01/06/2026
പിണറായിയുടെ മകൾ വീണയുടെ വീട്ടിൽ Raid നടത്തിയ ഇ ഡി ഉദ്യോഗസ്ഥരെ ആക്രമിച്ച കേസിൽ ജയിലിൽ പോയ പാർട്ടി പ്രവർത്തകന്റെ വീട്ടിൽ സിപിഎം നേതാക്കൾ സന്ദർശനം നടത്തുന്ന ചിത്രമാണിത്. മുൻമന്ത്രി വി ശിവൻകുട്ടിയുടെ ഫേസ്ബുക് പോസ്റ്റിനൊപ്പമുള്ള പടമാണ്. ആ റെയ്ഡിനെ കുറിച്ചോ അറസ്റ്റിനെ കുറിച്ചോ അല്ല പറയാനുള്ളത്.
നിങ്ങൾ ആ വീടിന്റെ അകത്തേക്കൊന്നു നോക്കൂ. ആ വീട്ടിൽ താമസിക്കുന്ന കുടുംബത്തിന്റെ സാമ്പത്തിക നില വിളിച്ചറിയിക്കുന്നുണ്ട് ആ വീടകം. അങ്ങേയറ്റം പാവപ്പെട്ട കുടുംബമാകും എന്നുറപ്പാണ്. കേരളത്തിൽ ഏതെങ്കിലും പാർട്ടിയുടെ ഇച്ചിരിയെങ്കിലും മൂത്ത നേതാവിന്റെ വീട് ഇങ്ങനെ ഉണ്ടാകുമോ?
ആ വീട്ടുകാരൻ നിത്യം ജോലിക്ക് പോയിട്ടാകണം ആ വീട് പുലർന്നിട്ടുണ്ടാവുക. ജയിലിൽ നിന്ന് ഇനി എന്ന് ഇറങ്ങുമെന്നറിയില്ല. ജാമ്യത്തിൽ ഇറങ്ങിയാലും ആ കേസ് അവിടെത്തന്നെയുണ്ടാകും. അതിനു പിറകെ പിന്നെയും പോകേണ്ടി വരും. കോടതി കയറേണ്ടി വരും. ഒടുവിൽ ശിക്ഷ ഏറ്റുവാങ്ങേണ്ടിയും വരും. ഇത്തരം കൂരകളിൽ അന്തിയുറങ്ങി, മുണ്ട് മുറുക്കിയുടുത്ത് പാർട്ടികൾക്ക് വേണ്ടി തല്ലാനും കല്ലെറിയാനും ഒടുവിൽ ജയിലിൽ പോകാനും വിധിക്കപ്പെട്ട സാധുക്കൾ. നേതാക്കൾ വീടുകൾ സന്ദർശിക്കും. കുടുംബത്തിലുള്ളവരെ ആശ്വസിപ്പിക്കും. എല്ലാം നല്ലതു തന്നെ. പക്ഷേ ഇപ്പറയുന്ന ഒരു നേതാവിൻ്റെ മകനെയും നിങ്ങൾ തെരുവിൽ കാണില്ല. അവർ പോലീസിന്റെ അടി മേടിക്കുന്നത് ധീരതയായി കാണുന്നില്ല. ജയിലിൽ പോകാനും പോലീസ് സ്റ്റേഷനും കോടതിയും കയറാനും വേണ്ടി..
ചെറുപ്പക്കാരേ, യുവാക്കളേ, പാർട്ടിക്കാരേ.. നിങ്ങൾ ആഗ്രഹിക്കുന്ന കാലം വരെയും രാഷ്ട്രീയത്തിൽ പ്രവർത്തിച്ചോളൂ. സമരം ചെയ്തോളൂ. പക്ഷേ വീടിനെയും വീട്ടുകാരെയും മറന്നുകൊണ്ട് ആർക്കുവേണ്ടിയും നിങ്ങൾ തല്ലാനിറങ്ങരുത്, തല്ല് കൊള്ളാനുമിറങ്ങരുത്. നിങ്ങളുടെ തല ആർക്കും തല്ലിപ്പൊളിക്കാനുള്ളതല്ല. നിങ്ങളുടെ കൈകൾ ആരുടെയും തല എറിഞ്ഞുടയ്ക്കാനുള്ളതുമല്ല.
