06/02/2026
പുതിയ ഒരു ഡിസൈനുമായി ടൊയോട്ട കമ്പനിയെ സമീപിച്ച മെക്കാനിക്കിനെ അവർ തിരസ്കരിച്ചു, അതിന്റെ പ്രതികാരത്തിനായി ആ മെക്കാനിക് തുടങ്ങിയ കമ്പനിയാണ് ഹോണ്ട,
മോട്ടിവേഷണൽ സ്പീക്കർമാർ പലപ്പോഴും പറയുന്ന കഥയാണ്, എന്നാൽ ഇതിന്റെ പകുതി മാത്രമാണ് സത്യം.
1930 കളിൽ piston rings നിർമ്മിക്കുന്ന ഒരു ചെറിയ കമ്പനി ആയിട്ടാണ് Tokai Seiki പ്രവർത്തനം ആരംഭിക്കുന്നത്. അദ്ദേഹം തന്റെ piston rings ആയിട്ട് ടോയോട്ട കമ്പനിയെ സമീപിച്ചു,
എന്നാൽ അവരുടെ പരിശോധനയിൽ തങ്ങൾക്ക് വേണ്ട ക്വാളിറ്റി ഇല്ല എന്ന് കണ്ടതിനാൽ അവർ അദ്ദേഹത്തിന്റെ അടുത്ത് നിന്ന് അവ വാങ്ങാൻ തയ്യാറായില്ല.
ഇതിന്റെ പേരിൽ ഈഗോ കയറി അദ്ദേഹം അടുത്ത ദിവസം പോയി ആരംഭിച്ച കമ്പനി ഒന്നുമല്ല ഹോണ്ട, അദ്ദേഹം നേരെ പോയത് തന്റെ piston rings എങ്ങനെ ക്വാളിറ്റി കൂട്ടി നിർമ്മിക്കാം എന്ന് പഠിക്കാൻ വേണ്ടിയാണ്.
ഏതാണ്ട് 2 വർഷം അദ്ദേഹം metallurgy ആയിട്ട് ബന്ധപ്പെട്ട കോഴ്സ് ഒരു സ്ഥാപനത്തിൽ പോയി പഠിച്ചു, അദ്ദേഹത്തിന്റെ ലക്ഷ്യം ടോയോട്ടയേ മത്സരിച്ച് തോൽപ്പിക്കണം എന്നല്ല മറിച്ചു അവർ വാങ്ങുന്ന രീതിയിൽ തന്റെ പ്രോഡക്റ്റ് മികച്ചത് ആക്കണം എന്നതായിരുന്നു.
അങ്ങനെ അദ്ദേഹത്തിന്റെ രണ്ടാമത്തെ ശ്രമം വിജയം കണ്ടു, ടൊയോട്ട അദ്ദേഹത്തിന്റെ കയ്യിൽ നിന്ന് പ്രോഡക്റ്റ് വാങ്ങുക മാത്രമല്ല അദ്ദേഹത്തിന്റെ പരിശ്രമവും സ്വയം മെച്ചപ്പെടാനുള്ള മനസും ഒക്കെ കണ്ട് അദ്ദേഹത്തിന്റെ കമ്പനിയിൽ നിക്ഷേപം നടത്തിക്കൊണ്ട് പാർട്ണർ ആയി.
എന്നാൽ രണ്ടാം ലോകമഹായുദ്ധത്തിൽ ബോംബ് വീണു അവരുടെ ഫാക്ടറി ഏതാണ്ട് പൂർണ്ണമായും തകർന്ന് പോയി.
ഓരോ പരാജയങ്ങളും ഒന്നിന്റെയും അവസാനമല്ല അത് കൂടുതൽ മെച്ചപ്പെട്ട അവസരങ്ങളുടെ തുടക്കമാണ് എന്നറിയാവുന്ന ഹോണ്ട അവിടെയും പകച്ചില്ല,
തകർന്ന ഫാക്ടറി ഏറ്റെടുക്കാൻ ടോയോട്ട തയ്യാറായപ്പോൾ അദ്ദേഹം അതിന് തയ്യാറായി. അതുവഴി ലഭിച്ച തുകകൊണ്ട് അദ്ദേഹം പുതിയ വഴി തിരയാൻ തുടങ്ങി.
ലോകമഹായുദ്ധത്തിൽ തകർന്ന ജപ്പാനിൽ ചെലവ് കുറഞ്ഞ യാത്ര മാർഗ്ഗങ്ങൾക്ക് വേണ്ടി ആളുകൾ ശ്രമിക്കുന്നത് അദ്ദേഹത്തിന്റെ ശ്രദ്ധയിൽ പെട്ടു,
അതിന് അദ്ദേഹത്തിന്റെ കയ്യിൽ ഒരു ആശയം ഉണ്ടായിരുന്നു, സൈക്കിളുകളിൽ മോട്ടോർ ഘടിപ്പിക്കുക, അതിനായി സൈന്യം ഉപയോഗിച്ച് ഉപേക്ഷിച്ച ജനറേറ്റർ എഞ്ചിനുകൾ ഉപയോഗിക്കുക.
ആ പരീക്ഷണം അധികം വൈകാതെ വിജയം കണ്ടു, അങ്ങനെ 1948 സെപ്റ്റംബർ 24 ന് ഹോണ്ട മോട്ടോർ കമ്പനി നിലവിൽ വന്നു. 1949 ൽ പൂർണ്ണമായും സ്വന്തം ഫാക്ടറിയിൽ നിർമ്മിച്ച അവരുടെ ആദ്യത്തെ മോട്ടോർ ബൈക്ക് പുറത്തിറങ്ങി.
അവിടെ നിന്ന് കമ്പനി അതിവേഗം വളർന്നു, 1958 ൽ Honda Super Cub എന്നൊരു മോഡൽ അവതരിപ്പിച്ചു. ആർക്കും വളരെ എളുപ്പത്തിൽ ഉപയോഗിക്കാൻ കഴിയുന്ന ലളിതമായ പ്രവർത്തനം ഉള്ള ഇരുചക്ര വാഹനം - ഇതായിരുന്നു ആ മോഡലിന്റെ പ്രിത്യേകത.
ക്ലച് ആവശ്യമില്ലാതെ കാൽ കൊണ്ട് ഗിയർ മാറാൻ കഴിയുന്ന സെമി ഓട്ടോമാറ്റിക് ഗിയർ സംവിധാനമായിരുന്നു അതിൽ അവർ അവതരിപ്പിച്ചത്. സ്ഥാപകനായ Soichiro Honda യുടെ ബിസിനസ്സ് പാർട്ണർ ആയ Fujisawa ആയിരുന്നു ഈ ആശയത്തിന്റെ പിന്നിൽ,
നൂഡിൽസ് ഡെലിവറിക്ക് വേണ്ടി പോകുന്ന ആളുകൾക്ക് ഒരു കൈ കൊണ്ട് വാഹനം ഓടിക്കുകയും മറ്റേ കൈ ഉപയോഗിച്ച് നൂഡിൽസ് ഉള്ള ട്രേ പിടിക്കാനും പറ്റണം, ഇതായിരുന്നു അദ്ദേഹത്തിന്റെ ആശയത്തിന്റെ പിന്നിലെ ആവശ്യം.
അത് ക്ലിക്ക് ആകുകയും ഒരുപാട് ഓർഡർ കമ്പനിക്ക് ലഭിക്കുകയും ചെയ്തു,
എന്തിനേറെ പറയണം ലോകത്ത് ഇതുവരെ ഏറ്റവും കൂടുതൽ വിട്ടുപോയ ഇരുചക്ര വാഹനം ഇത് തന്നെയാണ്, ഏതാണ്ട് 10 കോടിക്ക് മുകളിൽ എണ്ണം വിറ്റ് പോയിട്ടുണ്ട്.
1959 ൽ അമേരിക്കൻ മാർക്കറ്റിൽ ഈ മോഡൽ ഹോണ്ട അവതരിപ്പിച്ചു, എന്നാൽ ഭാരം കൂടിയ വലിയ ബൈക്ക് കണ്ട് ശീലിച്ച അമേരിക്കൻ ജനതക്ക് ഈ കുഞ്ഞൻ ബൈക്ക് അത്രക്ക് അങ്ങ് ഇഷ്ടമായില്ല.
ഹോണ്ട വെറുതെ ഇരുന്നില്ല, You Meet the Nicest People on Honda എന്നൊരു ക്യാമ്പയിൻ വഴി ചെറിയ വാഹനം ഉപയോഗിക്കുന്നതിന്റെ ഗുണങ്ങൾ ഉപഭോക്താകളിലേക്ക് എത്തിക്കാൻ അവർക്ക് കഴിഞ്ഞു.
Super Cub അമേരിക്കയിൽ ഹിറ്റ് ആകുക മാത്രമല്ല ചെയ്തത് അവരുടെ കാഴ്ചപ്പാട് തന്നെ മാറ്റിമറിച്ചു. വലിയ ബൈക്കുകൾ ഉപേക്ഷിച്ചു കൊണ്ടുനടക്കാൻ എളുപ്പമുള്ള കുഞ്ഞൻ ബൈക്കുകളെ അവർ ഇരുകൈയും നീട്ടി സ്വീകരിച്ചു. 1963 ആയപ്പോഴേക്കും അമേരിക്കയിൽ മറ്റെല്ലാ കമ്പനികൾ വിൽക്കുന്ന എണ്ണം ഒരുമിച്ചു കൂട്ടിയാൽ പോലും ഹോണ്ടയുടെ കച്ചവടത്തിനു ഒപ്പം എത്താൻ കഴിയില്ല എന്ന അവസ്ഥയിലേക്ക് എത്തി.
അതോടെ കമ്പനി പുതിയ മേഖലയിലേക്ക് ചുവട് വച്ചു, T360 എന്ന മിനി ട്രക്ക്, S500 എന്ന സ്പോർട്സ് കാർ നിർമ്മിച്ചുകൊണ്ട് കാറുകളുടെ നിർമ്മാണം ആരംഭിച്ചു. 1972 ൽ Civic, 1976 ൽ Accord എന്നീ മോഡലുകൾ അവതരിപ്പിച്ചതോടെ കാർ വിപണിയിലും ഹോണ്ട തരംഗമായി.
1986 ൽ Acura എന്ന പേരിൽ ആഡംബര ബ്രാൻഡ് കൂടി അവർ ആരംഭിച്ചു. പിന്നീട് മറ്റു മേഖലയിലേക്ക് കൂടി പറന്നു കയറുന്ന ഹോണ്ടയെ ആണ് കാണാൻ കഴിയുന്നത്. 2000 ത്തിൽ ASIMO എന്ന പേരിൽ ഒരു ഹ്യൂമനോയ്ഡ് റോബോട്ടിനെ നിർമ്മിച്ചു ശാസ്ത്രലോകത്തെയും ഹോണ്ട ഞെട്ടിച്ചു.
ഇന്ന് ഹോണ്ട എന്നാൽ ഏറെ ജനപ്രിയ വാഹനങ്ങൾ നിർമ്മിക്കുന്ന, ടൊയോട്ടയുടെ ഒപ്പം നിൽക്കുന്ന കമ്പനിയാണ്.
ഇനി നമ്മൾക്ക് ഒന്ന് തിരിച്ചു പോകാം, ആദ്യത്തെ piston rings ഓർഡർ നല്കാത്തതിന്റെ പേരിൽ അല്ല ഹോണ്ട കമ്പനി ആരംഭിച്ചത്.
ബിസിനസ്സ് എന്നാൽ ഈഗോ അല്ലെങ്കിൽ വാശിപ്പുറത്തു ചെയ്യാൻ കഴിയുന്ന ഒന്നല്ല, ടൊയോട്ട നിരസിച്ചപ്പോൾ അവരോട് പ്രതികാരം ചെയ്യാൻ അല്ല അദ്ദേഹം ശ്രമിച്ചത്, തനിക്ക് എങ്ങനെ മെച്ചപ്പെടാൻ കഴിയുമെന്നും അങ്ങനെ അവരുടെ അടുത്ത് നിന്ന് ഓർഡർ നേടിയെടുക്കണം എന്നുമായിരുന്നു അദ്ദേഹത്തിന്റെ വാശി.
അതിൽ അദ്ദേഹം വിജയിച്ചു, എന്നാൽ ആ ഫാക്ടറി യുദ്ധത്തിൽ തകർന്നപ്പോൾ എല്ലാം നഷ്ടപ്പെട്ടു എന്ന നിരാശയിലേക്കും അദ്ദേഹം പോയില്ല, സംഭവിച്ചത് സംഭവിച്ചു, അവിടെ നിന്ന് തനിക്ക് ഇനി എന്ത് ചെയ്യാൻ കഴിയുമെന്നാണ് അദ്ദേഹം ചിന്തിച്ചത്.
ഹോണ്ട എന്ന കമ്പനി ഇന്ന് കാണുന്ന നിലയിൽ ആയത് ഇദ്ദേഹഹത്തിന്റെ ഈ തുറന്ന മനസ് ഒന്നുകൊണ്ടു മാത്രമാണ്.
Courtesy
