18/05/2025
മൂരാട് നടന്ന അപകടത്തിൻ്റെ പശ്ചാത്തലത്തിൽ ചില കാര്യങ്ങൾ ശ്രദ്ധയിൽപ്പെടുത്തുകയാണ്. പുതിയ ആറുവരി പാത വരുന്നതോടെ നമ്മുടെ ഡ്രൈവിംഗ് രീതികളിൽ വലിയ മാറ്റങ്ങൾ വരുത്തേണ്ടതുണ്ട്.
മൂരാട് ബ്രദേഴ്സ് സ്റ്റോപ്പിലെ പെട്രോൾ പമ്പ് സ്ഥിതി ചെയ്യുന്നത് റോഡിൻ്റെ പടിഞ്ഞാറ് ഭാഗത്താണ്. കോഴിക്കോട് ഭാഗത്തേക്ക് യാത്ര ചെയ്യുന്ന വാഹനങ്ങൾക്ക് ഈ പമ്പിലേക്ക് റോഡിൽ നിന്ന് നേരിട്ട് പ്രവേശിക്കാൻ സാധിക്കില്ല. അവർ മുന്നോട്ട് പോയി, എതിർവശത്തെ റോഡിൽ കയറി, തിരിഞ്ഞു വരണം. ഇന്ധനം നിറച്ച ശേഷം, പിന്നോട്ട് പോയി കിഴക്ക് ഭാഗത്തുള്ള റോഡിലേക്ക് വീണ്ടും പ്രവേശിക്കണം.
രണ്ടു റോഡുകൾക്കുമിടയിൽ വലിയ ദൂരത്തിൽ ഡിവൈഡർ ഉണ്ടെന്നുള്ള കാര്യം ശ്രദ്ധിക്കാതെ, എളുപ്പത്തിൽ മറ്റേ റോഡിലേക്ക് പ്രവേശിക്കാമെന്ന് കരുതിയായിരിക്കാം ചില ഡ്രൈവർമാർ തെറ്റായ ദിശയിലേക്ക് വാഹനമോടിക്കുന്നത്.
കൂടാതെ, അഴിയൂരിൽ നിന്ന് കോഴിക്കോട്ടേക്ക് യാത്ര ചെയ്യുന്ന ഒരാൾ, അടുത്തുള്ള മാഹിയിലോ, കിഴക്ക് ഭാഗത്ത് റോഡിനോട് ചേർന്നു തന്നെയുള്ള അയനിക്കാടോ പയ്യോളിയോ പോലുള്ള സ്ഥലങ്ങളിലെ പമ്പുകളിൽ നിന്ന് ഇന്ധനം നിറക്കാതെ, വിലയിൽ വ്യത്യാസമുണ്ടായിട്ടുപോലും ഇത്രയധികം ബുദ്ധിമുഞ്ഞ് പടിഞ്ഞാറ് ഭാഗത്തുള്ള പമ്പിൽ എത്തിയതിൻ്റെ കാരണം വ്യക്തമല്ല. ഒരുപക്ഷേ ഇന്ധനം നിറക്കാൻ കയറിയതാണോ അതോ മറ്റെന്തെങ്കിലും ആവശ്യത്തിനുവേണ്ടിയായിരുന്നോ എന്നും ഉറപ്പില്ല. ഈ സാഹചര്യത്തിൽ, ഡ്രൈവർക്ക് ആ പ്രദേശത്തെ റോഡിൻ്റെ ഘടനയെക്കുറിച്ച് ഒട്ടും ധാരണയില്ലായിരുന്നു എന്ന് അനുമാനിക്കേണ്ടിവരും.
ട്രാഫിക് നിയമങ്ങൾ പാലിക്കേണ്ടതിൻ്റെ പ്രാധാന്യം ഇനിയെങ്കിലും മലയാളികൾ മനസ്സിലാക്കണം:
പുതിയ ആറുവരി പാത യാഥാർത്ഥ്യമാകുമ്പോൾ, വാഹനമോടിക്കുന്ന എല്ലാവരും ട്രാഫിക് നിയമങ്ങളെക്കുറിച്ച് കൂടുതൽ ബോധവാന്മാരായിരിക്കണം. ഓരോ റോഡിൻ്റെയും ദിശ, പ്രവേശന മാർഗ്ഗങ്ങൾ, വേഗത പരിധി തുടങ്ങിയ കാര്യങ്ങൾ ശ്രദ്ധിക്കുകയും പാലിക്കുകയും ചെയ്യേണ്ടത് അത്യാവശ്യമാണ്. അശ്രദ്ധമായ ഡ്രൈവിംഗും, റോഡിൻ്റെ ഘടനയെക്കുറിച്ചുള്ള അജ്ഞതയും അപകടങ്ങൾക്ക് കാരണമായേക്കാം. സുരക്ഷിതമായ യാത്രയ്ക്ക് ട്രാഫിക് നിയമങ്ങൾ പാലിക്കുക എന്നത് ഓരോ ഡ്രൈവറുടെയും കടമയാണ്. അനാവശ്യമായ അപകടങ്ങൾ ഒഴിവാക്കാനും സുഗമമായ ഗതാഗതത്തിനും ഇത് അനിവാര്യമാണ്.
