The Chinland Post

The Chinland Post A Ngeitu : Fidi Foundation
Web :www.thechinlandpost.info
Contact :[email protected]

The Top News Agency in Chin (Lai) Version, Chin State
Address: Sangau, Lawngtlai District (India)
[email protected]
www.thechinlandpost.info
[email protected]

08/09/2026

Indonesia Ram Anak Krakatau Meitlang A Puah Lio (Muicawl)

The Chinland Post | 2026 Septeber 8 — Indonesia ram, Anak Krakatau meitlang a puak i meitlang vutcam a chuah dih caah Airport pariat cu caan karlak chung khar a si nain atu ahcun Indonesia ram ca a biapi mi Airport telh in Airport cheukhat cu on ṭhan a si cang tiah theih a si.

Anak Krakatau meitlang cu September 4 zaan in September 6 tiang pehzulh in a puak i Jarkata le a pawngkam vancung ah meihang aa varh i himnak kong ralrinnak ca ah caan karlak rak khar chung hi a si tiah theih a si.

Video - Social cahmai

Hakha-Matupi-Gangaw Lampi Remh Hnu Ah Umkal Ṭhan Khawh A Si Cang⠀The Chinland Post | 2026 September 8 — Chin ramkulh, Ma...
08/09/2026

Hakha-Matupi-Gangaw Lampi Remh Hnu Ah Umkal Ṭhan Khawh A Si Cang
⠀
The Chinland Post | 2026 September 8 — Chin ramkulh, Matupi peng, Rezua khua chung um Zotung ram ah ruah fakpi in a sur ruang ah min cim in umkalnak a pit mi Hakha-Matupi-Gangaw lampi cu remh in sersiam dih a si cang ca ah mawṭaw pawl pehzulh umkal ṭhan khhawh a si cang tiah lam remhnak ṭuanvo ngeitu nih Zalen ah an chim.
⠀
Ruah pehzulh in a sur ruang ah tualchung lam tampi min cimhnak le ti nih khuhchilhnak pawl a can ruang ah Gangaw-Rezua lampi tel in Hakha le Rezua khua mawṭaw umkalnak lam a rawh cikcek hi a si.
⠀
"Gangaw-Rezua-Matupi pehzulh in kal khawh a si cang. Hakha-Rezua karlak ah mawṭaw hme pawl kal khawh a si i mawṭaw ngan kal khawh a si rih lo. Seh he a nai mi hmunhma lawng remh khawh a si rih. Seh he a hlatnak hmunhma pawl remh khawh a si rih lo," tiah Zotung Federal, lam remhnak ṭuanvo ngeitu Salai Thomas Maung Maung nih Zalen ah a chim.
⠀
Cun, hi lampi pawl hi ruah a sur poh ah an cim i an rawh zungzal bantuk in hmunhma pakhat le pakhat meng 60 hrawng a hlat ca ah le seh zong pathum hrawng lawng a um ca ah lam remhnak rian ah harnak pawl a um tiah a chim.
⠀
A hrampi lam a si mi Hakha-Matupi lampi, Calthawng khua tanglei min cimhnak hmunhma pathum cu September 2 le September 7 ah a voi hnihnak remh a si cang tiah a chim.
⠀
Atu lio ah cu lampi chung ah mawṭaw pawl pehzulh in an umkal ṭhan cang tiah thawng theih a si.
⠀
Hmanthlak: Hakha-Matupi lampi min cimhnak remhnak rianṭuan lio (Hmanthlak - Zalen)

North Korea Ti Ralkap Nih Nuclear Hriamnam An Ngei Lai Tiah Kim Jong Un Nih A Chim⠀The Chinland Post | 2026 September 8 ...
08/09/2026

North Korea Ti Ralkap Nih Nuclear Hriamnam An Ngei Lai Tiah Kim Jong Un Nih A Chim
⠀
The Chinland Post | 2026 September 8 — North Korea ti ralkap cu nuclear a hmang kho mi ralkap phu pakhat ah sersiam a si lai tiah North Korea hruaitu Kim Jong Un nih a chim.
⠀
US, South Korea le Japan ram thum fonh nih Freedom Edge tiah tlangtar in September 7 ah ti ralkap cawnnak program an thawk lio ah atu bantuk in Kim Jong Un biachim mi cu North Korea cozah media pawl nih an langhter. Hi ram thum ralkap bawi pawl nih 2023 in aa thawk mi Freedom Edge raltuk cawnnak pawl hi North Korea ngeih mi missile le nuclear hriamnam ṭhihphaihnak pawl lehrulhnak ding ca ah tinhnak a si tiah an chim.
⠀
September 6 ah, North Korea ti ralkap tilawng thar (Kang Kon) cu Wonsan khuapi tilawng dinhnak ah ralkap hman ding in peknak program tuah a si lio ah Kim nih ti ralkap pawl cu nuclear hriamnam pawl tlaihter a timhnak kong, congress ah a chim. Hi tilawng hi 2025 May thla lio ah ti chung pilhnak tong in a rak rawk mi a si ca ah remh ṭhan mi tilawng a si.
⠀
A tak in raltuknak a chuah caan ah nuclear hriamnam pawl ṭha tein hman a si khawh nakhnga timhtuahnak a herh i North Korea nih ti ralkap pawl cu nuclear a hmang kho mi ralkap phu pakhat ah ser ding in timhtuahnak a ngei tiah Kim nih a chim.
⠀
North Korea cozah phu KCNA thawngzamhnak zung nih a langhter mi hmanthlak chung ah, Kim hmunhma a changtu ding tiah mi tampi nih an ruah mi a fanu Kim Ju Ae le North Korea hruaitu cu ralkap tilawng cung ah zohfelnak an tuah lio a lang.
⠀
July thla lio zong ah Kim Jung Un nih Kang Kon tilawng hneksaknak tuah lio a rak zoh bel cang. Hi tilawng hi North Korea ti ralkap nih a thar in ser mi thiamnak lei ah a sang bik mi Ton 5,000 ralkap tilawng pawl chung in pakhat a si. North Korea nih hi bantuk tilawng pahnih a ngeih cang.
⠀
Ti ralkap cu nuclear ralkap ah ser ding tiah Kim a biachim ning in cu tilawng pawl ngeih mi missile pawl a par ah nuclear hriamnam bunh a si lai tiah zumh a si.
⠀
Kim nih North Korea ti ralkap cawlcanghnak pakhat cu a ra lai mi thla 8 thla chung ah vawleicungpi nih hmu ding in hmuhsak a si lai tiah a chim. Hi bia hi North Korea ti chung ah hram a bunh mi tilawng in thlah mi, a hlatpi kap kho mi intercontinental ballistic missile a thar pakhat hneksaknak tuah mi a si kho tiah hlathlaitu pawl nih an chim.
⠀
Khat lei ah, North Korea a dohkalhtu ram thum nih Freedom Edge raltuk cawnnak cu South Korea ramṭhen Jeju tikulh nichuahlei le thlanglei vawleicung ti chung ah September 7 in 11 tiang an tuah lai tiah theih a si.
⠀
Hmanthlak: North Korea hruaitu Kim Jong Un le a fanu Kim Ju Ae ralkap tilawng zohfelnak an tuah lio. (Hmanthlak - KCNA/Reuters)

Geneva Ah Tuah Mi UN Human Rights Council Meeting Ah CHRO Nih Dinfelnak Hmuh Ding A Chim⠀The Chinland Post | 2026 Septem...
08/09/2026

Geneva Ah Tuah Mi UN Human Rights Council Meeting Ah CHRO Nih Dinfelnak Hmuh Ding A Chim
⠀
The Chinland Post | 2026 September 8 — Geneva khuapi ah tuah mi a voi 63nak UN Human Rights Council meeting ah Chin Human Rights Organization (CHRO) nih nuhrin covo a kilvengtu pawl, biachimtu pawl, artist pawl he bawm in Myanmar ram chung ah ton cuahmah mi International Crimes buarnak t***e fekte in ngeih a si mi pawl cu atak in ṭuanchuahnak le dinfelnak hmuh kho ding in zeitin dah a tak in thlen khawh a si lai ti pawl kong he pehtlai in biaruahnak a ngeih hna tiah CHRO nih a langhter.
⠀
Biaruahnak chung ah ralhrang ralkap nih mipi cung ah van lei in bomthlaknak pehzulh in an tuah mi, kahdohnak he pehtlai in tlaihhremnak pawl, biaknak zalonnak cung ah dohkalhnak pawl, phungning lo in tlaih hnu ah tlaunak kong le hi sualnak pawl pehzulh in a buar khawh nakhnga dantatnak chung in luatnak a hmuh mi dirhmun pawl kong an langhter.
⠀
T***e cazin lak lawng nih mipi a kilven kho lo tiah t***e cazin a laktu pawl nih fekte in an chim. T***e cazin pawl cu a tak in ṭuanchuahnak lei ah thlen a herh i, cu chung ah ralhrang ralkap vanlawng pawl, vanlawng datsii, hriamnam pawl le tangka hmuhnak lam pawl phihkhamnak, vawleicung nih fek deuh in ṭuanvo lak a si khawh nakhnga a fek mi bawmhchanhnak lei in lam a um khawh nakhnga Universal Jurisdiction hmang in cawlcanghnak pawl a herh tiah an chim.
⠀
Khoika dah a um ti hngalh lo in, phungning lo in tlaih hnu ah a tlau mi Rev. William Hrang Thing cung ah a cang mi t***e nih minung pakhat cio temhtuarnak kha a langhter. CHRO nih UN Working Group on Enforced or Involuntary Disappearances le aa pehtlai mi Special Procedures pawl nih a ran nak in cawlcanghnak tuah ding in a forhfial hna i, thil dik a langh khawh nakhnga le ṭuanvo laknak a um khawh nakhnga vawleicung nih pehzulh in ralhrang ralkap cung ah pressure pek a herh tiah a chim fawn.
⠀
Cu meeting chung ah ralhrang ralkap nih tlaihhremnak kha hriamnam bantuk in a hmannak le hi sualnak pawl cung ah dantatnak in luatnak a hmuh mi kong zong an chim. Hriamtlai phu zapi nih tlaihhremnak kham ding, mipi pawl kilven ding le a taang mi mipi pawl ca ah dinfelnak le tlukruannak hmuh a si khawh nakhnga ṭuanvo an ngei tiah ralrin peknak zong an chim.
⠀
Hmanthlak: Geneva meeting chung ah CHRO chungtel pawl le cawlcanghtu pawl. (Hmanthlak - CHRO)

Minung Pathum An Thattu Gangaw Peng PDF Hriamtlai Pariat Ralhrang Ralkap Sin An Zaam⠀The Chinland Post | 2026 September ...
08/09/2026

Minung Pathum An Thattu Gangaw Peng PDF Hriamtlai Pariat Ralhrang Ralkap Sin An Zaam
⠀
The Chinland Post | 2026 September 8 — Magway ramṭhen, Gangaw peng um Black Dragon Force (BDF) chungtel minung priat nih CDF-KKG Battalion 06 in hriamtlai pahnih le mipi pakhat an thah hna hnu ah ralhrang ralkap sin ah an zaam tiah tualchung thawng hrampi chimnak cherhchan in The Kaladan Post nih a langhter.
⠀
Mi sawhsawh pakhat thahnak thil a can ning hi a luancia August 12 zaan ah a si i Gangaw khuapi nitlaklei Rajamuni pura pawng ah a cang mi a si i, a thaizing ah cu minung pariat cu ralhrang ralkap sin an phan tiah an chim.
⠀
Ralhrang ralkap lei ah a zaam mi BDF chungtel pariat nih hriamnam le kuanzen cheukhat zong an phorh tiah theih a si.

Black Dragon Force (BDF) hi an dirhnak k*m khat a tling rih lo mi phu a si tiah min langhter a duh lo mi tualchung dothlennak hriamtlai pakhat nih a chim.
⠀
Cu thil a cannak kong ah ralhrang ralkap leiṭang Telegram le Social cahmai pawl nih Gangaw peng chung ah a cawlcangmi PDF pariat cu ralkap sin ah an i ap tiah an langhter.
⠀
A luancia August 12 zaan suimilam 11:00 hrawng ah Gangaw khuapi nitlaklei, Rajamuni pura pawng ah KKG Battalion 06 in Chairman a si mi Ba Phyo le ralkap pakhat tel in mipi pakhat thah hnu ah a zaam mi Black Dragon Force hruaitu Chan Min Aung @ Nyein Thaw le a zultu minung pasarih hna an si kho tiah tualchung thawng hrampi nih an ruahdamh.

Kalay Ah Nu Panga Tuluk Ah A Zuartu Nih Lah-Wah-Kah Zung Ah Tangka Phalh In Hmatpungṭin Tuah Aa Tim⠀The Chinland Post | ...
08/09/2026

Kalay Ah Nu Panga Tuluk Ah A Zuartu Nih Lah-Wah-Kah Zung Ah Tangka Phalh In Hmatpungṭin Tuah Aa Tim
⠀
The Chinland Post | 2026 September 8 — Sagaing ramṭhen, Kalay peng thlanglei, Donwe khuate in nu pakhat nih Myanmar nu panga cu pakhat ah China phaisa Yuan 100,000 in China ram ah a zuar hna i, a hmuh mi phaisa in Kalay khuapi ah sui aa c**k i, ralhrang ralkap tang um Immigration zung (Lah-wah-kah) rianṭuantu pawl sin ah tangka phalh in hmatpungṭin tuah ding in timhtuahnak a ngei tiah tualchungmi pawl sin in thawng theih a si tiah Surbung Times nih a langhter.
⠀
Minung c**k/zuarnak a tuahtu hi Kalay peng thlanglei, Donwe khuate um U Chit Po le Daw Hla Win hna i an fanu Ma Thida Oo a si i, amah nih tualchung nu panga cu Tuluk ram ah a zuar hna hi a si.
⠀
A hmuh mi phaisa tampi in anu Daw Hla Win he Kalay khuapi chung hmunhma pakhat ah an riak.
⠀
Tuluk ram ah zuar a tong mi nu panga chung ah Ma Than Pya, Ma Thuza le Ma Thethe hna pathum an min cu theih khawh a si i, a taang mi pahnih cu a chuahpi unau an si i an min theih khawh a si rih lo tiah theih a si.
⠀
"Zuar a tong mi nu panga chung ah pathum lawng an min kan fehter khawh rih. A tang mi pahnih cu a chuahpi unau an si i hlathlai cuahmah lio a si. Minung pakhat ah Tuluk phaisa Yuan 100,000 in a zuar hna," tiah tualchung thawng hrampi pakhat nih Surbung Times ah a chim.
⠀
Cun, Ma Thida Oo te chungkhar cu chungkhar cazin le hmatpungṭin (မှတ်ပုံတင်) a ngei lo mi an si i, a hmuh mi phaisa pawl hmang in ralhrang ralkap tang um Immigration zung rianṭuantu pawl phaisa phalh in chungkhar cazin le hmatpungṭin cu phunging lo in hmuh ting an i timhtuah tiah tualchungmi pawl nih an chim.

August Thla Chung Ah Ralhrang Ralkap 20 Nih Hriam An Chiah, 33 An Tlaih Hna⠀The Chinland Post | 2026 September 8 — Ram p...
08/09/2026

August Thla Chung Ah Ralhrang Ralkap 20 Nih Hriam An Chiah, 33 An Tlaih Hna
⠀
The Chinland Post | 2026 September 8 — Ram pumpi huap in August thla chung ah ralhrang ralkap 20 nih dothlennak phu pawl sin ah hriam an chiah i ralhrang ralkap 33 an tlaih hna tiah People's Goal Organization (ပြည်သူ့ပန်းတိုင်) nih September 7 langhternak ning in thawng theih a si.
⠀
Ralhrang ralkap chung in a zaam mi minung 20 an um i Magway ramṭhen in minung pakhat, Chin ramkulh in minung pathum, Kayin ramkulh in minung pasarih, Shan ramkulh in minung paruk le Sagaing ramṭhen in pyithusit pathum an si hna i minung pakua cu ralhrang ralkap tla ding in hramhram in dawh thar mi pawl an si tiah a langhter.
⠀
Cu hlei ah, a nung in an tlaih mi ralhrang ralkap 33 chung ah Tanintharyi ramṭhen in ralkap pali le palek pakhat, Shan ramkulh in pakhat, Chin ramkulh in paruk, Karenni ramkulh in pali, Magway ramṭhen in 17 an si hna i minung pathum cu ralkap tla ding in hramhram in dawh mi pawl an si hna tiah an langhter.
⠀
Ralhrang ralkap sin in, 2025 January thla in 2026 August thla tiang hriam chiah in aa ap mi le tlaih mi zapi minung 3,821 tiang an um cang tiah People's Goal Organization nih cazin an lak mi ning in an langhter.

Chin Ramkulh Ah Bomrap Ral Nih Nifatin Nunnak A Hnorsuan Tiah US Thawng Hlattu Nih A Chim⠀The Chinland Post | 2026 Septe...
08/09/2026

Chin Ramkulh Ah Bomrap Ral Nih Nifatin Nunnak A Hnorsuan Tiah US Thawng Hlattu Nih A Chim
⠀
The Chinland Post | 2026 September 8 —US ram in Chin ramkulh chung ah thawng a hlathlaitu le documentary muicawl a thlatu Collin Mayfield nih bomrap (landmine) ral hi chikhat puahkehnk lawng siloin ngandamnak lei zohkhenhnak le sersiam ṭhan ding rianṭuannak tiang caan saupi a hnorsuan tiah a chim.
⠀
Cu US ram in thawng a rak hlathlaitu nih Insight Myanmar Podcast in thlah mi "Navigating A Minefield" timi program ah atu bantuk in a chim hi a si.
⠀
Mayfield cu 2023 le 2025 ah, Chin ramkulh nitlaklei ah thla tampi a um i thawng a la mi a si. 2025 k*m, a voi hnihnak a kal lio ah bomrap ral an ton hnu in bomrap ral nih a chuahpi mi harnak kha fiang deuh in a hngalh tiah a chim.
⠀
Bomrap in hliamhma a tuar mi pakhat ca ah phorhnak, siii le caan saupi thlopbulnak pawl a herh tiah a chim.
⠀
A hmuhton mi chung in, Chin ramkulh chung ah bomrap ral hi hmunhma kip ah a um caah tualchungmi pawl nih bomrap a um khawhnak hmunhma pawl kha pakhat le pakhat ralrin an i pe hna, a hlei in ruah a sur hnu ah vawlei cung ah an pawt tiah a chim.
⠀
Cu hlei ah, bomrap ral ruang ah tualchungmi pawl umkalnak le pawcawmnak rian pawl a donh tiah Mayfield nih a fianter. Lo rianṭuannak le saṭil zohkhenhnak bantuk nifatin rianṭuannak pawl ca ah a him tiah ruah mi lam pawl lawng hman a si i nifatin ralrinnak ngeih a herh tiah a chim.
⠀
"Mipi pawl cu nifatin ralring tein an um" tiah a chim.
⠀
Mayfield nih bomrap ruang ah tuar mi hliamhma pawl damhnak ding ca ah, ngandamnak lei rianṭuantu thazang le sii hmuhnak hrampi pawl a har hlei ah tualchung sianginn pawl le sizung pawl cawlcanghnak tiang a va hnorsuan tiah a chim.
⠀
Hmanthlak: Chin Ramkulh chung ah thawng va la mi US thawngfianhtu Collin Mayfield. Source: Insight Myanmar Podcast

Hsenwi Manmai Khua Zen Chuannak A Puah Ca Ah China Miphun Rianngeitu Tel In Minung 15 Hliamhmatuar le Thi An Um⠀The Chin...
08/09/2026

Hsenwi Manmai Khua Zen Chuannak A Puah Ca Ah China Miphun Rianngeitu Tel In Minung 15 Hliamhmatuar le Thi An Um
⠀
The Chinland Post | 2026 September 8 — Kokang ralkap (MNDAA) nih an humhak mi Hsenwi peng, Manmai khua cunglei tlang cung ah a um mi zen chuahnak hmunhma pakhat cu nihin September 8 zingka suimilam 05:30 hrawng ah a puah ca ah minung 15 hrawng hliamhmatuar le thi an um tiah tualchungmi pawl nih Shwe Phee Myay nih a langhter.
⠀
Cuka hmunhma ah MNDAA ralkap pawl nih zen an chuah tiah tualchungmi pawl nih an chim nain fehter cuahmah lio a si tiah a langhter.
⠀
Puahkehnak ruang ah Tuluk miphun rianngeitu pahnih, rianṭuantu panga le MNDAA ralkap pariat tiah, an zapi minung 15 hliamhmatuar le thi an um tiah theih a si.
⠀
⠀
Cubantuk in a luancia April 7 zong ah "Wa" ralkap (UWSA) nih an humhaknak ramṭhen khualipi a si mi Pangkham (Pangsang) peng, Yowngpan (Yongpan) khua ah puahkehnak nganpi a rak chuak iminung 160 nak tlawm lo hliamhmatuar le thi an um tiah theih a si.
⠀
Hmanthlak: Hsenwi peng ah puahnak a cannak hmunhma pawngkam. (Hmanthlak - CJ)

Lawngtlai Pengkomh Uktu Bawi Nih Ramdangmi Pawl Ca Ah Zulhphung 7 A Thanh⠀The Chinland Post | 2026 September 8 — Mizoram...
08/09/2026

Lawngtlai Pengkomh Uktu Bawi Nih Ramdangmi Pawl Ca Ah Zulhphung 7 A Thanh
⠀
The Chinland Post | 2026 September 8 — Mizoram ramkulh, Lawngtlai pengkomh uktu bawi Pu Donny Lalruatsanga nih ralzaam pawl, ramdangmi pawl he aa pehtlai mi zulhphung 7 a thanh tiah thawng theih a si.
⠀
Lawngtlai pengkomh chung ah a um mi ralzaam pawl nih pawcawmnak ca ah rian an ṭuan ahcun an umnak khuate uktu bawi le Lai Young Association (YLA) sin in rianṭuannak nawl (Work Permit) an lak a herh i, aa pehtlai mi phu pawl nih zohfelnak an tuah lai tiah thawng a thanh.
⠀
Atu September thla thawk in ralzaam pawl le ramdangmi pawl cu Lawngtlai khuapi chung ah inn hlan in umnak nawl pek a si ti lai lo i, ralzaam pawl, ramdangmi pawl cu zaan suimilam 8:00 hnu ah a herh tuk mi thil (Emergency Case) dah ti lo ahcun leng chuahnak nawl a um ti lai lo tiah thawngthanhnak ah a langhter.
⠀
Khuate council ramri chung ah a um mi, tualchungmi a si lo mi pawl/ram dangmi pawl cu Village Council nih Register cazin chung ah ṭha tein cazin an lak lai tiah a chim.
⠀
Chungkhar poh nih man inn ah a phan mi khual pawl (India rammi a sinak t***e a ngei lo mi pawl) cu Village Council le YLA sin ah thawng an thanh hrimhrim lai i Village Council pawl zong nih a fek mi cazin an tuah hnu ah Register cauk cu ṭha tein an fim lai tiah a langhter.
⠀
Mah le umnak sang/khuate lei ah aa rak ṭhial ding mi pawl cu a luancia rak umnak khuapi/khuate/sang chung Village Council sin in ṭhialnak ca (Transfer Letter) an ngeih a herh i, cu ṭhialnak ca cu atu lio umnak hmunhma Village Council sin ah an langhter lai. Ṭhialnak ca ttete a tling lo mi pawl cu sang/khuate ṭuanvo ngeitu pawl nih a herh ning in an tawlrel lai tiah a langhter.
⠀
Hotel/Homestay rianṭuannak a tuah mi pawl nih an sin ah a riak mi pawl a aho dah an si ti fiangte in hngalh lo mi khual pawl cu riaknak nawl pek lo ding le a riak mi khual pawl sin in Voter ID Card, Aadhaar Card, Driving Licence t***e pawl an hal hna lai tiah an chim.
⠀
Cun, a riak mi le a chuak ṭhan mi pawl cu Register chung ah ṭha tein cazin an lak lai i Hotel/Homestay pakhat cio nih khual pawl he aa pehtlai mi zarh fatin cazin (Weekly Report) le aa pehtlai mi ca pawl cu Lawngtlai District Police Office (Superintendent of Police, Lawngtlai) sin ah an langhter lai tiah thawng theih a si.
⠀
Lawngtlai pengkomh hi Mizoram ramkulh chung ah a pahnihnak Myanmar ram in ralzaam pawl a tam bik an umnak hmunhma a si.
⠀
Cu hlei ah Lawngtlai pengkomh hi Chin ramkulh Paletwa peng tan in, Rakhine ramkulh lei ah India thilri pawl a hrampi phorhnak lampi a si ca ah nifatin Myanmar lei in a lutchuak mi an tam chin hlei ah, Lawngtlai pengkomh chung ah inn hlan in a um mi an tam chin ca ah atu bantuk in an fehter hi a si kho tiah thawng theih a si.
⠀
Hmanthlak: Lawngtlai pengkomh uktu bawi Pu Donny Lalruatsanga. (Hmanthlak - CJ)

Address

Sangau, Lawngtlai District
Lawngtlai
796810

Website

Alerts

Be the first to know and let us send you an email when The Chinland Post posts news and promotions. Your email address will not be used for any other purpose, and you can unsubscribe at any time.

Contact The Business

Send a message to The Chinland Post:

Shortcuts

Share

Category