14/09/2026
പുത്തൻകാവിന്റെ അമൂല്യരത്നം – 6-ആം മാർത്തോമ്മാ / വലിയ മാർ ദീവന്നാസിയോസ് (ഏപ്രിൽ 7, 1808) [Marthomma VI alias Mar Dionysius the Great]
പുത്തൻകാവ് പള്ളിയിൽ പെരുന്നാൾ കൂടുന്നതിനായി ചെറുപ്പം മുതലുള്ള യാത്രകൾ മനസ്സിൽ നിന്ന് ഇന്നും മാഞ്ഞിട്ടില്ല. മാതാപിതാക്കളുടെ ജോലിസ്ഥലമായ കുണ്ടറയിൽ നിന്നും, പിന്നീട് സ്വദേശമായ പത്തനംതിട്ടയിൽ നിന്നും മുടങ്ങാതെ എല്ലാ വർഷവും ഏപ്രിൽ 17-ന് വന്ന് പങ്കെടുത്തിരുന്ന ആ വേളകൾ പുത്തൻകാവിൽ കൊച്ചുതിരുമേനിയുടെ ഓർമ്മ ആണെന്നതല്ലാതെ മറ്റൊന്നും മനസ്സിൽ പതിഞ്ഞിരുന്നില്ല. എന്നാൽ മനസ്സിൽ പതിഞ്ഞ കൌതുകകരമായ ഒരു കാഴ്ചയുണ്ടായിരുന്നു. അത് മറ്റൊന്നുമല്ല. ദേവാലയത്തിന്റെ വലത്തെ ഭിത്തിയിൽ വിശ്വാസികളുടെ കണ്ണുകളിലേക്ക് സൂക്ഷിച്ചുനോക്കും വിധം കാണപ്പെട്ടിരുന്ന, കാൽമുട്ടിന് താഴേക്ക് ഒഴുകിക്കിടക്കുന്ന, നീണ്ട, വെളുത്ത താടിമീശയുള്ള ഒരു പിതാവിന്റെ ചിത്രം. വർഷങ്ങൾ കഴിഞ്ഞിട്ടും പുത്തൻകാവ് പള്ളി സ്ഥാപകൻ കൂടിയായ, ആറാം മാർത്തോമ്മാ എന്ന, ആ പിതാവിന്റെ ചിത്രം എന്തേ മനസ്സിൽ നിന്നും എടുത്തുമാറ്റുവാൻ കഴിയാത്തത് എന്ന്, ആ പിതാവിനെ മനസ്സിന്റെ ഉള്ളറകളിൽ ഒരിക്കലും മായാത്ത വിധം സൂക്ഷിക്കുന്ന പുത്തൻകാവുകാർ ആ പിതാവിനെ കുറിച്ച് പറഞ്ഞ് കേൾക്കും വരെ മനസ്സിലായതേയില്ല. മലങ്കരയിലെ നസ്രാണിസമൂഹം കാലങ്ങളായി നേരിട്ടുകൊണ്ടിരുന്ന വെല്ലുവിളികൾക്ക് പ്രതിഫലമായി, അവരുടെ പ്രാർത്ഥനകൾക്കും നാഡിമിടിപ്പിനുമൊത്തവണ്ണം, അവർക്ക് യോജ്യമായ ദൈവികഫലങ്ങൾ സ്വീകരിക്കയും കൈമാറുകയും ചെയ്യുന്ന പിതാക്കന്മാർ, മലങ്കരയുടെ അഭിമാനമായ അക്ഷയസമ്പത്തായിരുന്നു. ആ പിതാക്കന്മാർ സ്വാർത്ഥലാഭേശ്ചയില്ലാതെ പ്രാർത്ഥനയാലും സമർപ്പണത്താലും നിശ്ശബ്ദപോരാട്ടങ്ങളാലും നേടിയ നേട്ടങ്ങൾ അളവറ്റതാണ്. ആ ആത്മീയനിസ്വന്മാർ നമ്മുടെ മനങ്ങളിലേക്ക് വേരുകളാഴ്ത്തുന്നതിന്റെ ആദ്യപടിയായിരുന്നിരിക്കാം ആ ചിത്രത്തിൽ ബാല്യകാലത്ത് തന്നെ കണ്ണുടക്കിയത് (സമീപത്തുള്ള ചിത്രത്തിലെ എട്ടാം മാർത്തോമ്മായും ഇടവകയുമായി ഇഴ പിരിയാത്ത ബന്ധമുണ്ടായിരുന്ന് അവിടെത്തന്നെ കബറടക്കപ്പെട്ടതുമായ പിതാവാണ്) എന്നും പില്ക്കാലത്ത് ആ പിതാവിനെ കുറിച്ച് കൂടുതൽ വായിച്ചറിയുവാനിടയായതും എന്ന് ഈ സമയത്ത് ബോധ്യമാകുന്നു.
പുത്തൻകാവിന്റെ മണ്ണിനെയും, വിശ്വാസവുമായി ഇഴചേർന്ന സംസ്കാരത്തെയും, ആ പൈതൃകം ശ്വാസത്തിലും ഹൃദയത്തിലും ആത്മാവിലും വഹിച്ചിരുന്ന വിശ്വാസീസമൂഹത്തെയും തന്നിലുള്ള ദൈവികപ്രഭാവത്താൽ കീഴടക്കിയ അന്ത്രയോസ് (കല്ലട വല്യപ്പൂപ്പൻ) ബാവായുമായുള്ള ഇടവകയുടെ ബന്ധവും, ആ ദേവാലയത്തിൽ കബറടക്കപ്പെട്ടിരിക്കുന്ന 2 മാർത്തോമ്മാമാരുമായും പുത്തൻകാവിൽ കൊച്ചുതിരുമേനിയുമായുള്ള വേർപിരിക്കാനാകാത്ത ബന്ധവും തദ്ദേശീയരായ ആർക്കും വിസ്മരിക്കാവതല്ല. സഭാപിതാക്കന്മാരെ സ്വകുടുംബത്തിലെ അംഗങ്ങളായി ആദരവോടെ കണ്ടുതുടങ്ങുന്നത് ഏകദേശം 18-ആം നൂറ്റാണ്ടിന്റെ മദ്ധ്യഭാഗത്തോടെ, പുത്തൻകാവ് ആസ്ഥാനമായി സഭയെ നയിച്ച മാർത്തോമ്മാ ആറാമൻ എന്ന വലിയ മാർ ദീവന്നാസിയോസ് പിതാവിൽ നിന്ന് ആയിരുന്നു. മാർത്തോമ്മാ മെത്രാൻ സ്ഥാനം ഏറ്റവും കൂടുതൽ കാലം [1765-1808] വഹിച്ച ആ പിതാവിനെയും, ആ പിതാവിന്റെ, അധികമാർക്കും പരിചിതമല്ലാതെ മറയപ്പെട്ടുകിടക്കുന്ന ജീവിതത്തെയും, പുതുതലമുറയിൽ ഏവർക്കും സഭാമക്കൾക്കും, പരിചയപ്പെടുത്തുന്നതിലേക്കായി ഏവരുടെയും ശ്രദ്ധയെ ക്ഷണിക്കുന്നു:
ജനനം / സ്ഥാനാരോഹണം
ജനനം പകലോമറ്റം തറവാട്ടിൽ ഏകദേശം AD 1728-ലായിരുന്നു എന്നും ആത്മീയമായ പരിശീലനവും സമർപ്പണവും ദൃശ്യമായ ആ മകനെ ദൈവവേലയ്ക്ക് യോഗ്യനെന്ന് കണ്ട് അഞ്ചാം മാർത്തോമ്മാAD 1757-ൽ വൈദികനായും AD 1761 ജൂലൈ 10-ആം തീയതി മെത്രാപ്പോലീത്തായായും സഭാസേവനത്തിനുമായി വാഴിച്ചു എന്നുമാണ് വിശ്വസിക്കപ്പെടുന്നത്. അഞ്ചാം മാർത്തോമ്മായുടെ പിൻഗാമിയായി അദ്ദേഹത്തിന്റെ ദേഹവിയോഗത്തിന് (മെയ് 8, 1765) ശേഷം നിയോഗിക്കപ്പെടുകയും, ആറാം മാർത്തോമ്മാ എന്ന പേരിൽ നിരണം പള്ളിയിൽ വച്ച് അവരോധിക്കപ്പെട്ട് സഭാഭരണം ഏറ്റെടുക്കുകയും ചെയ്തതായാണ് ചരിത്രത്താളുകളിൽ നിന്ന് മനസ്സിലാകുന്നത്. ഭരണത്തിന്റെ ആദ്യനാളുകളിൽ അപ്രതീക്ഷിതമായ എതിർപ്പുകളും വെല്ലുവിളികളും വിദേശത്തുനിന്ന് കടന്നുവന്നവരായ പിതാക്കന്മാരിൽ നിന്ന് തന്നെ ഉണ്ടായെങ്കിലും സഭയുടെ വളർച്ചയ്ക്കും പ്രയാണത്തിനും അവരോട് സമരസപ്പെട്ട് ദീവന്നാസിയോസ് എന്ന പേര് സ്വീകരിക്കുകയും ചെയ്തുകൊണ്ടാണ് അദ്ദേഹം ഭരണസാരഥ്യം ഏൽക്കുന്നത്. മലങ്കര സഭാ പിതാക്കന്മാരിൽ “ദീവന്നാസിയോസ്” എന്ന നാമം സ്വീകരിക്കുന്ന ആദ്യ പിതാവായിരുന്നു മാർത്തോമ്മാ ആറാമൻ. ആയതിനാൽ ദീവന്നാസിയോസ് ഒന്നാമൻ എന്നും വലിയ മാർ ദീവന്നാസിയോസ് എന്നീ അപരനാമങ്ങളിലും അദ്ദേഹം അറിയപ്പെടുന്നുണ്ട്.
മാർത്തോമ്മാ ആറാമൻ (ദീവന്നാസിയോസ് ഒന്നാമൻ) അപൂർവ്വവും അനിതരസാധാരണവുമായ പല സവിശേഷതകളുടെയും നേട്ടങ്ങളുടെയും ഉടമയായിരുന്നു. അതുകൊണ്ട് തന്നെ 1765 മുതൽ നീണ്ട 43 വർഷങ്ങൾ സംഭവബഹുലവും, ചരിത്രപ്രാധാന്യമേറിയതും, ദൈവികനിയന്ത്രണത്താൽ അത്ഭുതകരവുമായ അനേകം സംഭവങ്ങളുടെയും കാലമായിരുന്നു. അസാമാന്യമെന്ന പ്രതീതിയുളവാക്കുന്ന ദൈവാനുഗ്രഹലബ്ധിയ്ക്ക് കാരണഭൂതനായിരുന്ന പരി. പിതാവിന്റെ ഭരണകാലത്ത് പ. സഭയിൽ ദൃശ്യമായ സംഭവങ്ങളിൽ തൊഴിയൂർ (മലബാർ സ്വതന്ത്ര സുറിയാനി സഭ) സഭയുടെ ഉത്ഭവം (1772), ടിപ്പു സുൽത്താന്റെ ആക്രമണം (1789), ഡോ. ക്ലോഡിയസ് ബുക്കാനന്റെ ആഗമനം (1806), ആർത്താറ്റ് പടിയോല (1806), മലയാളത്തിലെ ആദ്യ ബൈബിൾ വിവർത്തനത്തിന്റെ പ്രാരംഭനടപടികൾ, വട്ടിപ്പണം ശേഖരണം എന്നിവ എടുത്തുപറയേണ്ടവയാണ്.
മലയാളം വേദപുസ്തകത്തിന്റെ ആദ്യനാളുകൾ
ദൈവവചനം വിശ്വാസിമനസ്സുകളിലേക്ക് ആഴത്തിൽ വേരൂന്നുന്നതിന് മാതൃഭാഷയിലുള്ള വേദപുസ്തകത്തിന്റെ പതിപ്പ് ആവശ്യമാണെന്ന് തിരിച്ചറിയുവാൻ പിതാവായ ദൈവം മാർത്തോമ്മാ ആറാമൻ തിരുമേനിയ്ക്ക് അവസരം നല്കിയത് തികച്ചും വിസ്മയകരമായ രീതിയിലായിരുന്നു. 1806-ൽ മലങ്കരയിലെത്തിയ ആംഗ്ലിക്കൻ ബിഷപ്പിന്റെ പ്രതിനിധിയായ ഡോ. ക്ലോഡിയസ് ബുക്കാനന് ആയിരം വർഷം പഴക്കമുള്ള ബൈബിൾ പ. പിതാവ് സമ്മാനിക്കുകയുണ്ടായി. ഡോ. ബുക്കാനന് നൽകിയ വേദപുസ്തകത്തെ അടിസ്ഥാനപ്പെടുത്തിയുള്ള സംഭാഷണം വഴി മലയാളത്തിൽ വേദപുസ്തകം പ്രസിദ്ധീകരിക്കേണ്ടത് അത്യന്താപേക്ഷിതമാണെന്ന് പ. പിതാവിന് ബോധ്യമായതും ഡോ. ബുക്കാനന്റെ നിർദ്ദേശങ്ങളും ഏതാനും നാളുകൾക്കുശേഷം 4 സുവിശേഷങ്ങളും പ്രസിദ്ധീകരിക്കുന്നതിന് മുൻകൈയെടുത്ത് ആ ശ്രമം ഊർജ്ജിതപ്പെടുത്തുവാനും മാർത്തോമ്മാ ആറാമന് സഹായകമായി. അതിനെ തുടർന്ന് കായംകുളം ഫിലിപ്പോസ് റമ്പാൻ, പുലിക്കോട്ടിൽ ഇട്ടൂപ്പ് റമ്പാൻ, തമിഴ് വൈയാകരണനായ തിമ്മയ്യാപ്പിള്ള എന്നിവരുടെ പങ്കാളിത്തത്തോടെ 1811-ൽ ആദ്യ മലയാളം വേദപുസ്തകം പുറത്തിറക്കുവാൻ വഴിയൊരുങ്ങുകയും ചെയ്തു.
വട്ടിപ്പണം എന്ന ആത്മീയവഴികാട്ടി
സഭയിലും സമൂഹത്തിലും സാമ്പത്തികമായി മുന്നോക്കമായവർ കുറവായിരുന്നുവെങ്കിലും, ജീവകാരുണ്യപ്രവർത്തനങ്ങൾ സഭയുടെ ആത്മീയജീവനാഡിയാണെന്ന തിരിച്ചറിവോടെ, മാർത്തോമ്മാ ആറാമൻ അതിനാവശ്യമായ നടപടികൾ സ്വീകരിക്കുകയുണ്ടായി. സഭയുടെ സമ്പത്തായ കുഞ്ഞാടുകൾക്കുൾപ്പെടെ ഉള്ളവർക്ക് സഹായമാകും വിധം കൃത്യമായ ഇടവേളകളിൽ ലഭിക്കും വിധം ഒരു തുക സ്വരൂപിക്കുക എന്നതായിരുന്നു അതിലൊന്ന്. അപ്രകാരം 3000 പൂവരാകൻ 8 ശതമാനം പലിശയിൽ ബ്രിട്ടീഷ് ഈസ്റ്റിൻഡ്യാ കമ്പനിയിൽ നിക്ഷേപിച്ചതാണ് ‘വട്ടിപ്പണം‘ എന്ന പേരിൽ പിന്നീട് അറിയപ്പെട്ട, പ. സഭയുടെ ആത്മീയമണ്ഡലങ്ങളിൽ ക്രിസ്തുവിന്റെ ദർശനങ്ങൾ നടപ്പിലാക്കുവാൻ കാരണമായത്. മേൽപ്പറഞ്ഞ തുക സ്വരൂപിച്ചത് മാർത്തോമ്മാ ആറാമൻ ആണെങ്കിലും അത് നിക്ഷേപിച്ചത് അദ്ദേഹത്തിന്റെ പിൻഗാമിയായ മാർത്തോമ്മാ ഏഴാമൻ ആയിരുന്നു. എങ്കിലും സഭാംഗങ്ങളിൽ അനാഥരും അശരണരും ആയവർക്ക് വേണ്ടി ദീർഘവീക്ഷണത്തോടെയുള്ള ആ തീരുമാനം സഭയുടെ ജീവകാരുണ്യപ്രവർത്തികളിലേക്കുള്ള മികച്ച ചുവടുവെയ്പ്പായി എന്നതിൽ മാർത്തോമ്മാ ആറാമൻ തിരുമേനി എന്നെന്നും ഓർമ്മിക്കപ്പെടും എന്നതിൽ സംശയമില്ല.
പുത്തൻകാവ് പള്ളി സ്ഥാപനം
പുത്തൻകാവ് ദേശവാസികളായ മലങ്കര നസ്രാണികളുടെ ആഗ്രഹം കണ്ടറിഞ്ഞ് മാർത്തോമ്മാ ആറാമൻ പണികഴിപ്പിച്ച ദേവാലയമാണ് പുത്തൻകാവ് സെന്റ് മേരീസ് കത്തീഡ്രൽ. തിരുവിതാംകൂർ രാജാവായിരുന്ന കാർത്തിക തിരുനാൾ മഹാരാജാവ് കരമൊഴിവായി നല്കിയ സ്ഥലത്താണ് പള്ളി പണികഴിപ്പിച്ചിട്ടുള്ളത്. AD 1793-ൽ പണി ആരംഭിക്കുകയും AD 1795-ൽ പണി പൂർത്തീകരിക്കുകയും ചെയ്ത ചരിത്രപ്രശസ്തമായ പള്ളിയിലെ ആദ്യ വി. കുർബ്ബാന അർപ്പിച്ച് ദേവാലയകൂദാശ നിർവഹിക്കപ്പെടുന്നതിനും മുന്നിൽ നിന്നത് ആറാം മാർത്തോമ്മാ പിതാവായിരുന്നു. സഭയുടെ കാതലായ പല തീരുമാനങ്ങൾക്കും വേദിയായ മലങ്കര അസ്സോസിയേഷനുകൾക്ക് ഇടവക ആതിഥ്യമരുളിയിട്ടുണ്ട് എന്നതിന് പുറമെ എട്ടാം മാർത്തോമ്മായുടെയും ‘മലങ്കരയുടെ രത്നദീപം‘ പുത്തൻകാവിൽ തിരുമേനിയുടെയും കബറിടങ്ങളും കൊണ്ടും ഈ ദേവാലയം ശ്രദ്ധിക്കപ്പെടുന്നു. ചെങ്ങന്നൂർ ഭദ്രാസനത്തിന്റെ പ്രഥമ മെത്രാപ്പോലീത്താ ഭാഗ്യസ്മരണാർഹനായ തോമസ് മാർ അത്തനാസിയോസ്, മഹാകവി പുത്തൻകാവ് മാത്തൻ തരകൻ, ഡോ. കെ. എം. തരകൻ, അവിഭക്ത കേരളത്തിലെ ആദ്യ മന്ത്രിസഭയായ ഇ.എം.എസ് മന്ത്രിസഭയിൽ അംഗമായിരുന്ന കെ. സി. ജോർജ് എന്നിവർ ഈ ഇടവകാംഗങ്ങളായിരുന്നു.
അന്ത്യം, കബറടക്കം
മുൻഗാമികളും സമകാലീനരുമായ പിതാക്കന്മാരെ കുറിച്ച് പഠിക്കുമ്പോൾ താരതമ്യേന ദീർഘനാൾ ശ്രേഷ്ഠമായും ഫലപ്രദമായും ഭരണച്ചുമതല നിറവേറ്റിയശേഷം ആ വന്ദ്യ പിതാവ് 1808 ഏപ്രിൽ 7-ആം തീയതി നാല്പതാം വെള്ളിയാഴ്ച ദിനത്തിൽ നിരണം പള്ളിയിൽ വച്ച് കഥാവശേഷനായി. പീഡനങ്ങളും അടിച്ചമർത്തലുകളും അവമതിപ്പും ഏറെ ഏറ്റുവാങ്ങിയ, തന്റെ സഭയ്ക്കായി അത് നേട്ടങ്ങളുടെ പൂച്ചെണ്ടുകളാക്കി മാറ്റിയ ആ ശ്രേഷ്ഠപിതാവ് തന്റെ ജീവിതത്തിന്റെ കൂടുതൽ സമയവും താൻ ചെലവഴിച്ച പുത്തൻകാവ് പള്ളിയുടെ വി. മദ്ബഹായിൽ ആ പിതാവ് തനിയ്ക്കായി നിശ്ചയിച്ചിരുന്ന സ്ഥാനത്ത് തന്നെ കബറടക്കുകയും ചെയ്തു.
മറയപ്പെട്ടുകൂടാത്ത ചില യാഥാർത്ഥ്യങ്ങൾ
മാർത്തോമ്മാ ആറാമൻ തിരുമേനിയുടെ ജീവിതവുമായി പ്രത്യക്ഷത്തിൽ ബന്ധമുള്ളതും മറയ്ക്കപ്പെട്ടുകൂടാത്തതുമായ ചില കയ്പ്പൻ യാഥാർത്ഥ്യങ്ങൾ:
* AD 1761-ൽ മെത്രാപ്പോലീത്തായായി വാഴിക്കപ്പെട്ടുവെങ്കിലും വിദേശത്ത് നിന്ന് മലങ്കരയിലെത്തിയ സിറിയൻ പിതാക്കന്മാരുടെ ഒളിഞ്ഞും തെളിഞ്ഞുമുള്ള ആക്രമണത്തിന്റെ ഭാഗമായി 1770-ൽ അവരുമായി താൽക്കാലികമായി രമ്യതപ്പെട്ടതുകൊണ്ട് കൂടിയാണ് ദീവന്നാസിയോസ്‘ എന്ന പേര് സ്വീകരിച്ച് മലങ്കരസഭാഭരണകർത്താവായി ചുമതലയേൽക്കുന്നത്.
* മാർത്തോമാ ശ്ലീഹായുടെ പൈതൃകം പേറുന്ന എല്ലാ ക്രൈസ്തവരും ഒരുമിക്കണമെന്നും അവർക്ക് ഒറ്റ ആത്മീയനേതാവ് മാത്രമേ ഉണ്ടാകാവൂ എന്ന ഉദ്ദേശ്യത്തിൽ പ്രവർത്തിച്ചിരുന്ന തച്ചിൽ മാത്തു തരകൻ, മലങ്കര മെത്രാപ്പോലീത്തായെയും സഭാംഗങ്ങളെയും പീഡിപ്പിക്കുകയും ഭീഷണിപ്പടുത്തുകയും ചെയ്തുകൊണ്ടിരുന്നു. വിശ്വാസികളുടെ ബുദ്ധിമുട്ടുകൾ കാരണം ആ നിർദ്ദേശം പ്രാവർത്തികമാക്കുവാനുള്ള ഉടമ്പടി വായിച്ചുപോലും നോക്കാതെ ഒപ്പുവയ്ക്കുവാൻ ആറാം മാർത്തോമ്മാ നിർബന്ധിതനായി. ആ ഉടമ്പടി പ്രകാരം മലങ്കരസഭ താൽക്കാലികമായി റോമാ നുകത്തിന് കീഴിലാക്കപ്പെട്ടു. അത് പരസ്യമായി പരസ്യപ്പെടുത്തുവാൻ ആ പിതാവിനെ കൊണ്ട് നിർബന്ധിച്ച് തത്തമ്പള്ളി പള്ളിയിൽ വച്ച് പത്തീറ (പുളിപ്പില്ലാത്ത അപ്പം) ഉപയോഗിച്ച് വി. കുർബ്ബാന ചൊല്ലിക്കുകയുണ്ടായി. ആ വേദനാജനകമായ നടപടിയ്ക്ക് ശേഷം ഹൃദയം തകർന്നവനായി അനേകദിനങ്ങൾ ആ പിതാവ് ചെങ്ങന്നൂർ പള്ളിയിൽ ഉപവാസത്തിലും പ്രാർത്ഥനയിലുമായി കഴിയുകയും, ആ ഉടമ്പടി അസാധുവാക്കപ്പെട്ടപ്പോൾ പട്ടക്കാരുടെയും വിശ്വാസികളുടെയും ഒപ്പം 41 ദിവസം തുടർച്ചയായി വി. കുർബ്ബാന അർപ്പിച്ച് തന്റെ വീഴ്ചയ്ക്ക് പ്രായശ്ചിത്തം ചെയ്യുകയും ചെയ്തു.
* AD 1796-ൽ തന്റെ പിൻഗാമിയായി 7-ആം മാർത്തോമ്മായെ ചെങ്ങന്നൂർ പഴയ സുറിയാനി പള്ളിയിൽ വച്ച് ആറാം മാർത്തോമ്മാ വാഴിക്കുകയുണ്ടായി.
ഉപസംഹാരം:
മലങ്കരസഭയുടെ ക്രമാനുഗതമായ വളർച്ചയുടെ കാലഘട്ടത്തിലെ കിതപ്പിന്റെയും കുതിപ്പിന്റെയും മദ്ധ്യേയുള്ള അനുഗ്രഹീതമായ വിജയഗാഥയ്ക്ക് മുഖാന്തിരമായ പിതാക്കന്മാരിലൊരാളായിരുന്നു പരി. ആറാം മാർത്തോമ്മാ അഥവാ വലിയ മാർ ദീവന്നാസിയോസ്. ത്രിയേകദൈവം കൈകളിലേൽപ്പിച്ച സഭയുടെ ഇടയനായി സഹനം, ദൃഢവിശ്വാസം, ആത്മീയദർശനം എന്നിവകളെ കോർത്തിണക്കി നാളത്തെ സഭയ്ക്കും സഭാമക്കൾക്കുമായി ഇന്നത്തെ സ്വർഗ്ഗീയമദ്ധ്യസ്ഥനായി നമുക്ക് മാതൃക കാട്ടുകയും പ്രത്യാശ നല്കുകയും ചെയ്ത ആ പിതാവിനെ നമുക്ക് സ്മരിക്കാം! ആ പിതാവിന്റെ മദ്ധ്യസ്ഥത നമുക്ക് അഭയവും കോട്ടയുമാകട്ടെ!
ക്രിസ്തുവിൽ സഹോദരൻ,
( ജോർജിയൻ. )
അജോയ് ജേക്കബ് ജോർജ്.
മാക്കാംകുന്ന് / കുവൈറ്റ്.
മലങ്കര സഭയെ നെഞ്ചിൽ ഏറ്റിയ പിതാക്കൻ മാരെ പറ്റി കൂടുതൽ അറിയുവാൻ സന്ദർശിക്കുക :
https://georgianspear.wordpress.com/
![അഞ്ചാം മാർത്തോമ്മാ എന്ന ധീരനായ പോരാളി (മെയ് 8, 1765) [Marthomma V, the brave leader of Nasranis]കൂനൻ കുരിശ് സത്യത്തെ തുട...](https://img4.medioq.com/055/874/1516008660558747.jpg)
![പുണ്യവാനും കാര്യശേഷിയുടെ കാതലുമായ 4-ആം മാർത്തോമ്മാ (മാർച്ച് 24, 1728) [Marthomma IV, Kandanad]കുഞ്ഞാടുകളും പോരാളികളും മേ...](https://img3.medioq.com/397/984/1515131023979844.jpg)
