്യക്തമാക്കി.

20/02/2026

ഓ ടി ടിയിൽ കൂടുതൽ പരിക്കുകളേൽക്കാതിരിക്കാൻ കരുതലുമായി ചത്താപച്ചാ ടീം. തിയേറ്ററിൽ ഏറ്റവും കൂടുതൽ വിമർശനം ഉയർന്നത് കാമിയോ റോളിലെത്തിയ മമ്മൂട്ടിയുടെ വാൾട്ടർ എന്ന കഥാപാത്രത്തിന്റെ ഡയലോഗ് ഡെലിവറിക്കായിരുന്നു. സിങ്ക് സൗണ്ടിലുള്ള മമ്മൂട്ടിയുടെ ഡയലോഗ് ഡെലിവറിയിലെ അപാകത സിനിമയുടെ വാണിജ്യ വിജയത്തെ തന്നെ ബാധിച്ചിരുന്നു. ഓ ടി ടി റിലീസിലും സമാന വിമർശനം ഒഴിവാക്കാൻ വാൾട്ടറിന് റീഡബ്ബിങ് നടത്തിയിരിക്കുകയാണ് അണിയറ പ്രവർത്തകർ. ഇതോടെ ഡയലോഗ് ഡെലിവറിയിലുണ്ടായ അപാകത ഒരു പരിധി വരെ ഓ ടി ടിയിൽ മറി കടക്കാൻ സാധിച്ചത് മമ്മൂട്ടി ആരാധകർക്കും വലിയ ആശ്വാസമായി...

20/02/2026

പപ്പ രാഷ്ട്രീയത്തിൽ നിന്ന് ഒരു രൂപ പോലും സമ്പാദിച്ചിട്ടില്ല :- ഷോൺ ജോർജ്

19/02/2026

പി കെ ശശി കെ ടി ഡി സി ചെയർമാൻ സ്ഥാനം രാജി വെച്ചു. സിപിഎം മുൻ എം എൽ ഏയും പാർട്ടിയുടെ പാലക്കാടൻ മുഖവുമായിരുന്ന പി കെ ശശി പീഡന വിവാദത്തിൽ പെട്ടതോടെ പൊളിറ്റിക്കൽ ഗ്രാഫിൽ നന്നേ താഴെ പോയിരുന്നു. നിലവിൽ സി പി എമ്മുമായി അത്ര നല്ല ബന്ധത്തിൽ അല്ലാത്ത പി കെ ശശി വരുന്ന തിരഞ്ഞെടുപ്പിൽ സ്വന്തമായി പാർട്ടിയുണ്ടാക്കി യു ഡി എഫ് സ്വാതന്ത്രനായി പാലക്കാട്‌ മത്സരിക്കുമെന്നാണ് സൂചന..

19/02/2026

വിധി മാറ്റിയെഴുതിയ ആ നിഷ്കളങ്ക ചിരി: അരുണിന്റെ അതിജീവന കഥ...

ജീവിതത്തിന്റെ കഠിനവഴികളിൽ തളർന്നുപോയേക്കാവുന്ന ഒരു ബാല്യത്തെ, ഒരൊറ്റ നിമിഷം കൊണ്ട് പ്രകാശമാനമാക്കാൻ ഒരു പുഞ്ചിരിക്ക് കഴിയുമെന്ന് അരുൺ നമുക്ക് കാട്ടിത്തന്നു. ലോറിയുടെ ആക്രോശങ്ങൾക്കും കരിപുരണ്ട ക്ലീനർ ജോലിക്കുമിടയിൽ ആ പയ്യൻ വിരിയിച്ച ആ ചിരി ഇന്ന് വെറുമൊരു വൈറൽ വീഡിയോ മാത്രമല്ല; അതൊരു വലിയ സ്വപ്നത്തിന്റെ തുടക്കമായിരുന്നു.

കരിപുരണ്ട കൈകളും വിടർന്ന സ്വപ്നങ്ങളും.....
👇
ദാരിദ്ര്യം എന്ന വില്ലൻ നാലാം ക്ലാസ്സിൽ വെച്ച് അരുണിന്റെ പുസ്തകത്താളുകൾ മടക്കിവെപ്പിച്ചു. പഠിക്കേണ്ട പ്രായത്തിൽ ഉപജീവനത്തിനായി അവൻ ക്ലീനർ വേഷമണിഞ്ഞു. ഡ്രൈവർ നെഹ്റു അണ്ണന്റെ തമാശ കേട്ട് അരുൺ പൊട്ടിച്ചിരിച്ച ആ നിമിഷം ആരോ ക്യാമറയിൽ പകർത്തുമ്പോൾ, അതവന്റെ ജീവിതം തന്നെ മാറ്റിമറിക്കുമെന്ന് ആരും കരുതിയില്ല.

ആ ചിരിക്ക് പിന്നിൽ മറഞ്ഞുകിടന്നത് കണ്ണീരിന്റെയും കഷ്ടപ്പാടിന്റെയും കഥയായിരുന്നു. എന്നാൽ നെഹ്റു അണ്ണൻ എന്ന മനുഷ്യസ്നേഹി അവനെ കൈവിട്ടില്ല. "പഠിക്കണം" എന്ന വാശിയിൽ അവനെ വീണ്ടും അക്ഷരമുറ്റത്തേക്ക് മടക്കി അയച്ചു.

വിജയത്തിന്റെ പുതിയ ആകാശം.
👇
ഇന്ന് അരുൺ പത്താം ക്ലാസ് എന്ന കടമ്പ വിജയകരമായി പിന്നിട്ടിരിക്കുന്നു. ആ നിഷ്കളങ്കമായ വാക്കുകളിൽ നന്ദിയും പ്രതീക്ഷയും നിറയുന്നു:

> "എന്റെ ഈ ചിരി ഇത്രയും പേർക്ക് പ്രിയപ്പെട്ടതാകുമെന്ന് ഞാൻ സ്വപ്നത്തിൽ പോലും കരുതിയിരുന്നില്ല. ആ ഒരൊറ്റ നിമിഷം എന്റെ നിയോഗം മാറ്റിമറിച്ചു. നെഹ്റു അണ്ണൻ ഇല്ലായിരുന്നെങ്കിൽ ഞാൻ ഇന്നും കരിപുരണ്ട ലോകത്ത് തുടരുമായിരുന്നു. എനിക്ക് ഇനിയും ഉയരങ്ങളിലെത്തണം, എന്നെപ്പോലെ കഷ്ടപ്പെടുന്ന കുട്ടികൾക്ക് താങ്ങാവണം."

>
ആ പാഠം നമുക്കുള്ളതാണ്
വിധി തോൽപ്പിക്കാൻ നോക്കിയപ്പോഴും പുഞ്ചിരിയോടെ നേരിട്ട അരുൺ നമുക്ക് നൽകുന്ന സന്ദേശം വ്യക്തമാണ്—നമ്മുടെ ഒരു ചെറിയ കരുണയും കരുതലും ഒരാളുടെ ജീവിതം തന്നെ മാറ്റിമറിച്ചേക്കാം. കഷ്ടപ്പാടിന്റെ ഇരുട്ടിൽ നിന്നും അറിവിന്റെ വെളിച്ചത്തിലേക്ക് നടന്നു കയറുന്ന അരുണിന് നമുക്ക് ഹൃദയം നിറഞ്ഞ ആശംസകൾ നേരാം.

ആ ചിരി ഇനിയും പടരട്ടെ, ഒരായിരം സ്വപ്നങ്ങൾക്ക് ചിറകായി! 💙

19/02/2026

മമ്മൂട്ടി : ഞാൻ ഷൂട്ടിങ്ങിനിടെ ഒരാൾക്ക് കാതിൽ വെക്കാൻ ഒരു ശ്രവണ സഹായി വാങ്ങിച്ചുകൊടുത്തിരുന്നു. അയാളത് കുറച്ച് നേരം വച്ചിട്ട് എടുത്ത് എറിഞ്ഞുകളഞ്ഞു. കാരണം ശബ്ദം എന്ന് പറയുന്ന അനുഭവം അയാൾക്ക് ഒരിക്കലും ഉണ്ടായിട്ടില്ല. ഒരു ഭീക രാവസ്ഥയിലേക്ക് അയാൾ പോവുകയും അയാൾ പിന്നീടൊരിക്കലും ആ ശ്രവണ സഹായി ഉപയോഗിച്ചിട്ടില്ല. ഇപ്പോഴും ഉപയോഗിക്കുന്നില്ല.

കാഴ്ചയും കേൾവിയുമാണ് മനുഷ്യന് ഏറ്റവും കൂടുതൽ ആവശ്യം. ശ്വാസം വലിക്കുകയും വേണം. മണമില്ലേലും നമ്മൾ ശ്വാസം വലിക്കും. കുറെ കാലത്തിന് എനിക്ക് ഇല്ലായിരുന്നു ഇതൊന്നും. ഇപ്പോൾ കുറച്ചായി കിട്ടി തുടങ്ങിയിട്ടുണ്ട്,

കേൾവി എന്നത് ഒരു അനുഗ്രഹമാണ്. അത് ലഭിക്കാതെ പോയ ധാരാളം പേരുണ്ട്. അവർക്കു വേണ്ടിയാണ് ഈ പദ്ധതി. നന്മചെയ്യുക , നന്മ ചെയ്യുന്നവരെ പ്രോത്സാഹിപ്പിക്കുക, തിന്മയെ എതിർക്കുക. ഇതാണ് ഭൂമിയിൽ നമുക്ക് ചെയ്യാവുന്ന ഏറ്റവും മഹത്തായ കാര്യം

06/02/2026

ശ്രീഹരി വടക്കന്റെ തിരക്കഥയ്ക്ക് വിജേഷ് പുനത്തൂർ സംവിധാനം നിർവഹിച്ച് ഗണപതി, സാഗർ സൂര്യ, അമീൻ, കലാഭവൻ നവാസ്, അസീസ് നെടുമങ്ങാട്, മല്ലിക സുകുമാരൻ തുടങ്ങിയവർ പ്രധാന കഥാപാത്രങ്ങളായി അണി നിരന്ന ഹൊറർ കോമഡി വിഭാഗത്തിൽ പെടുന്ന ചിത്രമാണ് പ്രകമ്പനം. ജേണറിനോട് ഏറെക്കുറേ നീതി പുലർത്തുന്ന രീതിയിലാണ് ചിത്രം തുടക്കം മുതൽ സഞ്ചരിക്കുന്നത്. ഹൊററിനേക്കാൾ കോമഡിക്കാണ് പ്രകമ്പനം പ്രാധാന്യം നൽകുന്നത്.

മൂന്ന് കോളേജ് വിദ്യാർത്ഥികൾ, അവർക്കിടയിൽ സംഭവിക്കുന്ന അസാധാരണമായ ചില സംഭവങ്ങൾ, തുടർന്ന് പ്രശ്ന പരിഹാരത്തിനയുള്ള നെട്ടോടം, ഒടുവിൽ അപ്രതീക്ഷിതമായുള്ള പരിഹാരം തുടങ്ങിയ സ്ഥിരം ടെംപ്ളേറ്റിലാണ് സിനിമ കഥ പറയുന്നത്. രോമാഞ്ചം, പടക്കളം തുടങ്ങിയ ചിത്രങ്ങളേ പോലെ പ്രേക്ഷകനെ പരമാവധി എന്റർടൈൻ ചെയ്യുക എന്ന ദൗത്യം തന്നെയാണ് പ്രകമ്പനവും ഏറ്റെടുത്തിരിക്കുന്നത്. പടക്കളവുമായി ചിത്രത്തിന് മോശമല്ലാത്ത ഒരു സാമ്യമുണ്ട്. ബോഡി സ്വാപ്പിങ്ങിന്റെ വേറിട്ടൊരു രീതിയാണ് പ്രകമ്പനത്തിൽ പരീക്ഷിക്കുന്നത്. അത് പൂർണമായും വിജയിക്കുകയും പ്രേക്ഷകരെ രസിപ്പിക്കുകയും ചെയ്യുന്നുണ്ട്.അല്പം പക്വതയാർന്ന പ്രകടനവുമായാണ് ഗണപതി സ്‌ക്രീനിൽ തിളങ്ങി നിൽക്കുന്നത്. റീൽസിൽ കാഴ്ച്ച വെക്കുന്ന അതേ അഭിനയ രീതി പകർത്തി വെക്കാൻ അമീൻ ശ്രമിക്കുന്നു.അദ്ദേഹത്തിന്റെ നുറുങ്ങ് കോമഡികൾ തിയേറ്ററിൽ ആളുകളെ നന്നായി രസിപ്പിക്കുന്നുണ്ട്. സാഗർ സൂര്യയാണ് സിനിമയിലെ ശ്രദ്ധാ കേന്ദ്രം.നേരത്തെ പടകളത്തിൽ സന്ദീപ് നമുക്ക് മുന്നിൽ ചെയ്ത് വെച്ച വേഷത്തിന്റെ സാമ്യതയുള്ള പകർപ്പാണ് പ്രകമ്പനത്തിലെ സാഗർ സൂര്യയുടേത്. അതുകൊണ്ട് തന്നെ സാഗർ എത്രത്തോളം കഥാപാത്രത്തെ ഉൾക്കൊണ്ടു എന്ന ചോദ്യം ബാക്കിയാണ്. പലപ്പോഴും സാഗറിന്റെ ഡയലോഗുകൾ കൃത്യമായി തിരിച്ചറിയാൻ കഴിയുന്നുണ്ടായിരുന്നില്ല. എന്നിരുന്നാലും മോശം എന്ന് പറയാൻ കഴിയാത്ത വിധത്തിൽ സാഗർ കഥാപാത്രത്തെ അവതരിപ്പിച്ചിട്ടുണ്ട്.
എഴുത്തുകാരന് കേരളം ഭരിക്കുന്ന പാർട്ടിയോട് എന്തോ രാഷ്ട്രീയ വിരോധം ഉണ്ടെന്ന് തോന്നിപ്പിക്കുന്നത് പോലെ ആവശ്യത്തിനും അനാവശ്യത്തിനും പ്രസ്തുത പാർട്ടിയെ തലോടി പോകുന്നുണ്ട്. കണ്ണൂരിലെ പാർട്ടിക്കാരെയും അവരുടെ പാർട്ടി സംവിധാനത്തെയും പരിഹാസ രൂപത്തിൽ അവതരിപ്പിച്ച് പ്രേക്ഷകരെ കൊണ്ട് ചിരിപ്പിക്കാൻ അദ്ദേഹത്തിന് കഴിഞ്ഞിട്ടുണ്ട്.

ഒരു പക്കാ എന്റർറ്റൈനർ ഫസ്റ്റ് ഹാഫ് ആണ് സിനിമയുടേത്. സെക്കന്റ്‌ ഹാഫിലേക്ക് വരുമ്പോൾ എഴുത്തിൽ എവിടെയൊക്കെയോ പാളിച്ചകൾ കടന്നു കൂടുന്നു. ഇത് എങ്ങനെയാണ് അവസാനിപ്പിക്കേണ്ടത് എന്ന് ധാരണയില്ലാത്തത് പോലൊരു ക്ലൈമാക്സിലൂടെയാണ് സിനിമ അവസാനിപ്പിക്കുന്നത്...യൂത്തിനും ഫാമിലിക്കും ഒരുപോലെ ഇഷ്ടപെടുന്ന ഒരു ചിത്രം തന്നെയാണ് പ്രകമ്പനം.

02/01/2026

ശങ്കരൻ പിന്നെയും തെങ്ങുമ്മൽ തന്നെ എന്ന് പറയുന്നത് പോലെയാണ് സിപിഎമ്മിന്റെ അവസ്ഥ. തദ്ദേശ തിരഞ്ഞെടുപ്പിൽ ശക്തമായ തിരിച്ചടി നേരിട്ടിട്ടും തങ്ങളുടെ പ്രചരണ സ്റ്റാറ്റർജി മാറ്റാൻ അവർ ഒരുക്കമല്ല.

കഴിഞ്ഞ കുറച്ച് വർഷങ്ങളായി നമ്മൾ സോഷ്യൽ മീഡിയകളിൽ സ്ഥിരമായി കാണുന്ന കാര്യമാണ് ഇന്ത്യയിൽ ഏറ്റവും കൂടുതൽ പി എസ് സി നിയമനങ്ങൾ നടത്തുന്ന കേരള പി എസ് സിയുടെ പരസ്യ പോസ്റ്ററുകൾ. ആദ്യത്തെ ഒന്ന് രണ്ട് തവണ ഈ പോസ്റ്ററുകൾ കണ്ടപ്പോൾ നല്ല കാര്യം എന്ന് തോന്നിച്ച മനസുകൾ വീണ്ടും വീണ്ടും കണ്ട് മടുത്തപ്പോൾ ഇതിന് പിന്നിലെ വസ്തുതകൾ തേടി അലഞ്ഞപ്പോളാണ് ഈ കണക്കുകളിൽ സിപിഎം പ്രചാരകർ ഒളിപ്പിച്ചു വെച്ച കാപട്യം നമ്മൾ തിരിച്ചറിഞ്ഞത്. ഏതാണ്ട് ഒന്ന് രണ്ട് വർഷം മുമ്പ് തന്നെ ഈ പ്രചരണ തന്ത്രത്തിലെ കുതന്ത്രം പുറത്തായതാണ്.

എങ്ങനെയാണ് കേരള പി എസ് സി ഇന്ത്യയിൽ ഒന്നാമത്തെ നിയമന കക്ഷിയായി മാറുന്നതെന്ന ചോദ്യത്തിന്റെ ഉത്തരം ലളിതമാണ്.

കേരളത്തിലെ ഗവണ്മെന്റ് സെക്റ്ററിൽ വരുന്ന മുഴുവൻ തസ്തികകളിലും നിയമനം നടത്തുന്നത് കെ പി എസ് സി നേരിട്ടാണ്. ഗവണ്മെന്റ്, അർദ്ധ സർക്കാർ, പൊതു മേഖലകളിലെയും നിയമന അതോറിറ്റി പി എസ് സി തന്നെയാണ്. പോലീസ് സേനയിലാണെങ്കിലും, ഹോസ്പിറ്റൽ മേഖലയിൽ ആണെങ്കിലും, റവന്യു, പൊതുമരാമത്ത്, സർവകലാശാല തുടങ്ങി കോടതികളിൽ വരെ പി എസ് സി വഴിയാണ് നിയമനം നടക്കുന്നത്.എന്നാൽ മറ്റ് സംസ്ഥാനങ്ങളിൽ ഓരോ മേഖലകളിലും അതാത് ഡിപ്പാർട്മെന്റ്കൾ അവരവരുടേതായ ബോർഡുകൾ വഴിയാണ് നിയമനം നടത്തുന്നത്. അതായത് പോലിസ് സേനയിലേക്ക് ആഭ്യന്തര വകുപ്പിന് കീഴിലുള്ള ബോർഡ് നിയമനം നടത്തുമ്പോൾ ഹോസ്പിറ്റൽ മേഖലയിലേക്ക് വേറെ ബോർഡാണ് നിയമനം കൈകാര്യം ചെയ്യുക. ഈ സംസ്ഥാനങ്ങളിലെ പി എസ് സി നേരിട്ട് നിയമനം നടത്തുന്നത് നാമമാത്രമായ തസ്‌തികകളിലേക്ക് മാത്രമാണ്.

സിപിഎം ഇപ്പോൾ പുറത്തു വിട്ട 36813 ന്റെ കണക്ക് നിയമനം നടത്തിയതിന്റേത് അല്ല എന്നുള്ളതാണ് മറ്റൊരു കാര്യം. അത് പി എസ് സി അയച്ച നിയമന ശുപാർശകളുടേതാണ്. നിങ്ങളുടെ പരിചയത്തിൽ പി എസ് സി ട്രൈ ചെയ്യുന്ന ആളുകൾ ഉണ്ടെങ്കിൽ അവരോട് ചോദിച്ചാൽ മനസിലാകും പി എസ് സി യിൽ ടോപ്പറായ ഒരു വ്യക്തി എല്ലാ ലിസ്റ്റിലും ഉൾപ്പെടുകയും അയാൾക്ക് അഞ്ചും ആറും നിയമന ശുപാർശ ലഭിക്കുകയും ചെയ്യുമെന്ന കാര്യം. അതായത് അയാൾക്ക് ഒരു 6 നിയമന ശുപാർശ ലഭിച്ചാലും അയാൾക്ക് ഒരു പോസ്റ്റിൽ മാത്രമേ ജോയിൻ ചെയ്യാൻ കഴിയുകയുള്ളൂ. ഈ 36813 നിയമന ശുപാർശകളിൽ എത്ര നിയമനം നടന്നു എന്ന കണക്കാണ് യഥാർത്ഥത്തിൽ സർക്കാർ പുറത്ത് വിടേണ്ടത്. ഒരു പോസ്റ്റിൽ ഒരാൾക്ക് നിയമന ശുപാർശ നൽകുകയും അയാൾ ആ പോസ്റ്റിൽ ജോയിൻ ചെയ്യാതെ പോകുകയും, ആ പോസ്റ്റ്‌ NJD ആയി മാറി അടുത്ത ആൾക്ക് നിയമന ശുപാർശ പോകുകയും ചെയ്യുമ്പോൾ കണക്കിൽ രണ്ട് നിയമന ശുപാർശ കാണിക്കുകയും ചെയ്യും.

ഇന്ത്യയിൽ നടക്കുന്ന 60% പി എസ് സി നിയമനങ്ങളും കേരളത്തിൽ ആണ് നടക്കുന്നതെന്നാണ് സർക്കാരിന്റെ അവകാശ വാദം. അതായത് ഈ 36813 ആണ് ഇന്ത്യയുടെ 60% നിയമനം എങ്കിൽ കേരളം ഒഴികെയുള്ള 28 സംസ്ഥാനങ്ങളിലെ 40% എന്ന് പറയുന്നത് 24542 ആണ്. അതായത് ഇന്ത്യയിൽ 144 കോടി ജനങ്ങൾ ഉണ്ട്. കേരളത്തിലെ 4 കോടി മാറ്റി നിർത്തിയാൽ 140 കോടി ജനങ്ങൾക്ക് ഇടയിൽ വെറും 24542 നിയമനങ്ങളെ നടക്കുന്നുള്ളൂ എന്ന് പറഞ്ഞാൽ അരിയാഹാരം കഴിക്കുന്നവർ മൂക്കത്ത് വിരൽ വെച്ചു പോകും.

ഇന്ത്യയിൽ ഏറ്റവും കൂടുതൽ നിയമന ശുപാർശ അയക്കുന്നത് കേരള പി എസ് സി ആയിരിക്കും. എന്നാൽ അത് കൊണ്ട് ഈ നാട്ടിലെ യുവാക്കൾക്ക് ഒരു നേട്ടവും ഇല്ല. കേരളത്തിൽ ഒരു വർഷം എത്ര നിയമനങ്ങൾ നടക്കുന്നുണ്ട് എന്നുള്ളതും, ആ നിയമനങ്ങൾ മറ്റ് സംസ്ഥാനങ്ങളിലെ മൊത്ത നിയമനങ്ങളുമായി (എല്ലാ ബോർഡുകളിലെയും നിയമനങ്ങൾ) താരതമ്യം ചെയ്യപ്പെടുമ്പോൾ ഉള്ള കണക്കും ആണ് നമ്മൾ ചർച്ച ചെയ്യേണ്ടത്.

23/12/2025

ശബരിമല സ്വർണ കേസ് സംസ്ഥാനത്ത് മുഴുവൻ ഇത്രത്തോളം ഓളം ഉണ്ടാകുമെന്ന് സിപിഎം സ്വപ്നത്തിൽ പോലും കരുതി കാണില്ല. ഒരുപക്ഷേ കേരള രാഷ്ട്രീയത്തിൽ തന്നെ ആദ്യമായിട്ടായിരിക്കും വോട്ടിങ് പ്രായം പോലും ആവാത്ത പിള്ളേര് വരെ ഒരു രാഷ്ട്രീയ വിഷയം ഇത്രത്തോളം ഏറ്റെടുത്ത് ആഘോഷമാക്കുന്നത്.

ന്യായീകരിക്കാൻ ഒന്നുമില്ലെങ്കിൽ പോലും ന്യായീകരിച്ച് പിടിച്ച് നിൽക്കാൻ മിടുക്കരായ സൈബർ സഖാക്കൾ പോലും ശബരി മല വിഷയത്തിൽ പതറി പോയിട്ടുണ്ട്. ഈ കേസിൽ അറസ്റ്റ് ചെയ്തവരിൽ കോൺഗ്രസിന്റെ ആളുകൾ ഉണ്ടായിട്ട് പോലും അത് പറഞ്ഞ് പ്രതിരോധിക്കാൻ പോലും അവർക്ക് കഴിയുന്നില്ല. പോറ്റിയെ കേറ്റിയെ പാട്ടിൽ നാരായൺ പോറ്റിയെ ശബരിമലയിൽ കയറ്റിയത് യു ഡി എഫ് കാലത്താണെന്ന വസ്തുത ഉണ്ടായിട്ടും സൈബറിടത്തിൽ സഖാക്കൾക്ക് ന്യായീകരിച്ച് പിടിച്ച് നിൽക്കാൻ കഴിയുന്നില്ല. ശബരിമലയിൽ ഇതിന് മുമ്പും പാത്രം അഴിമതി പോലുള്ള സംഭവങ്ങൾ അരങ്ങേറിയിട്ടുണ്ട്.എന്നിട്ടും എന്ത് കൊണ്ടായിരിക്കും അന്നൊന്നും ഇല്ലാത്ത വിധം സ്വർണ കേസ് ഭരിക്കുന്ന സർക്കാരിന് തീരാ തലവേദനയായി മാറുന്നത്..?

അതിനുത്തരമാണ് രാഹുൽ മാങ്കൂട്ടത്തിലിന്റെ കേസിലുള്ള സഖാക്കളുടെ ഇടപെടൽ. കേരളത്തിൽ തന്നെ ഇത്തരത്തിൽ ഒരു കേസ് ആദ്യമായിട്ട് സംഭവിച്ചത് പോലെയായിരുന്നു രാഹുൽ വിഷയം സഖാക്കൾ കൊണ്ടാടിയത്. രാഹുലിനെതിരെ ഫ്ലെക്സ് വെക്കാത്ത, പ്രതിഷേധ പ്രകടനം നടത്താത്ത ഡി വൈ എഫ് ഐയുടെ ഒരു യൂണിറ്റ് കമ്മിറ്റി പോലും കേരളത്തിൽ ഉണ്ടാവില്ല. സകല മുക്കിലും മൂലയിലും രാഹുലിന്റെ ഫ്ലെക്സ് കാണാമായിരുന്നു. കേരള നിയമസഭയിൽ ഇപ്പോഴും സമാനമായ ആരോപണങ്ങൾ നേരിടുന്ന സമാജികരുണ്ട്. അവരൊന്നും നേരിടാത്ത പ്രതിഷേധങ്ങളായിരുന്നു രാഹുൽ നേരിട്ടത്. ആദ്യ ദിവസങ്ങളിൽ രാഹുലിനെതിരെയുള്ള വാർത്തകൾ വന്നപ്പോൾ മലയാളികൾ ഒന്നടങ്കം ഞെട്ടി പോയി എന്നുള്ളത് വാസ്തവം തന്നെയാണ്. മലയാളികൾക്കിടയിൽ രാഹുലിനെതിരെ ഒരു വികാരം രൂപപെട്ടിരുന്നു. എന്നാൽ ഈ വിഷയം സഖാക്കൾ ഏറ്റെടുക്കുകയും പരമാവധി രാഷ്ട്രീയ നേട്ടത്തിന് വേണ്ടി ഉപയോഗിക്കാനും തുടങ്ങിയതോടെ കളി മാറി. ഏതാണ്ട് 4 മാസത്തോളം ഒരേ വിഷയം കത്തിച്ചു നിർത്താനുള്ള സഖാക്കളുടെ ശ്രമം പാളി. അവസാന ലാപ് ആയപ്പോൾ ജനങ്ങളിൽ എന്താണോ സഖാക്കൾ ഉദ്ദേശിച്ചത് അതിന്റെ വിരുദ്ധമായ മനോഭാവം ആണ് രൂപപ്പെട്ടത്. ഈ ഗ്യാപ്പ് മുതലാക്കി കോൺഗ്രസുകാർ ശബരിമല പ്രശ്നം ഉയർത്തി കൊണ്ട് വരികയും ചെയ്തു. ഒരു രാഷ്ട്രീയ നേതാവിന് നേരെയുള്ള വിഷയങ്ങൾ ഒരു നിശ്ചിത സമയം മാത്രമേ കത്തിച്ചു നിർത്താൻ പാടുള്ളൂ. ആ സമയത്തിനുള്ളിൽ പരമാവധി ഡാമേജ് അയാൾക്ക് ഉണ്ടാക്കി പതിയെ പിൻവാങ്ങണം. അല്ലെങ്കിൽ ജനങ്ങൾക്ക് മടുക്കും, അവർക്ക് അത് ഒരു വിഷയമേ അല്ലാതായി തീരും..

ശബരിമല സ്വർണ കേസിലും ഇത് തന്നെയാണ് സംഭവിക്കുക. തദ്ദേശ തിരഞ്ഞെടുപ്പിൽ യു ഡി എഫ് ഈ വിഷയം കത്തിച്ചു നിർത്തി സിപിഎമ്മിനും സർക്കാരിനും പരമാവധി ഡാമേജ് ഉണ്ടാക്കിയിട്ടുണ്ട്. എന്നാൽ വരുന്ന നിയമസഭ തിരഞ്ഞെടുപ്പിലും ഈ വിഷയം തന്നെ മുഖ്യ അജണ്ടയാക്കി മാറ്റാനാണ് യു ഡി എഫ് ശ്രമിക്കുന്നതെങ്കിലും പ്രതീക്ഷിക്കുന്നതിന് വിപരീതമായ ഫലം ആണ് ലഭിക്കുക. കൃത്യമായ സമയത്ത് ഉന്നയിച്ച് നിർത്തിയ ആരോപണങ്ങളിൽ നിന്ന് പിന്മാറി പുതിയത് ഉയർത്തി കൊണ്ട് വരുന്നതും ഇന്നത്തെ കാലത്ത് മികച്ചൊരു രാഷ്ട്രീയ തന്ത്രം ആണ്.

Evergreen media

16/03/2026

28/02/2026

27/02/2026

20/02/2026

20/02/2026

20/02/2026

19/02/2026

19/02/2026

19/02/2026

06/02/2026

02/01/2026

23/12/2025

Address

Telephone

Website

Alerts

Shortcuts

Share

Category