19/09/2026
സ്വാഭാവികമായ അഭിനയം കൊണ്ടും പകരം വെക്കാനില്ലാത്ത കഥാപാത്രങ്ങൾ കൊണ്ടും കാലങ്ങളായി മലയാളി പ്രേക്ഷകരുടെ മനസ് ഭരിക്കുന്ന മലയാളത്തിന്റെ പ്രിയപ്പെട്ട കാവ്യ മാധവന് ഇന്ന് നാൽപ്പത്തിരണ്ടാം പിറന്നാളാണ്. രാവിലെ മുതൽ സോഷ്യൽമീഡിയ മുഴുവൻ നടിയെ ഫോട്ടോകളും വീഡിയോകളും സഹപ്രവർത്തകരുടേയും ആരാധകരുടേയും വിഷസ് കൊണ്ടും നിറഞ്ഞിരിക്കുകയാണ്.
ശാലിനിയെപ്പോലെ തന്നെ മലയാളികളുടെ കൺമുന്നിൽ വളർന്ന് വന്ന അഭിനേത്രിയാണ് ഈ നീലേശ്വരംകാരി. ശാലീന സൗന്ദര്യം എന്നാൽ ഒരു കാലത്ത് കാവ്യയായിരുന്നു. വളരെ ചെറിയ പ്രായത്തിലാണ് മറ്റാർക്ക് ഇനിയൊരിക്കലും ചെയ്ത് ഫലിപ്പിക്കാൻ കഴിയാത്ത കഥാപാത്രങ്ങൾക്ക് കാവ്യ ജീവൻ നൽകിയത്. അതാർക്കും വിസ്മരിക്കാൻ സാധിക്കുന്ന ഒന്നല്ല.
അതുപോലെ തന്നെ സിനിമയിൽ വന്നകാലം മുതൽ നേട്ടങ്ങൾക്കൊപ്പം പല തരത്തിലുള്ള പ്രതിസന്ധികളേയും നടിക്ക് അതിജീവിക്കേണ്ടി വന്നിട്ടുണ്ട്. വിവാദങ്ങളും ഗോസിപ്പുകളും ഇന്നും താരത്തെ വിടാതെ പിന്തുടരുന്നുമുണ്ട്. എന്നാൽ ആരോപണങ്ങൾ വരുമ്പോൾ അതോർത്ത് വിഷമിച്ചിരിക്കാൻ തന്നെ സഹോദരൻ അനുവദിക്കാറില്ലെന്ന് പറയുകയാണ് കാവ്യ. വർഷങ്ങൾക്ക് മുമ്പ് അമൃത ടിവിക്ക് നൽകിയ അഭിമുഖത്തിലാണ് താാരം ഇക്കാര്യങ്ങൾ പറഞ്ഞത്.
ആര് എന്ത് പറഞ്ഞാലും നമുക്ക് ഉള്ളിൽ കുറ്റബോധം വരാതെ നോക്കിയാൽ മതിയെന്ന് നടി പറയുന്നു. എന്റെ ചേട്ടൻ പുറത്ത് പോയി പഠിച്ച ആളൊക്കെയാണെങ്കിലും പക്ക നാട്ടിൻപ്പുറത്തുകാരനാണ്. ചേട്ടനെ ഞാൻ അവൻ, നീ എന്നൊക്കെയാണ് വിളിക്കാറ്. അങ്ങനൊരു റിലേഷനാണ് ഞങ്ങൾക്കിടയിൽ. കൂടുതലായും ആരോടെങ്കിലും മിണ്ടുന്നത് കണ്ടാൽ ചേട്ടൻ ദേഷ്യപ്പെടും. പൊസസീവ്നെസ്സിന്റെയല്ല.
പെൺകുട്ടികളായാൽ അടക്കവും ഒതുക്കവും വേണം, ഒരുപാട് സംസാരിക്കരുത് എന്നൊക്കെയുള്ള ചിന്താഗതിയാണ്. അതുപോലെ സിംപിൾ ലുക്കിൽ പെൺകുട്ടികൾ നടക്കുന്നതാണ് ഇഷ്ടം. ലിപ് ലൈനർ ഇട്ടാൽ പോലും ഇതൊക്കെ എന്തിനാണ് ഇടുന്നതെന്ന് ചോദിക്കും. പക്ഷെ എനിക്ക് എതിരെയുള്ള ആരോപണങ്ങൾ ശ്രദ്ധയിൽപ്പെട്ടാൽ അതിന് എന്താണ് എന്നാണ് ചോദിക്കുക. നീ എന്തിനാണ് വിഷമിക്കുന്നതെന്ന് ചോദിക്കും. നമ്മുടെ ഉള്ളിൽ കുറ്റബോധം വരാതിരിക്കാൻ നോക്കണം. അത് വന്നാൽ പിന്നെ ഒന്നും ചെയ്യാൻ പറ്റില്ല.
എനിക്കൊപ്പം എന്റെ അച്ഛനും അമ്മയുമുണ്ട്. അവർക്ക് അറിയാം ഞാൻ എങ്ങനെയാണെന്നുള്ളത്. അതിനേക്കാൾ എനിക്ക് അറിയാം ഞാൻ എങ്ങനെയാണെന്നുള്ളത്. എല്ലാവരെ കൊണ്ടും നല്ലത് പറയിപ്പിക്കാൻ ഒരിക്കൽ പറ്റില്ലെന്നും കാവ്യ പറഞ്ഞു. ചൈൽഡിഷ് പെരുമാറ്റം കൊണ്ട് പക്വതയില്ലാത്ത പെൺകുട്ടിയെന്ന ഇമേജ് കാവ്യയ്ക്ക് സഹപ്രവർത്തകർ തന്നെ നൽകിയിട്ടുണ്ട്.
നീ പൊട്ടിയായി അഭിനയിക്കുകയല്ലേയെന്ന് അടുത്തറിയാവുന്നവർ പോലും തന്നോട് ചോദിച്ചിട്ടുണ്ടെന്നും കാവ്യ പറയുന്നു. അഭിനയത്തെ ഞാൻ സീരിയസായി കണ്ട് തുടങ്ങി. പൊതുവെ ബാലതാരമായി അഭിനയിക്കുന്നവർക്ക് നായികയായി അരങ്ങേറും മുമ്പ് ഒരു ഗ്യാപ് എല്ലാവർക്കും വരും. എനിക്ക് അതും വന്നിട്ടില്ല. എട്ടാം ക്ലാസ് കഴിയും വരെ ഞാൻ ബാലതാരമായി അഭിനയിച്ചു. ഒമ്പതാം ക്ലാസിൽ പഠിക്കുമ്പോൾ നായികയുമായി.
അഴകിയ രാവണനും ചന്ദ്രനുദിക്കുന്ന ദിക്കിലും തമ്മിൽ മൂന്ന് വർഷത്തെ ഗ്യാപ്പെയുള്ളുവെന്ന് പറഞ്ഞാൽ ആരെങ്കിലും വിശ്വസിക്കുമോ. ഞാൻ വളർന്നതും പെട്ടന്നായിരുന്നു. കളിച്ച് നടക്കേണ്ട പ്രായത്തിൽ എനിക്ക് അത് സാധിച്ചില്ല. ഞാൻ ജോലി ചെയ്യുകയായിരുന്നു. പത്ത് വയസ് മുതൽ ജോലി ചെയ്യുന്നു. എന്നെ ചെറുപ്പം മുതൽ കാണുന്നവർ ചോദിക്കാറുണ്ട് നീ പൊട്ടിയായി അഭിനയിക്കുകയല്ലേയെന്ന്.
എന്നെ ആളുകൾ പൊട്ടിയും മദ്ധബുദ്ധിയുമായി കരുതണമെന്ന് ആരെങ്കിലും ആഗ്രഹിക്കുമോ?. ആ ഇമേജ് കൊണ്ട് എനിക്കൊരു ഗുണമുണ്ട്. ധൈര്യത്തിൽ എന്തും പറയാം. എനിക്ക് അബദ്ധം പറ്റിയാലും ക്ഷമിക്കാൻ ആളുകൾക്ക് തോന്നും. അതുപോലെ ചില സമയത്ത് ആരാധകരുടെ പെരുമാറ്റം കാരണം ഞാൻ കരഞ്ഞിട്ടുണ്ട്. അമ്പലത്തിൽ തൊഴുതുകൊണ്ട് നിൽക്കുമ്പോൾ ഒരു അമ്മ വന്ന് മുടി വെട്ടിയതിന് എന്റെ കവിളിൽ പിച്ചി. എന്റെ കണ്ണിൽ നിന്നും വെള്ളം വന്നു. ഉപദ്രവിച്ചിട്ടാണോ സ്നേഹം കാണിക്കുന്നത്?. ഞാൻ അങ്ങനെ ചെയ്യാറില്ലെന്നും കാവ്യ പറഞ്ഞു.
