05/12/2025
နာဂဒေသကို နစ်ခြမ်းခွဲဖို့ကြိုးစားနေတဲ့ မြန်မာစစ်တပ် နှင့် အိန္ဒိယနိုင်ငံ။
နှစ်နိုင်ငံနယ်စပ်ကို ခြံစည်းခတ်ရန် အိန္ဒိယအစိုးရက လုပ်ဆောင်နေမှုကို နာဂအဖွဲ့အစည်းများနှင့် ဒေသခံများက လက်မခံကန့်ကွက်နေကြသည်။
နာဂကိုယ်ပိုင်အုပ်ချုပ်ခွင့်ရဒေသရှိ
နယ်ခြားမှတ်တိုင် အမှတ်(၁၇၃) (ပန်ဆောင်တောင် ကြားလမ်း) နှင့် အမှတ်(၁၇၂) အကြားနန်းယွန်းမြို့နယ်အတွင်းကျရောက်သော နေရာအား ခြံစည်းရိုးခတ်ရန် ၂၀၂၅ခုနှစ်တွင် စတင်ဆောင်ရွက်နေခြင်းကို အရှေ့နာဂအမျိုးသမီးအသင်း (ENWA) က ယမန်နေ့ (ဒီဇင်ဘာလ၄ရက်) နှင့် ညီညွတ်သော တန်ရှန်းနာဂကောင်စီ (UTNC) က နိုဝင်ဘာလ နိုဝင်ဘာလ၂၁ရက်တို့တွင် အသီးသီးကြေညာချက်ထုတ်ပြန် ကန့်ကွက်ကြခြင်းဖြစ် သည်။
“တဖက်သတ် သတ်မှတ်ထားတဲ့ နယ်စပ်စည်းမျဥ်းခြားတာကြောင့် တဖက် ၊ တခြမ်းဆီမှာ နေထိုင်နေကြတဲ့ နာဂလူမျိုး မိသားစုတွေကို အမျိုးမျိုးပုံစံနဲ့ ခွဲနေခြင်းဟာ လူ့အခွင့်အရေး ၊ ဌာနေ တိုင်းရင်းသားအခွင့်အရေးတွေကို ချိုးဖောက်နေတာသာဖြစ်ပြီး ဒီလိုချိုးဖောက်နေခြင်းကို လုံးဝ ကန့်ကွက်ရှုံချပါတယ်” ဟု ENWA က ဆိုသည်။
ဒီမိုကရေစီနိုင်ငံကြီးအဖြစ် သတ်မှတ်ထားသော အိန္ဒိယအနေဖြင့် ဌာနတိုင်းရင်းသားတွေရဲ့ ပိုင်ဆိုင်မှု နှင့် ဘိုးဘွားများ၏ ရိုးရာဓလေ့ထုံးစံများကို အလေးထားတန်ဖိုးထားပြီး ဌာနေတိုင်းရင်းသားများ၏ အသံကို အဓိကနားထောင်ရန်လိုအပ်ကြောင်း အရှေ့နာဂအမျိုးသမီးများအဖွဲ့ ထုတ်ပြန်ချက်တွင် ဖော်ပြသည်။
ယခုခြံစည်းရိုးကာရံသည့် နယ်စပ်ပိုင်းခြားကန့်သတ်သော နယ်မြေသည် တန်ရှန်းနာဂလူမျိုးများ နေထိုင်သည့်ဒေသ ဖြစ်ပြီး လူမျိုးတခုတည်း ၊မိသားတစုတည်း ဌာနေနာဂလူမျိုး၏ တည်ရှိမှုကို မသိကျိုး ကျွံပြုကာ ဆောင်ရွက်လာခြင်းဖြစ်ပြီး မည်သည့် အာဏာစက်ကမျှ ပိုင်းခြားဖျောက်ဖျက်၍ မရနိုင်ကြောင်း ညီညွတ်သော တန်ရှန်းနာဂကောင်စီ (UTNC) ထုတ်ပြန်ချက်တွင် ဖော်ပြသည်။
အဆိုပါ ထုတ်ပြန်ချက်ကို နာဂရိုးရာယဥ်ကျေးမှုစာပေကော်မတီ(နန်းယွန်းမြို့နယ်၊ နာဂရိုးရာယဥ်ကျေးမှုစာပေကော်မတီ (ပန်ဆောင်မြို့နယ်၊တန်ရှန်းနာဂနှစ်ခြင်းခရစ်ယာန်အသင်းများ ကောင်စီ၊ တန်ရှန်းနာဂကျောင်းသားများအစည်းအရုံး တို့ကလည်း ထောက်ခံအတည်ပြုထားသည်။
အိန္ဒိယ - မြန်မာနယ်စပ်ခြံစည်းရုံးခတ်ခြင်းလုပ်ငန်းစဥ်ကို အိန္ဒိယနိုင်ငံက Border Roads Organization(BRO) အဖွဲ့က ဦးစီးလုပ်ကိုင်နေပြီး နာဂနှင့် ချင်းဒေသများအပါအဝင် ငါးနှစ်စီမံကိန်းသတ်မှတ်ကာ ရူပီး သန်း ၃၁,၀၀၀သုံးစွဲသွားမည်ဖြစ်ကြောင်း သိရသည်။
မဏိပူရပြည်နယ်အစိုးရက ခြံစည်းရိုးကာရံမှုကို လက်ခံသော်လည်း နယ်စပ်နေ ဌာနတိုင်းရင်းသားများ ကမူ ကန့်ကွက်နေကြပြီး အရူနာချာပရာဒေ့ချ်ကပြည်နယ်ကမူ သဘောထားတစုံတရာ ထုတ်ပြန် ပြောဆိုခြင်းမရှိကြောင်း သိရသည်။
#ခြံစည်းရိုးကာရံမှု
#နာဂအဖွဲ့
