https://www.facebook.com/1232345646627633/

Pulipra Vartha, Pulipra, Kundara (2026)

26/08/2026

എല്ലാവർക്കും തിരുവോണാശംസകൾ

25/08/2026

പൂരാട പാച്ചിലിൽ പുലിപ്ര റോഡിൽ അപകടം വഴിമാറിയത് തലനാരിഴയ്ക്ക്. ടൗൺ അതിർത്തിക്കുള്ളിലാണ് അപകടം നടന്നത്. മധ്യവയസ്കയായ സ്ത്രീയെ പിന്നിൽ നിന്നും വന്ന ഓട്ടോറിക്ഷ തോളിൽ ഇടിച്ചു വീഴ്ത്തുകയായിരുന്നു.

തൊട്ടു പിന്നാലെ സ്‌കൂട്ടറിൽ വന്ന പുലിപ്രയിലെ ധീര ജവാൻ സജിൻ ജോൺ ആണ് സ്ത്രീയെ രക്ഷിച്ച് പ്രാഥമിക ശുഷ്രൂഷ നൽകിയത്. ഓണ ലഹരിയിൽ മതിമറന്ന് അമിത വേഗതയിൽ വാഹനം ഓടിക്കരുതെന്ന് അദ്ദേഹം ഓട്ടോ ഡ്രൈവറെ ഓർമ്മിപ്പിച്ചു. ഇതുവരെ ഫുട്ട് പാത്ത് ആയിട്ടില്ലാത്ത പുലിപ്ര റോഡിൽ കാൽനടക്കാരും ശ്രദ്ധിക്കണം എന്നും സജിൻ ജോൺ പുലിപ്ര വാർത്തയോട് പറഞ്ഞു.

അദ്ദേഹത്തിന്റെ ധീരത, സാഹസികത, പ്രതിരോധത്തോടുള്ള പ്രതിബദ്ധത എന്നിവ എക്കാലത്തും പുലിപ്രയിലെ നാട്ടുകാർക്ക് പ്രചോദനമാകും എന്ന് ഒത്തുകൂടിയ പുലിപ്ര നിവാസികൾ സൂചിപ്പിച്ചു.

NB: പ്രതീകാത്മക ചിത്രം

ആക്‌സിഡന്റ് റിപ്പോർട്ടിങ്ങ് ഡെസ്ക്, പുലിപ്ര വാർത്ത

24/08/2026

പൂരാടം എത്തിയതോടെ ഓണം മൂഡിലേക്കു ഗിയർ മാറ്റി പുലിപ്ര നാട്. അവിട്ടം നാൾ ആഘോഷിക്കാനായി പുലിപ്ര എന്റെ ഗ്രാമം ഗ്രൗണ്ട് ഒരുക്കുന്നതും ഉറിയടിക്ക് വടം കെട്ടുന്നതുമൊക്കെ ആഹ്ലാദ കാഴ്ചകളായി. ഓണത്തിനും ഉത്രാടത്തിനും തൊട്ടുമുൻപുള്ള അവസാന ഞായറാഴ്ചയായ ഇന്നലെ സാധനങ്ങൾ വാങ്ങാൻ വൻ ജനക്കൂട്ടം കുണ്ടറയിൽ എങ്ങും നിറഞ്ഞു.

തെരുവോരങ്ങൾ മുതൽ വലിയ കടകൾ വരെയും പച്ചക്കറി വിപണി മുതൽ പൂക്കടകൾ വരെയും ജനം നിറഞ്ഞു. തുണിക്കടകളിലായിരുന്നു കുണ്ടറയിൽ തിരക്ക് അധികം. ആകർഷകമായ ഓണം നിരക്കുകളും സമ്മാന പദ്ധതികളും ഉള്ളതിനാൽ ഇലക്ട്രോണിക്സ്, ഗൃഹോപകരണ കടകളിലും ഞായറാഴ്ചയും തിരക്കായിരുന്നു. ഉത്രാടപ്പാച്ചിലിനു മണിക്കൂറുകൾ ശേഷിക്കെ എല്ലാ മേഖലകളെയും തൊട്ടുണർത്തി ഓണം മൂഡിലേക്കു മാറിയിരിക്കുകയാണ് പുലിപ്ര.

ഫെസ്റ്റിവൽ ഡെസ്ക്, പുലിപ്ര വാർത്ത

23/08/2026

കുണ്ടറ ഈസ്റ്റ്‌ റെയിൽവേ സ്റ്റേഷൻ പ്ലാറ്റ്ഫോമിന്റെ നീളം 576 മീറ്റർ ആക്കി ഉയർത്തുന്നു. ചെന്നൈ ആസ്ഥാനമായ ശ്രീ ബാലാജി എന്റെർപ്രൈസ്സസ് ആണ് ഒരു വർഷത്തേക്ക് കൊല്ലം ചെങ്കോട്ട ലൈനിൽ കരാർ റീ ടെണ്ടർ ചെയ്തു നേടിയത്.

പുലിപ്രയിൽ നിന്നുള്ള യാത്രക്കാർക്ക് ഭാവിയിൽ മധുര ഗുരുവായൂർ എക്സ്പ്രസിൽ കൂടുതൽ കോച്ചുകളിൽ യാത്ര ചെയ്യാം. പ്ലാറ്റ്ഫോമിന് നീളം കൂടുന്നത് കൂടുതൽ ട്രെയിനുകൾക്ക് സ്റ്റോപ്പ് അനുവദിക്കാനും സഹായിക്കും.

പുലിപ്രയിൽ നിന്നുള്ള റെയിൽ യാത്രക്കാരുടെ ഓൺലൈൻ കൂട്ടായ്മ തീരുമാനത്തെ സ്വാഗതം ചെയ്തു.

ട്രാവൽ ഡെസ്ക്, പുലിപ്ര വാർത്ത

22/08/2026

പുലിപ്രയിൽ ക്ഷീരകർഷകരുടെ എണ്ണം ദിനംപ്രതി കുറയുന്നു. ഗ്രാമത്തിലാകെ രണ്ട് മൂന്ന് വീടുകളിൽ മാത്രമാണ് ഇപ്പോൾ കാന്നുകാലികളെ വളർത്തുന്നത്. ആയിരം പേരോളം നിവസിക്കുന്ന പുലിപ്രയിൽ ദിവസവും 250 ലിറ്റർ പാലെങ്കിലും വേണം.

കാലിത്തീറ്റ വില കുത്തനെ കൂടിയതിനാൽ കന്നുകാലികളെ പരിപാലിക്കാൻ കഴിയാതെ ക്ഷീരമേഖല ഉപേക്ഷിച്ചവർ നിരവധിയാണ്. പാലിന് മികച്ച വില നൽകിയാൽമാത്രമേ കർഷകർ ക്ഷീരമേഖലയിൽ തുടരുകയുള്ളൂ.

നിലവിലെ അവസ്ഥ തുടർന്നാൽ പാലിനും പാലുത്പന്നങ്ങൾക്കും പൂർണമായും അയൽ വാർഡുകളെ ആശ്രയിക്കേണ്ട സ്ഥിതി വരുമെന്ന് പുലിപ്രയിലെ ഒരു ക്ഷീരകർഷകൻ മുന്നറിയിപ്പ് നൽകുന്നു.

ക്ഷീരകർഷകരെ പിടിച്ചുനിർത്താൻ കഴിയുന്ന പദ്ധതികൾ ആസൂത്രണം ചെയ്യുകയും, കുറഞ്ഞ വിലയ്ക്ക് കാലിത്തീറ്റ ലഭ്യമാക്കുകയും ചെയ്യാനായി പുലിപ്ര കേന്ദ്രമാക്കി ക്ഷീര സഹകരണ കേന്ദ്രം ആരംഭിക്കണം.

അഗ്രിക്കൾച്ചർ ഡെസ്ക്, പുലിപ്ര വാർത്ത

21/08/2026

പുലിപ്രയുടെ ഹൃദയഭാഗമായ വഞ്ചിമുക്കിൽ ഉപേക്ഷിക്കപ്പെട്ട പോലെയുള്ള നിലയിൽ 4 കോൺക്രീറ്റ് പോസ്റ്റുകൾ ആണ് KSEB അധികൃതർ അപകട ഭീഷണി മുഴക്കി തള്ളിയിരിക്കുന്നത്. വർഷങ്ങൾ ആയി റോഡരുകിൽ വാഹനങ്ങൾ പാർക്ക് ചെയ്യാൻ പോലുമാകാതെ പൊതുജനം ബുദ്ധിമുട്ടുന്നു.

സമീപ കാലത്ത് വൻ തിരക്ക് അനുഭവപ്പെടുന്ന കുണ്ടറ ഈസ്റ്റ്‌ - പുലിപ്ര റോഡിന് ഇപ്പോഴും കേവലം 6 മീറ്റർ മാത്രമാണ് വീതി. ഒടുവിൽ അപകടം ഉണ്ടായി കഴിയുമ്പോൾ ഇങ്ങനെ പറയേണ്ടി വരും ' നീ ദേ ആ കിടക്കുന്ന പോസ്റ്റുകൾ കണ്ടോ?' 'കണ്ടു.'
'ങാ, ഞാൻ കണ്ടില്ല'

ആക്‌സിഡന്റ് പ്രിവെൻഷൻ ഡെസ്ക്, പുലിപ്ര വാർത്ത

20/08/2026

ഓണത്തെ വരവേൽക്കാൻ പുലിപ്ര ഒരുങ്ങിക്കഴിഞ്ഞു. തിരുവോണത്തിന് ഇനിയും 6 നാൾ ഉണ്ടെങ്കിലും പുലിപ്ര റോഡിൽ തിരക്കേറുകയാണ്. ദേശീയ പാതയിലെ ഗതാഗത കുരുക്ക് ഒഴിവാക്കാൻ കരിപ്പുറം, മുക്കൂട് തുടങ്ങിയ ഭാഗത്തേക്കുള്ള ഒട്ടേറെ വാഹനകളും പുലിപ്ര സമാന്തര റോഡ് വഴിയാണ് സഞ്ചാരം.

സ്വന്തമായി പേരില്ലെങ്കിലും പേര് കേട്ട മൂന്ന് കടകൾ പുലിപ്ര ടൗൺ അതിർത്തിക്കുള്ളിൽ ഓണം വരവേൽക്കാനായി ഉപ്പ് മുതൽ കർപ്പൂരം വരെ എത്തിച്ചു കഴിഞ്ഞു. അടുത്ത വർഷം പുലിപ്രയിലെ ഓണവിപണി ലക്ഷ്യമിട്ട് പൂകൃഷി കൂടി ഇറക്കിയാൽ കളറാകും. ഓണം വരെ ഒറ്റപ്പെട്ട ഇടങ്ങളിൽ മാത്രമാണ് മഴ മുന്നറിയിപ്പുള്ളത്. പുലിപ്ര മറ്റു സ്ഥലങ്ങളുമായി റോഡ് മൂലം ബന്ധപ്പെട്ട് കിടക്കുന്നത് കൊണ്ട് ഒറ്റപ്പെട്ട സ്ഥലമല്ല എന്ന കാരണത്താൽ ഓണം വരെ മഴയും മാറി നിൽക്കും.

നാടിന്റെ പൊതുവായ ഓണാഘോഷം ഇത്തവണ മത്സരങ്ങളോടും കലാ സന്ധ്യയോടും കൂടി അവിട്ടത്തിനാണ് ഒരുക്കിയിരിക്കുന്നത്. പുലിപ്രയിലെ അത്തം ഇത്തവണ വെളുത്തതാണ് ആകെ ഒരു ആശങ്ക ബാക്കി നിൽക്കുന്നത്. ഓണം കറുക്കുമോ, പഴഞ്ചൊല്ലിൽ പതിരുണ്ടോ എന്നൊക്കെ കാത്തിരുന്നു കാണാം.

ഫെസ്റ്റിവൽ ഡെസ്ക്, പുലിപ്ര വാർത്ത

19/08/2026

ഇനിയില്ല ആ ഓർമ്മകൾ. പുത്തൻ പുതിയ കുണ്ടറ ഈസ്റ്റ്‌ -പുലിപ്ര റോഡിന് ഇരുവശത്തുമായി തലയുയർത്തി ഹരിതാഭയും പച്ചപ്പും വിരിച്ച് വാഹനങ്ങളെയും കാൽനടയാത്രികരെയും തഴുകി തലോടി നിന്നിരുന്ന പുൽ നാമ്പുകൾ വെട്ടി നശിപ്പിച്ചു.

കുണ്ടറ പഞ്ചായത്തും ആയുഷ്മാൻ ആരോഗ്യമന്ദിറും ശുചിത്വ പുലിപ്ര ആരോഗ്യമുള്ള പുലിപ്ര എന്നൊക്കെ പറയുന്നെങ്കിലും പ്രകൃതിയെയും മണ്ണിനേയും മറന്നുള്ള വികസനം ഒന്നും എല്ലാവർക്കും ഉൾകൊള്ളാൻ ആകുന്നില്ല. ചെറിയ സസ്യങ്ങൾ, അവയെ ഭക്ഷണമാക്കുന്ന പുഴുക്കൾ, ഷഡ്പദങ്ങൾ, പുഴുക്കളെ ഭക്ഷിക്കുന്ന പറവകൾ, അവയെ ആഹാരമാക്കുന്ന ഇഴജന്തുക്കൾ തുടങ്ങി ഒരു വലിയ ആവാസ വ്യവസ്ഥ ആണ് പുലിപ്രയിൽ ഇല്ലാതാകുന്നത്.

2047 ആകുമ്പോഴേക്ക് ഒരു വികസിത് പുലിപ്ര എന്ന സ്വപ്നം വേണ്ടത് തന്നെ എന്ന് പറയുമ്പോഴും ഓരോ പദ്ധതിയും പ്രകൃതിയെ എങ്ങനെ ബാധിക്കും എന്ന പഠനം പോലും നടത്താതെ ഉള്ള ചൂഷണങ്ങളെ കയ്യും കെട്ടി നോക്കി നിൽക്കാൻ 5,12 വാർഡുകാർ തയ്യാറാവുമെന്ന് തോന്നുന്നില്ല. റോഡിന് ഇരുവശത്തും കാടുകൾ പോയപ്പോൾ ഇനി മണ്ണൊലിപ്പ് പോലെയുള്ള ദുരന്തങ്ങൾ ആണോ പുലിപ്രയെ കാത്തിരിക്കുന്നത് എന്ന ചോദ്യം ബാക്കി ആകുന്നു.

നേച്ചർ കെയർ ഡെസ്ക്, പുലിപ്ര വാർത്ത

18/08/2026

കുടിവെള്ളത്തിന്റെ കാര്യത്തിൽ പുലിപ്ര സ്വയം പര്യാപ്തമാകേണ്ട കാലം അതിക്രമിച്ചു. പുലിപ്ര ഏലായിൽ ചോല മരങ്ങളുടെ ചുവട്ടിൽ നിന്നും ഉത്ഭവിക്കുന്ന സ്വാഭാവിക ജലസ്രോതസിലെ ശുദ്ധമായ വെള്ളം ഒഴുകുന്ന തോട് ഉണ്ട്. പഞ്ചായത്ത് കിണർ ഉണ്ട്. പുലിപ്രയ്ക്ക് മാത്രം ആയി അവയിലെ ജലം സംഭരിച്ച് വിതരണം നടത്തണം. നമുക്ക് അവകാശപ്പെട്ട ജലം ആണ് മുളവനയിലേക്കും പിന്നീട് കല്ലട ആറ്റിലേക്കും ഒഴുകി പാഴായി പോകുന്നത്.

വാട്ടർ അതോറിറ്റിക്ക് പുലിപ്രയോടുള്ള ചിറ്റമ്മ നയത്തിൽ പ്രതിഷേധം ശക്തമാണ്. മാസത്തിൽ മൂന്നോ നാലോ തവണ പുലിപ്ര ലൈനിൽ വെള്ളം കിട്ടിയാലായി. പക്ഷേ രണ്ടു മാസം കൂടുമ്പോൾ പുലിപ്രയിലെ മുഴുവൻ ബില്ലുകളും റെഡി. അറ്റ കുറ്റ പണികൾ റിപ്പോർട്ട്‌ ചെയ്തവയും അവഗണിക്കുന്നു.

അധികാരികൾ മനസ്സു വച്ചാൽ എക്കലും മണലും വാരി ആഴം കൂട്ടി തടയണ കെട്ടി ശേഖരിക്കുന്ന വെള്ളം പുലിപ്രയിൽ തന്നെ ഒരു ജലശുദ്ധീകരണശാലയിൽ വച്ച് ശുദ്ധീകരിച്ച് രണ്ടോ മൂന്നോ ഓവർ ഹെഡ് ടാങ്കുകളിൽ എത്തിച്ച് വീടുകളിൽ വിതരണം നടത്താം.

സ്വയം പര്യാപ്ത ഡെസ്ക്,പുലിപ്ര വാർത്ത.

17/08/2026

പുലിപ്രയിൽ നിന്നും രാജ്യത്തിനു വേണ്ടി അഭിമാന മെഡൽ നേടാൻ കുട്ടികൾക്ക് കുറവൊന്നും ഇല്ല. പ്രതിഭയും ഉണ്ട്. പക്ഷേ അവർക്ക് കളിച്ചു വളരാൻ പുലിപ്രയിൽ ഒരിടം ഇല്ല. തെങ്ങിൻ തോപ്പുകളൊക്കെ റബ്ബർ മരങ്ങൾ കയ്യടക്കി. വയലുകളൊക്കെ പണകോരി. കണ്ടങ്ങളൊക്കെ നികത്തി കണ്ടംപററി വീടുകൾ വച്ചു. പുലിപ്രയിലെങ്ങും ഗ്രൗണ്ടും ഇല്ല ടർഫും ഇല്ല.

വർഷം 2030 - കോമൺവെൽത്ത് ഗെയിംസ് വേദി ഇന്ത്യ. 2036 -ഒളിമ്പിക്സ് വേദി ഇന്ത്യ. 5 മുതൽ 15 വയസ്സ് വരെയുള്ള പ്രായത്തിലുള്ള പ്രതിഭകളെ കണ്ടെത്താനായി രാജ്യവ്യാപകമായി ടാലന്റ് ഹണ്ട് നടത്തുന്നു. അന്നൊക്കെ മെഡൽ വാങ്ങാൻ പോകുന്ന മറ്റു കുണ്ടറക്കാരെ നോക്കി നെടുവീർപ്പിടാനേ പുലിപ്രയിലെ കൂട്ടുകാർക്ക് കഴിയൂ എന്നതാണ് നിലവിലെ അവസ്ഥ.

ഗ്രൗണ്ടും ടർഫും ഒന്നും ഇല്ലെങ്കിലും പഴയ കണ്ടം ക്രിക്കറ്റ്, കണ്ടം ഫുട്ബോൾ , കണ്ടം ലോങ്ങ് ജമ്പ് പോലുള്ള അന്യം നിന്നു പോയ കലാ രൂപങ്ങൾ എങ്കിലും പുലിപ്രയിൽ എവിടെയെങ്കിലും തിരികെ വന്നിരുന്നെങ്കിൽ. പന്ത് കാട്ടിൽ പോയാൽ അടിച്ചവൻ എടുക്കണം, തെങ്ങിൽ തട്ടി വന്ന ക്യാച്ച് എടുത്താലും ഔട്ട്, പരിധിയിൽ കൂടുതൽ വേഗത്തിൽ എറിഞ്ഞാൽ റീ-ബോൾ, മരത്തിൽ കൊണ്ടിട്ട് പുറത്തേക്ക് പോയാൽ ഔട്ട് അല്ല, ബാറ്റ് കൊണ്ടുവരുന്നവനെ ഔട്ട് ആക്കിയാൽ അവൻ ബാറ്റുമായി പോകും-കളി കഴിയും ... അങ്ങനെ വിചിത്രങ്ങൾ ആയ ലോക്കൽ നിയമങ്ങൾ ഉള്ള കളികൾ എങ്കിലും നടത്താൻ ഇടമില്ലാതെ പകച്ചു പോയ ബാല്യങ്ങൾ.

സ്പോർട്സ് ഡെസ്ക്, പുലിപ്ര വാർത്ത

Pulipra Vartha

26/08/2026

25/08/2026

24/08/2026

23/08/2026

22/08/2026

21/08/2026

20/08/2026

19/08/2026

18/08/2026

17/08/2026

Address

Website

Alerts

Shortcuts

Share

Category

Listing takedown request