15/09/2025
#মাজুলী_ডায়েৰী: ১৫ ছেপ্টেম্বৰ:
নামনি মাজুলীৰ গোৱালগাঁও তৰুণ নাট্য সমাজৰ প্ৰেক্ষাগৃহত দুদিনীয়া কাৰ্যসূচীৰে অনুষ্ঠিত হোৱা অসমৰ অগ্ৰণী মহিলা সংগঠন "সাতসৰী - সামাজিক সাংস্কৃতিক উন্নয়ন সংস্থা'- অসম" ৰ ২৪ সংখ্যক প্ৰতিষ্ঠা দিৱস দেওবাৰে সফলতাৰে সামৰণি পৰে । মাজুলী জিলা সাতসৰী আশাপূৰ্ণা শাখাৰ সহযোগত অনুষ্ঠিত হোৱা এই কাৰ্যসূচীত সদৌ অসম ভিত্তিত মহিলাসকলৰ মাজত দলীয় বিয়া নাম প্ৰতিযোগিতা অনুষ্ঠিত হয়। ৰাজ্যৰ ভিন্ন প্ৰান্তৰ ২২ টা নিৰ্বাচিত বিয়ানামৰ দলে প্ৰতিযোগিতাখনিত অংশগ্ৰহণ কৰে। এই বিয়ানাম প্ৰতিযোগিতাত জাউৰীয়ে জাউৰীয়ে বিয়া নাম, উৰুলি, জোৰা নাম, জোৰোণৰ নাম, সুৱাগ তোলা নাম, আখৈ দিয়া নাম, গাঁথিয়ন খুন্দা নাম আদি পৰিৱেশন কৰি অনুষ্ঠানটি মুখৰিত কৰি তোলে।
প্ৰতিষ্ঠা দিৱসত আৰ্ট অৱ লিভিঙৰ জৰিয়তে এটা চিকিৎসা শিবিৰ অনুষ্ঠিত হয় । কালি মুকলি সভাত শিশু আলোচনী " শিশু সম্ভাৰ" উন্মোচন কৰাৰ লগতে ডা০ বীণা পাত্ৰ সাতসৰী সংগীত সাধনা বঁটা -২০২৫ প্ৰদান কৰে মাজুলীৰ বিশিষ্ট লোক শিল্পী বিষ্ণু দাসক। অনুষ্ঠানটিত সাতসৰী আশাপূৰ্ণা শিল্পী সমাজে "শোণিত কুঁৱৰী" নাটকখনি মঞ্চস্থ কৰে ।
