08/04/2026
നസീർ ഹുസൈൻ എഴുതുന്നു.. 👇👇
കാൽ നൂറ്റാണ്ട് മുൻപ്, ഞാൻ കേരളത്തിൽ ഉണ്ടായിരുന്ന സമയത്ത് ഇടതുപക്ഷത്തിന്റെ ഇമേജ് വികസനവിരോധികൾ എന്നായിരുന്നു. എന്നും എല്ലാത്തിനും സമരം ചെയ്തു കൊണ്ടിരിക്കുന്നവർ എന്നായിരുന്നു അവരെക്കുറിച്ചുള്ള ധാരണ. പ്രീഡിഗ്രി ബോർഡ് സമരം, സ്വാശ്രയ കോളേജ് സമരം തുടങ്ങി അനേകം സമരങ്ങൾ. കോൺഗ്രസ് വികസനത്തിന് വേണ്ടി നിലകൊണ്ടവരായിരുന്നു. ഉദാഹരണത്തിന് കരുണാകരൻ നെടുമ്പാശേരി എയർപോർട്ട് കൊണ്ടുവന്നു, കലൂർ സ്റ്റേഡിയം കൊണ്ടുവന്നു. ഇടതുപക്ഷത്തിന് അതുപോലെ ചൂണ്ടി കാണിക്കാൻ ഒന്നും വാർത്തകളിൽ ഉണ്ടായിരുന്നില്ല. കുറച്ചൊക്കെ അഴിമതി കാണിച്ചാലും നാടിൻറെ വികസനത്തിന് കോൺഗ്രസ് വേണം എന്നായിരുന്നു ഒരു പൊതു ധാരണ. അവരുടെ അഴിമതിയും ദുർഭരണവും മടുത്ത് മാത്രമാണ്, ഉറച്ച പാർട്ടി വോട്ടുകൾക്ക് അപ്പുറം, ഇടതുപക്ഷത്തിന് നിഷ്പക്ഷ വോട്ടുകൾ കിട്ടിയിരുന്നത്.
പക്ഷെ കാൽ നൂറ്റാണ്ടിൽ കാര്യങ്ങൾ വളരെ മാറി. ഇടതുപക്ഷം വികസനവിരോധികളെന്ന് ഇന്നാരും പറയുമെന്ന് തോന്നുന്നില്ല. നൂറുകണക്കിന് വികസനപ്രവർത്തനങ്ങൾ ആളുകളുടെ കണ്മുന്നിൽ തന്നെയുണ്ട്. ഗെയിൽ പൈപ്പ് ലൈൻ, കൊച്ചി വാട്ടർ മെട്രോ, വിഴിഞ്ഞം തുറമുഖം, മലയോര തീരദേശ ഹൈവേ, കെ ഫോൺ, ഡിജിറ്റൽ യൂണിവേഴ്സിറ്റി, കേരളത്തിലെ ഹൈവേക്ക് സംസ്ഥാന സർക്കാർ പൈസ മുടക്കി സ്ഥലം ഏറ്റെടുത്ത് കൊടുത്ത് അതിന്റെ നിർമാണം പുരോഗമിക്കുന്നത്, ലൈഫ് മിഷൻ, സ്കൂളുകളുടെയും ആശുപത്രികളുടെയും സൗകര്യം മെച്ചപ്പെടുത്തിയത്, ആർദ്രം മിഷൻ, ഇടമൺ കൊച്ചി പവർ ഹൈവേ തുടങ്ങി എണ്ണിയാൽ ഒടുങ്ങാത്ത വികസന പ്രവർത്തനങ്ങൾ ഇടതുപക്ഷം കൊണ്ടുവന്നു. അതിനൊക്കെ എങ്ങിനെ പൈസ കണ്ടെത്തും എന്ന് സംശയിച്ചവർക്ക് കിഫ്ബി എന്നൊരു ആശയം അവതരിപ്പിച്ചു, പ്രാവർത്തികമാക്കി.
കൊണ്ഗ്രെസ്സ് വികസനത്തിന്റെ കൂടെ നടത്തിയ അഴിമതികൾ ആയിരുന്നു അവരുടെ പ്രധാന പ്രശ്നം. രാഷ്ട്രീയ മാറ്റത്തിനു വേണ്ടി സ്വന്തം പാർട്ടിയുടെ അകത്ത് തന്നെ ഉള്ളവർക്ക് എതിരെ ഉന്നയിച്ച ISRO കേസ്, പാലാരിവട്ടം പാലം അഴിമതി തുടങ്ങി അനേകം അഴിമതി ആരോപണങ്ങൾ ഉയർന്നു. പണ്ട് വികസനത്തിന് വേണ്ടി വോട്ടു ചോദിക്കുന്നവർ കോൺഗ്രസ് ആയിരുന്നെങ്കിൽ ഇന്ന് അത് ഇടതുപക്ഷം ആയി മാറി, അതും സീരിയസ് ആയി ഒരു അഴിമതി ആരോപണങ്ങളും ഇല്ലാതെ. കഴിഞ്ഞ തവണ യുഡിഫ് പ്രയാജയപ്പെടാനും, ഇത്തവണ മൂന്നാമത്തെ തവണ അധികാരത്തിന് വേണ്ടി മത്സരിക്കുന്ന എൽഡിഫ് ആത്മധൈര്യത്തോടെ നിൽക്കാനും കാരണം വികസനം തന്നെയാണ്. കോൺഗ്രസ് അധികാരത്തിൽ വന്നാൽ തന്നെ അവർ വിയർക്കാൻ പോകുന്നതും ഒരു അഴിമതിയും ഇല്ലാതെ ഇതിനേക്കാൾ വലിയ വികസനം എങ്ങിനെ സാധ്യമാകും എന്നതിൽ ആയിരിക്കും.
കേരളം നമ്മൾ കരുതുന്നത് പോലെ തലച്ചോർ കൊണ്ട് ആലോചിച്ച് വോട്ട് ചെയുന്ന ഒരു ജനതയൊന്നും ആണെന്ന് ഞാൻ കരുതുന്നില്ല. മറിച്ച് അവർ വികാരപരമായി പലപ്പോഴും വോട്ട് ചെയ്യാറുണ്ട്. ചെല്ലാനത്ത് കോടിക്കണക്കിന് രൂപയുടെ വികസന പ്രവർത്തനങ്ങൾ നടത്തിയ പഞ്ചായത്തിൽ ഇടതുപക്ഷം തോറ്റത് നമ്മൾ കണ്ടതാണ്. മതവും ജാതിയുമൊക്കെ ഇന്നും വോട്ടിനെ സ്വാധീനിക്കുന്ന ഒരു ജനതയാണ് നമ്മൾ. രണ്ടുതവണ ഭരിച്ച ഒരു സർക്കാരിന് എതിരെ , വെറുതെ ഒരു മാറ്റത്തിന് വേണ്ടി മാത്രം , വെറുതെ ഒരു രസത്തിന് വോട്ട് ചെയ്യാൻ മടിയില്ലാത്ത ഒരു ജനത കൂടിയാണ് നമ്മൾ. അതുകൊണ്ട് കോൺഗ്രസ് വെറുതെ നിന്നാൽ ജയിക്കാവുന്ന ഒരു തിരഞ്ഞെടുപ്പ് ആയിരുന്നു ഇത്. ഒരു പക്ഷെ മുസ്ലിം ലീഗ് ചെയ്തത് പോലെ, ചൂരൽ മലയിൽ കോൺഗ്രസ് വീട് വച്ച് കൊടുത്തിരുന്നെങ്കിൽ, അവരുടെ നേതാക്കൾ പരസ്യമായി തല്ലു കൂടാതെ ഇരുന്നെങ്കിൽ, കയ്യും വീശി ജയിക്കാവുന്ന ഒരു തിരഞ്ഞെടുപ്പ് അവർ കുളമാക്കി ഇടതുപക്ഷത്തിന് കൂടുതൽ സാധ്യത ഉണ്ടാക്കി കൊടുത്തത് കൊണ്ട് മാത്രം ഒരു ഫോട്ടോ ഫിനിഷിലേക്ക് മാറിയ ഒരു തിരഞ്ഞെടുപ്പ് കൂടിയാണിത്. എന്റെ ആശങ്ക കോൺഗ്രസ് ഈ തിരഞ്ഞെടുപ്പിൽ ജയിക്കുന്നതിനെകുറിച്ചല്ല, മറിച്ച് ഈ തിരഞ്ഞെടുപ്പിൽ ജയിച്ച് അധികാരത്തിൽ വന്നാലുള്ള സ്ഥിതിയെ കുറിച്ചാണ്. അഴിമതി ഇല്ലാത്ത വികസന കാര്യങ്ങളിൽ ഇടതുപക്ഷം ഉയർത്തിയ ബാർ അത്രയ്ക്ക് വലുതാണ്. മോശമായി ഭരിച്ചാൽ, കോൺഗ്രസിന് പിന്നെ മതവും ജാതിയും മാത്രം പറഞ്ഞു വോട്ട് ചോദിക്കേണ്ട അവസ്ഥ ഭാവിയിൽ വന്നു ചേരും. അത് അത്രക്ക് ആശ്യാസ്യമായ ഒരു കാര്യമല്ല. ഉത്തരേന്ത്യയിൽ സംഭവിച്ചത് പോലെ മതത്തിന്റെ പേരിൽ കൂടുതൽ നന്നായി വോട്ട് ചോദിയ്ക്കാൻ അറിയാവുന്ന ബിജെപി കോൺഗ്രസിനെ മറികടന്നു വരുന്നത് ആലോചിക്കാനേ വയ്യ, പക്ഷെ കോൺഗ്രസ് സൂക്ഷിച്ചില്ലെങ്കിൽ സംഭവിക്കാൻ പോകുന്നത് അതാണ്.
വോട്ടു ചെയ്യാൻ പോകുന്നവരോട് ഒരു അഭ്യർത്ഥ ഉണ്ട്, ദയവായി മതത്തിന്റെ കാര്യങ്ങളുടെ അടിസ്ഥാനത്തിൽ വോട്ട് ചെയ്യരുത്. ദൈവങ്ങൾ നമുക്ക് ജോലിയോ ഭക്ഷണമോ തരുന്നില്ല. കേരളത്തിനോട് എതിർപ്പുള്ള ഒരു കേന്ദ്ര ഗവണ്മെന്റ് ഉള്ളപ്പോൾ പോലും വികസനം സാധ്യമാക്കുന്ന പാർട്ടിക്ക് വോട്ട് ചെയ്യുക, നാളെ നമ്മളുടെ അടുത്ത തലമുറ നമ്മളോട് കടപ്പെട്ടിരിക്കും.
