మంగళగిరి వైభవం

23/04/2025

08/12/2024

వైభవంగా దామర్ల వారి వనసమారాధన

ఆత్రేయ మహర్షి గోత్రీకులైన దామర్ల వంశీకుల వనసమారాధన మహోత్సవం ఆదివారం పెదవడ్లపూడి సమీపంలోని గోలి నాగశయనరావు తోటలో ఘనంగా జరిగింది. ఆహ్లాదకర వాతావరణంలో జరిగిన ఈ వేడుకల్లో దామర్ల కుటుంబ సభ్యులు పెద్ద సంఖ్యలో హాజరై రోజంతా ఉల్లాసంగా ఉత్సాహంగా గడిపారు. తొలుత అర్చక స్వాములు తోట ప్రాంగణంలో మహిళలచే శాస్త్రోక్తంగా పూజలు నిర్వహించారు. దామర్ల ఫౌండేషన్ ఆధ్వర్యంలో దామర్ల ప్రముఖులను ఘనంగా సన్మానించారు. చిన్నారులు ప్రదర్శించిన సాంస్కృతిక కార్యక్రమాలు అలరించాయి. అనంతరం తోటలో సహపంక్తి భోజనాలను ఆచరించారు. మహిళలు, చిన్నారులకు వివిధ రకాల ఆటల పోటీలు నిర్వహించి బహుమతులను అందజేశారు. తొలుత ఇటీవల కాలం చేసిన దామర్ల కుటుంబ పెద్దల మృతిపట్ల సంతాపం తెలిపారు. ఈ కార్యక్రమంలో దామర్ల ఫౌండేషన్ ప్రతినిధులు పాల్గొన్నారు.

21/10/2024

బిందె పానకం రూ.30కే...

* మంగళాద్రి క్షేత్రంలో నూతన విధానం
* తయారీ బాధ్యతలు అక్షయ పాత్ర సంస్థకు
* మంత్రి నారా లోకేష్ సూచనతో దేవాదాయ శాఖ నిర్ణయం
* దశాబ్దాలుగా కొనసాగుతున్న దోపిడీకి అడ్డుకట్ట

29/04/2024

నిర్ణయం ‘ఆమె’దే...

* మంగళగిరిలో అతివల ఓట్లే అధికం
* నియోజకవర్గ ఓటర్లు 2,92,432
* పురుషులు 1,40,660.. మహిళలు 1,51,759
* ఓటర్ల తుది జాబితా విడుదల
* జిల్లాలో మంగళగిరి ఓటర్లే అత్యధికం

సార్వత్రిక సమరంలో ఓటు హక్కు వినియోగించుకునే వారి సంఖ్య లెక్క తేలింది. తుది జాబితాను ఎన్నికల సంఘం విడుదల చేసింది. విభజిత గుంటూరు జిల్లాలోని ఏడు నియోజకవర్గాలతో పోలిస్తే మంగళగిరి అసెంబ్లీ నియోజకవర్గం (2,92,432) లోనే ఓటర్లు అత్యధికంగా వున్నారు. ఆ తరువాతి స్థానాల్లో వరుసగా గుంటూరు పశ్చిమ (2,78,158), ప్రత్తిపాడు (2,67,888), తెనాలి (2,67,624), గుంటూరు తూర్పు (2,50,691), పొన్నూరు (2,27,135), తాడికొండ (2,07,615) వున్నాయి. ఈ ఏడాది జనవరి 22న విడుదల చేసిన తుది ఓటర్ల జాబితా తరువాత వచ్చిన క్లయిమ్‌లను పరిష్కరించి, కొత్త వారికి ఓటు హక్కు అవకాశం కల్పిస్తూ తుది జాబితాను ఆదివారం విడుదల చేశారు. జనవరిలో విడుదల చేసిన జాబితాతో పోలిస్తే ప్రస్తుత తుది జాబితాలో 3,354 మంది అదనంగా చేరారు. మంగళగిరిలో పురుషుల కంటే మహిళా ఓటర్లే అధికంగా వున్నారు. మంగళగిరి నియోజకవర్గానికి సంబంధించి మంగళగిరి రూరల్‌ మండలంలో అత్యధిక ఓట్లు నమోదు కాగా, తాడేపల్లి రూరల్‌ మండలంలో అత్యల్పంగా ఓట్లు నమోదయ్యాయి. నియోజకవర్గంలోని తాడేపల్లి అర్బన్, రూరల్‌, మంగళగిరి అర్బన్, రూరల్‌, దుగ్గిరాల మండలాల్లో అన్నిచోట్లా పురుషుల కంటే మహిళా ఓటర్లే అధికంగా వున్నారు. నియోజకవర్గంలో పురుషులు 1,40,660 మంది, మహిళలు 1,51,759 మంది, ఇతరులు 13 మందిని కలుపుకుని మొత్తం 2,92,432 మంది ఓటర్లు వున్నారు. పురుషుల కంటే మహిళలు 11,099 మంది ఎక్కువగా వున్నారు. దీంతో మే 13వ తేదీన జరిగే అసెంబ్లీ ఎన్నికల పోలింగ్‌లో మహిళల నిర్ణయమే కీలకంగా మారనుంది. అతివల మద్దతు ఎటువైపు మొగ్గుతుందో ఫలితాలు వెల్లడయ్యే వరకు వేచిచూడాల్సిందే!

-అన్వేష్

20/04/2024

జొన్నాదుల బాలకృష్ణ ఆధ్వర్యంలో ఘనంగా చంద్రబాబు జన్మదిన వేడుకలు

నరసింహస్వామి ఆలయంలో ప్రత్యేక పూజలు

టీడీపీ కేంద్ర కార్యాలయంలో 75 కిలోల కేకు కట్ చేసిన నేతలు

మంగళగిరి టీడీపీ యువనేత, పద్మశాలి సాధికార సమితి గుంటూరు పార్లమెంటు సభ్యుడు జొన్నాదుల బాలకృష్ణ ఆధ్వర్యంలో టీడీపీ జాతీయ అధ్యక్షులు, మాజీ ముఖ్యమంత్రి నారా చంద్రబాబు నాయుడు జన్మదినోత్సవ వేడుకలను శనివారం ఘనంగా నిర్వహించారు తొలుత ఉదయం మంగళగిరి శ్రీ లక్ష్మీ నరసింహ స్వామి దేవస్థానంలో ప్రత్యేక పూజలు చేశారు. శ్రీ లక్ష్మి నరసింహ స్వామి శ్రీ రాజ్యలక్ష్మి అమ్మవారి ఆలయాల్లో చంద్రబాబు పేరిట ప్రత్యేక పూజలు నిర్వహించి అనంతరం భక్తులకు తీర్థ ప్రసాదాలను పంపిణీ చేశారు. ఈ సందర్భంగా జొన్నాదుల బాలకృష్ణ మాట్లాడుతూ చంద్రబాబు ఇలాంటి పుట్టినరోజు వేడుకలు మరెన్నో జరుపుకోవాలని ఆకాంక్షించారు. చంద్రబాబుకు సంపూర్ణ ఆయురారోగ్యాలను ప్రసాదించాలని నరసింహస్వామిని వేడుకున్నట్టు చెప్పారు. అనంతరం బాలకృష్ణ ఆధ్వర్యంలో మంగళగిరి బైపాస్ రోడ్డు లోని తెలుగుదేశం పార్టీ కేంద్ర కార్యాలయంలో చంద్రబాబు పుట్టినరోజు వేడుకలు ఘనంగా నిర్వహించారు. బాలకృష్ణ ఆధ్వర్యంలో ప్రత్యేకంగా ఏర్పాటు చేసిన 75 కిలోల భారీ కేకును టీడీపీ పోలీట్ బ్యూరో సభ్యులు వర్ల రామయ్య కట్ చేసి చంద్రబాబుకు జన్మదిన శుభాకాంక్షలు తెలియజేశారు. ఆయా కార్యక్రమాల్లో టీడీపీ రాష్ట్ర నేతలు కొమ్మారెడ్డి పట్టాభిరామ్, కోనంకి గురుమూర్తి, మంగళగిరి నియోజకవర్గ సమన్వయకర్త నందం అబద్దయ్య, మంగళగిరి టీడీపీ నాయకులు, కార్యకర్తలు పెద్ద సంఖ్యలో పాల్గొన్నారు.

18/04/2024

మంగళగిరిలో తొలిరోజు 14 నామినేషన్లు

సార్వత్రిక ఎన్నికల సమరం మొదలైంది. గురువారం నోటిఫికేషన్ వెలువడిన వెంటనే నామినేషన్ల ఘట్టం ఆరంభమైంది. మంగళగిరి నియోజకవర్గ ఎన్నికల రిటర్నింగ్‌ అధికారి రాజకుమారి గణియా గురువారం ఉదయం సార్వత్రిక ఎన్నికల నోటిఫికేషన్ విడుదల చేశారు. అనంతరం నామినేషన్ల ప్రక్రియ ఆరంభం కాగా... మంగళగిరి అసెంబ్లీ స్థానానికి సంబంధించి తొలిరోజు పది మంది అభ్యర్థుల నుంచి 14 నామినేషన్లు దాఖలయ్యాయి. నవతరం పార్టీ తరపున రావు సుబ్రహ్మణ్యం రెండు సెట్లు, నవరంగ్‌ కాంగ్రెస్‌ పార్టీ తరపున షేక్‌ జలీల్‌, స్వతంత్ర అభ్యర్థి దానబోయిన వెంకట శివాజీ మూడు సెట్లు, భారత చైతన్య యువజన పార్టీ తరపున బోడె రామచంద్ర యాదవ్‌, స్వతంత్ర అభ్యర్థి బండ్ల బిక్షమయ్య, స్వతంత్ర అభ్యర్థిగా నైనాల లావణ్య, టీడీపీ అభ్యర్థి నారా లోకేష్ తరపున ఎన్డీఏ కూటమి నేతలు నందం అబద్దయ్య ఒక సెట్‌, వేమూరి మైనర్‌బాబు మరో సెట్‌, జైభీమ్‌ రావు భారత పార్టీ తరపున జడ శ్రావణ్‌కుమార్‌, తెలుగు రాజ్యాధికార సమితి పార్టీ తరపున జంజనం కోటేశ్వరరావు, స్వతంత్ర అభ్యర్థిగా జంజనం పద్మ నామినేషన్లు దాఖలు చేశారు.

18/04/2024

మంగళగిరిలో సార్వత్రిక ఎన్నికల నోటిఫికేషన్ విడుదల చేస్తున్న ఆర్వో రాజకుమారి