19/09/2025
ശ്രേഷ്ഠ കാതോലിക്ക ബാവായെ വരവേൽക്കാൻ അയർലണ്ട് ഒരുങ്ങി; സന്ദർശനം ആഘോഷമാക്കാന അയർലണ്ടിലെ വിശ്വാസികൾ.
ഡബ്ലിൻ : മലങ്കര യാക്കോബായ സുറിയാനി ഓർത്തഡോക്സ് സഭയുടെ ശ്രേഷ്ഠ കാതോലിക്കായും, മലങ്കര മെത്രാപ്പോലീത്തായുമായ ആബൂൻ മോർ ബസ്സേലിയോസ് ജോസഫ് ബാവായെ വരവേൽക്കാൻ അയർലണ്ടിലെ വിശ്വാസി സമൂഹം ഒരുങ്ങി. കാതോലിക്ക സ്ഥാനലബ്ധിക്ക് ശേഷം ആദ്യത്തെ അയർലണ്ട് സന്ദർശനം ഗംഭീര ആഷോഘമാക്കാനുള്ള എല്ലാ ഒരുക്കങ്ങളും പൂർത്തിയായതായി ഭാരവാഹികൾ അറിയിച്ചു.
ഇന്ന് സെപ്റ്റംബർ 19 വെള്ളി മുതൽ 24 വരെയാണ് ശ്രേഷ്ഠ ബാവായുടെ അനുഗ്രഹീത സന്ദർശനം. ഇന്ന് അയർലണ്ട് ഷാനോൺ എയർപോർട്ടിൽ എത്തുന്ന ശ്രേഷ്ഠ ബാവായെ അയർലണ്ട് പാത്രിയാർക്കൽ വികാരി അഭിവന്ദ്യ മോർ അലക്സന്ത്രയോസ് തോമസ് മെത്രാപ്പോലീത്ത, ഭദ്രാസന വൈസ് പ്രസിഡന്റ് ഫാ. ജിനോ ജോസഫ്, സെക്രട്ടറി ഫാ. ഡോ. ജോബി സ്കറിയ, ട്രഷറർ സുനിൽ എബ്രഹാം എന്നിവരുടെ നേതൃത്വത്തിൽ ഭദ്രാസന ഭാരവാഹികളും കൗൺസിൽ അംഗങ്ങളും ഭക്തസംഘടനാ ഭാരവാഹികളും ചേർന്ന് സ്വീകരിക്കും. വൈകിട്ട് ഗാൽവേയിലേക്ക് പോകുന്ന ബാവ, ഗാൽവേ സെന്റ് ജോർജ് യാക്കോബായ സുറിയാനി ഓർത്തഡോക്സ് പള്ളിയിൽ സന്ധ്യാ പ്രാർത്ഥനക്ക് നേതൃത്വം നൽകും.
20-ന് ശനിയാഴ്ച വൈകിട്ട് 4ന് അയർലണ്ട് ഭദ്രാസനത്തിന്റെ ആഭിമുഖ്യത്തിൽ ബാവായ്ക്ക്, രാജ്യത്തെ ഇരുപത് യാക്കോബായ സുറിയാനി ഇടവകകളിൽ നിന്നുള്ള വിശ്വാസി സമൂഹം നോക്ക് ഷ്റൈനിൻ ഹൃദ്യമായ സ്വീകരണം നൽകും. തുടർന്ന് യൂറോപ്പിലെ പ്രമുഖ മരിയൻ തീർത്ഥാടന കേന്ദ്രമായ നോക്ക് പള്ളിയിൽ ബാവായുടെ മുഖ്യ കാർമികത്വത്തിലും അഭിവന്ദ്യ മോർ അലക്സന്ത്രയോസ് തോമസ് മെത്രാപ്പോലീത്തയുടെ സഹകാർമികത്വത്തിലും വിശുദ്ധ കുർബ്ബാന നടക്കും.
21ന് ഞായറാഴ്ച ഡബ്ലിൻ സെന്റ് ഗ്രീഗോറിയോസ് യാക്കോബായ സുറിയാനി ഓർത്തഡോക്സ് പള്ളിയുടെ 20-ാമത് വാർഷിക ആഘോഷ പരിപാടികളിൽ ബാവ പങ്കെടുക്കും. അയർലണ്ടിലെ വിവിധ സഭാ മേലധ്യക്ഷരും രാഷ്ട്രീയ സാംസ്കാരിക നേതാക്കളും പരിപാടിയിൽ സംബന്ധിക്കും. പിന്നീട് സെന്റ് ഗ്രിഗോറിയോസ് പള്ളി പുതുതായി വാങ്ങിയ സ്ഥലത്തിൻ്റെ കൂദാശയും ബാവ നിർവഹിക്കും. തുടർന്ന് ബാവ ബെൽഫാസ്റ്റിലേക്ക് പോകും.
22ന് തിങ്കളാഴ്ചച വാട്ടർഫോർഡ് സെന്റ് മേരീസ് പള്ളിയിൽ സന്ധ്യ പ്രാർത്ഥനയ്ക്ക് ബാവ നേതൃത്വം നൽകും. 23 ചൊവ്വാഴ്ച കത്തോലിക്കാ സഭയുടെ വാട്ടർഫോർഡ് ബിഷപ്പ് അൽഫോൻസാസ് കല്ലിനാനുമായി ബാവ കൂടിക്കാഴ്ച നടത്തും.
വൈകിട്ട് കോർക്ക് സെന്റ് പീറ്റേഴ്സ് യാക്കോബായ സുറിയാനി പള്ളിയിലും ബാവയ്ക്ക് സ്വീകരണം നൽകും. ഇവിടെ സന്ധ്യാ പ്രാർത്ഥനയോടെ സന്ദർശന പരിപാടി സമാപിക്കും.അയർലണ്ടിന്റെ സ്നേഹവായ്പ്പുകളെല്ലാം ഏറ്റുവാങ്ങി 24 ന് യുകെ സന്ദർശനത്തിനായി ഷാനോൺ എയർപോർട്ടിൽ നിന്നും ലണ്ടനിലേക്ക് ബാവ മടങ്ങും.
അയർലണ്ടിലെ യാക്കോബായ സുറിയാനി സഭയുടെ വളർച്ചയിൽ നാഴികക്കല്ലാവുന്ന ശ്രേഷ്ഠ ബാവായുടെ സന്ദർശനം ആഘോഷമാക്കാനുള്ള തയാറെടുപ്പിലാണ് അയർലണ്ടിലെ സഭാ വിശ്വാസികൾ. കാതോലിക്ക ബാവായുടെ സന്ദർശനത്തിന് നേതൃത്വം വഹിക്കുന്ന പാത്രിയാർക്കൽ വികാരി അഭിവന്ദ്യ മോർ അലക്സന്ത്രയോസ് തോമസ് മെത്രാപ്പോലീത്ത ഇന്നലെ തന്നെ ഡബ്ലിനിൽ എത്തിയിട്ടുണ്ട്.
അഭിവന്ദ്യ മോർ അലക്സന്ത്രയോസ് തോമസ് മെത്രാപ്പോലീത്തയുടെ നേതൃത്വത്തിൽ, ഫാ. ജിനോ ജോസഫ്, ഫാ. ഡോ. ജോബിമോൻ സ്കറിയ, ഫാ. ബിജോയ് കാരുകുഴിയിൽ, ഫാ. പീറ്റർ വർഗീസ്, സുനിൽ എബ്രഹാം, ജിബി ജേക്കബ്, ജെയ്മോൻ മാർക്കോസ്, സന്ദിപ് കല്ലുങ്കൽ, ബിനു ബി. അന്തിനാട്ട് എന്നിവർ ഉൾപ്പെട്ട വിപുലമായ കമ്മിറ്റിയാണ് ശ്രേഷ്ഠ ബാവായുടെ സന്ദർശനത്തിന് നേതൃത്വം നൽകുന്നത്.
