https://www.facebook.com/270580092975722/

DUHLAIDAILY, Kolasib (2026)

29/07/2024

Paris Olympic hawnna a an thil lan tir chungchangah organiser te chuan ngaihdam an dil ta nge nge e.

Paris Olympic Opening ceremony ah khan Isua hova a zirtirten Zanriah hnuhnung an kil lai fiamthu thawhna atana hman ni ngei a ngaih chu lan tir a ni a, hei hi sawisel a hlawh hle a, France ram Catholic kohhran chuan 'Kristiante nuihzat na a ni' tiin a sawisel a, US telecommunications company C Spire chuan Paris Olympic atanga Advertisement an hmuh zawng zawng pawh an la thla nghal vek bawk.

Hetiang a nih hnuah hian Organiser te chuan ngaihdam an dil a, mi rilru tihnat emaw, eng sakhua emaw nuihzat a siamna tura thil ti an nih loh thu an sawi a. Artistic director Thomas Jolly pawhin a thil ruahman chu midang nuihzatna tura siam a ni lo tih a sawi bawk.

29/09/2021

TUIKUK TAN SPECIAL BOOTH SIAM TUM LO

Thla thar ni 30 a By election neihna tur Tuirial Bial chhung a Vote nei, Tripura a awm mek Tuikuk te chu Vote an thlakna tura Special Booth siam sak lo a, Vote an neihna hmun Polling station a vote thlak tir turin Election Commission of India ah rawtna thlen a ni dawn.

Vawiin khan Mizoram Chief Election Officer, T. Jawahar hovin Kolasib District a Election lama thawktuten Biak a hmuh theih (Video Conference) kaltlangin By Election lo awm tur chungchang hi an sawi ho a. Video Conference an neih hnua kan Palai in Kolasib District Election Officer Dr H. Lalthlangliana hnen atanga thu a dawn danin Video Conference ah hian Tuirial bial chhunga Vote nei, Tripura a awm mek te hi Special Booth siam sak loh nise tih rawtna neih a ni a, ECI ah hei hi an thlen dawn a ni.

Kolasib District Election Officer in a sawi danin Video Conference an neih ah hian Tuirial Bial chhunga By election neih huna Polling Official tura ruat ten Covid Vaccine an lak vek theih dan tur chungchangte, Polling Station thawm that ngai leh a hmun sawn ngai a awm leh awm loh chungchanga hmalak dan turte an sawi ho bawk a ni.

Tarlan tawh angin Tuirial bial vawngtu Pu Andrew H. Thangliana chu a boral avangin thla thar ni 30 khian By election hi neih a ni dawn a, naktip October ni khat hian hemi chungchangah hian Kolasib District Election Officer chuan Notification a chhuah dawn a ni.

28/09/2021

District To***co Control Cell, Kolasib District huaihawtin 8th Mizoram State Anti To***co Day hman a ni.

State Anti To***co Day hi k*m 2013 a hman tan niin k*m tin september ni 11 ah hman thin a ni a, k*min erawh chu remchan zawkna vangin district hrang hrangah mahni remchan dan anga hman a ni.

He hun hi Pu ZT Vawra Hmar District Consultant, NTCP, DTCC in kaihruaiin, DNO, NTCP Dr C Vanlalhlimpuian vaihlo leh akaihhnawih chungchang kalkhawmte zirtirna a pe a ni. He hun hi CMO officeah hman ni in.. CMO Dr Lalhlimpuia leh SMO Dr R K Lalthlamuana te bakah Health Department staff te an tel a ni.

28/09/2021

KVK KOLASIB AH WORLD RABIES DAY HMANG

Ui â hri (rabies) damdawi hmuchhuaktu Louis Pasteur thihcham September ni 28 pual a k*m tina hman thin World Rabies Day chu vawiin khan KVK Kolasib ah hman a ni a, he ni pual hian a thlawnin Ui â hri venna damdawi pek a ni

K*min World Rabies Day thupui (Theme) ah hian “Rabies: Facts, not Fear” hman a ni a. Report atanga a lan danin khawvel a Ui seh avanga nunna chan zinga 95% hi Asia leh Africa khawmualpui a mi an ni. World Rabies Day hi 2007 khan World Health Organization kaihhruaiin Alliance for Rabies Control leh Centers for Disease Control and Prevention, Atlanta, USA ten an hmang tan a, hemi atang hian k*m tin hman thin a ni ta a ni.

28/09/2021

TUIRIAL BIAL BY ELECTION HUN TUR PUANG.
KOLASIB DISTRICT AH MODEL CODE OF CONDUCT HMANG NGHAL

Kolasib District chhung a Tuirial Bial vawngtu Pu Andrew H. Thangliana chu a boral tak avangin bial ruak hnawhkhat tura By election neih hun tur chu Election Commission of India chuan a rawn tifel ta a, October ni 30, 2021 hian inthlanna hi neih a ni dawn a. Hei vang hian vawiin atang khan Kolasib District chhung ah Model Code of Conduct chu hman tan nghal a ni.

Kolasib District Election Officer Dr H. Lalthlangliana chuan vawiin chawhnu khan DC Office Conference Hall ah Kolasib a Media mite hmachhawnin MCC hman tan a nih thu hi a sawi a, Inthlanna tur bial ah chauh MCC hmang lova, District pumpui a hman a nih chhan hi Election Commission of India in inkaihhruaina a siam ang a nih thu a sawi.

District Election Officer Dr H. Lalthlangliana chuan Tuirial bial chhung bikah hian VLTF mawhphurhna chu inthlan zawhfel a nih hma zawng atan YMA te kutah hlan a nih dawn thu sawiin, Order pawh vawiin khan a tichhuak tih a sawi a. Inthlan a zawhfel hnuah a hma a kal dan pangngai anga kal zui leh nghal mai tur a nih thu a sawi lang.

DEO chuan By Election lo awm tura inthlanna thianghlim leh dik (Free & Fair Election) a awm theih nan Political Party tinte chu MCC bawhchhe zawnga hmala lo tura a duh thu a sawi a. Hei bakah hian Covid-19 a darh leh hluai lohna turin Covid-19 Protocol ngaih pawimawh a nih tur thu a sawi lang bawk a ni.

Tuirial Bial By Election atan hian Dt 1.10.2021 Zirtawpni khian Notification tihchhuah a ni ang a. Dt 8.10.2021 thleng chuh tumte tan hming pekluh theih a ni ang a. Dt 11.10.2021 ah hming pek luhte endik niin inhnukdawk duh tan Dt 13.10.2021 thleng hun hawn a ni ang a. Vote hi Dt 30.10.2021 ah thlak a ni ang a, Vote tla te hi Dt 2.11.2021 ah chhiar a ni ang.

Tuirial Bial ah hian Polling Station 26 awmin Voter 17905 an awm a, Mipa 8818 leh hmeichhia 9087 an ni.

28/09/2021

Bye-election hun tur ruat :

Election Commission of India chuan 4-Tuirial (ST) AC bye-election neih hun atan Oct. 30, 2021 a ruat a, inthlan chuh tumte tan October 8, 2021 thleng hming pekluh theih a ni anga, Nov. 2, 2021-ah Vote tla te chhiar a ni ang.

28/09/2021

SAIPHAI AH HPC VC A DING
Kolasib District chhung Saiphai khua ah VC member pakhat chuan HPC a zawm avangin MNF VC chu thiah a ni a, HPC VC din nghal a ni.
MNF Party Ticket a thlan tlin, MNF VC a an Vice President nilai Pu Zokhumthanga chuan HPC a zawm a. Saiphai ah hian VC Member mi 5 awmin MNF in VC member 3 neiin HPC in Member 2 an nei a. MNF member pakhat in HPC a zawm tak avang hian MNF chuan VC ah Sorkar na an siam chhunzawm thei lo a, HPC VC a ding ta a ni.
Kar kalta khan Pu Zokhumthanga hian MNF chhuansan a, HPC a zawm thu leh, HPC VC din an duh thu hi Pu ST Lalhmingmawia DLAO Kolasib hnenah a thlen tawh a. Pu ST Lalhmingmawia hian enfiah tur a tirh hnuah vawiin khan HPC VC hi an ding a. Chanvo pawh an insiam rem nghal a. Pu Zokhumthanga hi VCP a ni ang a, Pu Lalthlirlien chu Vice President niin Pi Varmawikimi chu Treasurer a ni dawn ta a ni.

27/09/2021

PMAY HNUAIAH INSAK TANPUINA DILTU 4816 RECOMMEND AWM

Pradhan Mantri Awas Yojana – Urban (PMAY-U) hnuaiah Kolasib District chhunga chhungkaw 4816 te chu Insak tanpuina pek tura Recommend an ni tawh a. An zinga chhungkaw 637 te hnenah tanpuina pek an ni tawh.

Vawiin khan Kolasib DC Office Conference Hall ah Kolasib District chhunga PMAY hnuaia hmalak dan thlirin Kolasib DC Dr H. Lalthlangliana kaihhruaiin meeting neih a ni a. Meeting a report pek a nih danin Kolasib District chhungah hian chhungkaw 5297 chu PMAY kaltlanga insak tanpuina dawng tura thlan an nih hnuah chhungkaw 481 chu hnawl (Curtail) leh an ni a, Recomend hi 4816 an awm mek a. Pu Gaston Vanlalhriatpuia, DUDO, Kolasib chuan, PMAY hnuaia Insak tanpuia dawng turte hi VC leh NGO te Recommend vek an nih bakah Office lam atangin Verify leh vek an nih thu a sawi a. Heng an hnawl leh te hi a then chu an dilna a rei tawh avanga In leh lo tha lo nei hman tawhte, a then chu lo pem tawhte niin a then chu an mahni inhnukdawk leh te an nih thu a sawi lang.

PMAY dawng tura thlan zingah hian Kolasib khawchhung ah mi 2321 an awm a, 2105 a thlan tawh mi 853 atangin mi 311 chuan an dawn tur ang cheng nuaikhat leh singnga an dawng kim tawh a, mi 79 dangin cheng sing ruk an dawng tawh bawk tih report ah hian tarlan a ni a. 2017 a dawng tura thlan mi 736 leh 2019 a thlan mi 736 atangin insak tanpuina dawng an la awm lo a ni.

Kawnpui atangin mi 738 thlan an awm tawh a, an zinga 555 hi 2015 a thlan an ni a, heng zinga 148 hian an dawn tur ang an dawng kim tawh a, 99 in 1st instalment an dawng tawh bawk a. 2017 a thlan m 183 zinga tanpuina dawng an la awm lo a ni.

Bairabi ah 2015 ah thlan mi 359 awmin 2017 a thlan mi 196 an awm a, Bairabi atanga thlan zawng zawng hi 555 an ni a, tanpuina dawng an la awm lo a. Vairengte ah pawh tanpuina dawng tura thlan mi 1202 zinga tanpuina dawng an la awm lo a, 795 hi 2015 a thlan tawh niin 2017 a thlan mi 407 an awm bawk a ni.

Meeting kaihruaitu Kolasib DC Dr H. Lalthlangliana chuan Mahni a chenna in sa thei lo, tanpuina diltu zingah a dawng thei turte chu dawng tura thlan mai tur an nih thu a sawi a. Insak tanpuina dawngtute pawhin an dawn chhan ang ngei a In sakna atan an hman tangkai ngei a beisei thu a sawilang bawk.

27/09/2021

KOLASIB AH FAINA HAPTA HMANG DAWN

K*m dang ang bawkin Kolasib Dist chhungah 'Faina- Kan in leh a chhehvel atangin' tih thupui a hmangin Faina Hapta hman a ni dawn a. Kolasib ah chuan Dt 2.10.2021 ah hawn a ni ang a, Sub Division lam chu an mahni in hman dan tur lo la rel tura tih an ni.

Vawiin khan Kolasib DC Dr H. Lalthlangliana kaihhruaiinn Kolasib Town Sanitation Task Force chu an thukhawm a, Meeting hian Faina Hapta hman dan tur an rel a. Faina Hapta hi Dt 2.10.2021 zing dar 7 ah Venglai a YMA Park ah hawn a ni ang a, Dr H. Lalthlangliana DC Kolasib chu khuallian a ni ang a. A kharna hi Dr 8.10.2021 ah IPR Conference Hall Kolasib ah neih a ni ang a, Pu K. Lalrinliana Minister FCS&CA chu khuallian tura beisei a ni.

Faina Hapta hman chhung hian Kolasib khawpui chhungah Vengfai, Schools leh College Fai, Office Fai, Restaurant leh Hotel Fai bakah Hospital/Health Facility fai inelna neih a ni dawn a, heng inelna hrang hranga endiktu turte hi meeting hian a ruahman a, endiktute hian Dt 7.10.2021 ah an endikna result hi DUDO Kolasib ah thehlut tura tih an ni.

Dr.H.Lalthlangliana chuan Kolasib chu Solid Waste Management Centre awmna hmun a nih angin țangkai tak a hman a nih theih nan in tin atanga bawlhhlawh thliar hran 'Waste segregation at Source' a pawimawh thu sawiin 'Faina hapta 2021' hmannaah pawh mipui inzirtirna kawngah hma lak a țul thu a sawi a. Khawllai a bawlhhlawh hal chu dan khap a nih rualin ruahmanna felfei tak nen bawlhhlawh hal ralna hmun siam a tih ral țhin chu intihhmuh a țhat thu a sawi bawk a ni.

22/09/2021

REL PASSENGER TE TEST VEK DAWN

Indian Railway in India ram hmun hrang hrangah Rel an Service tir leh tawh a. Mizoram a Rel Station awm chhun Bairabi ah chuan Rel atanga Passenger lo lut te chu Covid-19 an vei leh vei loh Rapid Antigen hmanga Test an ni vek dawn.

He thu hi vawiin a Kolasib DC Office Chamber Kolasib ah Kolasib District chhunga hman tur Standard Operation Procedure (SOP) for Covid-19 chung chang ngaihtuah a Meeting neih ah tarlan a ni a. Bairabi ah hian September ni 10 atang khan Rel hi a Service tan tawh a, mahse Passenger erawh an la awm lo niin tarlan a ni a. Passenger hi an awm tan dawn tawh niin a lang a, hei vang hian Covid-19 an kai leh kai loh RAgT hmanga test an ni vek dawn a, Chief Medical Officer Kolasib lam pawhin hemi tur hian ruahmanna an siam tawh tih CMO Dr Lalhlimpuia chuan a sawi lang bawk.

Meeting ah hian Mizoram Sorkar in SOP an tihchhuah tharah Phai lam a zin, lo let leh te Dar 96 chhung an awm tlin chuan Quarantine Centre a dah tur tih a telh thin a paih tak chungchang pawh sawilan a ni a. Kolasib Dist chhung bik a hman turin Darkar 72 chhung aia rei Phai lama awm te chu Quarantine tur a tih a ni bawk.

Meeting kaihruaitu Dr H. Lalthlangliana chuan Kolasib District chu Inter State Boundary nei kan nih avangin phai lam atanga lut leh chhuak chungchangah kan fimkhur bik a ngaih thu a sawi a. Kan District chhung atanga phai lam dawrtu an awm ve reng bakah District dang atang pawha khualzin nei reng kan nih avangin kan fimkhur a ngai tih a sawi a ni.

22/09/2021

THLAI CHI THA KAN SUPPLY A NGAI -DC KOLASIB

Kolasib DC Dr H. Lalthlangliana chuan 'Mipuite hnen a thlai chin tur kan supply in a chin tlak leh a chi tha ngei supply tur a ni a. Supplier turah duhsak zawng kan nei a nih pawhin kan duhsaka te chuan a chi tha leh a chin tlak an supply mai tur a ni' a ti.

He thu hi vawiin a District Level Coordination Committee under Management Unit (DMU), Fortering Climate Resitent Upland Farming System (FOCUS), Kolasib District thutkhawm, DC Office Conference Hall Kolasib a neihah a sawi a. Dr H. Lalthlangliana chuan, Kolasib District chhunga FOCUS hnuaia Kuhva chi sem tawhah a supply tuten plai lam atanga a chi tha leh tha lo pawh thliar lo a, a man tlawm a piang an la mai nia sawi thawm a hriat thu sawilangin, 'Thlai chi leh phun tur kan Supply hian a chi tha leh chin tlak ngei kan supply tur a ni a. Thlai chi chhia kan Supply hian a tuartu chu Kuthnathawktute an ni a. A chi tha lo kan pek hian k*m tam tak hnuah an thawhrimna kha engmah lohah a chang thei thin a ni. Hei vang hian thlai chi supply tura kan thlan te hian a chi tha leh a chin tlak an supply mai tur a ni' a ti.

Meeting ah hian FOCUS hmalakna leh MGNREGS hna convergence tawh dan report ngaihthlak a ni a, 2022-2023 atanga Convergence leh tura ruahmanna siam pawh pawm nghal a ni bawk a. Hei bakah hian Line Department dang nen a an thawhhona leh an thawhho na tur kawng hrang hrangte sawilan a ni a. Hmalak tawhna hrang hrangte an thlir let bawk a. DC chuan FOCUS chu Line Department te anga Work khawih tur an ni lo a, Line Dept te hna Monitoring a, an hnathawh tur ruahmanna siamsaktu tur an nih thu sawiin, Line Department te an thawhpui that a ngaih thu a sawi lang bawk.

Meeting ah hian FOCUS hnuaia Line Department hrang hrangte an tel a. Aizawl atangin Pu Lalmalsawma Deputy Director FOCUS in a rawn hmanpui a ni.

22/09/2021

COVID-19 positive thar 1355 hmuhchhuah ah Kolasib Dist mi 49 awm

Thawhlehni khan Mizoram ah Sample 8805 test a ni a, Covid-19 Positive mi 1355 hmuh a ni a. Sample test atanga chhutin Positive hmuh hi 15.39% a ni.

positive thar hmuhchhuah hi ZMC RT PCR a Sample test 1122 atanga hmuh 324, TrueNAT a Sample Test 288 atanga hmuh 56, RAgT a sample test 7189 atanga hmuh 945 bakah FIA (Fluorescent Immunoassay) a sample test 206 atanga hmuh 30 an awm a ni.

Hetihlai hian Kolasib Dist ah covid-19 kai hmuh thar mi 49 an awm a, an zinga 2 hi Aizawl a hmuh an ni a. RT PCR a sample an test atang hian ZMC a damlo enkawltu, Vairengte mi hmuh a awm a, RAgT atanga hmuh zingah hian Aizawl Hospital a inentir tura kal pakhat hmuh a awm bawk a ni.

TrueNAT ah Kolasib a Sample test 8 awmin mi 3 an Positive a, Pahnih hi Kolasib Tumpui veng a mi, Mipa k*m 53 mi leh Hmeichhia k*m 23 mi, inrinhlelh vanga sample test an ni a, pakhat dang hi Kolasib Hmar Veng a mi, Mipa k*m 58 a upa, positive contact atanga hri kai a ni.

Rapid Antigen hmanga Sample test 860 zingah Positive mi 44 hmuh an awm a. Bilkhawthlir ah 10 hmuhchhuah awmin, Mipa 4 leh Hmeichhia 6 an ni a. New Builum ah 8 awmin Mipa 2 leh Hmeichhia 6 an ni.

Kolasib Tumpui ah mi 6 awmin Mipa k*m 1 leh Hmeichhia 5 an ni a. Bairabi ah pawh mi 5 hmuh an ni a. Mipa 2 leh Hmeichhia 3 an ni a. Kolasib Venglai ah pawh mi 5 tho hmuh an ni a. Mipa 4 leh Hmeichhia 1 an ni.

Kolasib Diakkawn ah mi 2 hmuh awmin, Kawnpui, Kolasib Electric Veng, Kolasib Hmar Veng, Kolasib Project Veng, Pangbalkawn, Saipum, Vairengte Screening Point leh Zanlawn ah te mi 1 theuh hmuh an awm bawk a ni.

DUHLAIDAILY

29/07/2024

29/09/2021

28/09/2021

28/09/2021

28/09/2021

28/09/2021

28/09/2021

27/09/2021

27/09/2021

22/09/2021

22/09/2021

22/09/2021

Address

Telephone

Website

Alerts

Contact The Business

Shortcuts

Share

Category